An Tawo nga Nahigugma han Kinabuhi Ngan mga Tawo

NATAPOS ni Daniel Sydlik—maiha na nga membro han Nagmamando nga Lawas han mga Saksi ni Jehova—an iya tunan-on nga kinabuhi han Martes, Abril 18, 2006. Otsenta-y-syete anyos hiya ngan nag-alagad sugad nga membro han pamilya han Bethel ha Brooklyn, New York, ha sulod hin haros 60 ka tuig.

Hi Bugto Dan, sugad han pag-agnay ha iya han mga duok ha iya, inabot ha Bethel han 1946. Antes hito, nag-alagad hiya sugad nga espesyal payunir ha California ngan napriso liwat durante han Girra ha Kalibotan II tungod han iya pagin neutral sugad nga Kristiano. An iya mga eksperyensya hito nga panahon detalyado nga iginhulagway ha istorya han iya kinabuhi ha The Watchtower han Hunyo 1, 1985, nga may ulohan nga “How Priceless Your Friendship, O God!”

Hi Bugto Sydlik kilala ha pagin natural ngan masayon madaop. Kon nagdudumara hiya hin morning worship ha pamilya han Bethel, an iya positibo nga disposisyon ngan gugma ha kinabuhi agsob nga iginpapahayag ha iya introduksyon: “Salamat nga buhi kita basi mag-alagad ha totoo ngan buhi nga Dios.” Sugad nga mamumulong, ini nga panlantaw igindadasig niya ha iba, nagpapahayag nga an mga tema sugad han “Malipayon an mga Tawo nga an Dios hi Jehova,” “Pagpakita han Kalipay ni Jehova,” “Tipigi nga Naglalaga an Kalayo han Espiritu han Dios,” ngan “Tiarabot Pa an Gimaopayi.”

Han 1970, ginkasal hira Bugto Sydlik ngan Marina Hodson nga tikang ha Inglatera, nga iya iginhulagway sugad nga “regalo han Dios.” Magkaupod nga nag-alagad hira kan Jehova ha sulod hin 35 ka tuig.

Durante han mga tuig niya ha Bethel, nagtrabaho hiya ha magkalain-lain nga departamento, upod na an imprintahan ngan an Writing Department. Nagtrabaho liwat hiya ha estasyon han radyo nga WBBR. Katapos han Nobyembre 1974, ginpili hiya nga magin membro han Nagmamando nga Lawas ngan ha urhi nagtrabaho ha Personnel ngan Writing nga mga komite

Ha sulod hin sobra 30 ka tuig, an daku nga gugma ha mga tawo ni Bugto Sydlik nakita ha iya trabaho ha Personnel Committee. Damu an iya nadasig pinaagi han iya bug-os nga tingog, pirme pinapabug-atan an aton presyoso nga pribilehiyo ha pag-alagad kan Jehova. Padayon nga ginpabug-atan niya nga an totoo nga kalipay nadepende, diri ha materyal nga mga butang, kondi ha aton relasyon kan Jehova ngan ha aton disposisyon ha kinabuhi.

Bisan kon ginmimingaw gud kan Bugto Sydlik an pamilya han Bethel, magpapabilin an iya susbaranan sugad nga usa nga nahigugma gud han kinabuhi ngan mga tawo. Nasarig kami nga usa hiya hadton ginhihisgotan ha Pahayag 14:13: “Bulahan an mga patay nga nagkamatay ha Ginoo tikang niyan: oo, siring han espiritu, basi nga hira magpakapahuway ha ira mga buhat; kay an ira mga buhat nanununod ha ira.”