An mga Nagradwar han Gilead Nakarawat hin Instruksyon nga Nakakabantad han Kasingkasing

HAN Septyembre 9, 2006, an gradwasyon han ika-121 nga klase han Watchtower Bible School of Gilead gindumara ha Watchtower Educational Center ha Patterson, New York. Makapadasig ito nga programa.

An programa gintikangan ni Geoffrey Jackson, usa nga membro han Nagmamando nga Lawas han mga Saksi ni Jehova, pinaagi ha pag-abiabi han 56 nga magradwar ngan han 6,366 nga mamarati tikang ha iba-iba nga nasud. Ginhisgotan niya an Salmo 86:11, nga nasiring: “Igtutdo ha akon an imo agian, O Jehova; maglalakat ako ha imo kamatuoran: pag-usaa an akon kasingkasing ha kahadlok han imo ngaran.” Iginpatin-aw ni Bugto Jackson an tulo nga punto nga ginpapabug-atan hito nga bersikulo. Hiya nagsiring: “Ha siyahan nga bahin, ginpapabug-atan an instruksyon; ha ikaduha, an aplikasyon; ngan ha ikatulo, an motibo. Importante ini nga tulo labi na ha iyo nga mga misyonero samtang makadto kamo ha iyo mga toka.” Katapos iginpakilala niya an sunod-sunod nga pahayag ngan interbyu nga magpapabug-at hini.

Makapadasig nga mga Instruksyon

Ginhisgotan ni William Malenfant, nagtatrabaho ha sentro nga opisina, an tema nga “An Gimaopayi nga Kinabuhi nga Posible.” Iya ginhisgotan an ehemplo ni Maria, an bugto ni Marta. Ha usa nga okasyon han binisita hi Jesus ha balay nira Maria, ginpili niya nga lumingkod ha tiilan ni Jesus basi mamati ha iya, ginhimo ito nga iya prayoridad. Hi Jesus nagsiring kan Marta: “Hi Maria nakagpili hin maopay nga bahin, nga diri makukuha tikang ha iya.” (Lukas 10:38-42) “Hunahunaa la ito,” siring han mamumulong. “Diri gud hingangalimtan ni Maria nga liningkod hiya ha tiilan ni Jesus ngan duok nga namati ha mag-opay nga espirituwal nga kamatuoran—tungod kay ginpili niya an maopay.” Katapos kumendasyonan an mga magradwar tungod han ira maopay nga mga pagpili, hiya nagsiring: “An iyo mga ginpili naggigiya ha iyo ha gimaopayi nga kinabuhi nga posible.”

Sunod ginhisgotan ni Anthony Morris, usa nga membro han Nagmamando nga Lawas, an tema nga “Igsul-ot Niyo an Ginoo Jesu-Kristo,” nga iginbasar ha Roma 13:14. Paonan-o naton mabubuhat ini? An pagsul-ot han Ginoo nga hi Jesu-Kristo nag-uupod han pagsubad han iya mga paggawi. Salit nangangahulogan ini hin pagsubad han susbaranan ngan disposisyon ni Jesus. “Komportable an mga tawo kan Jesus,” siring han mamumulong, “tungod kay may-ada hiya sinsero nga pagtagad ha ira, ngan inaabat nira ito.” Katapos ginhisgotan han mamumulong kon paonan-o nakakuha hin daku nga kahibaro an mga estudyante ha ira pag-eskwela ha Gilead ‘basi hisabtan an kahiluag, ngan kahilaba, ngan kahitaas, ngan kahilarom,’ han kamatuoran, sugad han siring han Efeso 3:18. Kondi iya ginpahinumdom hira mahitungod han bersikulo 19, nga nasiring: “Ngan pagkilala han gugma ni Kristo nga labaw ha ngatanan nga kinaadman.” Ginsagda ni Bugto Morris an mga estudyante: “Samtang nagpapadayon kamo ha iyo personal nga pag-aram, pamalandonga kon paonan-o niyo masusubad an mahigugmaon nga pagpaid ni Kristo ngan iyo gud ‘isul-ot an Ginoo nga hi Jesus-Kristo.’”

 Pangataposan nga Instruksyon Tikang ha mga Instruktor han Gilead

Hi Wallace Liverance, nga instruktor han Gilead, an sunod nga nagpahayag han tema nga iginbasar ha Proberbios 4:7. Hiya nagsiring nga bisan kon an diosnon nga kinaadman importante hinduro, kinahanglan liwat kita ‘kumuha hin sarabotan,’ nga nag-uupod hin pagtarampoha han iba-iba nga impormasyon ngan katapos usisahon kon ano an kalabotan hito ha usa kag usa basi hibaroan an kahulogan hito. Iginpakita han mamumulong nga an pagkaada hin sarabotan nagriresulta hin kalipay. Pananglitan, ha panahon ni Nehemia, an mga Lebihanon “nagpasabot ha mga tawo han balaud” ngan “hira nakasabot.” Katapos hito, an mga tawo nakaeksperyensya hin “daku nga kasadya, tungod kay hira nakasabot han mga pulong nga iginsaysay ha ira.” (Nehemia 8:7, 8, 12) Hi Bugto Liverance nagtapos: “An kalipay amo an resulta han pagsabot ha giniyahan nga Pulong han Dios.”

“Hin-o Gud ba an Imo Kaaway?” an tema nga ginhisgotan ni Mark Noumair, usa pa nga instruktor  ha Gilead. Ha girra, damu nga sundalo an namamatay tungod han diri tinuyo nga kaigo han mga bala han ira mga kaalyado. “Kumusta man an espirituwal nga away diin kaapi kita?” nagpakiana hiya. “Kon diri kita mabinantayon, bangin diri naton makilala kon hin-o an totoo nga kaaway ngan makasakit ha aton mga kaupod.” An kaawa magpapakuri han pagkilala kon hin-o an aton kaaway. Nakaaghat ito kan Hadi Saul nga mangalimbasog nga patayon hi David, nga iya igkasi-magsiringba, bisan kon ha pagkamatuod an mga Pilisteohanon an kaaway. (1 Samuel 18:7-9; 23:27, 28) Katapos an mamumulong nagpadayon: “Kumusta man kon igkaupod ka hin misyonero nga maopay gud ha damu nga paagi? Pauul-olan mo ba hiya pinaagi hin nakakasakit nga mga pulong, o mamurayawon nga kakarawaton mo nga malalabawan ka han iba ha magkalain-lain nga paagi? Kon pagkikinitaon naton an mga kaluyahan han iba bangin makawurok la ha aton kon hin-o gud an aton totoo nga kaaway. Atohi an totoo nga kaaway, hi Satanas.”

Makalilipay nga mga Eksperyensya Ngan Impormatibo nga mga Interbyu

An sunod nga bahin, “Buhata an Buruhaton han Ebanghelisador,” gindumara ni Lawrence Bowen, usa nga instruktor han Gilead, ngan may-ada ini mga interbyu ngan mga eksperyensya. An mamumulong nagsiring: “An siyahan nga buruhaton han usa nga misyonero nga ginbansay ha Gilead amo an pagpasamwak han maopay nga sumat, ngan nabuhat ini hini nga klase diin man hira makabiling hin mga tawo.” Iginpasundayag an aktuwal nga nahitabo ha pipira nga mag-opay nga eksperyensya.

An duha nga bahin han sunod nga programa gindumara nira Michael Burnett ngan Scott Shoffner, nga mga membro han pamilya han Bethel. Nag-interbyu hira hin mga membro han Komite han Sanga tikang ha Australia, Barbados, Korea, ngan Uganda. An mga komento han mga membro han komite nagpakita nga ginpapangalimbasogan gud an pag-ataman ha mga panginahanglan han mga misyonero, upod na an paghatag ha ira hin maopay nga urukyan ngan pag-ataman han kahimsog. Iginpatin-aw han mga membro han komite nga an malampuson nga mga misyonero andam magpahiuyon ha lokal nga mga kahimtang.

Makapadasig Ngan Makapaaghat nga Konklusyon

An nangunguna nga pahayag han programa amo an “Kahadluki an Dios Ngan Tagi Hiya hin Himaya,” nga iginpresenta ni John E. Barr, usa nga maiha na nga membro han Nagmamando nga Lawas. Iya ginhisgotan an Pahayag 14:6, 7, nga mababasa: “Hinkit-an ko in lain nga anghel nga naglulupadlupad ha ginkakatungaan han langit, nga may-ada waray kataposan nga maopay nga sumat nga igwawali ngadto hadton mga nag-uukoy ha tuna, ngan ha ngatanan nga nasud ngan panon, ngan yinaknan ngan katawohan; ngan nasiring hiya ha daku nga tingog: Kahadluki niyo an Dios, ngan tagi hiya niyo hin himaya; kay an oras han iya paghukom iini na.”

Ginsagda ni Bugto Barr an mga estudyante nga hinumdoman an tulo nga butang may kalabotan hito nga anghel. Siyahan, kinahanglan niya ipasamwak an waray kataposan nga maopay nga sumat nga hi Kristo nagmamando na yana nga may bug-os nga awtoridad ha Ginhadian. An mamumulong nagsiring: “Kombinsido gud kita nga nahitrono na hiya han 1914. Salit ini nga makalilipay nga sumat kinahanglan ipasamwak ha bug-os nga tuna.” Ikaduha, an anghel nagsiring: ‘Kahadluki an Dios.’ Iginsaysay han mamumulong nga kinahanglan buligan han mga naggradwar an ira mga estudyante ha Biblia nga magkaada hilarom nga pagtahod ha Dios basi diri makabuhat hin bisan ano nga makakapasubo ha iya. Ikatulo, an anghel nagsugo: ‘Tagi an Dios hin himaya.’ “Ayaw hingalimti,” iya ginsagda an mga estudyante, “nga nag-aalagad kita para ha himaya han Dios, diri para ha aton.” Katapos ha paghisgot mahitungod han ‘oras han paghukom,’ hi Bugto Barr nagsiring: “Gutiay na la nga oras an nahibibilin ngan ipapahibaro na an ultimo nga paghukom. Damu ha aton mga teritoryo an kinahanglan pa gihapon makabati han mensahe han maopay nga sumat antes maurhi na hinduro.”

Samtang ini nga mga pulong padayon nga ginhuhunahuna han 56 nga nagradwar, hira gintagan han ira diploma ngan iginpadara ha mga sidsid han tuna. An kasingkasing han mga naggradwar ngan han ngatanan nga tinambong nabantad gud han makapaaghat nga sagdon nga ira nakarawat durante hiton makalilipay nga adlaw.

[Kahon ha pahina 17]

ESTADISTIKA HAN KLASE

Kadamu han nasud nga ginrepresentaran: 6

Kadamu han nasud nga gintokahan: 25

Kadamu han estudyante: 56

Aberids nga edad: 35.1

Aberids nga mga tuig ha kamatuoran: 18.3

Aberids nga mga tuig ha bug-os-panahon nga ministeryo: 13.9

[Retrato ha pahina 18]

Ika-121 nga Naggradwar nga Klase han Watchtower Bible School of Gilead

Ha lista ha ubos, an mga rumbay may numero tikang ha unahan tipaluyo, ngan an mga ngaran iginlista tikang ha wala tipatoo ha kada rumbay.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.