Kalamposan—Ha Ano nga Paagi Mo Ito Ginsusukol?

HI Jesse Livermore gintagad han iba sugad nga an pinakamalampuson nga negosyante han Wall Street ha bug-os nga kasaysayan, tungod han iya mag-opay nga desisyon ha negosyo. Sugad nga resulta, nakatirok hiya hin damu nga karikohan. Nakasul-ot hiya han pinakamaopay nga amerikana nga kinamot nga gintahi, nag-ukoy ha mansyon nga 29 an kwarto, ngan nagtag-iya hin itom nga Rolls-Royce nga awto.

Determinado liwat hi David a nga magriko. Sugad nga bise presidente ngan general manager han daku nga kompanya ha graphics, posible hiya magin presidente ha usa nga dibisyon han kompanya. Nadani hiya ha karikohan ngan kabantogan. Kondi, nagdesisyon hiya ha pagbaya ha kompanya. “Maaram ako nga diri na gud ako magkakaada hin trabaho nga sugad kahitaas an katungdanan,” siring ni David. Ha imo paghunahuna nagsayop ba hi David?

Damu an natoo nga an kalamposan nag-uupod han pagkaada hin karikohan, popularidad, o kabantogan. Kondi, adton nagpapahimulos hin kahuraan ha materyal mahimo la gihapon makaeksperyensya hin kakulangan ngan kawaray kahulogan ngan katuyoan ha kinabuhi. Ito gud an kahimtang ni Mr. Livermore. Bisan pa han iya karikohan, an iya kinabuhi puno hin kasakitan, trahedya, ngan kasub-anan. Nakaeksperyensya hiya hin depresyon, pakyas nga mga pag-asawa, ngan diri duok nga relasyon ha iya mga anak nga kalalakin-an. Usa ka adlaw, han maubos na an kadak-an han iya karikohan, kinadto hiya ha bar hin marahalon nga hotel ngan nasusubo hinduro nga iginpahayag an mga nawara ha iya. Nag-order  hiya hin irinmon, ginkuha an iya notbok nga anit an kobre, ngan nagsurat ha iya asawa. Han natapos hiya uminom, kinadto hiya ha masirom-sirom nga kwarto nga birilinan hin gamit ngan nagpusil ha iya kalugaringon.

Bisan kon an mga hinungdan han pagpakamatay komplikado, ini nga panhitabo nagpapamatuod han kamatuoran han ginsisiring ha Biblia: “An mga naghuhunahuna ha pagkamanggaranon . . . nagtugob ha ira hin damu nga kasakitan.”—1 Timoteo 6:9, 10.

Posible ba nga adton nagsusukol han kalamposan pinaagi ha karikohan, katungdanan, o kabantogan nagamit hin sayop nga paagi? Gintatagad mo ba an imo kalugaringon nga malampuson? Kay ano? Paonan-o mo ginsusukol an kalamposan? Ano an nakakaimpluwensya ha imo paghunahuna han kalamposan? An masunod nga artikulo naghihisgot han masasarigan nga sagdon nga nakabulig ha minilyon nga maglampos. Aton paghisgotan kon paonan-o ka liwat magigin malampuson.

[Footnote]