Kon Paonan-o Ka Magigin Malampuson
Kon Paonan-o Ka Magigin Malampuson
SUGAD la nga an mga kag-anak nagmamangno ha ira mga anak ngan naruruyag nga maglampos hira, an aton langitnon nga Amay nagmamangno liwat ha aton ngan karuyag nga maglampos kita. Ha pagpakita han iya malumo nga pagtagad, naghahatag hiya hin damu nga impormasyon mahitungod han kalamposan ngan kapakyasan. Ha pagkamatuod, kon nag-uunabi mahitungod ha usa ka tawo nga namamati ha ginsisiring han Dios, may pasarig nga nasiring an Biblia: “An ngatanan nga iya paghihimoon madukwag,” o mag-uuswag.—Salmo 1:3.
Kondi, kon ito an kahimtang, kay ano nga diri naieksperyensyahan han damu nga tawo an malampuson, malipayon, ngan tagbaw nga pagkinabuhi? An mas maopay nga pag-usisa hini nga salmo maghahatag ha aton han baton ngan magpapakita ha aton kon paonan-o liwat kita magigin malampuson.
‘Sagdon han mga Magraot’
An salmista nagpapahamangno mahitungod han peligro han pagsunod ha ‘sagdon han mga magraot.’ (Salmo 1:1) An nangunguna nga “usa nga maraot” amo hi Satanas nga Yawa. (Mateo 6:13, NW) Nagsusumat ha aton an Kasuratan nga hiya an “prinsipe hini nga kalibotan” ngan “an bug-os nga kalibotan kanan kayawan-on.” (Juan 16:11; 1 Juan 5:19) Salit, diri urusahon nga damu han nakukuha nga sagdon ha kalibotan nagpapakita han panhunahuna han usa nga maraot.
Ano nga klase hin sagdon an iginhahatag han mga magraot? Ha kabug-osan, an mga magraot diri nagtatahod ha Dios. (Salmo 10:13) Kalyap ha bisan diin an ira sagdon nga nagbabalewaray o nagpapasipara ha Dios. An moderno nga sosiedad nag-aaghat han “kairiphon han unod ngan an kairiphon han mga mata, ngan an paghambog han kinabuhi.” (1 Juan 2:16) Pirme igin-aaghat ha aton han media an pilosopiya nga an pagin materyalistiko amo an gimaopayi nga paagi han pagkinabuhi. Ha bug-os nga kalibotan, an mga kompanya nagasto hin sobra 500 bilyon dolyar (E.U.) ha usa ka tuig ha pagpaanunsyo basi madani an mga tawo nga pumalit han ira mga produkto—ginkikinahanglan man ito o diri han mga mamaralit. Ngan ginbubuhat ini nga propaganda diri la ha pagbag-o han mga paagi ha pamalit han mga tawo. Binabag-o hito an ideya han kalibotan mahitungod han kalamposan.
Sugad nga resulta, bisan kon damu an nagtatag-iya hin mga butang nga ha naglabay ginhihingyap la, diri la gihapon hira natatagbaw ha paghiningyap hin mas damu pa nga materyal. Naghuhunahuna hira nga kon diri ka magkakaada hini, diri ka magigin malipayon o malampuson. Sayop ini nga panhunahuna ngan “diri kanan Amay, kondi kanan kalibotan.”—1 Juan 2:16.
Maaram an aton Maglalarang kon ano gud an makakabulig ha aton nga magmalampuson. An iya sagdon naiiba gud ha ‘sagdon han mga magraot.’ Salit, an pangalimbasog nga makarawat an pag-uyon han Dios samtang naglalakat ha dalan han kalibotan ngadto ha kalamposan, pariho hin paglakat ha duha nga magkaiba nga dalan ha pariho nga panahon. Diri gud ito mahihimo. Diri urusahon nga an Biblia nagpapahamangno: “Ayaw na kamo pag-uyon han paagi hini nga kalibotan”!—Roma 12:2, An Maopay nga Sumat nga Biblia.
Ayaw Pagpaimpluwensya han Kalibotan
An kalibotan nga ilarom han impluwensya ni Satanas nangangalimbasog kuno ha pagpakita hin pagtagad ha aton kaopayan. Salit, kinahanglan magin mabinantayon kita. Hinumdumi nga ha hakugnon nga paagi ginlimbongan ni Satanas an siyahan nga babaye, hi Eva, basi magbuhat han iya karuyag. Katapos ginamit niya hi Eva ha pag-impluwensya kan Adan nga makasala. Yana, ginagamit liwat ni Satanas an mga tawo ha pagdara han iya maraot nga propaganda.
Pananglitan, hi David, nga gin-unabi ha nahiuna nga artikulo, ginlalaoman nga magtatrabaho hin damu ka oras ngan agsob nga magbibiyahe may kalabotan ha trabaho. “Malakat unta ako temprano ha Lunes nga aga ngan mauli ha Huwebes nga gab-i,” nagsiring hi David. Tungod kay maaram nga an sugad nga mga pagsakripisyo ginkikinahanglan basi makab-ot an kalamposan ha kalibotan, an sinsero nga kasangkayan, mga kapamilya, ngan mga katrabaho nag-aghat kan David: “Karawata ito para ha imo pamilya.” Hira nagsiring nga bubuhaton niya an sugad nga rutina ha pipira la ka tuig tubtob nga makaestablisar la hiya. Hi David nagsaysay: “Nangatadongan hira nga mas makakaopay ini ha akon pamilya tungod kay magkakaada ako hin mas damu nga kwarta—mas magigin malampuson ako. Bisan kon diri ko kaupod an akon pamilya, ginkombinse ako han akon kasangkayan nga ha pagkatinuod mas damu an akon naihahatag ha akon pamilya.” Pariho kan David, damu an mauyatom nga nagtatrabaho basi maihatag nira ha ira pamilya an ngatanan nga ira ginkikinahanglan. Kondi an pagsunod ba hini nga klase hin sagdon nagriresulta ha kalamposan? Ano gud ba an ginkikinahanglan han pamilya?
Hinbaroan ito ni David samtang nagbibiyahe hiya may kalabotan ha iya trabaho. “Nakaistorya ko ha telepono an akon anak nga hi Angelica, nga nagsiring: ‘Tay, kay ano nga pirme ka waray ha balay?’ Nabaraka gud ako,” siring niya. An ginyakan han iya anak nagparig-on han iya hingyap nga bumaya ha trabaho. Disidido hi David nga ihatag ha iya pamilya an tinuod nga ginkikinahanglan nira—hiya mismo.
An Pag-aplikar han Sagdon han Dios Nagriresulta hin Kalamposan
Paonan-o mo maaatohan an nagpapasimang nga impormasyon nga kalyap gud dinhi hini nga kalibotan? An salmista nagsusumat ha aton nga an malampuson ngan malipayon nga tawo amo an usa nga ‘nalilipay ha balaud ni Jehova; ngan adlaw ug gab-i hiya namamalandong hito.’— Salmo 1:2.
Han ginpili han Dios hi Josue sugad nga lider han nasud han Israel, hiya ginsidngan: “Magpalandong ka [ha Pulong han Dios] adlaw ngan ha gab-i.” Oo, importante an pagbasa ngan pagpamalandong ha Pulong han Dios, kondi kinahanglan liwat ni Josue ‘bantayan an pagbuhat sumala han ngatanan nga nahisurat dida.’ Syempre, an pagbasa han Biblia diri awtomatiko nga makakahimo ha imo nga malampuson. Kinahanglan iaplikar mo an imo binabasa. Hi Josue ginsidngan: “Dida hito ikaw magmamauswagon ha imo paglakat, ngan dida hito mamamay-ada ka maopay nga kauswagan.”—Josue 1:8.
Handurawa an mahiyom-hiyom nga bata nga ginsasabak han iya mahigugmaon nga kag-anak samtang ginbabasa nira an paborito nga istorya. Bisan kon damu ka beses na nira nga nabasa ito, ira ginpapabilhan an sugad kapresyoso nga mga higayon. Ha pariho nga paagi, an tawo nga nahigugma ha Dios maaram nga an adlaw-adlaw nga pagbasa han Biblia makaruruyag gud nga eksperyensya—makalilipay nga panahon han pakig-upod ha iya langitnon nga Amay. Pinaagi han pagsunod ha sagdon ngan giya ni Jehova, an sugad nga tawo nagigin pariho hin “kahoy nga gintanom ha ligid han mga kasapaan hin tubig, nga mabunga ha iya panahon, nga an iya dahon diri malalaya; ngan an ngatanan nga iya paghihimoon madukwag.”—Salmo 1:3.
An kahoy nga iginhulagway han salmista diri kay basta la nga tinubo. Igintanom ito ha inaawasan han tubig ngan gin-aataman han parauma. Ha pariho nga paagi, ginbabag-o ngan gintatadong han aton langitnon nga Amay an aton panhunahuna pinaagi han sagdon nga mababasa ha Kasuratan. Sugad nga resulta, nagtutubo kita ngan namumunga hin diosnon nga mga bunga.
Kondi, ‘diri sugad hini an mga magraot.’ Oo, baga hin nag-uuswag hira ha usa ka panahon, kondi ha kataposan maraot an ira dadangatan. Hira ‘diri matindog ha hukmanan.’ Lugod, ‘an dalan han mga magraot mawawara.’—Salmo 1:4-6.
Salit ayaw tuguti nga maimpluwensyahan han kalibotan an imo mga tumong ngan mga prinsipyo. Bisan kon bangin maabtik ka ngan may-ada potensyal nga maglampos dinhi hini nga kalibotan, pagbantay kon paonan-o mo ginagamit an imo mga talento o kon paonan-o mo ito iginpapagamit ha kalibotan. An waray pulos nga materyalistiko nga mga tinguha ‘nakakalaya’ ha usa. Ha luyo nga bahin, an pagkaada maopay nga relasyon ha Dios magriresulta hin totoo nga kalamposan ngan kalipay.
Kon Paonan-o Ka Magigin Malampuson
Kay ano nga kon an usa nasunod ha sagdon han Dios, an ngatanan nga bubuhaton niya maglalampos? An ginhihisgotan han salmista diri an kalamposan dinhi hini nga kalibotan. Iginkakaw-ing an kalamposan han diosnon nga tawo ha pagbuhat han kaburut-on han Dios—ngan an kaburut-on han Dios pirme naglalampos. Aton kitaon kon paonan-o an pag-aplikar han mga prinsipyo ha Biblia mabulig ha imo nga maglampos.
Pamilya: An Kasuratan nagsasagdon ha mga bana nga ‘higugmaon an ira mga asawa sugad ha ira kalugaringon nga lawas,’ ngan an Kristiano nga asawa ginsusugo nga magkaada hilarom nga ‘pagtahod ha iya asawa nga lalaki.’ (Efeso 5:28, 33) Gin-aaghat an mga kag-anak nga magkaada hin panahon ha ira mga anak, malipay kaupod nira, ngan magtutdo ha ira han importante nga mga butang ha kinabuhi. (Deuteronomio 6:6, 7; Eklesiastes 3:4) An Pulong han Dios nagsasagdon liwat ha mga kag-anak: “Diri niyo pag-aghaton ha kasina an iyo mga anak.” Kon igin-aaplikar ini nga sagdon, mas masayon para ha mga anak nga ‘magtuman ha ira mga kag-anak’ ngan ‘tumahod ha ira amay ngan ha ira iroy.’ (Efeso 6:1-4) An pagsunod hini nga sagdon han Dios mahimo magresulta hin malampuson nga pagkinabuhi han pamilya.
Kasangkayan: Kadam-an nga tawo an naruruyag hin kasangkayan. May-ada kita kapasidad ha hunahuna ngan ha emosyon ha paghigugma ngan higugmaon. Hi Jesus nagsiring ha iya mga sumurunod nga sadang hira “maghigugmaanay an usa kag usa.” (Juan 13:34, 35) Ha butnga nira, makakabiling kita hin mga sangkay nga aton mahihigugma ngan masasarigan—bisan pa ngani han aton gihilarumi nga mga panhunahuna ngan pagbati. (Proberbios 18:24) Labaw ha ngatanan, pinaagi han pag-aplikar han mga prinsipyo ha Biblia, mahimo kita “magin duok ha Dios” ngan, pariho kan Abraham, mahimo pa ngani kita tawagon nga “sangkay han Dios.”—Jakobo 2:23; 4:8, NW.
Katuyoan ha Kinabuhi: Imbes han pagkaada hin waray katuyoan nga kinabuhi, adton tinuod nga malampuson nakakabiling hin kahulogan ngan katuyoan ha kinabuhi. An ira kinabuhi diri nakadepende ha diri marig-on nga kahimtang hini nga sistema. An ira mga tumong naggigiya ngadto ha totoo ngan nagpapadayon nga katagbaw, tungod kay nakasentro ito ha totoo nga katuyoan han kinabuhi. Ano an mabulig basi magkaada katuyoan an kinabuhi han usa? “Kahadluki an Dios, ngan bantayi an iya mga sugo; kay amo ini an bug-os nga turumanon han tawo.”—Eklesiastes 12:13.
Paglaom: An pagin Sangkay han Dios naghahatag liwat ha aton hin paglaom ha tidaraon. Hi apostol Pablo nagsagda ha mga Kristiano nga “diri nira ibutang an ira paglaom dida ha diri kamarig-on han mga bahandi, kondi ha Dios.” Hini nga paagi, hira “nagtitirok ha ira kalugaringon hin maopay nga patukoranan andam han tidaraon nga panahon, basi nga madakop nira an kinabuhi nga amo an kinabuhi nga totoo.” (1 Timoteo 6:17-19) Inin totoo nga kinabuhi diri na maiha umabot kon igpahiuli na han langitnon nga Ginhadian han Dios an Paraiso dinhi ha tuna.—Lukas 23:43.
Bisan kon igin-aaplikar mo an mga prinsipyo ha Biblia, diri mo malilikyan an mga problema, kondi malilikyan mo an damu nga kasubo ngan kasakit nga ginpapahinabo han mga magraot ha ira kalugaringon. Hi David, nga gin-unabi kanina, ngan an minilyon nga pariho ha iya nahibaro han bili han pag-aplikar han mga prinsipyo ha Biblia ha ira kinabuhi. Katapos makabiling hin trabaho nga maopay an eskedyol, hi David nagsiring: “Mapasalamaton gud ako ha akon relasyon ha akon asawa ngan mga anak sugad man ha pribilehiyo nga makag-alagad kan Jehova nga Dios sugad nga tigurang ha kongregasyon.” Diri urusahon nga an salmo nasiring mahitungod ha tawo nga namamati ha sagdon han Dios: “An ngatanan nga iya paghihimoon madukwag”!
[Tsart ha pahina 6]
LIMA NGA PAAGI HA PAGLAMPOS
1 Ayaw pagpaimpluwensya ha mga prinsipyo hini nga kalibotan.
2 Basaha ngan pamalandonga an Pulong han Dios kada adlaw.
3 Iaplikar an sagdon han Biblia ha imo pagkinabuhi.
4 Makigsangkay ha Dios.
5 Kahadluki an totoo nga Dios, ngan tumana an iya mga sugo.
[Mga Retrato ha pahina 7]
Ginsusunod mo ba an mga paagi ha paglampos?