‘Magmamalipayon ka Gud’

“Ha pito ka adlaw pagsaurugon mo an pyesta kan Jehova . . . , ngan magmamalipayon gud ikaw.”—DEUTERONOMIO 16:15.

1. (a) Ano nga mga isyu an iginbangon ni Satanas? (b) Ano an igintagna ni Jehova katapos magrebelde hira Adan ngan Eva?

 HAN ginsulay ni Satanas hira Adan ngan Eva ha pagrebelde ha ira Maglalarang, nagbangon hiya hin duha nga importante hinduro nga isyu. Siyahan, iya gin-akusahan hi Jehova nga Hiya diri tangkod ngan diri husto an paagi han Iya pagmando. Ikaduha, iginpasabot ni Satanas nga an mga tawo mag-aalagad ha Dios tungod la ha hakugnon nga mga hinungdan. An ikaduha nga isyu direkta nga iginbangon ha panahon ni Job. (Genesis 3:1-6; Job 1:9, 10; 2:4, 5) Kondi, hi Jehova ginios dayon ha pagsulbad han sitwasyon. Bisan han naukoy pa hira Adan ngan Eva ha hardin han Eden, igintagna ni Jehova kon paonan-o Niya susulbaron an mga isyu. Iya igintagna an pag-abot han usa nga “binhi” nga, katapos samaron an iya tikod, magsasamad kan Satanas ha ulo ha makamaratay nga paagi.—Genesis 3:15, NW.

2. Ano an iginpatin-aw ni Jehova mahitungod ha kon paonan-o niya tutumanon an tagna nga iginrekord ha Genesis 3:15?

² Samtang nalabay an panahon, dugang nga iginpatin-aw ni Jehova ito nga tagna, hito nga paagi ipinapakita an pagkasigurado han katumanan hito. Pananglitan, ginsumatan han Dios hi Abraham nga an “binhi” maabot dida ha iya katulinan. (Genesis 22:15-18) An apo ni Abraham nga hi Jakob nagin amay han 12 nga tribo han Israel. Han 1513 A.K.P., han nagin nasud ito nga mga tribo, iginhatag ni Jehova ha ira an usa nga kodego han mga balaud nga nag-upod han magkalain-lain nga tinuig nga mga pyesta. Hi apostol Pablo nagsiring nga ito nga mga pyesta “amo an lambong han mga tiarabot nga mga bagay.” (Kolosas 2:16, 17; Hebreo 10:1) Nag-upod ito hin abanse nga pagpakita han katumanan han katuyoan ni Jehova para ha Binhi. An pagsaurog hito nga mga pyesta naghatag hin duro nga kalipay ha Israel. An halipot nga paghisgot hito magpaparig-on han aton pagtoo ha pagkamasasarigan han mga saad ni Jehova.

Inabot an Binhi

3. Hin-o an iginsaad nga Binhi, ngan paonan-o ginsamad an iya tikod?

³ Sobra 4,000 ka tuig katapos han siyahan nga tagna ni Jehova, inabot an Binhi, hi Jesus. (Galasia 3:16) Sugad nga hingpit nga tawo, nagpabilin hi Jesus nga matinumanon tubtob ha kamatayon ngan salit pinamatud-an niya nga buwa an mga akusasyon ni Satanas. Dugang pa, tungod kay hi Jesus waray sala, an iya kamatayon usa nga halad nga daku hinduro an bili. Pinaagi hito, igintagana ni Jesus an kaluwasan tikang ha sala ngan kamatayon para ha matinumanon nga mga anak ni Adan ngan Eva. An kamatayon ni Jesus ha pasakitan nga kahoy amo an ‘pagsamad ha tikod’ han iginsaad nga Binhi.—Hebreo 9:11-14.

4. An halad ni Jesus ginpadagawan han ano?

⁴ Hi Jesus namatay han Nisan 14, 33 K.P. a Ha Israel, an Nisan 14 amo an makalilipay nga adlaw han pagsaurog han Paskua. Kada tuig hito nga adlaw, an mga pamilya magkaupod ha pangaon diin may-ada nati, waray-buring nga karnero. Hini nga paagi, ira nahinumdoman an nahimo han dugo han karnero may kalabotan ha kaluwasan han Israelita nga mga suhag han ginpatay han anghel han kamatayon an mga suhag han mga Ehiptohanon han Nisan 14, 1513 A.K.P. (Eksodo 12:1-14) An karnero han Paskua nagpadagaw kan Jesus, nga mahitungod ha iya hi apostol Pablo nagsiring:  “An aton pesach iginhalad na nga amo hi Kristo.” (1 Korinto 5:7) Pariho ha dugo han karnero han Paskua, an iginbubo nga dugo ni Jesus nagtatagana hin kaluwasan para ha damu.—Juan 3:16, 36.

‘An Siyahan nga mga Bunga han mga Patay’

5, 6. Kakan-o ginbanhaw hi Jesus, ngan paonan-o ginpadagawan ha Balaud ito nga hitabo? (b) Paonan-o an katumanan han Genesis 3:15 nagin posible tungod han pagkabanhaw ni Jesus?

⁵ Ha ikatulo ka adlaw, ginbanhaw hi Jesus basi ipresenta ha iya Amay an bili han iya halad. (Hebreo 9:24) An iya pagkabanhaw ginpadagawan durante han usa pa nga pyesta. An adlaw katapos han Nisan 14 amo an tinikangan han Pyesta han mga Tinapay nga Waray Ipaturubo. Ha sunod nga adlaw, Nisan 16, an mga Israelita nagdadara hin usa ka butok han siyahan nga mga bunga han inani nga sebada, an siyahan nga ani ha Israel, nga ig-aabyog han saserdote ha atubangan ni Jehova. (Lebitiko 23:6-14) Angayan gud nga hito mismo nga adlaw han tuig 33 K.P., ginpugngan ni Jehova an maraot nga mga pangalimbasog ni Satanas nga patayon ha kadayonan an iya “matinumanon ngan matuod nga testigo”! Han Nisan 16, 33 K.P., ginbanhaw ni Jehova hi Jesus tikang ha mga minatay ngadto ha diri-mamaratyon, espiritu nga kinabuhi.—Pahayag 3:14; 1 Pedro 3:18.

⁶ Hi Jesus nagin “an siyahan nga mga bunga tikang ha mga nangangaturog” ha kamatayon. (1 Korinto 15:20) Diri sugad hadton ginbanhaw antes hito, hi Jesus waray mamatay utro. Lugod, sinaka hiya ha langit ha too ni Jehova, diin naghulat hiya tubtob nga mahitrono hiya sugad nga Hadi han langitnon nga Ginhadian ni Jehova. (Salmo 110:1; Buhat 2:32, 33; Hebreo 10:12, 13) Tikang ha kahitrono ni Jesus sugad nga Hadi, makakahimo na hiya yana pagsamad ha ulo han daku nga kaaway, hi Satanas, ngan pagbungkag han iya binhi.—Pahayag 11:15, 18; 20:1-3, 10.

Dugang Pa nga mga Membro han Binhi ni Abraham

7. Ano an Pyesta han mga Semana?

⁷ Hi Jesus an Binhi nga iginsaad ha Eden ngan pinaagi ha iya ‘bubungkagon [ni Jehova] an mga buhat han Yawa.’ (1 Juan 3:8) Kondi, han nagyakan hi Jehova kan Abraham, Iya iginpasabot nga an “binhi” ni Abraham magigin sobra pa ha usa la nga tawo. Magigin “sugad [ito] han baras nga aada ha baybayon.” (Genesis 22:17) An pag-abot han iba nga membro han “binhi” ginpadagawan han usa pa nga makalilipay nga pyesta. Paglabay hin 50 ka adlaw katapos han Nisan 16, ginsaurog han Israel an Pyesta han mga Semana. An Balaud mahitungod hini nasiring: “Ha pagkabuwas ha katapos han ikapito nga adlaw nga iparahuway, umihap kamo makalim-an ka adlaw, ngan maghalad kamo hin bag-o nga halad nga karaunon kan Jehova. Tikang ha iyo mga urukyan magdara kamo hin duha nga tinapay nga inabyog han duha ka ikanapulo ka bahin han usa ka epa: harina nga pino ini, paglutoon nga may-ada ipaturubo, ini para han siyahan nga bunga kan Jehova.” b—Lebitiko 23:16, 17, 20.

8. Ano an makatirigamnan nga nahitabo han Pentekostes 33 K.P.?

⁸ Han hi Jesus nakanhi ha tuna, an Pyesta han mga Semana tinatawag nga Pentekostes (tikang ha Griego nga pulong nga nangangahulogan hin “ikakalim-an”). Han Pentekostes 33 K.P.,  iginbubo han mas harangdon nga Hitaas nga Saserdote, nga amo an binanhaw nga hi Jesu-Kristo, an baraan nga espiritu ha gutiay nga grupo han 120 nga disipulo nga nagkatirok ha Jerusalem. Tungod hito, ito nga mga disipulo nagin dinihogan nga mga anak han Dios ngan kabugtoan ni Jesu-Kristo. (Roma 8:15-17) Nagin bag-o hira nga nasud, ‘an Israel han Dios.’ (Galasia 6:16) Tikang ha gutiay nga grupo, ito nga nasud ha kataposan magigin 144,000.—Pahayag 7:1-4.

9, 10. Paonan-o ginpadagawan an kongregasyon han dinihogan nga mga Kristiano durante han Pentekostes?

⁹ An kongregasyon han dinihogan nga mga Kristiano ginpadagawan han duha nga tinapay nga may ipaturubo nga igin-aabyog ha atubangan ni Jehova ha kada Pentekostes. Ipinakita han pagkaada hin libadura han tinapay nga an dinihogan nga mga Kristiano magkakaada pa gihapon han sugad-libadura nga napanunod nga sala. Kondi, mahimo hira dumaop kan Jehova pinaagi han halad lukat ni Jesus. (Roma 5:1, 2) Kay ano nga duha nga tinapay? Bangin iginpasabot hito nga an dinihogan nga mga anak han Dios ha kataposan magtitikang ha duha nga grupo—siyahan ha mga Judio ngan ha urhi ha mga Hentil.—Galasia 3:26-29; Efeso 2:13-18.

¹⁰ An duha nga tinapay nga iginhalad han Pentekostes nagtikang ha siyahan nga mga bunga han inani nga trigo. Sugad nga katugbang, adton igin-anak-ha-espiritu nga mga Kristiano tinatawag nga ‘siyahan nga bunga han iya mga buhat.’ (Jakobo 1:18) Hira an siyahan nga ginpasaylo ha ira mga sala pinaagi han iginbubo nga dugo ni Jesus, ngan tungod hito nagin posible nga hatagan hira hin diri-mamaratyon nga kinabuhi ha langit, diin magmamando hira upod ni Jesus ha iya Ginhadian. (1 Korinto 15:53; Filipos 3:20, 21; Pahayag 20:6) Hito nga katungdanan, ha hirani nga tidaraon ira ‘paghahadian an mga nasud hin sungkod nga puthaw,’ ngan makikita nga ‘hi Satanas ginbanos ha ilarom han ira mga tiil.’ (Pahayag 2:26, 27; Roma 16:20) Hi apostol Juan nagsiring: “Ini hira amo an nagsusunod ha Kordero bisan diin hiya kakadto. Ini hira amo an mga tinubos tikang ha mga tawo, nga magin siyahan nga mga bunga ngadto ha Dios ngan ha Kordero.”—Pahayag 14:4.

Usa nga Adlaw nga Nagpapabug-at han Kaluwasan

11, 12. (a) Ano an nahitatabo ha Adlaw han Pagbayad han mga Sala? (b) Ano nga mga kapulsanan an nakakarawat han Israel tikang ha mga halad nga baka nga toro ngan mga kanding?

¹¹ Ha ikanapulo nga adlaw han Ethanim (ha  urhi gintawag nga Tishri), c ginsasaurog han Israel an pyesta nga nagpadagaw kon paonan-o iaaplikar an mga kapulsanan han halad lukat ni Jesus. Hito nga adlaw an bug-os nga nasud nagkakatirok para ha Adlaw han Pagbayad han mga Sala basi matabonan an ira mga sala pinaagi han mga paghalad para ha ira.—Lebitiko 16:29, 30.

¹² Ha Adlaw han Pagbayad han mga Sala, an hitaas nga saserdote nag-iihaw hin nati nga baka nga toro, ngan ha Gibabaraani iya iginwiwisik an iba han dugo hito hin pito ka beses ha atubangan han tabon han Arka, hito nga paagi simboliko nga iginhahalad an dugo ha atubangan ni Jehova. Ito nga halad amo an para ha mga sala han hitaas nga saserdote ngan “han iya balay,” an kabulig nga mga saserdote ngan an mga Lebihanon. Katapos, an hitaas nga saserdote nakuha hin duha nga kanding. An usa iya gin-iihaw sugad nga halad para han sala han “katawohan.” An iba han dugo hito iginwiwisik liwat ha atubangan han tabon han Arka ha Gibabaraani. Katapos, iginbubutang han hitaas nga saserdote an iya mga kamot ha ulo han ikaduha nga kanding ngan iginsusumat an mga sala han mga anak han Israel. Katapos, iya ginpapalakat an kanding ngadto ha kamingawan basi dad-on an mga sala han nasud ha simboliko nga paagi.—Lebitiko 16:3-16, 21, 22.

13. Paonan-o an mga hitabo ha Adlaw han Pagbayad han mga Sala nagpadagaw ha bahin ni Jesus?

¹³ Sugad han ginpadagawan hito nga mga buhat, ginagamit han harangdon nga Hitaas nga Saserdote, nga amo hi Jesus, an bili han iya dugo ha pagpasaylo han mga sala. Siyahan, an bili han iya dugo inaaplikar ha “espirituhanon nga balay” han 144,000 nga dinihogan nga Kristiano, ngan tungod hito iginpapahayag hira nga matadong ngan may-ada hira limpyo nga kahimtang ha atubangan ni Jehova. (1 Pedro 2:5; 1 Korinto 6:11) Ginpadagawan ini han halad nga baka nga toro. Tungod hini nagkakaada hira higayon nga makarawat an ira langitnon nga panurundon. Ikaduha, an bili han dugo ni Jesus inaaplikar para ha minilyon nga iba pa nga nagbubuhat hin pagtoo kan Kristo, sugad han ipinakita han halad nga kanding. Bibendisyonan hira hin kinabuhi nga waray kataposan dinhi ha tuna, an panurundon nga nawara nira Adan ngan Eva. (Salmo 37:10, 11) Pinaagi han iya iginbubo nga dugo, ginkuha ni Jesus an mga sala han katawohan, sugad la nga simboliko nga gindara han buhi nga kanding an mga sala han Israel ngadto ha kamingawan.—Isaias 53:4, 5.

Pagkalipay ha Atubangan ni Jehova

14, 15. Ano an nahitatabo durante han Pyesta han mga Payag, ngan ano an iginpapahinumdom hini ha mga Israelita?

¹⁴ Katapos han Adlaw han Pagbayad han mga Sala, ginsasaurog han mga Israelita an Pyesta han  mga Payag, an pinakamakalilipay nga pyesta han tuig han mga Judio. (Lebitiko 23:34-43) Ito nga pyesta ginsasaurog tikang ha ika-15 tubtob ha ika-21 han Ethanim ngan natatapos pinaagi hin sagrado nga katirok ha ika-22 han bulan. Nagtigaman ito han kataposan han pagtirok han inani ngan usa nga panahon han pagpasalamat ha hura nga pagkamaopay han Dios. Tungod hito, ginsugo ni Jehova an mga nagsaurog: “Magbibendisyon hi Jehova ha imo ha ngatanan mo nga bunga, ngan ha ngatanan nga buhat han imo kamot, ngan magmamalipayon gud ikaw.” (Deuteronomio 16:15) Makalilipay gud adto nga panahon!

¹⁵ Durante hito nga pyesta, pito ka adlaw nga naukoy an mga Israelita ha mga payag. Hito nga paagi ginpapahinumdom hira nga nag-ukoy hira hadto ha mga payag ha kamingawan. An pyesta naghatag ha ira hin igo nga higayon nga pamalandungon an mahigugmaon nga pagmangno ni Jehova sugad nga Amay. (Deuteronomio 8:15, 16) Ngan tungod kay an ngatanan, bahandianon ngan kablas, naukoy ha parapriho nga mga payag, ginpapahinumdom an mga Israelita nga durante han pyesta, parapriho hira ngatanan.—Nehemia 8:14-16.

16. Ano an ginpadagawan han Pyesta han mga Payag?

¹⁶ An Pyesta han mga Payag usa nga pyesta han pag-ani, usa nga makalilipay nga pagsaurog han pagtirok, ngan nagpadagaw ito han makalilipay nga pagtirok hadton nagbubuhat hin pagtoo kan Jesu-Kristo. An pagtirok nagtikang han Pentekostes 33 K.P., han gindihogan an 120 nga disipulo ni Jesus basi magin bahin han “pagkasaserdote nga baraan.” Sugad la nga an mga Israelita inukoy ha mga payag hin pipira ka adlaw, maaram an mga dinihogan nga hira “lumalabay [la]” nga mga umurukoy hinin diri-diosnon nga kalibotan. Ha langit an ira paglaom. (1 Pedro 2:5, 11) Ito nga pagtirok ha dinihogan nga mga Kristiano nadangat na ha ikatarapos hito durante hinin “kataposan nga mga adlaw,” diin gintitirok na an ultimo nga mga membro han 144,000.—2 Timoteo 3:1.

17, 18. (a) Ano an nagpapasabot nga an iba gawas pa han dinihogan nga mga Kristiano magpapahimulos han halad ni Jesus? (b) Hin-o yana an nagpapahimulos han antitipiko nga Pyesta han mga Payag, ngan san-o madangat ha pungkay iton makalilipay nga pyesta?

¹⁷ Makatirigamnan nga durante hinin kadaan  nga pyesta, 70 nga baka nga toro an iginhalad. (Numeros 29:12-34) An 70 nagrirepresentar han 7 nga ginmultiplikar hin 10, mga numero nga ha Biblia nagrirepresentar han langitnon ngan tunan-on nga pagkahingpit. Salit, an halad ni Jesus mapapahimulsan han magtinumanon tikang ha ngatanan nga 70 nga pamilya han katawohan nga nagtikang kan Noe. (Genesis 10:1-29) Uyon hito, ha aton panahon igin-uupod liwat ha pagtirok an mga indibiduwal tikang ha ngatanan nga nasud nga nagbubuhat hin pagtoo kan Jesus ngan naglalaom nga mabuhi ha waray kataposan ha paraiso nga tuna.

¹⁸ Hinkit-an ni apostol Juan ha bisyon ini nga pagtirok yana. Siyahan, iya hinbatian an pagpahibaro han pagselyo han ultimo nga mga membro han 144,000. Katapos, iya hinkit-an “an kadam-an nga mga tawo, nga waray tawo nga sadang makaihap,” nga nagkakatukdaw ha atubangan ni Jehova ngan ni Jesus, nga may-ada “mga palwa dida ha ira mga kamot.” Ini hira ‘magkakagowa tikang ha daku nga kagol-anan’ ngadto ha bag-o nga kalibotan. Hira liwat yana lumalabay la nga mga umurukoy hinin daan nga sistema han mga butang, ngan may pagsarig nga ginpapamulat nira an panahon diin ‘an Kordero magmamando ha ira ngadto ha mga burabod ha mga tubig han kinabuhi.’ Hito nga panahon, “an Dios magpapahid han ngatanan nga luha tikang ha ira mga mata.” (Pahayag 7:1-10, 14-17) An antitipiko nga Pyesta han mga Payag madangat ha pungkay hito ha kataposan han Usa ka Yukot ka Tuig nga Pagmando ni Kristo kon hira kaupod an matinumanon nga mga binanhaw hatagan na hin kinabuhi nga waray kataposan.—Pahayag 20:5.

19. Paonan-o kita nagpapahimulos ha paghisgot mahitungod han mga pyesta nga ginsaurog ha Israel?

¹⁹ Kita liwat “magmamalipayon gud” samtang pinamamalandong naton an kahulogan han kadaan nga mga pyesta han mga Judio. Makalilipay hunahunaon nga hi Jehova nagtagana hin abanse nga mga pagpakita kon paonan-o matutuman an iya igintagna hadto ha Eden, ngan makalilipay gud makita nga hinay-hinay nga nahitatabo an katumanan hito. Yana, maaram kita nga an Binhi inabot na ngan ginsamad na hiya ha tikod. Langitnon nga Hadi na hiya yana. Dugang pa, pinamatud-an na han kadam-an han 144,000 an ira pagkamatinumanon tubtob ha kamatayon. Ano pa an mahitatabo? San-o bug-os nga matutuman an tagna? Paghihisgotan ini ha masunod nga artikulo.

[Mga footnote]

Maisasaysay Mo Ba?

• Ano an ginpadagawan han karnero han Paskua?

• Ano nga pagtirok an ginpadagawan han Pyesta han Pentekostes?

• Ano nga mga bahin han Adlaw han Pagbayad han mga Sala an nagpadagaw han paagi han pag-aplikar han halad lukat ni Jesus?

• Ha ano nga paagi ginpadagawan han Pyesta han mga Payag an pagtirok ha mga Kristiano?

[Mga Pakiana]

[Tsart ha pahina 22, 23]

(Para ha aktuwal nga format, kitaa an publikasyon)

Hitabo: Ginpadagawan:

Paskua Nisan 14 Gin-ihaw an Iginhalad hi Jesus

karnero han

Paskua

Pyesta han Nisan 15 Sabbath

mga Tinapay

nga Waray

Ipaturubo Nisan 16 Iginhalad an Ginbanhaw hi Jesus

(Nisan 15-21) Sebada

↑

50 ka adlaw

↓

Pyesta han Iginhalad na Iginpresenta

mga Semana Sivan 6 duha nga tinapay ni Jesus kan

(Pentekostes) Jehova an iya

dinihogan nga

kabugtoan

Adlaw han Tishri 10 Iginhalad an Iginhalad ni Jesus

Pagbayad usa nga baka an bili han iya

mga Sala nga toro ngan dugo para ha

duha nga kanding ngatanan nga

katawohan

Pyesta han Tishri 15-21 Malipayon nga Pagtirok ha mga

mga Payag inukoy an mga dinihogan

(Pagtirok, Israelita ha ngan ha “daku

Tabernakulo) mga payag ngan nga panon”

nagkalipay ha

pag-ani, iginhalad

an 70 nga baka

nga toro

[Mga Retrato ha pahina 21]

Pariho ha dugo han karnero han Paskua, an iginbubo nga dugo ni Jesus nagtatagana hin kaluwasan para ha damu

[Retrato ha pahina 22]

An siyahan nga mga bunga han inani nga sebada nga iginhalad ha Nisan 16 nagpadagaw han pagkabanhaw ni Jesus

[Retrato ha pahina 23]

An duha nga tinapay nga iginhalad han Pentekostes nagpadagaw ha kongregasyon han dinihogan nga mga Kristiano

[Mga Retrato ha pahina 24]

An Pyesta han mga Payag nagpadagaw ha makalilipay nga pagtirok ha mga dinihogan ngan ha “daku nga panon” tikang ha ngatanan nga nasud