Mahimo Mo Malamposan an Sugad-Bagyo nga mga Kakurian

HININ magpakalilisang nga mga panahon, damu an nag-aantos hin sugad-bagyo nga mga kakurian. Kondi, para ha mga Kristiano, an gugma ha Dios ngan pagkamaunungon ha iya mga prinsipyo nabulig ha ira nga maglampos. Paonan-o? An baton makikita ha usa nga ilustrasyon nga iginsaysay ni Jesu-Kristo. Iya iginpariho an iya masinugtanon nga mga disipulo ha “makinaadmananon nga tawo, nga nagtindog han iya balay ha bawbaw han bato.” Hi Jesus nagsiring: “Inuran ngan nagbaha an mga salog, ngan an mga hangin nanhuyop ngan gin-agmakan iton nga balay, ngan waray katumba, kay gintindog ha bawbaw han bato nga bantilis.”—Mateo 7:24, 25.

Tigamni nga bisan kon maaramon an tawo ha ilustrasyon, nakaeksperyensya pa gihapon hiya hin mga kakurian—nga sugad hin bunok, baha, ngan makabungkag nga hangin. Salit, waray igpasabot ni Jesus nga an iya mga disipulo makakalikay ha ngatanan nga kakurian ngan magpapahimulos hin kinabuhi nga may nagpapadayon nga kamurayawan ngan kamingaw. (Salmo 34:19; Jakobo 4:13-15) Kondi nagsiring gud hiya nga an matinumanon nga mga surugoon han Dios mahimo mangandam ngan makalampos ha sugad-bagyo nga mga kakurian ngan mga problema.

Gintikangan ni Jesus an ilustrasyon pinaagi ha pagsiring: “An tagsa-tagsa nga nakabati hini nga mga pulong nakon, ngan ira pagbuhaton, adto igsusugad ko han makinaadmananon nga tawo, nga nagtindog han iya balay ha bawbaw han bato.” Syempre, an iginpapasabot ni Jesus, diri an pagtukod hin literal nga mga balay, kondi an pagpatubo hin Kristiano nga mga motibo ngan mga buhat. Adton nasunod ha mga pulong ni Kristo nagamit hin pagsabot ngan nagpapakita hin maopay nga pagturutimbang. Ira ginhihimo nga pundasyon han ira mga motibo ngan mga buhat an marig-on nga sugad-bato nga mga katutdoan ni Kristo pinaagi han pag-aplikar han igintutdo ha ira. Makapainteres nga inin simboliko nga bato diri hiaagian ha bawbaw la. An tawo ha ilustrasyon kinahanglan ‘mag-ukab hin hilarom’ basi madangat ito. (Lukas 6:48) Ha sugad man nga paagi, an mga disipulo ni Jesus padayon nga maduruto nga nangangalimbasog ha pagpatubo hin nagpapadayon nga mga kalidad nga nabulig ha ira nga magin mas duok ha Dios.—Mateo 5:5-7; 6:33.

Ano an nahitatabo kon an sugad-bagyo nga mga kakurian nagsasari han karig-on han Kristiano nga pundasyon han mga sumurunod ni Jesus? An ira kinaburut-on nga pagkamasinugtanon ha mga katutdoan ni Kristo ngan an ira Kristiano nga mga kalidad nagigin surok han kusog durante han sugad nga mga kakurian, ngan labaw ha ngatanan, durante han tiarabot nga sugad-bagyo nga Armagedon. (Mateo 5:10-12; Pahayag 16:15, 16) Oo, pinaagi han pagsunod ha mga katutdoan ni Kristo, nalalamposan han damu an sugad-bagyo nga mga pagsari. Malalamposan mo liwat ito.—1 Pedro 2:21-23.