Mga Pakiana Tikang ha mga Magbarasa

Ano an iginpapasabot han pagselyo nga gin-unabi ha Pahayag 7:3?

An Pahayag 7:1-3 nasiring: “Hinkit-an ko an upat nga mga anghel nga nagkakatukdaw ha upat nga palwis han tuna, nga ginpupugngan nira an upat nga hangin ha tuna, basi nga waray hangin nga humuyop ha tuna, o ha dagat, o ha bisan ano nga kahoy. Ngan hinkit-an ko an lain nga anghel nga nasaka tikang ha sinirangan, nga may-ada niya selyo han buhi nga Dios: ngan nagguliat hiya hin daku nga tingog ngadto ha upat nga mga anghel nga gintagan hin gahum ha paghibang han tuna ngan han dagat, nga nasiring, Ayaw niyo paghibanga iton tuna, bisan iton dagat, o mga kakahoyan, ngada han pagkasiselyohi namon han mga agtang han mga surugoon han aton Dios.”

Kon buhian na “an upat nga hangin,” magriresulta ito ha “daku nga kagol-anan,” an kabungkagan han palso nga relihiyon ngan han ngatanan nga bahin hinin maraot nga kalibotan. (Pahayag 7:14) An “mga surugoon han aton Dios” amo an dinihogan nga kabugtoan ni Kristo ha tuna. (1 Pedro 2:9, 16) Kon sugad, ini nga tagna nagpapasabot nga naselyohan na an kabugtoan ni Kristo pagtikang han daku nga kagol-anan. Kondi, an iba nga bersikulo ha Biblia nagpapasabot nga may-ada nauna nga pagselyo ha mga dinihogan. Salit, usahay naghihisgot kita mahitungod han siyahan ngan han ultimo nga pagselyo. Ano an kaibahan hini nga duha?

Tagdon naton an kahulogan han pulong nga ‘naselyohan.’ Ha kadaan nga panahon, an selyo usa nga garamiton ha pagmarka hin dokumento. Ito nga pulong mahimo liwat magtudlok ha marka mismo. Hito nga panahon, komon an pagselyo ha usa nga dokumento o iba nga mga butang ha pagpakita han pagkahusto hito o han pagtag-iya hito.—1 Hadi 21:8; Job 14:17.

 Iginpariho ni Pablo an baraan nga espiritu ha usa nga selyo han hiya nagsiring: ‘An nagpaparig-on nga ikaw ngan kami kan Kristo, ngan an nanhirog ha aton amo an Dios; ngan ginselyohan man kita niya, ngan naghatag han patinga han espiritu ha aton mga kasingkasing.’ (2 Korinto 1:21, 22) Salit, ini nga mga Kristiano gindihogan ni Jehova han iya baraan nga espiritu basi ipakita nga hira iya panag-iya.

Kondi, may-ada duha nga pagselyo han mga dinihogan. An siyahan nga pagselyo naiiba ha ultimo nga pagselyo (1) ha katuyoan ngan (2) ha panahon. An katuyoan han siyahan nga pagselyo amo an pagpili hin bag-o nga membro nga idudugang ha dinihogan nga mga Kristiano. An ultimo nga pagselyo nagpaparig-on nga ini nga pinili ngan sinelyohan nga indibiduwal bug-os nga nagpapakita han iya pagkamaunungon. Dida la ha ultimo nga pagselyo permanente nga siselyohan ‘an agtang’ han usa nga dinihogan, nga nagpapakilala ha iya sugad nga nasarihan ngan matinumanon nga “surugoon han aton Dios.” An pagselyo nga gin-unabi ha Pahayag kapitulo 7 nagtutudlok hinin ultimo nga pagselyo.—Pahayag 7:3.

May kalabotan ha panahon han siyahan nga pagselyo, hi apostol Pablo nagsurat ha dinihogan nga mga Kristiano: “Ha iya man, han pakabati niyo han pulong han kamatuoran, han maopay nga sumat han iyo kaluwasan, ha iya, ha iyo man pagtoo, ginselyohan kamo han espiritu santo han saad.” (Efeso 1:13, 14) Ha damu nga kahimtang, an rekord han Biblia nagpapakita nga an mga Kristiano ha siyahan nga siglo ginselyohan waray pag-iha katapos nira hibatian an maopay nga sumat ngan nagin mga sumurunod ni Kristo. (Buhat 8:15-17; 10:44) An sugad nga pagselyo nagpapakita han pag-uyon han Dios ha ira. Kondi diri ito nagpapakita hin permanente nga pag-uyon han Dios. Kay ano?

Hi Pablo nagsiring nga an dinihogan nga mga Kristiano ginselyohan ha adlaw han pagpagowa. (Efeso 4:30) Nagpapakita ini nga ginkikinahanglan an paglabay han panahon, nga kasagaran damu ka tuig, katapos hiton siyahan nga pagselyo. An mga dinihogan kinahanglan magpabilin nga matinumanon tikang ha adlaw nga ginselyohan hira han baraan nga espiritu tubtob ha adlaw han ira pakagawas tikang ha unudnon nga lawas—karuyag sidngon, tubtob ha ira kamatay. (Roma 8:23; Filipos 1:23; 2 Pedro 1:10) Salit, ha kataposan gud la han kinabuhi ni Pablo nga hiya nakagsiring: “Natapos ko an akon pakipagrumba, akon gintipigan an pagtoo. Niyan naghuhulat ha akon an pudong-pudong han katadongan.” (2 Timoteo 4:6-8) Dugang pa, hi Jesus nagsiring ha usa nga kongregasyon han dinihogan nga mga Kristiano: “Magmatinumanon ka tubtob ha kamatayon ngan tatagan ko ikaw han pudong-pudong han kinabuhi.”—Pahayag 2:10; 17:14.

An pulong nga “pudong-pudong,” o korona naghahatag hin dugang nga pamatuod nga malabay an panahon butnga han siyahan ngan han ultimo nga pagselyo. Kay ano? Ha kadaan nga panahon, kustomre na an paghatag hin pudong-pudong ha paradalagan nga nagdaog han rumba. Basi makarawat an pudong-pudong, diri la pag-api ha rumba an iya sadang himoon. Kinahanglan hiya dumalagan tubtob ha kataposan. Ha pariho nga paagi, an dinihogan nga mga Kristiano kukoronahan la hin diri-mamaratyon nga kinabuhi ha langit kon magpapadayon hira tubtob ha kamatayon—tikang ha siyahan tubtob ha ultimo nga pagselyo.—Mateo 10:22; Jakobo 1:12.

San-o makarawat han ultimo nga pagselyo an naselyohan na nga nanhibilin han dinihogan nga mga Kristiano? An bisan hin-o nga buhi pa dinhi ha tuna siselyohan ha ira “mga agtang” antes magtikang an daku nga kagol-anan. Kon buhian na an upat nga hangin han kagol-anan, an ngatanan nga membro han espirituwal nga Israel nakakarawat na han ultimo nga pagselyo, bisan kon may pipira nga buhi pa ha unod ngan kinahanglan pa tapuson an ira kinabuhi ha tuna.