Puydi Mo ba Pahaluagon an Imo Gugma?

AN KADENA han angkla han barko kinahanglan nga makailob ha magkusog hinduro nga pwersa basi diri ig-anod an barko. Kondi, posible la ini kon marig-on gud an mga kadena. Kay kon diri, mauutod ito.

Pariho hito an kahimtang han Kristiano nga kongregasyon. Basi magin marig-on ngan mahimsog an kongregasyon, an mga membro kinahanglan bug-os nga nagkakaurosa. Ano an nagbubugkos ha ira? An gugma, nga amo an pinakamakusog nga pwersa ha pagkaurosa. Diri urusahon nga hi Jesu-Kristo nagsiring ha iya mga disipulo: “Ako mahatag ha iyo hin usa nga bag-o nga sugo, nga kamo maghigugmaanay an usa kag usa; nga sugad gud han akon paghigugma ha iyo, kamo man maghigugmaanay an usa kag usa. Tungod hini an ngatanan makilala, nga kamo akon mga tinon-an, kon kamo maghigugmaanay an usa kag usa.” Oo, an totoo nga mga Kristiano may-ada gugma ha usa kag usa nga lahos pa ha pagkamagsangkay la ngan pagtahod ha kada tagsa. Ira ginpapatubo an nagsasakripisyo-ha-kalugaringon nga gugma.—Juan 13:34, 35.

Pag-apresyar ha Aton mga Igkasi-Tumuroo

An damu nga kongregasyon ginkukompwesto hin mga tawo nga magkalain-lain an edad, rasa, nasyonalidad, kultura, yinaknan, ngan sosiedad nga gintikangan. An kada membro may kalugaringon nga mga karuyag ngan diri-karuyag, mga ginlalaoman ngan nababarak-an, ngan kasagaran nga an kada tagsa may-ada personal nga problema—bangin sakit o kakurian ha pinansyal. Ini nga pagkaiba-iba mahimo magin problema ha pagkaurosa han mga Kristiano. Ano man an makakabulig ha aton ha pagpahaluag han aton gugma ngan pagpabilin nga nagkakaurosa bisan pa han problema? An sinsero nga apresasyon ha ngatanan dida ha kongregasyon mabulig ha aton nga mapahilarom an aton gugma ha usa kag usa.

Kondi, ano an kahulogan han pag-apresyar ha usa? Sumala ha The New Shorter Oxford English Dictionary, an pulong nga “pag-apresyar” nangangahulogan hin “pagin mahunahunaon o sensitibo ha; igo nga pagtagad; pagkilala sugad nga birilhon o maopay hinduro; pagin mapasalamaton ha.” Kon inaapresyar naton an aton mga igkasi-tumuroo, sensitibo kita ha ira panginahanglan, ginpapabilhan gud naton hira, nakikita naton an ira kaopayan, ngan mapasalamaton kita nga kaupod naton hira ha pagsingba. Sugad nga resulta, napapatubo an aton duro nga gugma ha ira. An halipot nga paghisgot ha iginsurat ni apostol Pablo ha mga Kristiano ha Korinto han siyahan nga siglo mabulig ha aton nga masabtan kon paonan-o naton bug-os nga maipapakita an gugma sugad nga Kristiano.

An mga Taga-Korinto “Kulang hin Paghigugma”

Ginsurat ni Pablo an iya siyahan ngan ikaduha nga surat ha mga taga-Korinto han 55 K.P. An iya ginsiring nagpapasabot nga an iba ha kongregasyon ha Korinto kulang hin apresasyon ha ira mga igkasi-tumuroo. Iginhulagway ni Pablo an kahimtang pinaagi han masunod nga mga pulong: “Iton amon baba nagkakabubuka nganhi ha iyo O, mga taga-Korinto, iton amon kasingkasing nadagku. Waray niyo mga kakulangan ha amon, kondi kamo in kulang hin paghigugma ha iyo ngahaw.” (2 Korinto 6:11, 12) Ano an iginpapasabot ni Pablo han iya iginhulagway hira sugad nga “kulang hin paghigugma”?

Karuyag niya sidngon nga hira lamot ngan diri  mahinatagon. Usa nga eskolar han Biblia an naghunahuna nga an gugma kan Pablo han mga taga-Korinto “napugngan han magkuri nga kahimtang tungod han waray basihan nga pagsuspetsa . . . ngan naul-olan nga garbo.”

Tigamni an iginsagdon ni Pablo: “Basi nga makabalos kamo hin sugad nga paagi (nagyayakan ako sugad hin ngadto ha akon mga anak), managku [“magpahaluag,” NW] man kamo.” (2 Korinto 6:13) Gindasig ni Pablo an mga taga-Korinto nga pahaluagon an ira gugma ha mga igkasi-tumuroo. Mangangahulogan ini hin pagin napagios, diri tungod han kawaray-pagsarig ngan gudtiay nga sayop, kondi tungod han positibo nga panhunahuna ngan mahinatagon nga kasingkasing.

Pagpahaluag han Gugma Yana

Makalilipay makita nga an totoo nga mga magsiringba han Dios yana nangangalimbasog gud ha pagpahaluag han ira gugma ha usa kag usa. Oo, kinahanglan gud pangalimbasogan an pagpahaluag han gugma. Diri la ito tubtob ha paghibaro han bubuhaton. Nag-oobligar ito ha aton nga gumios nga naiiba gud ha mga diri nagkikinabuhi uyon ha mga prinsipyo ha Biblia. An sugad nga mga tawo agsob nga waray apresasyon ha iba. Mahimo hira magin diri matinagaron, waray respeto, ngan nakakainsulto. Salit, diri gud naton pasagdan nga makaimpluwensya ini ha aton. Magigin makasurubo gud kon an aton gugma, pariho han kanan mga taga-Korinto, mapugngan han kawaray pagsarig! Mahimo ini mahitabo kon madagmit kita makabiling hin mga sayop ha Kristiano nga bugto kondi mahinay makakita han iya mga kaopayan. Mahimo liwat ito mahitabo kon kulang an aton gugma ha usa tungod kay iba an iya kultura.

Ha kabaliktaran, an surugoon han Dios nga nagpapahaluag han gugma may-ada sinsero nga apresasyon ha mga igkasi-tumuroo. Ginpapabilhan gud niya hira, iya gintatahod an ira dignidad, ngan sensitibo ha ira panginahanglan. Bisan kon  may husto nga hinungdan ha pagreklamo, andam hiya magpasaylo ngan diri nadumot. Lugod, natapod hiya ha mga motibo han iya mga igkasi-tumuroo. An pagin mahinatagon nabulig ha iya nga maipakita an gugma nga pariho han ginhunahuna ni Jesus han hiya nagtagna: “Tungod hini an ngatanan makilala, nga kamo akon mga tinon-an, kon kamo maghigugmaanay an usa kag usa.”—Juan 13:35.

Makig-upod ha Iba Ngan Makigsangkay ha Bag-o nga mga Kakilala

An kinasingkasing nga gugma magpapagios ha aton nga makig-upod ha iba gawas han aton kasangkayan na ngan makig-upod ha mga kakongregasyon nga diri naton agsob makaistorya. Hin-o hira? An iba han aton Kristiano nga kabugtoan awdanon o, ha pipira nga hinungdan, gutiay la an kasangkayan. Bangin ha siyahan abaton naton nga gutiay la an aton ginkaparihoan ha ira, labot la han aton ginkaparihoan ha pagsingba. Kondi diri ba totoo nga an pipira han duok hinduro nga pagkasangkay nga gin-unabi ha Biblia nakultibar han mga tawo nga kon kitaon, baga hin gutiay la an ginkaparihoan?

Pananglitan, hi Rut ngan hi Noemi magkaiba gud ha edad, nasyonalidad, kultura, ngan bisan ha yinaknan. Bisan pa hito, an ira pagkamagsangkay waray maapektohi han sugad nga mga ginkaibahan. Hi Jonatan ginpadaku sugad nga prinsipe, ngan hi David sugad nga paramangno han mga karnero. Daku an diperensya han ira edad, kondi an ira pagkamagsangkay usa han pinakaduok nga gin-unabi ha Baraan nga Kasuratan. Ini nga mga pagkamagsangkay nakahatag hin kalipay ngan espirituwal nga bulig ha mga nakaeksperyensya hito.—Rut 1:16; 4:15; 1 Samuel 18:3; 2 Samuel 1:26.

Bisan yana napapatubo an duok nga pagkamagsangkay ha butnga han totoo nga mga Kristiano nga magkaiba an mga edad o kahimtang ha kinabuhi. Pananglitan, hi Regina usa nga nagsusolo nga iroy nga duha an tinedyer nga anak. a Sagipo hiya ngan gutiay la an panahon ha pakig-uruurupod ha iba. Hira Harald ngan Ute retirado na nga mag-asawa nga waray anak. Kon kitaon, baga hin gutiay la an ginkakaparihoan hinin duha nga pamilya. Kondi igin-aplikar nira Harald ngan Ute an sagdon han Biblia nga pahaluagon an ira gugma. Ira igin-uupod hi Regina ngan an iya mga anak ha damu nga buruhaton, ha ministeryo ngan ha pipira nga pagpahalibway.

Puydi ba naton pahaluagon an aton gugma lahos pa han agsob makaupod naton? Kay ano nga diri pangalimbasogan nga an duok nga pakigsangkay ha mga igkasi-tumuroo nga iba an nasyonalidad, kultura, o pangidaron?

Matinagaron ha Panginahanglan han Iba

An pagkamahinatagon magpapagios ha aton nga magin matinagaron ha panginahanglan han iba. Ano nga klase hin panginahanglan? Bueno, obserbahi an mga membro han Kristiano nga kongregasyon. An mga batan-on nagkikinahanglan hin giya, an mga lagas nagkikinahanglan hin pagdasig, an bug-os-panahon nga mga ministro nagkikinahanglan hin kumendasyon ngan suporta, ngan an mga igkasi-tumuroo nga masurub-on nagkikinahanglan hin makakaistorya. An ngatanan may-ada panginahanglan. Karuyag naton tagdon ini nga panginahanglan tubtob ha aton mahihimo.

An pagpahaluag nangangahulogan liwat nga magigin masinabuton kita ha mga may-ada espesyal nga panginahanglan. May hinbabaroan ka ba nga grabe an sakit o naatubang hin iba pa nga kasakitan ha kinabuhi? An pagpahaluag han gugma ngan pagkultibar han pagkamahinatagon mabulig ha imo nga magin masinabuton ngan mabinuligon ha mga nanginginahanglan.

Samtang natutuman an mga tagna han Biblia ha hirani nga tidaraon, an marig-on nga mga bugkos han pagkaurosa ha kongregasyon mas magigin birilhon gud kay ha mga panag-iya, abilidad, o mga nahimo. (1 Pedro 4:7, 8) An tagsa ha aton personal nga makakabulig ha pagparig-on han mga bugkos han pagkaurosa ha aton kongregasyon pinaagi ha pagpahaluag han aton gugma ha aton mga igkasi-tumuroo. Makakasiguro kita han hura nga bendisyon ni Jehova tungod han pagbuhat uyon ha mga pulong han iya Anak, hi Jesu-Kristo, nga nagsiring: “Ini amo an akon sugo, nga maghigugmaanay kamo an usa kag usa, sugad gud han akon paghigugma ha iyo.”—Juan 15:12.

[Footnote]

[Blurb ha pahina 10]

An pag-apresyar ha aton Kristiano nga kabugtoan nangangahulogan nga ginpapabilhan gud naton hira, gintatahod an ira dignidad, ngan sensitibo ha ira mga panginahanglan