Buligi an Iba nga Sundon an Igintututdo han Biblia

“An aadto ha maopay nga tuna, amo adton mga nagpakabati han pulong, ngan tinipigan hin maligdong, ngan maopay nga kasingkasing, ngan namunga hin bunga nga nagdayon ha mapailubon.”—LUKAS 8:15.

1, 2. (a) An libro nga Ano Gud ba an Igintututdo han Biblia? dinisenyo para ha ano nga katuyoan? (b) Ha bag-o la nga mga tuig, paonan-o ginbendisyonan ni Jehova an mga pangalimbasog han iya katawohan ha panhimo hin mga disipulo?

 “MAOPAY gud an libro. Naruruyagan gud ito han akon mga estudyante. Naruruyagan ko gud ito. Pinaagi hini nga libro posible an pagtikang hin mga pag-aram ha Biblia ha mga tawo dida mismo ha ira purtahan.” Ito an ginsiring han usa nga payunir han mga Saksi ni Jehova mahitungod han libro nga Ano Gud ba an Igintututdo han Biblia? a Mahitungod hini nga libro, usa nga edaran na nga parasamwak han Ginhadian an nagsiring: “Ha akon 50 ka tuig nga pagin aktibo ha ministeryo, nakapribilehiyo ako nga mabuligan an damu nga tawo nga makilala hi Jehova. Kondi masisiring ko nga maopay gud ini nga libro. Makaruruyag an makapaaghat nga mga retrato ngan ilustrasyon.” Ito ba an imo inaabat mahitungod han Igintututdo han Biblia nga libro? Ini nga bulig ha pag-aram ha Biblia dinisenyo ha pagbulig ha imo ha pagtuman han sugo ni Jesus: “Busa, lakat kamo, ngan manhimo kamo hin mga tinon-an ha ngatanan nga mga nasud . . . Pagtutdui hira ha pagbantay han ngatanan nga mga bagay, nga akon iginsugo ha iyo.”—Mateo 28:19, 20.

² Sigurado nga nalilipay an kasingkasing ni Jehova samtang nakikita niya an mga 6.6 milyon nga iya mga Saksi nga kinaburut-on nga nasunod ha sugo ni Jesus nga manhimo hin mga disipulo. (Proberbios 27:11) Matin-aw nga ginbibendisyonan ni Jehova an ira mga pangalimbasog. Pananglitan, durante han 2005 an maopay nga sumat iginsangyaw ha 235 nga katunaan ngan, ha aberids, sobra 6,061,500 nga pag-aram ha Biblia an gindumara. Sugad nga resulta, damu an ‘nakabati han pulong han Dios ngan kinarawat hito, diri sugad nga pulong han mga tawo, kondi ha pagkamatuod, nga pulong han Dios.’ (1 Tesalonika 2:13) Durante han naglabay nga duha ka tuig, sobra katunga han usa ka milyon nga bag-o nga mga disipulo an nagpahiuyon han ira kinabuhi ha mga suruklan ni Jehova ngan nagdedikar han ira kalugaringon ha Dios.

3. Ano nga mga pakiana mahitungod han paggamit han Igintututdo han Biblia nga libro an uusisahon hini nga artikulo?

³ Naeksperyensyahan mo na ba hinin bag-o la an kalipay ha pagdumara hin pag-aram ha Biblia ha usa ka tawo? Ha bug-os nga kalibotan, may-ada pa gihapon mga tawo nga may “maligdong, ngan maopay nga kasingkasing” nga ha pakabati han pulong han Dios, ‘magtitipig hito ngan mamumunga hin bunga nga magdadayon ha mapailubon.’ (Lukas 8:11-15) Aton paghisgotan kon paonan-o mo magagamit an Igintututdo han Biblia nga libro ha paghimo hin mga disipulo. Ha aton paghisgot, uusisahon an tulo nga pakiana: (1) Paonan-o  ka makakagtikang hin pag-aram ha Biblia? (2) Ano nga mga paagi han pagtutdo an epektibo gud? (3) Paonan-o mo mabubuligan an usa nga diri la magin estudyante kondi magin magturutdo liwat han sinurat nga Pulong han Dios, an Biblia?

Kon Paonan-o Ka Makakagtikang hin Pag-aram ha Biblia

4. Kay ano nga an iba bangin mag-alang ha pag-aram ha Biblia, ngan paonan-o mo mabubuligan hira nga mawara an ira pag-alang?

⁴ Kon patabukon ka ha haluag nga sapa ha usa la nga paglukso, bangin magdumiri ka. Kondi kon may iginbutang nga tungtongan nga mga bato nga gudti an lat-ang, bangin mas maruruyag ka nga sarihan an pagtabok. Ha sugad man nga paagi, an okupado nga tawo bangin mag-alang ha pag-aram ha Biblia. An tagbalay bangin maghunahuna nga daku hinduro nga panahon ngan pangalimbasog an ginkikinahanglan ha pag-aram hito. Paonan-o mo mabubuligan hiya nga mawara an iya pag-alang? Pinaagi han pagdumara hin sunod-sunod nga haglipot, impormatibo nga mga paghisgot, magagamit mo an Igintututdo han Biblia nga libro ha pagbulig ha iya nga magkaada regular nga pag-aram ha Pulong han Dios. Kon mag-andam ka hin maopay, an tagsa nga pagbalik bisita ha iya magigin sugad hin tungtongan nga bato ngadto ha iya pakigsangkay kan Jehova.

5. Kay ano nga kinahanglan basahon mo an Igintututdo han Biblia nga libro?

⁵ Kondi, antes mo mabuligan an usa nga magpahimulos ha Igintututdo han Biblia nga libro, kinahanglan magin pamilyar ka gud hito. Nabasa mo na ba an libro tikang ha tinikangan tubtob ha kataposan? Han nagbakasyon an usa nga mag-asawa, gindara nira an libro ngan gintikangan pagbasa ito samtang nagrirelaks ha baybayon. Han dinaop ha ira an usa nga babaye nga nagbabaligya ha mga turista, nakita niya an ulohan nga Ano Gud ba an Igintututdo han Biblia? Iya ginsumatan an mag-asawa nga pipira pa la ka oras antes hito, nag-ampo hiya mahitungod hito mismo nga pakiana, nangangaro ha Dios hin baton. Malipayon nga iginhatag han mag-asawa ha babaye an usa nga kopya han libro. Imo ba ‘ginpapahimulosan an oras’ nga basahon ini nga libro, bangin ha ikaduha na ka beses, samtang may-ada ginhuhulat nga kasabot o napahuway ha trabaho o ha eskwelahan? (Efeso 5:15, 16) Kon buhaton mo ito, magigin pamilyar ka hini nga bulig ha pag-aram ha Biblia ngan makakahimo liwat hin mga higayon ha pakiistorya ha iba mahitungod han mga sulod hito.

6, 7. Paonan-o mo magagamit an Igintututdo han Biblia nga libro ha pagtikang hin mga pag-aram ha Biblia?

⁶ Kon igintatanyag an libro ha ministeryo ha publiko, gamita hin maopay an mga retrato, teksto, ngan pakiana ha pahina 4, 5, ngan 6. Pananglitan, mahimo mo tikangan an pakiistorya pinaagi han pagpakiana, “Tungod han ngatanan nga problema nga inaatubang han katawohan yana, ha imo pag-abat, ano an masasarigan nga surok han giya?” Katapos pamatian hin maopay an baton han imo kaistorya, basaha an 2 Timoteo 3:16, 17, ngan isaysay nga an Biblia nagtatanyag hin totoo nga kasulbaran ha mga problema han katawohan. Katapos, ipakita ha tagbalay an pahina 4 ngan 5, ngan pakianhi: “Ha mga kahimtang nga ipinapakita hini nga mga pahina, hain an nakakaguol gud ha imo?” Kon pilion han tagbalay an usa nga kahimtang, pakapti ha iya an libro samtang binabasa mo an kaupod nga teksto ha Biblia. Sunod, basaha an pahina 6, ngan pakianhi hiya, “Ha unom nga pakiana ha ubos hini nga pahina, hain  an karuyag mo nga mabaton?” Kon pilion niya an usa, ipakita ha iya an kapitulo nga nabaton hito nga pakiana, ibilin ha iya an libro, ngan makigsabot ha pagbisita utro ngan hisgotan ito nga pakiana.

⁷ An presentasyon nga iginsaysay pa la matatapos hin singko minutos la. Kondi, hiton pipira ka minutos, hinbaroan mo na kon ha ano interesado an tagbalay, nabasa ngan naiaplikar an duha nga teksto, ngan nahimo an basihan para ha pagbalik bisita. Posible gud nga an imo halipot nga pakiistorya ha tagbalay amo an iya pinakanakakadasig ngan pinakanakakaliaw nga eksperyensya katapos hin hilawig nga panahon. Sugad nga resulta, bisan an okupado nga tawo posible gud nga magpamulat ha pakiistorya ha imo hin pipira pa ka minutos samtang binubuligan mo hiya ha pagbuhat han iya sunod nga pitad ha paglakat ha “dalan nga tipakadto ha kinabuhi.” (Mateo 7:14) Maabot an panahon nga samtang nagtutubo an interes han tagbalay, sadang dugangan an kahilawig han pag-aram. Mahihimo ini pinaagi han paghangyo nga lumingkod kamo ngan mag-aram ha sulod hin hiruhilawig nga espisipiko nga oras.

Mga Paagi han Pagtutdo nga Epektibo Gud

8, 9. (a) Paonan-o mo mahimo iandam an imo estudyante ha Biblia nga malamposan an mga ulang ngan pagsari nga posible maeksperyensyahan niya? (b) Diin hiaagian an diri-nasusunog nga materyales ha pagtukod hin marig-on nga pagtoo?

⁸ Kon an usa magtikang na pagsunod han igintututdo han Biblia, posible nga umatubang hiya hin mga problema nga mahimo makaulang han iya pag-uswag. Hi apostol Pablo nagsiring: “An ngatanan nga mahigugma mabuhi nga matinahuron ha Dios kan Kristo mag-aantos hin pagtimaraota.” (2 Timoteo 3:12) Iginpariho ni Pablo ini nga mga pagsari ha kalayo nga makakabungkag han diri marig-on nga materyales ha pagtukod kondi diri makakadaot ha materyales sugad han bulawan, salapi, ngan presyoso nga bato. (1 Korinto 3:10-13; 1 Pedro 1:6, 7) Basi mabuligan an imo estudyante ha Biblia nga mapatubo an mga kalidad nga ginkikinahanglan basi makailob ha mga pagsari nga bangin maeksperyensyahan niya, kinahanglan buligan mo hiya pinaagi ha pagtukod nga ginagamit an diri-nasusunog nga materyales.

⁹ Iginpariho han salmista “an mga pulong ni Jehova” ha “salapi nga ginsaraan dida ha pamagbahan nga tuna, ginputli hin makapito.” (Salmo 12:6) Oo, aada ha Biblia an ngatanan nga presyoso nga materyales nga magagamit ha pagtukod hin marig-on nga pagtoo. (Salmo 19:7-11; Proberbios 2:1-6) Ngan ipinapakita ha imo han Igintututdo han Biblia nga libro kon paonan-o magin epektibo ha paggamit han Kasuratan.

10. Paonan-o mo mabubuligan an estudyante nga isentro an iya atensyon ha Biblia?

¹⁰ Durante han pag-aram, buligi an estudyante nga isentro an iya atensyon ha igintagana nga mga teksto ha tagsa nga kapitulo nga ginhihisgotan. Pagbangon hin mga pakiana basi mabuligan hiya nga masabtan an nangunguna nga mga teksto ha Biblia ngan iaplikar ito ha iya kalugaringon. Pag-ikmat nga diri diktahan hiya kon ano an bubuhaton. Lugod, subara hi Jesus. Han an usa nga lalaki nga batid ha Balaud nagpakiana ha iya, hi Jesus binaton: “Ha Kasugoanan, ano an nahisurat? Ano an imo pagbasa?” An lalaki binaton tikang ha Kasuratan, ngan binuligan hiya ni Jesus nga masabtan kon paonan-o iaaplikar an prinsipyo ha iya kalugaringon. Pinaagi han paggamit hin ilustrasyon, binuligan liwat hiya ni Jesus nga masabtan kon paonan-o an katutdoan sadang makaapekto ha iya. (Lukas 10:25-37) An Igintututdo han Biblia nga libro puno hin simple nga mga ilustrasyon nga magagamit mo ha pagbulig ha estudyante ha pag-aplikar han Kasuratanhon nga mga prinsipyo ha iya kalugaringon.

11. Mationan-o kadamu nga aradman an sadang niyo paghisgotan ha tagsa nga pag-aram?

¹¹ Ginagamit han libro nga Igintututdo han Biblia an simple, direkta nga mga pulong ha pagsaysay han Pulong han Dios, sugad la nga iginsaysay ni Jesus an makuri nga mga ideya ha simple nga mga pulong. (Mateo 7:28, 29) Sunda an iya susbaranan. Isaysay an impormasyon ha simple, klaro, ngan husto nga paagi. Ayaw pag-apura nga tapuson an aradman. Lugod, tagda an kahimtang ngan abilidad han estudyante ha pagdesisyon kon pira nga parapo an paghihisgotan niyo durante han tagsa nga pag-aram. Maaram hi Jesus han mga limitasyon han iya mga disipulo ngan waray niya pakurii hira hin mas damu nga impormasyon kay ha ira ginkikinahanglan hito nga panahon.—Juan 16:12.

12. Paonan-o sadang gamiton an apendise?

¹² An Igintututdo han Biblia nga libro may-ada apendise nga 14 an topiko. Depende ha panginahanglan  han estudyante, sugad nga magturutdo makakadesisyon ka kon paonan-o magagamit ha gimaopayi nga paagi ini nga impormasyon. Pananglitan, kon an estudyante nakukurian pagsabot ha usa nga topiko o may-ada mga pakiana ha espisipiko nga mga butang tungod han iya mga tinotoohan hadto, bangin igo na nga ipakita ha iya an angayan nga bahin han apendise, ngan hiya na la an mag-aram hito. Ha luyo nga bahin, kon kinahanglanon han estudyante, mahimo mo paghisgotan ha iya an impormasyon. An apendise may-ada importante nga Kasuratanhon nga mga topiko, sugad han “‘Kalag’ Ngan ‘Espiritu’—Ano Gud ba an Kahulogan Hini nga mga Pulong?” ngan “Pagkilala ha ‘Babilonya nga Daku.’” Bangin karuyag mo paghisgotan ha imo estudyante ini nga mga topiko. Tungod kay waray iginhatag nga mga pakiana ha mga topiko nga ginhihisgotan ha apendise, kinahanglan magin pamilyar ka ha impormasyon hito basi makahimo ka hin mapulsanon nga mga pakiana.

13. Ano an bahin han pag-ampo ha pagparig-on han pagtoo?

¹³ ‘Kon hi Jehova diri magtukod han balay, kawang la an pagbuhat han mga magtitindog hito,’ siring han Salmo 127:1. Salit, samtang nag-aandam ka ha pagdumara hin pag-aram ha Biblia, pag-ampo para han bulig ni Jehova. An imo mga pag-ampo ha tinikangan ngan kataposan han tagsa nga pag-aram sadang magpakita han imo duok nga relasyon kan Jehova. Dasiga an estudyante nga mag-ampo kan Jehova para ha kinaadman nga masabtan an Iya Pulong ngan para ha kusog nga iaplikar an sagdon hito. (Jakobo 1:5) Kon buhaton ito han estudyante, mapaparig-on hiya nga makailob ha mga pagsari ngan padayon nga mag-uuswag hiya nga marig-on ha pagtoo.

Buligi an mga Estudyante ha Biblia nga Magin mga Magturutdo

14. Ano nga pag-uswag an ginkikinahanglan han mga estudyante ha Biblia?

¹⁴ Basi sundon han aton mga estudyante ha Biblia “an ngatanan nga mga bagay” nga iginsugo ni Jesus ha iya mga disipulo, kinahanglan mag-uswag hira tikang ha pagin mga estudyante ha Pulong han Dios ngadto ha pagin mga magturutdo hito. (Mateo 28:19, 20; Buhat 1:6-8) Ano an mahihimo mo basi mabuligan an estudyante nga magkaada sugad hito nga pag-uswag ha espirituwal?

15. Kay ano nga sadang dasigon mo an imo estudyante ha Biblia nga tumambong ha Kristiano nga mga katirok?

¹⁵ Ha tinikangan gud han siyahan nga pag-aram, dasiga an estudyante nga umupod ha imo ha pagtambong ha Kristiano nga mga katirok. Isaysay ha iya nga hini nga mga katirok nakakarawat mo an pagbansay sugad nga magturutdo han Pulong han Dios. Durante han pipira ka semana, magkaada pipira ka minutos ha kataposan han tagsa nga pag-aram ha Biblia basi isaysay an programa han espirituwal nga pagtutdo nga nakakarawat mo ha magkalain-lain nga katirok ngan asembleya. Isaysay hin madasigon an mga kapulsanan nga nakakarawat mo durante hini nga mga katirok. (Hebreo 10:24, 25) Kon matikangan na han estudyante an regular nga pagtambong ha mga katirok, posible nga magigin magturutdo hiya han Pulong han Dios.

16, 17. Ano an pipira nga tumong nga puydi himoon ngan madangat han usa nga estudyante ha Biblia?

¹⁶ Buligi an estudyante ha Biblia nga magkaada mga tumong nga mahimo niya madangat. Pananglitan, dasiga hiya nga isumat ha iya sangkay o paryente an iya hinbabaroan. Pagsuhestyon liwat nga magin tumong niya an pagbasa han bug-os nga Biblia. Kon mabuligan mo hiya ha pagtikang ngan pagpadayon hin rutina han regular nga pagbasa han Biblia, magigin mapulsanon ha iya ini nga batasan bisan kon maiha na hiya nga bawtismado. Dugang pa, kay ano nga diri magsuhestyon nga  magin tumong han estudyante an paghinumdom hin bisan usa la nga teksto ha Biblia nga nabaton ha nangunguna nga pakiana tikang ha tagsa nga kapitulo han Igintututdo han Biblia nga libro? Ha pagbuhat hito, hiya magigin ‘magburuhat nga diri naaawod han iya buhat, nga nagamit hin maopay han pulong nga kamatuoran.’—2 Timoteo 2:15.

¹⁷ Imbes nga tutdoan an estudyante nga yaknon la an iya minimorya nga mga teksto o ihatag an sumaryo hito, dasiga hiya nga isaysay an naaplikar nga mga bersikulo han Biblia samtang binabaton niya adton nagpapakiana ha iya han hinungdan han iya pagtoo. Makakabulig an halipot nga mga sesyon ha pagbansay, nga ikaw kunohay an paryente o katrabaho nga naghahangyo ha iya nga isaysay an iya mga tinotoohan. Samtang nabaton an estudyante, ipakita ha iya kon paonan-o mabaton nga “may kaaghop ngan pagtahod.”—1 Pedro 3:15.

18. Kon kwalipikado na an estudyante ha Biblia nga magin diri-bawtismado nga magwarali, ano an dugang pa nga bulig nga maihahatag mo ha iya?

¹⁸ Pag-abot han panahon, an estudyante mahimo na magin kwalipikado nga makigbahin ha pagsangyaw. Pabug-ati nga usa nga pribilehiyo an tugotan nga makigbahin hini nga buruhaton. (2 Korinto 4:1, 7) Kon masiguro han mga tigurang nga kwalipikado na an estudyante nga magin diri-bawtismado nga magwarali, buligi hiya ha pag-andam hin simple nga presentasyon ngan katapos, updi hiya ha pagsangyaw. Padayon nga updi hiya hin regular ha magkalain-lain nga bahin han ministeryo ha publiko, ngan tutdui hiya kon paonan-o mag-aandam ngan maghihimo hin epektibo nga mga pagbalik bisita. An imo maopay nga susbaranan magigin positibo nga impluwensya.—Lukas 6:40.

“Maluwas Ka Ngan an Imo Mamarati”

19, 20. Ano an sadang magin tumong naton, ngan kay ano?

¹⁹ Sigurado, ginkikinahanglan an duro nga kamaduruto basi mabuligan an usa nga “makadangat ha pagkilala han kamatuoran.” (1 Timoteo 2:4) Kondi, pipira la nga kalipay ha kinabuhi an maitatanding ha kalipay nga resulta han pakabulig ha usa nga sundon an igintututdo han Biblia. (1 Tesalonika 2:19, 20) Oo, pagkadaku han aton pribilehiyo nga magin “mga kabulig han Dios” hinin bug-os-kalibotan nga buruhaton ha pagtutdo!—1 Korinto 3:9.

²⁰ Pinaagi kan Jesu-Kristo ngan han gamhanan nga mga anghel, diri mag-iiha ipapadapat na ni Jehova an iya paghukom ha mga ‘waray kumilala ha Dios ngan waray pagtuman han maopay nga sumat han aton Ginoo Jesus.’ (2 Tesalonika 1:6-8) Namimeligro gud an mga kinabuhi. Mahihimo mo ba nga tumong an pagdumara hin bisan usa la nga pag-aram ha Biblia ha libro nga Ano Gud ba an Igintututdo han Biblia? Samtang ginbubuhat mo ini, magkakaada ka higayon nga “maluwas ka ngan an imo mamarati.” (1 Timoteo 4:16) Yana labaw ha kakan-o pa man, apurado gud nga buligan naton an iba nga sundon an igintututdo han Biblia.

[Footnote]

Ano an Imo Hinbaroan?

• An Igintututdo han Biblia nga libro dinisenyo para ha ano nga katuyoan?

• Paonan-o ka makakagtikang hin mga pag-aram ha Biblia nga ginagamit an Igintututdo han Biblia nga libro?

• Ano nga mga paagi han pagtutdo an epektibo gud?

• Paonan-o mo mabubuligan an usa nga estudyante nga magin magturutdo han Pulong han Dios?

[Mga Pakiana]

[Retrato ha pahina 26]

Ginagamit mo ba hin epektibo ini nga libro?

[Retrato ha pahina 27]

An halipot nga paghisgot mahimo makaaghat ha usa nga magin interesado ha pagkaada kahibaro ha Biblia

[Retrato ha pahina 29]

Ano an imo mahihimo basi giyahan an atensyon han estudyante ngada ha Biblia?

[Retrato ha pahina 30]

Buligi an estudyante ha Biblia nga mag-uswag