Igtutdo Kon Ano Gud an Igintututdo han Biblia
Igtutdo Kon Ano Gud an Igintututdo han Biblia
“Manhimo kamo hin mga tinon-an ha ngatanan nga mga nasud. . . . Pagtutdui hira.”—MATEO 28:19, 20.
1. Mationan-o kadamu nga tawo ha kalibotan an may-ada Biblia ha ira yinaknan?
AN Pulong ni Jehova, an Baraan nga Biblia, amo an usa han gidadaani nga mga libro ngan gidadamui an naipapanaltag ha kalibotan. Ha pinakaminos, an bahin hito iginhubad na ha sobra 2,300 nga yinaknan. Sobra 90 porsyento han mga umurukoy ha kalibotan an may-ada hito ha ira yinaknan.
2, 3. (a) Kay ano nga may-ada kawurok mahitungod han mga katutdoan han Biblia? (b) Ano nga mga pakiana an aton paghihisgotan?
2 Minilyon nga tawo an nagbabasa hin usa nga bahin han Biblia kada adlaw. An iba damu ka beses na nga nakabasa han bug-os nga Biblia. Yinukot nga relihiyoso nga grupo an nag-aangkon nga ira iginbabasar ha Biblia an ira mga katutdoan, kondi diri hira nagkakauruyon ha igintututdo hito. Nakakadugang pa ha kawurok an diri pagkaurosa han mga membro han pariho nga relihiyon. An iba nagruruhaduha mahitungod ha Biblia, ha gintikangan hito, ngan ha bili hito. Damu an nagtatagad hito sugad nga sagrado nga libro nga ginagamit la ha mga seremonya ha pagpanaad o ha pagpanumpa ha pagsumat han kamatuoran ha hukmanan.
3 Ha pagkamatuod, aada ha Biblia an gamhanan nga pulong, o mensahe, han Dios para ha katawohan. (Hebreo 4:12) Salit sugad nga mga Saksi ni Jehova, karuyag naton nga mahibaro an mga tawo kon ano an igintututdo han Biblia. Nalilipay kita ha pagbuhat han iginsugo ni Jesu-Kristo ha iya mga sumurunod han hiya nagsiring: “Lakat kamo, ngan manhimo kamo hin mga tinon-an ha ngatanan nga mga nasud. . . . Pagtutdui hira.” (Mateo 28:19, 20) Ha aton ministeryo ha publiko nakakaistorya naton an tangkod-an-kasingkasing nga mga tawo nga naguguol tungod han kawurok ha relihiyon nga kalyap ha kalibotan. Karuyag nira mahibaro han kamatuoran mahitungod han aton Maglalarang ngan naghihingyap gud nga mahibaro kon ano an ginsisiring han Biblia mahitungod han kahulogan han kinabuhi. Aton paghisgotan an tulo nga pakiana nga importante ha damu nga tawo. Ha tagsa nga pakiana, titigamnan naton kon ano an sayop nga ginsisiring han mga lider han relihiyon, ngan katapos, aton rirepasuhon kon ano gud an igintututdo han Biblia. Ini an mga pakiana: (1) An Dios ba nagtatagad ha aton? (2) Kay ano nga aanhi kita? (3) Ano an nahitatabo ha aton kon kita namamatay?
An Dios ba Nagtatagad?
4, 5. Kay ano nga an mga tawo naghuhunahuna nga an Dios diri nagtatagad ha aton?
4 Tikangan naton ha pakiana nga, An Dios ba nagtatagad ha aton? Makasurubo, damu an naghuhunahuna nga an Dios diri nagtatagad. Kay ano? An usa nga hinungdan, nagkikinabuhi hira ha kalibotan nga puno hin kapungot, girra, ngan pag-antos. ‘Kon an Dios tinuod nga nagtatagad,’ siring nira, ‘sigurado nga diri niya tutugotan nga mahitabo an sugad nga mga trahedya.’
5 An usa pa nga hinungdan kon kay ano nga an mga tawo naghuhunahuna nga an Dios diri nagtatagad ha aton, an mga lider han relihiyon nakakaaghat ha ira nga ito an ira abaton. Ano an agsob nga ginsisiring han mga klero kon nahitatabo an mga trahedya? Han namatay ha aksidente ha awto an duha nga gudtiay nga anak han usa nga babaye, an ira ministro nagsiring: “Kaburut-on ito han Dios. Nagkinahanglan hiya hin duha pa nga anghel.” Kon ginsisiring ito han mga klero, ha pagkamatuod ira ginbabasol an Dios ha mga trahedya nga nahitatabo. Kondi, an disipulo nga hi Jakobo nagsurat: “Waray bisan hin-o nga ginsulay nga magsiring, Ginsusulay ako han Dios; kay an Dios diri sadang pagsulayon hin maraot, diri hiya magsulay hin bisan hin-o nga tawo.” (Jakobo 1:13) Hi Jehova nga Dios diri gud nagpapahinabo hin karaotan. Oo, “ipahirayo tikang ha Dios, nga hiya magbuhat hin kahugawan.”—Job 34:10.
6. Hin-o an hinungdan han karaotan ngan pag-antos dinhi hini nga kalibotan?
6 Kay ano, kon sugad, nga duro an karaotan ngan pag-antos? An usa nga hinungdan, iginsalikway han katawohan ha kabug-osan an Dios sugad nga Magmarando, diri hira naruruyag magpasakop ha iya matadong nga mga balaud ngan prinsipyo. Diri maaram an mga tawo nga nagpapasakop hira ha Kaaway han Dios, hi Satanas, kay “an bug-os nga kalibotan kanan kayawan-on.” (1 Juan 5:19) An paghibaro hini nga kamatuoran nabulig ha aton nga mas masayon masabtan kon kay ano nga naeksister an magraot nga kahimtang. Hi Satanas maraot, mapungtanon, malimbong, ngan mabangis. Salit sadang laoman naton nga an kalibotan magpapakita han personalidad han magmarando hito. Diri urusahon nga duro an karaotan!
7. Ano an pipira nga hinungdan han pag-antos nga naieksperyensyahan naton?
7 An pagkadiri-hingpit han tawo usa pa nga hinungdan han pag-antos nga aton naieksperyensyahan. An makasasala nga mga tawo may tendensya nga makig-away para ha pagmando, ngan agsob nga nagriresulta ito hin mga girra, panalumpigos, ngan pag-antos. An Eklesiastes 8:9 angayan nga nasiring: “An usa ka tawo may gahum labaw han iba ha iya karaotan.” An dugang pa nga hinungdan han pag-antos amo an panahon ngan diri linalaoman nga mga hitabo. (Eklesiastes 9:11) Agsob nga naieksperyensyahan han mga tawo an kalamidad tungod kay nahitutuman nga aada hira ha peligroso nga lugar ha sayop nga panahon.
8, 9. Paonan-o kita nahibaro nga hi Jehova nagtatagad gud ha aton?
8 Nakakaliaw hibaroan nga hi Jehova diri nagpapahinabo hin pag-antos. Kondi nagtatagad gud ba an Dios mahitungod han nahitatabo ha aton kinabuhi? Oo an makalilipay nga baton! Maaram kita nga hi Jehova nagtatagad tungod kay an iya giniyahan nga Pulong nagsusumat ha aton kon kay ano nga tinutugotan niya an mga tawo nga magpadayon ha maraot nga paggawi. An mga hinungdan han Dios nag-uupod hin duha nga isyu: an iya pagkasoberano ngan an integridad han mga tawo. Tungod kay hi Jehova an makagarahum-ha-ngatanan nga Maglalarang, diri hiya obligado ha pagsumat ha aton kon kay ano nga tinutugotan niya an pag-antos. Kondi, iginsusumat niya ito tungod kay hiya nagtatagad ha aton.
9 Tagda an dugang nga ebidensya nga an Dios nagtatagad ha aton. ‘Nasubo hiya ha iya kasingkasing’ han an tuna napuno hin karaotan ha panahon ni Noe. (Genesis 6:5, 6) Nagbag-o na ba yana an inaabat han Dios? Waray, tungod kay hiya diri nagbabag-o. (Malakias 3:6) Nangangalas hiya ha kawaray-hustisya ngan diri gud niya karuyag nga makita nga an mga tawo nag-aantos. An Biblia nagtututdo nga hirani na pagwad-on han Dios an ngatanan nga kadaot nga resulta han pagmando han tawo ngan impluwensya han Yawa. Diri ba ito makakombinse nga ebidensya nga an Dios nagtatagad ha aton?
10. Ano an inaabat ni Jehova mahitungod han pag-antos han tawo?
10 Sayop an iginsusumat han mga lider han relihiyon mahitungod ha Dios kon nasiring hira nga kaburut-on niya an mga trahedya nga aton naieksperyensyahan. Ha kabaliktaran, naghihingyap gud hi Jehova nga tapuson an pag-antos han tawo. “Hiya nagmamangno [“nagtatagad,” NW] ha iyo,” nasiring an 1 Pedro 5:7. Ito gud an igintututdo han Biblia!
Kay Ano nga Aanhi Kita?
11. Ano an agsob nga ginsisiring han mga relihiyon ha kalibotan mahitungod han kinabuhi han tawo dinhi ha tuna?
11 Aton paghisgotan yana an ikaduha nga pakiana nga ginhuhunahuna han damu nga tawo, Kay ano nga aanhi kita? An mga relihiyon ha kalibotan agsob nga nabaton nga temporaryo la an tawo dinhi ha tuna. Ira ginhuhunahuna an aton tuna sugad hin aragian la, o tungtongan nga bato, ngadto ha kinabuhi ha iba nga lugar. An iba nga klero sayop nga nagtututdo nga maabot an panahon nga an Dios magbubungkag hini nga tuna. Sugad nga resulta hito nga mga katutdoan, damu an nakasiring nga mas maopay na la nga magkinabuhi hira hin bug-os samtang mahihimo pa nira tungod kay kamatayon la an naghuhulat ha ira. Ano gud ba an igintututdo han Biblia mahitungod ha kon kay ano nga aanhi kita?
12-14. Ano an igintututdo han Biblia mahitungod han katuyoan han Dios para ha tuna ngan ha katawohan?
12 An Dios may-ada urusahon nga katuyoan para ha tuna ngan ha katawohan. Hiya “nagbuhat [han tuna] nga diri bayaan” kondi “naghitsura hini ha pagkaurukyan.” (Isaias 45:18) Dugang pa, hi Jehova “nagbubutang han mga karig-onan han tuna, basi nga ito diri na makiwa ha waray kataposan.” (Salmo 104:5) An paghibaro hini nga mga butang mahitungod han katuyoan han Dios para ha tuna ngan ha katawohan makakabulig ha aton nga masabtan kon kay ano nga aanhi kita.
13 Ipinapakita han Genesis kapitulo 1 ngan 2 nga hi Jehova naghatag hin daku nga atensyon ha pag-andam han tuna basi ukyan han tawo. Ha kataposan han peryodo han paglarang ha aton tuna, an ngatanan “duro hin kaopay.” (Genesis 1:31) Iginbutang han Dios an siyahan nga lalaki ngan babaye, hi Adan ngan hi Eva, ha maanyag nga hardin han Eden ngan iginhatag ha ira an hura nga mag-opay nga pagkaon. An siyahan nga mag-asawa ginsugo: “Magmabungahon kamo ngan magdamu ngan pun-on niyo an tuna, ngan pagtag-iyahon niyo ito.” Manganganak hira hin hingpit nga mga anak, pahahaluagon an mga tubtoban han ira hardin nga urukyan ha bug-os nga tuna, ngan mahigugmaon nga pagmamandoan an mga hayop.—Genesis 1:26-28.
14 Katuyoan ni Jehova nga magkaada sosiedad han hingpit nga katawohan nga mag-uukoy ha tuna ha kadayonan. An Pulong han Dios nasiring: “An mga magtadong makakapanunod han tuna, ngan maukoy hira dida hin waray kataposan.” (Salmo 37:29) Oo, an katawohan gintuyo nga magpahimulos han kinabuhi nga waray kataposan ha Paraiso nga tuna. Ito an katuyoan han Dios, ngan ito gud an igintututdo han Biblia!
Ano an Nahitatabo ha Aton Kon Kita Namamatay?
15. Ano an igintututdo han kadam-an nga relihiyon ha kalibotan mahitungod han nahitatabo ha aton kon kita namamatay?
15 Yana aton paghisgotan an ikatulo nga pakiana nga importante ha damu nga tawo: Ano an nahitatabo ha aton kon kita namamatay? An kadam-an han mga relihiyon ha kalibotan nagtututdo nga may-ada ha sulod han tawo nga padayon nga nabubuhi katapos mamatay an lawas. An iba nga relihiyon natoo pa gihapon nga ginsisirotan han Dios an magraot pinaagi han waray kataposan nga pagpasakit ha ira ha naglalaga nga impyerno. Kondi ito ba an kamatuoran? Ano gud ba an igintututdo han Biblia mahitungod han kamatayon?
16, 17. Sumala ha Biblia, ano an kahimtang han mga patay?
16 An Pulong han Dios nasiring: “An mga buhi maaram nga hira mapatay: kondi an mga patay diri maaram han bisan ano, waray na man hira bisan ano nga balos; kay an handumanan ha ira hinngalimtan.” Tungod kay an mga patay “diri maaram han bisan ano,” diri hira makakabati, makakakita, makakayakan, makakaabat, o makakahunahuna. Diri na hira nakarawat hin suhol. Oo, imposible na ito tungod kay diri na hira makakahimo hin bisan ano nga trabaho! Dugang pa, “an ira gugma, an ira pagdumot ngan an ira kaawa, nahanaw ha maiha na,” kay diri na hira makakagpahayag hin bisan ano nga emosyon.—Eklesiastes 9:5, 6, 10.
17 Simple ngan klaro an ginsisiring han Biblia mahitungod hini nga topiko—an patay diri nagpapadayon nga buhi ha iba nga lugar. Waray nabaya ha aton lawas kon kita namamatay ngan padayon nga nabubuhi basi matawo utro ha iba nga lawas, sugad han ginsisiring hadton natoo ha reinkarnasyon. Mahimo naton iilustrar ito hini nga paagi: An aton kinabuhi pariho han laga han kandila. Kon napaparong an laga, diri ito napakadto ha bisan diin. Nawawara la ito.
18. Kon hinbabaroan han estudyante ha Biblia nga an mga patay diri maaram han bisan ano, ano nga mga punto an masasabtan niya?
18 Hunahunaa an iginpapasabot hiton simple kondi mapwersa nga kamatuoran. Kon hinbabaroan han usa nga estudyante ha Biblia nga an mga patay diri maaram han bisan ano, makakasiring hiya nga bisan kon nasisina gud an iya patay nga mga kaapoy-apoyan han buhi pa hira, diri hira makakasamok ha iya. Masasantop liwat niya nga an iya patay nga mga hinigugma diri na makakabati, makakakita, makakayakan, makakaabat, o makakahunahuna. Salit, imposible nga nakakaeksperyensya hira hin diri-maiilob nga kamingaw ha purgatoryo o pag-antos ha naglalaga nga pasakitan nga lugar. Kondi, an Biblia nagtututdo nga babanhawon an mga patay nga aada ha panumdoman han Dios. Urusahon gud ito nga paglaom!—Juan 5:28, 29.
Usa nga Bag-o nga Libro nga Magagamit Naton
19, 20. Sugad nga mga Kristiano, ano an aton responsabilidad, ngan ano nga bulig ha pag-aram ha Biblia an dinisenyo labi na gud basi gamiton naton ha ministeryo?
19 Aton ginhisgotan an tulo la nga pakiana nga ginhuhunahuna han damu nga tawo. Ha tagsa nga kahimtang, klaro ngan prangka an igintututdo han Biblia. Makalilipay an pagsumat han sugad nga mga kamatuoran ha mga tawo nga naruruyag mahibaro han igintututdo han Biblia! Kondi damu an iba pa nga importante nga mga pakiana nga an makapatagbaw nga mga baton kinahanglan hibaroan han mga tawo nga tangkod an kasingkasing. Sugad nga mga Kristiano, responsabilidad naton an pagbulig ha ira nga hibaroan an mga baton ha sugad nga mga pakiana.
20 Usa nga ayat an pagtutdo han kamatuoran han Kasuratan ha paagi nga klaro ngan makaruruyag ha kasingkasing. Basi buligan kita nga malamposan ini nga ayat, “an matinumanon ngan maaramon nga uripon” nagpublikar hin usa nga libro nga dinisenyo labi na gud basi gamiton naton ha aton Kristiano nga ministeryo. (Mateo 24:45-47, NW) Inin 224-pahina nga libro may ulohan nga Ano Gud ba an Igintututdo han Biblia?
21, 22. Ano an pipira nga makatirigamnan nga bahin han libro nga Ano Gud ba an Igintututdo han Biblia?
21 Ini nga libro nga iginpagowa ha “Diosnon nga Pagkamasinugtanon” Distrito nga mga Kombensyon han mga Saksi ni Jehova han 2005/06 may-ada magkalain-lain nga makatirigamnan nga mga bahin. Pananglitan, may-ada lima-ka-pahina nga introduksyon nga mapulsanon gud ha pagtikang hin mga pag-aram ha Biblia ha balay. Sigurado nga magigin masayon para ha imo an paghisgot ha mga retrato ngan mga teksto ha introduksyon. Magagamit mo liwat an impormasyon hini nga bahin ha pagpakita ha mga estudyante kon paonan-o hiaagian an mga kapitulo ngan mga bersikulo han Biblia.
22 Simple ngan klaro an estilo han pagkasurat hini nga libro. Pinangalimbasogan gud nga matugkad an kasingkasing han estudyante pinaagi han pag-aghat ha iya nga magkomento ha kada higayon nga posible. An tagsa nga kapitulo may-ada pipira nga pakiana ha tinikangan, ngan kahon ha kataposan nga may ulohan, “Kon Ano an Igintututdo han Biblia.” Aada ha kahon an Kasuratanhon nga mga baton ha mga pakiana ha tinikangan. An mag-opay nga retrato ngan kapsyon sugad man an mga ilustrasyon ha mga parapo hini nga libro mabulig ha estudyante nga masabtan an bag-o nga mga ideya. Bisan kon gintipigan nga simple gud an nangunguna nga bahin han libro, may-ada apendise nga maghahatag ha imo hin higayon nga paghisgotan hin mas detalyado an 14 nga importante nga mga topiko kon an estudyante nagkikinahanglan hin dugang nga impormasyon.
23. Ano an mga suhestyon may kalabotan ha paggamit han Igintututdo han Biblia nga libro ha mga pag-aram ha Biblia?
23 An libro nga Igintututdo han Biblia dinisenyo basi makabulig ha aton ha pagtutdo ha mga tawo nga iba-iba an naabot nga edukasyon ngan magkalain-lain an relihiyon. Kon an estudyante waray bisan ano nga kahibaro ha Biblia, bangin kinahanglan an sobra usa nga sesyon han pag-aram ha usa nga kapitulo. Ayaw pag-apura nga tapuson an aradman, kondi pangalimbasog nga matugkad an kasingkasing han estudyante. Kon diri niya nasasabtan an usa nga ilustrasyon nga ginamit ha libro, isaysay ito o gamita an iba nga ilustrasyon. Pag-andam hin maopay, buhata an imo bug-os nga mahihimo nga gamiton hin epektibo an libro, ngan pag-ampo para han bulig han Dios basi ‘magamit mo hin maopay an pulong han kamatuoran.’—2 Timoteo 2:15.
Magin Mapasalamaton ha Imo Presyoso nga mga Pribilehiyo
24, 25. Ano nga presyoso nga mga pribilehiyo an iginhahatag ni Jehova ha iya katawohan?
24 Hi Jehova naghahatag hin presyoso nga mga pribilehiyo ha iya katawohan. Nabulig hiya ha aton nga hibaroan an kamatuoran mahitungod ha iya. Kinahanglan diri gud naton igbalewaray ito nga pribilehiyo! Ha pagkamatuod, igintatago han Dios an iya mga katuyoan ha mga mapahitas-on ngan iginpapahayag ito ha mga mapainubsanon. May kalabotan hini, hi Jesus nagsiring: “Ako nagdadayaw ha imo, O Amay, Ginoo han langit ngan han tuna, kay imo gintago ini nga mga bagay ha mga makinaadmananon ngan masabuton, ngan ipinahayag ha mga kabataan.” (Mateo 11:25) Talagsahon la nga kadungganan an tagdon nga kaupod ha mga mapainubsanon nga nag-aalagad ha Soberano han Uniberso, hi Jehova.
25 Iginhatag liwat ha aton han Dios an pribilehiyo ha pagtutdo ha iba mahitungod ha iya. Hinumdumi nga sayop an pagpakilala ha iya han mga nagtututdo hin mga buwa mahitungod ha iya. Tungod hito damu an may-ada sayop gud nga pagkakilala kan Jehova, naghuhunahuna nga hiya diri matinagaron ngan diri mapinairon. Andam ka ba, oo, disidido pa ngani, nga bumulig ha pagtadong han sayop nga pagsabot? Karuyag mo ba nga hibaroan han tangkod-an-kasingkasing nga mga tawo ha bisan diin an kamatuoran mahitungod ha Dios? Niyan, ipakita gud an imo diosnon nga pagkamasinugtanon pinaagi han madasigon nga pagsangyaw ngan pinaagi han pagtutdo ha iba han ginsisiring han Kasuratan mahitungod han importante nga mga topiko. An mga tawo nga namimiling han kamatuoran kinahanglan mahibaro kon ano gud an igintututdo han Biblia.
Ano an Imo mga Baton?
• Paonan-o kita nahibaro nga an Dios nagtatagad ha aton?
• Kay ano nga aanhi kita ha tuna?
• Ano an nahitatabo ha aton kon kita namamatay?
• Ano nga mga bahin han Igintututdo han Biblia nga libro an labi nga inaapresyar mo?
[Mga Pakiana]
[Mga Retrato ha pahina 22]
An Biblia nagtututdo nga matatapos an pag-antos
[Ginkuhaan han mga Retrato]
Too ha igbaw, bata nga babaye: © Bruno Morandi/age fotostock; wala, babaye: AP Photo/Gemunu Amarasinghe; too ha ubos, mga pinalagiw: © Sven Torfinn/Panos Pictures
[Retrato ha pahina 23]
An magtadong maukoy ha kadayonan ha Paraiso