Lalaki Ngan Babaye—Ginhimo Para ha Kada Tagsa

AN LALAKI ngan an babaye pirme naghihingyap nga magin magkaupod. Ini nga hingyap tikang ha Dios. Nakita ni Jehova nga diri maopay nga an siyahan nga lalaki, hi Adan, padayon nga mag-inusahan. Salit an Dios naglarang ‘hin kabulig’ han lalaki.

Ginpakaturog ni Jehova hi Adan, ngan katapos kinuha hiya hin usa han iya mga gusok ngan “tikang ha gusok . . . nahimo in usa nga babaye, ngan gindara ha lalaki.” Nalipay hinduro hi Adan han makita inin mahusay nga linarang ni Jehova salit hiya nakagsiring: “Ini yana tul-an han akon mga tul-an, ngan unod han akon unod.” Tungod kay may-ada mga kalidad han babaye, an hingpit nga babaye, hi Eva, makaruruyag gud. Ngan an hingpit nga hi Adan nga may dignidad han lalaki, takos hin pagtahod. Ginhimo hira para ha kada tagsa. An Biblia nasiring: “Salit an tawo mabaya han iya amay ngan han iya iroy, ngan tumampo ha iya asawa: ngan hira magigin usa nga unod.”—Genesis 2:18-24.

Kondi, yana, nagbuburublag an mga pamilya, ngan an relasyon butnga han lalaki ngan babaye agsob nga inaabuso o apektado han kahakog. An espiritu han kompetisyon butnga han lalaki ngan babaye nagriresulta hin diri pagsinabtanay ngan kasamok. Ini ngatanan kabaliktaran han katuyoan han Dios para ha lalaki ngan babaye. An lalaki gindisenyo ha pagtuman hin urusahon nga bahin dinhi ha tuna. An babaye may-ada waray kapariho ngan darayawon nga bahin sugad nga kabulig han lalaki. Magkaupod nga magbubuhat hira nga nagkakauyon. Tikang han pag-eksister han tawo, an diosnon nga kalalakin-an ngan kababayin-an matinumanon nga nangangalimbasog ha pagtuman han mga bahin nga iginhatag ni Jehova ha ira, ngan nakakadugang ini ha ira kalipay ngan katagbaw. Ano ini nga mga bahin, ngan paonan-o naton tutumanon ito?

[Retrato ha pahina 3]

An lalaki ngan babaye gindisenyo ha pagtuman hin may dignidad nga mga bahin ha kahikayan han Dios