Lalaki Ngan Babaye—Usa nga May Dignidad nga Bahin Para ha Kada Tagsa

SIYAHAN nga ginlarang ni Jehova nga Dios hi Adan, katapos hi Eva. Antes larangon hi Eva, nakaeksperyensya na hi Adan ha pagkinabuhi. Durante hito nga panahon, gintagan hiya ni Jehova hin mga instruksyon. (Genesis 2:15-20) Tungod kay hi Adan an tagapagyakan han Dios, kinahanglan niya isumat ini ha iya asawa. Kon sugad, makatadunganon nga hiya an mangunguna ha ngatanan nga may kalabotan ha pagsingba.

An pariho nga kahikayan naeksister ha Kristiano nga kongregasyon, ngan makakapahimulos kita tikang ha pag-usisa hito. Hi apostol Pablo nagsurat: ‘Diri ako natugot nga an babaye maggahum ha lalaki, kondi nga magmamingaw. Kay hi Adan an siyahan nga ginhimo, ngan katapos, hi Eva.’ (1 Timoteo 2:12, 13) Diri ini nagpapasabot nga an babaye diri gud magyayakan ha katirok han Kristiano nga kongregasyon. Diri hiya magyayakan ha kongregasyon ha paagi nga diri hiya makikilantugi ha lalaki. Diri niya miminuson an katungdanan nga igintoka ha lalaki, o mangangalimbasog ha pagtutdo ha kongregasyon. Iginhatag ha mga lalaki an toka ha pagdumara ngan pagtutdo ha kongregasyon, kondi daku an naibubulig han mga babaye ha mga katirok pinaagi ha pakigbahin hito ha magkalain-lain nga paagi.

Ha paghatag ha aton hin hilarom nga pagsabot ha tagsa-tagsa nga bahin han kalalakin-an ngan kababayin-an ha kahikayan han Dios, hi apostol Pablo nagsurat: “An lalaki diri tikang ha babaye; kondi an babaye tikang ha lalaki . . . Ha Ginoo waray babaye nga gawas ha lalaki, ngan waray lalaki nga gawas ha babaye [o independente ha usa kag usa]. Kay sugad nga an babaye tikang ha lalaki, sugad man an lalaki tungod ha babaye; kondi an ngatanan tikang ha Dios.”—1 Korinto 11:8-12.

An Kababayin-an May-ada Mag-opay nga Pribilehiyo

Ilarom han Balaud nga iginhatag han Dios ha Israel, an mga babaye damu an pribilehiyo ngan may kagawasan hira nga gamiton an ira pamurubuot ha pagbuhat hito. Pananglitan, an Proberbios 31:10-31 naghihisgot mahitungod hin “birilhon” nga asawa nga namamalit hin de kalidad nga gamit ngan naghihimo hin mag-opay nga bado para ha iya pamilya. Aw, ‘hiya naghihimo hin lino nga mga panapton ngan iginbabaligya ito’! (Bersikulo 13, 21-24) “Pariho . . . han mga sakayan han magparatigayon,” inin maopay hinduro nga babaye namimiling hin magrasa nga pagkaon, bisan kon kinahanglan niya kuhaon ito ha higrayo nga lugar. (Bersikulo 14) “Hiya nagpapainoino hin usa nga uma, ngan napalit hini,” ngan hiya “nagtatanom hin urubasan.” (Bersikulo 16) Tungod kay an “iya mga baligya himurulsan,” nakakaganansya hiya. (Bersikulo 18) Dugang pa ha ‘pagbantay hin maopay ha mga kiwa han iya sulod-balay,’ inin maduruto nga mahadlukon kan Jehova bug-os nga nabulig ha iba. (Bersikulo 20, 27) Diri urusahon nga gindadayaw hiya!—Bersikulo 31.

An mga balaud ni Jehova nga iginhatag pinaagi kan Moises naghatag ha kababayin-an hin damu nga higayon ha pag-uswag ha espirituwal. Pananglitan, ha Josue 8:35, aton mababasa: “Waray  usa ka pulong dida han ngatanan nga kan Moises iginsugo, nga waray basaha ni Josue ha atubangan han bug-os nga katirokan ha Israel, ngan an kababayin-an, ngan an kabataan, ngan an mga humarapit nga dida ha ira.” May kalabotan ha saserdote nga hi Esra, an Biblia nasiring: “[Hiya] nagdara han balaud ngada ha atubangan han katirok, ha ngatanan nga kalalakin-an ngan kababayin-an, ngan ha ngatanan nga makakabati nga masabot, ha siyahan nga adlaw han ikapito ka bulan. Ngan iya ginbasa ini dida ha atubangan han haluag nga lugar nga nakada ha atubangan han ganghaan ha tubig, tikang ha sayo han aga ngada ha pag-udto, dida ha atubangan han kalalakin-an ngan han kababayin-an, ngan hadto nga makakasabot; ngan ha mga talinga han ngatanan nga katawohan nga andam ha pagpamati han basahon han balaud.” (Nehemia 8:2, 3) An kababayin-an nagpahimulos han sugad nga pagbasa han Balaud. Nagsaurog liwat hira han relihiyoso nga mga pyesta. (Deuteronomio 12:12, 18; 16:11, 14) Labaw nga importante, an kababayin-an ha kadaan nga Israel mahimo magkaada personal nga relasyon kan Jehova nga Dios ngan mahimo makag-ampo ha iya.—1 Samuel 1:10.

Ha siyahan nga siglo K.P., an nahahadlok ha Dios nga kababayin-an nakapribilehiyo ha pagserbi kan Jesus. (Lukas 8:1-3) Usa nga babaye an nagpahid hin balsamo ha iya ulo ngan mga tiil durante han usa nga panihapon ha Betania. (Mateo 26:6-13; Juan 12:1-7) Nagpakita liwat hi Jesus ha kababayin-an katapos han iya kabanhaw. (Mateo 28:1-10; Juan 20:1-18) Han sinaka hi Jesus ha langit, an grupo hin mga 120 ka tawo nga nagkatirok nag-uupod hin “kababayin-an, ngan hi Maria nga iroy ni Jesus.” (Buhat 1:3-15) Damu o ngatanan hini nga kababayin-an sigurado nga nakadto ha igbaw nga kwarto ha Jerusalem ha adlaw han Pentekostes 33 K.P., han iginbubo an baraan nga espiritu ngan an mga disipulo ni Jesus milagroso nga nakagyakan hin magkalain-lain nga pinulongan.—Buhat 2:1-12.

An kalalakin-an ngan kababayin-an kaupod hadton nakaeksperyensya han katumanan han Joel 2:28, 29, sugad han ginkotar ni apostol Pedro ha adlaw han Pentekostes: “Akon [Jehova] iipison an akon espiritu ngada ha ngatanan nga unod; ngan an iyo mga anak nga kalalakin-an ngan an iyo mga anak nga kababayin-an mananagna . . . Ngan akon liwat iipison an akon espiritu ngada ha mga surugoon nga kalalakin-an ngan ngada ha mga surugoon nga kababayin-an hadto nga mga adlaw.” (Buhat 2:13-18) May-ada panahon katapos han Pentekostes 33 K.P., nga an Kristiano nga kababayin-an gintagan hin mga regalo han espiritu. Nakagyakan hira han mga pinulongan han iba nga nasud ngan nanagna, diri karuyag sidngon nga nagpapahayag hira han mahitatabo kondi nagyayakan han kamatuoran tikang ha Kasuratan.

 Ha iya surat ha mga Kristiano ha Roma, madasigon nga nag-istorya hi apostol Pablo mahitungod kan “Pebe nga aton bugto,” iginrirekomenda hiya ha ira. Gin-unabi liwat niya hira Trepena ngan Triposa, gintawag hira nga ‘magburuhat tungod han Ginoo.’ (Roma 16:1, 2, 12) Bisan kon ini nga kababayin-an waray mga katungdanan ha pagmangno ha siyahan nga Kristiano nga kongregasyon, hira ngan an damu pa nga kababayin-an may-ada pribilehiyo ha pagin pinili han Dios nga makaupod han iya Anak, hi Jesu-Kristo, ha langitnon nga Ginhadian.—Roma 8:16, 17; Galasia 3:28, 29.

Daku gud an pribilehiyo han diosnon nga kababayin-an yana! “An Ginoo naghahatag hin pulong: Daku nga kadam-an an mga babaye nga nagpapahayag han sumat,” siring han Salmo 68:11. Sadang kumendasyonan hira. Pananglitan, an ira maabtik nga pagtutdo ha mga pag-aram ha Biblia naggigiya ha damu nga karawaton an totoo nga katutdoan nga nagpapalipay ha Dios. Takos liwat hin kumendasyon an Kristiano nga inasaw-an nga kababayin-an nga nabulig ha ira mga anak nga magin tumuroo ngan nasuporta ha ira bana nga damu an obligasyon ha kongregasyon. (Proberbios 31:10-12, 28) An solo nga kababayin-an liwat may-ada dungganon nga bahin ha kahikayan han Dios, ngan an Kristiano nga kalalakin-an ginsasagdonan nga tagdon “an mga tigurang nga babaye sugad ha mga iroy; an mga daraga sugad ha mga kabugtoan nga kababayin-an, ha bug-os nga kaputli.”—1 Timoteo 5:1, 2.

An Magkalain-lain nga Toka han Lalaki

An Kristiano nga lalaki may-ada toka nga iginhatag han Dios ha iya ngan ginlalaoman hiya ha pagtuman hito. Hi Pablo nagsiring: “Buot ko nga iyo hibaroan, nga an ulo han ngatanan nga mga tawo amo hi Kristo; ngan an ulo han babaye amo an lalaki; ngan an ulo ni Kristo amo an Dios.” (1 Korinto 11:3) May-ada liwat ulo an lalaki—hi Kristo. Oo, an lalaki may baratunon kan Kristo ngan labi na ha Dios. Ngan ginlalaoman han Dios nga bubuhaton han lalaki an iya pagkaulo ha mahigugmaon nga paagi. (Efeso 5:25) Ini an Iya katuyoan tikang pa han ginlarang an tawo.

Iginpapakita han Biblia nga gintagan han Dios an lalaki hin mga toka uyon ha iya katungdanan han pagkaulo. Pananglitan, hi Noe ginpahimo ni Jehova hin arka para ha kaluwasan han kinabuhi durante han Baha. (Genesis 6:9–7:24) Ginsaaran hi Abraham nga pinaagi han iya binhi, an ngatanan nga pamilya ngan nasud ha tuna magbibendisyon ha ira kalugaringon. An siyahan nga bahin hito nga binhi amo hi Jesu-Kristo. (Genesis 12:3; 22:18; Galasia 3:8-16) Gintokahan han Dios hi Moises nga giyahan an mga Israelita tipagawas ha Ehipto. (Eksodo 3:9, 10, 12, 18) Pinaagi kan Moises iginhatag ni Jehova an mga balaud nga ginkilala sugad nga an Balaud nga kauyonan, o an Mosaiko nga Balaud. (Eksodo 24:1-18) Kalalakin-an an ngatanan nga nagsurat han Biblia.

Sugad nga Ulo han Kristiano nga kongregasyon, hi Jesus “naghatag hin mga hatag ha mga tawo.” (Efeso 1:22; 4:7-13) Han iginlilista ni Pablo an kwalipikasyon han mga magmarangno, ginhunahuna niya nga para ito ha kalalakin-an. (1 Timoteo 3:1-7; Tito 1:5-9) Salit an mga kongregasyon han mga Saksi ni Jehova ginsiserbihan hin kalalakin-an nga paramangno, o  tigurang, ngan hin kalalakin-an nga gintokahan sugad nga ministeryal nga surugoon. (Filipos 1:1, 2; 1 Timoteo 3:8-10, 12) Kalalakin-an la an mag-aalagad sugad nga magbarantay ha Kristiano nga kongregasyon. (1 Pedro 5:1-4) Kondi, sugad han gin-unabi na, an kababayin-an may-ada urusahon nga hatag-han-Dios nga mga pribilehiyo.

Nalilipay ha Ira mga Bahin

An pagtuman han mga bahin nga iginhatag han Dios ha kalalakin-an ngan kababayin-an nakakalipay ha ira. Nagkakaada malipayon nga pag-asawa kon an mga mag-asawa nagsusubad han ehemplo ni Kristo ngan han iya kongregasyon. “Mga asawa nga kalalakin-an,” nagsurat hi Pablo, “higugmaa niyo an iyo mga asawa nga kababayin-an, sugad man nga hi Kristo naghigugma ha singbahan ngan igintubyan niya an iya kalugaringon tungod hito . . . An tagsa-tagsa ha iyo maghigugma ha iya kalugaringon nga asawa sugad ha iya ngahaw.” (Efeso 5:25-33) Kon sugad, obligado an mga bana nga tumanon an ira pagkaulo, diri ha hakugnon, kondi ha mahigugmaon nga paagi. An kongregasyon ni Kristo diri ginkukompwesto hin hingpit nga mga tawo. Bisan pa hito, hinigugma ngan ginmamangnoan ito ni Jesus. Ha pariho nga paagi, sadang higugmaon ngan mangnoan han Kristiano nga bana an iya asawa.

An Kristiano nga asawa sadang magkaada hilarom  nga ‘pagtahod ha iya asawa nga lalaki.’ (Efeso 5:33) May kalabotan hini, mahimo niya subaron an kongregasyon. An Efeso 5:21-24 nasiring: “Magpasakop kamo an usa kag usa ha kahadlok kan Kristo. Mga asawa nga kababayin-an, magpasakop kamo ha iyo mga asawa, sugad nga ha Ginoo. Kay an asawa nga lalaki amo an ulo han asawa nga babaye, sugad man nga hi Kristo amo iton ulo han singbahan, kay hiya amo an manluluwas han lawas. Kondi sugad nga iton singbahan sakop ni Kristo, sugad man an mga asawa nga babaye magpasakop ha ngatanan nga mga bagay ha ira asawa nga lalaki.” Bisan kon usahay makurian an asawa ha pagpasakop ha iya bana, ini “angay [husto] ha Ginoo.” (Kolosas 3:18) Mas masayon an pagpasakop ha iya bana kon huhunahunaon niya nga nakakalipay ini ha Ginoo nga hi Jesu-Kristo.

Bisan kon diri igkasi-tumuroo an bana han usa nga Kristiano nga babaye, kinahanglan hiya magpasakop ha iya pagkaulo. Hi apostol Pedro nasiring: “Mga kaasaw-an nga kababayin-an, magpasakop kamo ha iyo mga kaasaw-an nga kalalakin-an; nga, basi, kon may-ada iba nga diri masinugtanon ha pulong, pagdad-on unta hira ha waray pulong, pinaagi han mga batasan han ira mga kaasaw-an; nga hikit-an nira an iyo mauray nga gawi nga may kahadlok.” (1 Pedro 3:1, 2) Hi Sara, nga nagtahod ha iya bana, hi Abraham, nakapribilehiyo nga magin iroy ni Isaak ngan nagin kaapoy-apoyan ni Jesu-Kristo. (Hebreo 11:11, 12; 1 Pedro 3:5, 6) An mga asawa nga nagsusubad han paggawi ni Sara sigurado nga babalosan han Dios.

Nagkakaada kamurayawan ngan pagkauruyon kon gintutuman han kalalakin-an ngan kababayin-an an mga bahin nga hatag han Dios ha ira. Nagriresulta ini ha ira katagbaw ngan kalipay. Dugang pa, an pagtuman han mga ginkikinahanglan ha Kasuratan naghahatag hin dignidad ha kada tagsa may kalabotan ha ira pribilehiyo ha kahikayan han Dios.

[Kahon ha pahina 7]

Kon Ano an Ira Inaabat Mahitungod han Bahin nga Iginhatag han Dios ha Ira

“Ginbubuhat han akon bana an iya pagkaulo ha mahigugmaon ngan buotan nga paagi,” siring ni Susan. “Kasagaran nga gin-iistoryahan namon an amon mga desisyon, ngan kon nagdidesisyon hiya kon ano an bubuhaton o diri bubuhaton, maaram ako nga para ito ha amon kaopayan. An kahikayan ni Jehova para ha Kristiano nga mga asawa nakakalipay gud ha akon ngan nagpaparig-on han amon pag-asawa. May-ada kami duok nga relasyon ngan nagbubuligay ha pagkab-ot han espirituwal nga mga tumong.”

An usa nga babaye nga hi Mindy nagsiring: “An bahin nga iginhatag ni Jehova ha iya mga surugoon nga babaye usa nga pasarig han iya gugma ha amon. Para ha akon, an akon pagpasidungog ngan pagtahod ha akon bana pati na an pagsuporta ha iya ha mga obligasyon ha kongregasyon, amo an akon paagi ha pagpasalamat kan Jehova para hini nga kahikayan.”

[Mga Retrato ha pahina 5]

Uyon ha katungdanan han pagkaulo han lalaki, gintagan han Dios hira Noe, Abraham, ngan Moises hin magkalain-lain nga toka

[Retrato ha pahina 7]

“Daku nga kadam-an an mga babaye nga nagpapahayag han sumat”