Mga Pakiana Tikang ha mga Magbarasa

Ha ano nga paagi masisiring nga an paragtirok nakabiling la hin “usa ka tawo [o lalaki] dida ha usa ka yukot” kondi waray pakaagi hin “usa nga babaye dida hadto ngatanan”?—Eklesiastes 7:28.

Basi husto nga hisabtan inin giniyahan nga mga pulong, sadang hisabtan anay naton kon paonan-o gintatagad han Dios an kababayin-an. Tinatawag han Biblia an balo nga umagad ni Noemi nga hi Rut nga “babaye nga birilhon.” (Rut 3:11) Sumala ha Proberbios 31:10, an maopay nga asawa “labaw pa gud han mga rubi.” Kon sugad, ano an iginpapasabot ni Hadi Salomon han kadaan nga Israel han hiya siniring: “Usa ka tawo [o lalaki] dida ha usa ka yukot akon hin-agian; kondi an usa nga babaye dida hadto ngatanan waray ako pakaagi”?

Iginpapakita han konteksto nga posible gud nga an kadam-an han kababayin-an ha panahon ni Salomon hamubo an moral. (Eklesiastes 7:26) Ha kadak-an nga bahin bangin resulta ini han impluwensya han langyawanon nga kababayin-an nga nagsisingba kan Baal. Bisan hi Hadi Salomon naimpluwensyahan han iya damu nga langyawanon nga asawa. “Hiya may-ada pito ka gatos nga asawa, mga prinsesa, ngan tulo ka gatos nga hunay [“kerida,” NW],” siring han Biblia, “ngan an iya mga asawa nagpasimang han iya kasingkasing” ha pagsingba ha palso nga mga dios. (1 Hadi 11:1-4) Hamubo liwat an moral han kalalakin-an—talagsahon la o haros waray usa nga matadong nga lalaki ha usa ka yukot. “Ini la an akon hin-agian,” siring ni Salomon, “nga an Dios naghimo han tawo nga matadong; kondi hira nangita hin damu nga mga panmugna.” (Eklesiastes 7:29) Usa ini nga konklusyon mahitungod ha katawohan—tawo o lalaki sugad nga an tawhanon nga rasa, diri lalaki nga igintatanding ha babaye. Tungod hini, an mga pulong ha Eklesiastes 7:28 sadang hunahunaon sugad nga komento ha bug-os nga kahimtang ha moral han mga tawo ha panahon ni Salomon.

Kondi, may-ada usa pa nga posible nga kahulogan hini. Mahimo nga matagnaon liwat ito, tungod kay waray pa babaye nga nakahatag kan Jehova hin hingpit nga pagsugot. Kondi may-ada na usa nga lalaki nga sugad hito—hi Jesu-Kristo.—Roma 5:15-17.

[Retrato ha pahina 31]

“Usa ka tawo dida ha usa ka yukot”