Pagpabilin nga Marig-on Kon May Anak nga Nagrirebelde

USA nga Kristiano nga babaye nga aton tatawagon nga Joy an nangalimbasog ha pagpadaku ha iya anak nga lalaki nga higugmaon hi Jehova. Kondi, han magbabainte anyos na an iya anak, nagrebelde ito ngan lumayas. “Ito an pinakamasakit nga akon naeksperyensyahan,” siring ni Joy. “Ha akon pag-abat, gintraydoran ako, ginbido, ngan ginpakyas. Nanluya ako tungod han negatibo nga panhunahuna.”

Bangin nangalimbasog ka liwat ha pagpadaku ha imo mga anak ha paghigugma ngan pag-alagad ha Dios—kondi ha urhi usa o sobra pa an binaya ha Iya. Paonan-o mo maaatubang an sugad kamakasurubo nga kapakyasan? Ano an mabulig ha imo nga makapabilin nga marig-on ha imo pag-alagad kan Jehova?

Han Nagrebelde an mga Anak ni Jehova

An siyahan nga pitad amo an pagsabot nga maaram gud hi Jehova han imo inaabat. Ha Isaias 49:15, aton mababasa: “Makakalimot ba an usa nga babaye han iya nasuso nga bata, nga hiya mawaray pagbati han anak han iya tagoangkan? Oo, ini bangin hikalimot, kondi ako diri mangangalimot ha imo.” Oo, naieksperyensyahan ni Jehova an pagbati han mga kag-anak. Salit, handurawa an kalipay nga sigurado nga iya gin-abat han an ngatanan han iya anak nga anghel nagdadayaw ngan nag-aalagad ha iya. Samtang binabaton an patriarka nga hi Job “tikang ha alipuros nga hangin,” nahinumdoman ni Jehova an makalilipay nga panahon kaupod han iya nagkakaurosa nga pamilya ha langit, nasiring: “Nakain ka han pagpahamutang ko han mga patukoranan han tuna? . . . Han pagkanta ha tingob han mga bitoon ha kaagahon, ngan an ngatanan nga anak nga kalalakin-an han Dios naggugliat ha kalipay?”—Job 38:1, 4, 7.

Inabot an panahon, usa han hingpit nga anghel nga anak han Dios an nagrebelde ha iya ngan nagin Satanas nga nangangahulogan, “Parakontra.” Nakita liwat ni Jehova an iya siyahan nga tawhanon nga anak, hi Adan, ngan an iya hingpit nga asawa, hi Eva, nga inapi ha pagrebelde. (Genesis 3:1-6; Pahayag 12:9) Ha urhi, may iba pa nga anghel nga mga anak nga ‘binaya ha ira kalugaringon nga urukyan,’ ngan nagrebelde ha Dios.—Judas 6.

Waray iginsusumat ha aton an Kasuratan kon ano an gin-abat ni Jehova han nagrebelde an iba han iya hingpit nga anak. Kondi, an Biblia matin-aw nga nasiring: “Hi Jehova kinita nga an karaotan han tawo daku ha tuna, ngan an ngatanan nga panhunahuna han pamurubuot han iya kasingkasing amo gud la maraot ha  kadayonan. Ngan ito nakapagpabasol kan Jehova tungod nga iya ginhimo an tawo ha bawbaw han tuna, ngan ito nakagpasubo ha iya, ha iya kasingkasing.” (Genesis 6:5, 6) An pagrebelde han Israel, an katawohan nga pinili ni Jehova, ‘nagpasubo’ ngan nakasakit liwat ha iya.—Salmo 78:40, 41.

Waray ruhaduha nga may empatiya hi Jehova ha mga kag-anak nga nag-aantos hin kasubo ngan kasakit tungod han pagrebelde han ira mga anak. Ha iya Pulong, an Biblia, naghahatag hiya hin mag-opay nga sagdon ngan pagdasig basi mabuligan an sugad nga mga kag-anak nga malamposan an ira kahimtang. Gindadasig hira han Dios nga itubyan ha iya an ngatanan nga ira pangarit, magpaubos, ngan magin marig-on kontra kan Satanas nga Yawa. Aton usisahon kon paonan-o an pagsunod hini nga sagdon makakabulig ha imo nga makapabilin nga marig-on kon nagrirebelde an imo anak.

Itubyan an Imo Pangarit kan Jehova

Maaram hi Jehova nga nababaraka gud an mga kag-anak kon maaram hira nga an ira mga anak namimeligro ha pagdaot han ira kalugaringon o dauton han iba. Gin-unabi ni apostol Pedro an usa nga solusyon hini ngan han iba nga problema. Hiya nagsurat: “Ibutang niyo [kan Jehova] an ngatanan niyo nga pangarit, kay hiya nagmamangno ha iyo.” (1 Pedro 5:7) Kay ano nga ini nga imbitasyon ngan pasarig labi nga angayan ha mga kag-anak han rebelyoso nga bata?

Samtang bata pa an imo anak, mabinantayon ka ha pagpanalipod ha iya tikang ha mga peligro, ngan posible gud nga nagios hiya uyon ha imo mahigugmaon nga giya. Kondi, samtang nagtutubo hiya, bangin nagtitikaguti na la an imo impluwensya ha iya, kondi an imo sinsero nga hingyap ha pagpanalipod ha iya waray maibani. Ha pagkamatuod, bangin nag-uswag pa ngani.

Sugad nga resulta, kon nagrirebelde an imo anak ngan nag-aantos hin espirituwal, emosyonal, o pisikal nga kadaot, bangin basulon mo an imo kalugaringon. Sugad hini an gin-abat ni Joy, nga gin-unabi kanina. Hiya siniring: “Tungod kay ginsasakit ako han pag-abat hin kapakyasan, kada adlaw nahuhunahuna ko an naglabay.” Ha sugad nga mga panahon karuyag gud ni Jehova nga imo ‘ibutang ha iya an ngatanan nga imo pangarit.’ Kon bubuhaton mo ito, bubuligan ka niya. “Ibutang an imo dinara ha bawbaw ni Jehova,” siring han salmista, “ngan ikaw iya kabubuligan; diri gud hiya makakailob nga pagkikiwahon an matadong.” (Salmo 55:22) Naeksperyensyahan ni Joy an sugad nga pagliaw. Hiya nagsaysay: “Igin-istorya ko kan Jehova an  ngatanan han akon inaabat. Basta iginsumat ko la an ngatanan, ngan daku gud ito nga bulig.”

Sugad nga diri hingpit nga kag-anak, bangin nakahimo ka hin mga sayop samtang imo ginpapadaku an imo anak. Kondi kay ano nga paghihinunahunaon mo ito? Matin-aw nga diri ito an ginkikinita ni Jehova, tungod kay an giniyahan nga salmista nagkanta: “Kon imo panginanoon, O Jehova, an mga karat-an, O Ginoo, hin-o pa an matindog?” (Salmo 130:3) Bisan kon nagin hingpit ka nga kag-anak, posible nga nagrebelde la gihapon an imo anak. Salit isumat an imo inaabat kan Jehova pinaagi ha pag-ampo, ngan bubuligan ka niya nga makaantos. Kondi, kon karuyag mo magpabilin nga marig-on ha pag-alagad kan Jehova ngan maglikay ha kabiktima ni Satanas, kinahanglan labaw pa hito an imo buhaton.

Magpaubos

“Magmapaubsanon kamo ha ilarom han makagagahum nga kamot han Dios,” nagsurat hi Pedro, “basi pagpahitas-on kamo niya ha igo nga panahon.” (1 Pedro 5:6) Kay ano nga kinahanglan an pagpaubos kon nagrirebelde an imo anak? Dugang pa ha pagin hinungdan nga umabat ka hin kakonsensya ngan kasakit, bangin maawod ka ha pagkaada rebelyoso nga anak. Bangin nababaraka ka nga an ginbuhat han imo anak nakadaot han reputasyon han iyo pamilya, labi na kon kinahanglan hiya paiwason ha Kristiano nga kongregasyon. Bangin tungod ha kasina ha kalugaringon ngan kaawod, mawad-an ka hin kadasig ha pagtambong ha Kristiano nga mga katirok.

Ha pag-atubang ha sugad nga kahimtang, kinahanglan mo iaplikar an praktikal nga kinaadman. An Proberbios 18:1 nagpapahamangno: “Hiya nga nahibubulag namimiling han iya kalugaringon nga tinguha, ngan napupungot patok ha ngatanan nga maopay nga kinaadman.” Pinaagi han regular nga pagtambong ha Kristiano nga katirok bisan pa han imo kasubo, makakakuha ka hin importante nga instruksyon ngan pagdasig. “Ha siyahan, diri ko gud karuyag makiistorya ha bisan hin-o,” siring ni Joy. “Kondi ginpahinumdoman ko an akon kalugaringon han pagkaimportante han akon espirituwal nga rutina. Gawas pa, kon nagpabilin la ako ha balay, bangin naghinunahuna la ako han akon mga problema. An mga katirok nakabulig ha akon ha pagsentro ha makapadasig nga espirituwal nga mga butang. Mapasalamaton ako nga waray ako bumulag ngan umundang ha pagpahimulos han mahigugmaon nga suporta han akon kabugtoan.”—Hebreo 10:24, 25.

Hinumdumi liwat nga an tagsa nga membro han pamilya kinahanglan ‘magdara han iya kalugaringon nga darad-on’ nga responsabilidad sugad nga Kristiano. (Galasia 6:5) Ginlalaoman ni Jehova an mga kag-anak nga higugmaon ngan disiplinahon an ira mga anak. Ginlalaoman liwat niya an mga anak nga magsugot ngan magpasidungog ha ira mga kag-anak. Kon buhaton han mga kag-anak an ira bug-os nga mahihimo ha pagpadaku ha ira mga anak ha “pagturon-an ngan paglaygay han Ginoo,” an mga kag-anak mismo magkakaada maopay nga reputasyon ha Dios. (Efeso 6:1-4) Kon nagrirebelde an usa nga anak ha mahigugmaon nga pagdisiplina han mga kag-anak, an reputasyon han anak an madadaot. “Bisan an bata nagpapakilala ha iya ngahaw pinaagi han iya mga binuhatan, kon an iya buhat uray ba, ngan kon ito maopay ba,” siring han Proberbios 20:11. An pagrebelde ni Satanas sigurado nga waray makadaot han reputasyon ni Jehova ha mga maaram han kamatuoran.

Magmarig-on Kontra ha Yawa

“Magbuotan, ngan mag-agma kamo,” nagpahamangno hi Pedro. “An iyo kaaway nga amo an Yawa, sugad hin maaringasa nga leon, naglilinakat-lakat, pagpinamiling hin iya lalamyon.” (1 Pedro 5:8) Pariho hin leon, an agsob nga ginpupuntirya han Yawa mga batan-on ngan waray eksperyensya. Ha kadaan nga panahon, an mga leon naglilibot-libot ha Israel ngan peligroso ha  gin-aataman nga mga hayop. Kon an nati nga karnero bumulag ha panon, masayon magin biktima ito. Bangin natural la nga ibutang ha peligro han babaye nga karnero an iya kinabuhi basi panalipdan an iya nati. Kondi, bisan an daku na nga karnero diri makakapirde ha leon. Salit, ginkikinahanglan an maisugon nga mga magbarantay basi panalipdan an panon.—1 Samuel 17:34, 35.

Basi panalipdan an iya simboliko nga mga karnero ha “maaringasa nga leon,” nag-organisa hi Jehova hin espirituwal nga mga magbarantay nga mag-aataman han panon ilarom han “punoan han mga magbarantay,” hi Jesu-Kristo. (1 Pedro 5:4) Hito nga gintokahan nga kalalakin-an, hi Pedro nagsagda: “Mangnoi niyo an panon nga igintapod ha iyo han Dios, ngan tumana niyo nga malipayon, sugad han karuyag han Dios ha iyo, ngan diri tungod kay ginpirit kamo. Tumana an iyo buruhaton, diri tungod hin suhol la, kondi hin tinuod nga tinguha hin pag-alagad.” (1 Pedro 5:1, 2, An Maopay nga Sumat nga Biblia) Pinaagi han iyo kooperasyon sugad nga mga kag-anak, ini nga mga paramangno bangin makabulig hin batan-on nga tadungon an iya kinabuhi ha espirituwal nga paagi.

Kon kinahanglan sagdonan han Kristiano nga mga magbarantay an imo rebelyoso nga anak, bangin panalipdan mo hiya kontra ha disiplina. Kondi, magigin daku ito nga sayop. Hi Pedro nagsiring: ‘Atohi niyo an Yawa’—diri an espirituwal nga mga magbarantay.—1 Pedro 5:9.

Kon Mabug-at an Disiplina

Kon diri mabinasulon an imo anak ngan bawtismado na nga Kristiano, bangin kumarawat hiya han pinakamabug-at nga klase hin disiplina—an pagpaiwasa ha kongregasyon. Tikang hito nga panahon, an imo komunikasyon ha iya madepende ha iya edad ngan ha iba pa nga kahimtang.

Kon diri pa adulto an imo anak ngan nalungon pa ha iyo, natural la nga magpapadayon ka ha pagtagana han iya pisikal nga panginahanglan. Nagkikinahanglan liwat hiya hin pagbansay ha moral ngan pagdisiplina, ngan may-ada ka responsabilidad ha pagtagana hini. (Proberbios 1:8-18; 6:20-22; 29:17) Bangin maruyag ka nga dumarahan hiya hin pag-aram ha Biblia, nga nagkikinahanglan han iya pakigbahin. Mahimo mo isentro an iya atensyon ha magkalain-lain nga teksto ngan ha mga publikasyon nga igintatagana han “matinumanon ngan maaramon nga uripon.” (Mateo 24:45, NW) Puydi mo liwat hiya ig-upod ha Kristiano nga mga katirok ngan palingkuron ha imo sapit. Mahimo buhaton ini ngatanan ha paglaom nga iya susundon an Kasuratanhon nga sagdon.

Iba an kahimtang kon an ginpaiwas diri minor de edad ngan nag-uukoy ha iba nga balay. Ginsagdonan ni apostol Pablo an mga Kristiano ha kadaan nga Korinto: “Diri kamo makipag-upod-upod, kon an usa ka tawo nga ginngangaranan nga bugto, paralibog, o masingbahon ha mga ladawan, o malibakon, o parahubog, o paralimbong; bisan ha pagkaon diri kamo makigsaro ha iya.” (1 Korinto 5:11) Bisan kon an panginano han importante nga mga buruhaton ha pamilya bangin magkinahanglan hin pakigkomunikar ha ginpaiwas, sadang mangalimbasog an Kristiano nga kag-anak nga likyan an diri kinahanglanon nga pakig-upod.

Kon an nakasala nga anak gindisiplina han Kristiano nga mga magbarantay, diri maaramon kon imo balewarayon o minuson an ira basado ha Biblia nga disiplina. An pag-ugop ha imo rebelyoso nga anak diri gud makakahatag hin bisan ano nga totoo nga panalipod kontra ha Yawa. Ha pagkamatuod, imo iginbubutang ha peligro an imo espirituwal nga kahimsog. Ha luyo nga bahin, pinaagi ha pagsuporta han pangalimbasog han mga magbarantay, magpapabilin ka nga ‘marig-on ha pagtoo’ ngan makakahatag han gimaopayi nga bulig ha imo anak.—1 Pedro 5:9.

Bubuligan Ka ni Jehova

Kon nagrirebelde an imo anak, hinumdumi nga diri ka nag-uusahan. An iba nga Kristiano nga kag-anak nakaeksperyensya liwat hito. Anoman an aton problema, bubuligan kita ni Jehova.—Salmo 68:19.

Sarig kan Jehova ha pag-ampo. Makig-upod pirme ha Kristiano nga kongregasyon. Suportahi an disiplina han gintokahan nga mga magbarantay. Pinaagi ha pagbuhat hito, makakagpabilin ka nga marig-on. Ngan an imo susbaranan mahimo makabulig ha imo anak nga karawaton an mahigugmaon nga imbitasyon ni Jehova nga bumalik ha iya.—Malakias 3:6, 7.

[Mga Retrato ha pahina 18]

Kuha hin kusog tikang ha pag-ampo ngan ha Kristiano nga kongregasyon