Sobra Usa ka Gatos an Edad nga May Katuyoan ha Kinabuhi

HI Elin usa han 60 nga tawo ha Sweden nga bag-o la nga iginlista nga 105 ka tuig na an edad o sobra pa. Hiya mismo 105 anyos na. Bisan kon aada na la hiya ha balay para ha mga lagas, igo pa an iya kahimsog ha pagpadayon ha pag-alagad sugad nga aktibo nga Saksi ni Jehova, an pagkinabuhi nga ginpili niya sobra 60 ka tuig na an naglabay.

Ha pagsangyaw ha iba, ginsusunod ni Elin an susbaranan ni apostol Pablo han priso hiya ha usa nga balay. Nagsangyaw hi Pablo ha ngatanan nga iya bisita. (Buhat 28:16, 30, 31) Ha sugad man nga paagi, ginsasalingabot ni Elin an tagsa nga higayon ha pakiistorya ha mga dyanitor, dentista, doktor, beautician, nars, ngan iba pa nga iginkikita niya ha balay, iginsusumat ha ira an maopay nga sumat ha Biblia. Ha panapanahon, gin-iimbitar pa ngani han mga igkasi-tumuroo ha kongregasyon ni Elin an ira mga estudyante ha Biblia nga bisitahon hiya basi magpahimulos hira ha iya kahibaro ngan eksperyensya.

Inaapresyar han mga kakongregasyon ni Elin an iya malipayon nga disposisyon ngan pagkamausisa. Usa nga igkasi-Saksi an nasiring: “Urusahon an iya abilidad ha paghibaro han mga buruhaton han kongregasyon. Nahinunumdoman niya an mga ngaran han ngatanan nga kabataan ngan hadton bag-o la nga binalhin ngada ha kongregasyon.” Kilala liwat hi Elin tungod han iya pagkamaabiabihon, hilig ha pagpatawa, ngan positibo nga disposisyon ha kinabuhi.

Ano an nabulig kan Elin nga magpabilin nga malipayon ngan nakasentro ha iya katuyoan ha kinabuhi? Binabasa niya an usa nga teksto ha Kasuratan kada adlaw ha Pag-usisa han Kasuratan Adlaw-adlaw, nga iginpublikar han mga Saksi ni Jehova. Pinaagi hin lente, binabasa liwat niya an usa nga bahin han Biblia kada adlaw. Nag-aandam hi Elin para ha sinemana nga mga katirok han mga Saksi ni Jehova, ngan bisan kon diri na hiya nakakatambong hito tungod han iya maluya nga panlawas, pinamamatian niya an iginrekord nga mga bahin hini nga mga katirok. An regular nga pagbasa han Biblia ngan basado-ha-Biblia nga mga publikasyon ngan an regular nga pagtambong ha Kristiano nga mga katirok makakabulig ha aton nga magkaada hin makapatagbaw ngan may-katuyoan nga kinabuhi anoman an aton edad.—Salmo 1:2; Hebreo 10:24, 25.