Amos—Parapamuro o Paratusok hin mga Igos?

HAN ikasiyam ka siglo A.K.P., ginsugo hi propeta Amos han maraot hinduro ngan parasingba-hin-baka nga saserdote nga hi Amasia nga umundang ha panagna ha Israel. Nagdumiri hi Amos, hiya nagsiring: “Ako paramangno hin kakarnerohan, ngan parapangapon [“paratusok,” NW] hin mga kahoy nga sikomoro: Ngan kinuha ako ni Jehova tikang ha pagtugway han kapangon nga kakarnerohan ngan hi Jehova nagsiring ha akon: Lakat, panagna ha akon katawohan nga Israel.” (Amos 7:14, 15) Oo, hi Jehova an nagpili kan Amos nga magin propeta; diri an iya kalugaringon. Kondi ano an iginpapasabot ni Amos han hiya siniring nga “paratusok” hiya han mga igos han sikomoro nga mga kahoy?

An Hebreo nga pulong nga iginhubad hin sugad mababasa hin usa ka beses la ha New World Translation. Ito nga termino iginhubad han iba nga bersyon han Biblia nga “paraburo,” “parakultibar,” “parapangutod,” o “paratanom,” imbes nga “paratusok,” hin mga igos han sikomoro. Kondi, an barasahon nga Economic Botany nasiring nga an angayan nga hubad hito nga termino amo an “paraturok” tungod kay nangangahulogan ini hin espesyal nga buhat han parakultibar han mga igos han sikomoro.

An pagtusok, o pagturok, nga nangangahulogan hin, paghimo hin gudtiay nga buho ha mga igos han sikomoro, ginbubuhat gud ha Ehipto ngan ha Cyprus tikang pa hadto. An pagturok, o pagtusok, diri na ginhihimo ha Israel yana tungod kay iba na nga klase hin mga igos an nagtutubo dida hito nga nasud. Kondi, an pagtusok ginbubuhat han mga Israelita ha panahon ni Amos, tungod kay an mga sikomoro nga tinubo ha Israel hito nga panahon tikang ha Ehipto.

Matin-aw nga tungod ha pagturok ha mga igos nakakasupsop ito hin tubig ngan nagigin dugaon. Nakakapauswag liwat ito han pagsuplay han ethylene gas, nga nagpapadagmit han proseso han kahinog, nga nagriresulta ha mas dagku ngan mas matam-is nga prutas. Dugang pa, diri nadadaot han mga lapinig an mga prutas tungod kay nahihinog dayon ito.

Bisan pa han ubos nga gintikangan ni Amos sugad nga parabantay hin mga karnero ngan paratusok hin mga igos, waray hiya mahadlok ha mga kaaway. Lugod, maisugon nga iginpasamwak niya an mensahe ni Jehova kontra ha Israel. Maopay gud ito nga susbaranan para ha mga surugoon han Dios yana, nga kinahanglan liwat magpasamwak hin mensahe nga diri naruruyagan han kadam-an!—Mateo 5:11, 12; 10:22.