Ano an Imo Mahibabaroan Tikang ha Kabataan?

“BAGA ka man hin bata!” Kon isiring ito ha aton nga adulto, posible nga mainsulto kita. Bisan kon makaruruyag gud an gudtiay nga kabataan, matin-aw nga kulang pa hira hin kahamtong, eksperyensya, ngan kinaadman nga kasagaran nga nag-uuswag samtang nagkakaedad.—Job 12:12.

Kondi, ha usa nga okasyon ginsidngan ni Jesus an iya mga disipulo: “Matuod, ako nasiring ha iyo nga kon diri kamo magbalik ngan magpakabata, diri kamo makakasulod ha ginhadian han langit.” (Mateo 18:3) Ano an iginpapasabot ni Jesus? Ano nga mga kalidad han kabataan an angay subaron han mga adulto?

Pagkultibar han Pagpaubos nga Pariho han Kanan Bata

Tagda an kahimtang nga nakaaghat kan Jesus nga magyakan hin sugad. Han inabot hiya ha Kapernaum katapos hin maiha nga pagbiyahe, ginpakianhan niya an iya mga disipulo: “Ano an iyo ginbabaton-batonan ha dalan?” An naawod nga mga disipulo nagpabilin nga hilom, tungod kay naglantugi hira kon hin-o ha ira an mas labaw. Ha kataposan, nagkaada hira kaisog nga magpakiana kan Jesus: “Hin-o ba an gidadakui ha ginhadian han langit?”—Markos 9:33, 34; Mateo 18:1.

Baga hin urusahon nga katapos makaupod hi Jesus hin haros tulo ka tuig, an mga disipulo maglalantugi mahitungod hin katungdanan o ranggo. Kondi, nagdaku hira ha Judio nga relihiyon, nga nagpabili gud ha katungdanan. Matin-aw, inin relihiyoso nga gintikangan ngan tawhanon nga pagkadiri-hingpit, nakaimpluwensya ha panhunahuna han mga disipulo.

Hi Jesus liningkod, iya ginpahirani an iya mga disipulo, ngan siniring: “Kon  hin-o an karuyag magin siyahan, hiya magigin urhi han ngatanan, ngan surugoon han ngatanan.” (Markos 9:35) Sigurado nga nahipausa hira hini nga mga pulong. An panhunahuna ni Jesus nakontra gud ha mga ideya han mga Judio han pagin labaw! Katapos tumawag hi Jesus hin gutiay nga bata. Samtang mahigugmaon nga iya ginhahangkupan an bata, iya iginpatin-aw an iya punto: “Matuod, ako nasiring ha iyo nga kon diri kamo magbalik ngan magpakabata, diri kamo makakasulod ha ginhadian han langit. Busa bisan hin-o an magpapaubos sugad hini nga gutiay nga bata, amo an gidadakui ha ginhadian han langit.”—Mateo 18:3, 4.

Usa gud ito nga praktikal nga ehemplo han pagpaubos! Handurawa an kahimtang. Usa ka grupo han dagku na, seryoso nga adulto nga kalalakin-an an nakapalibot ha uusa nga bata, ngan ira ginkinita ito. Nahuyo gud la hiya ngan puno hin pagsarig! Waray gud hiya pagpalabi-labi ngan maraot nga panhunahuna! Mapasakupon gud ngan mapainubsanon hiya! Oo, an bata gimaopayi gud nga susbaranan han diosnon nga kalidad nga pagkamapainubsanon.

Matin-aw an punto ni Jesus. Kinahanglan kultibaron naton ngatanan an pagkamapainubsanon nga sugad hin bata kon karuyag naton makapanunod han Ginhadian han Dios. Ha sugad-hin-pamilya nga relasyon han mga Kristiano, waray ito pakigkompetensya o pagpahitaas. (Galasia 5:26) Ha pagkamatuod, ini gud nga mga kinaiya an nakaaghat kan Satanas nga Yawa nga magrebelde ha Dios. Diri urusahon nga hi Jehova nangangalas hito.—Proberbios 8:13.

An totoo nga mga Kristiano nangangalimbasog ha pagserbi, diri ha pagpadapat hin awtoridad. Bisan kon diri gud makaruruyag an buruhaton o minos hinduro an aton ginsiserbihan, an totoo nga pagpaubos nag-aaghat ha aton nga magsirbe ha iba. An sugad nga mapainubsanon nga pagserbi nagriresulta hin makapatagbaw nga balos. Hi Jesus nasiring: “Kon hin-o an kumarawat hin usa nga sugad hini nga bata ha akon ngaran, nakarawat ha akon; ngan kon hin-o an kumarawat ha akon, diri nakarawat ha akon, kondi han nagpakanhi ha akon.” (Markos 9:37) An pagkultibar hin mahinatagon, mapainubsanon, sugad-hin-kanan-bata nga disposisyon nagpapaduok ha aton ha gihitaasi nga Persona ha uniberso ngan ha iya Anak. (Juan 17:20, 21; 1 Pedro 5:5) Makakarawat naton an kalipay ha aton pagin mahinatagon. (Buhat 20:35) Ngan natatagbaw kita ha pakadugang han kamurayawan ngan pagkaurosa nga nakikita ha katawohan han Dios.—Efeso 4:1-3.

 Masayon Tutdoan Ngan Madagmit Sumarig

Katapos, ginpabug-atan ni Jesus an usa pa nga leksyon nga mahibabaroan han mga adulto tikang ha kabataan: “Bisan hin-o an diri kumarawat han ginhadian han Dios sugad han usa nga bata, diri gud makakasulod didto.” (Markos 10:15) An kabataan diri la mapainubsanon, masayon liwat hira tutdoan. “Pariho hira hin mga espongha may kalabotan ha pagkarawat hin impormasyon,” siring han usa nga iroy.

Kon sugad, basi makapanunod kita han Ginhadian han Dios, kinahanglan karawaton ngan sundon naton an mensahe han Ginhadian. (1 Tesalonika 2:13) Pariho han natatawo pa la nga minasus-an, kinahanglan naton ‘pagtinguhaon an espirituhanon nga gatas nga waray limbong, basi nga pinaagi hito magtubo kita ha kaluwasan.’ (1 Pedro 2:2) Kondi, kumusta man kon an katutdoan han Biblia baga hin makuri hisabtan? “An kabataan padayon nga nagpapakiana hin ‘Kay ano?’ tubtob nga makabiling hira hin makapatagbaw nga mga baton ha ira mga pakiana,” nakaobserba an usa nga an trabaho pagmangno hin kabataan. Maopay nga subaron naton hira. Salit magpadayon ha pag-aram. Makiistorya ha eksperyensyado nga mga Kristiano. Pangaro kan Jehova hin kinaadman. (Jakobo 1:5) Waray ruhaduha nga maabot an panahon nga babalosan an imo pagkamapinadayunon nga inuupdan hin mga pag-ampo.—Mateo 7:7-11.

Kondi, an iba bangin maghunahuna, ‘Diri ba masayon malimbongan an mga tawo nga masayon tutdoan?’ Diri, kon may-ada hira masasarigan nga giya. Pananglitan, natural la nga ha ira kag-anak nangangaro hin giya an kabataan. “Pinamamatud-an han kag-anak nga masasarigan hira pinaagi ha pagpanalipod ngan pag-ataman ha ira mga anak kada adlaw,” siring han usa nga amay. Sigurado nga may-ada kita pariho nga mga hinungdan ha pagsarig ha aton langitnon nga Amay, hi Jehova. (Jakobo 1:17; 1 Juan 4:9, 10) Hi Jehova naghahatag ha aton hin masasarigan nga giya pinaagi han iya sinurat nga Pulong. An iya baraan nga espiritu ngan organisasyon nagliliaw ngan nabulig ha aton. (Mateo 24:45-47; Juan 14:26) An pagpahimulos hini mabulig ha aton nga magin talwas pirme ha espirituwal.—Salmo 91:1-16.

An pagkultibar hin pagsarig ha Dios nga sugad han kanan bata naghahatag liwat ha aton hin kamurayawan ha hunahuna. Usa nga eskolar ha Biblia an nakaobserba: “Han kabataan pa kita  nagbibiyahe kita bisan kon waray kita dara nga pamasahe, ngan bisan kon waray kita ideya kon paonan-o kita madangat ha aton kakadtoan, kondi waray gud kita magruhaduha nga an aton mga kag-anak talwas nga magdadara ha aton ngadto.” Sugad ba liwat hito an aton pagsarig kan Jehova samtang nagbibiyahe kita ha dalan han kinabuhi?—Isaias 41:10.

An marig-on nga pagsarig ha Dios nabulig ha aton nga malikyan an mga batasan ngan buhat nga makakapeligro han aton espirituwalidad. Lugod, bug-os nga nasarig kita ha mga pulong ni Jesus nga an aton langitnon nga Amay maaram han aton mga buhat ngan tubtob nga gin-uuna naton an Ginhadian ngan an katadongan han Dios, mamangnoan kita niya. Mabulig ini ha aton nga maatohan an pagsulay ha pagsentro han aton atensyon ha materyal nga mga panginahanglan samtang napapabay-an an espirituwal nga mga responsabilidad.—Mateo 6:19-34.

‘Magpakabata ha Kasal-anan’

Bisan kon natawo nga diri hingpit, an kabataan putli an kasingkasing ngan hunahuna. Tungod hini, ginsasagdonan han Biblia an mga Kristiano: “Magpakabata kamo ha kasal-anan.”—1 Korinto 14:20.

Tagda an singko anyos nga hi Monique, nga malipayon nga nagsumat ha iya nanay: “An akon bag-o nga sangkay nga hi Sarah, kurong an buhok pariho ha akon!” An pagin iba han tribo ngan kolor han panit ni Sarah waray maunabi. Usa nga kag-anak an nagsiring: “Diri naiimpluwensyahan an kabataan han pagkaiba-iba han nasyonalidad. Balewaray ha ira an rasa o pagpasulabi.” May kalabotan hini, iginpapakita gud han kabataan an panhunahuna han aton waray ginpapasulabi nga Dios, nga nahigugma ha mga tawo han ngatanan nga nasud.—Buhat 10:34, 35.

Masayon liwat magpasaylo an kabataan. Usa nga kag-anak an siniring: “Kon nag-aaway hira Jack ngan Levi, ginsisidngan namon hira nga mangaro hin pasaylo ha kada tagsa, ngan diri nag-iiha malipayon na liwat hira nga nag-uuyag. Hira diri nagdudumot, naghihisgot mahitungod han naglabay, o naghihimo hin mga kondisyon antes magpasaylo. Nagpapadayon la hira ha pagkamagsangkay ngan pag-uyag.” Maopay gud nga susbaranan para ha mga adulto!—Kolosas 3:13.

Dugang pa, kinakarawat dayon han kabataan an pag-eksister han Dios. (Hebreo 11:6) An ira natural nga pagkaprangka agsob nga nagpapagios ha ira nga maisugon nga magsangyaw ha iba. (2 Hadi 5:2, 3) An ira simple, kinasingkasing nga mga pag-ampo nakakabantad bisan han pinakamatig-a nga kasingkasing. Ngan kon ginsusulay, makatirigamnan gud an ira karig-on. Presyoso gud nga mga regalo an kabataan!—Salmo 127:3, 4.

Maipapahiuli an Mag-opay nga Kalidad

Bangin maghunahuna ka, ‘Posible ba nga makuha utro han mga adulto an mag-opay nga kalidad han pagkabata?’ Oo, an simple ngan makapadasig nga baton! Sigurado nga an sugo ni Jesus nga “magpakabata” nagpapamatuod nga posible ito.—Mateo 18:3.

Ha pag-ilustrar: Usa nga grupo han mga nag-oopay hin mga obra han arte an nag-aayad hin marahalon hinduro nga obra maestra. Samtang ginbubuhat nira ito, ira ginkukuha an natirok na nga mga hugaw ngan ginpapara an mga nauna nga sayop nga mga pagsari ha pagpaopay hito. Katapos hin duro nga mapailubon nga pangalimbasog han mga nagtatrabaho, an orihinal nga makaruruyag nga kolor han obra maestra ngan an natural nga kaanyag hito nakikita na han ngatanan. Ha pariho nga paagi, pinaagi han padayon nga pangalimbasog, bulig han baraan nga espiritu ni Jehova, ngan mahigugmaon nga bulig han Kristiano nga kongregasyon, magkakaada utro kita mag-opay nga kalidad nga natural nga nakikita han kabataan pa kita.—Efeso 5:1.

[Retrato ha pahina 9]

Natural nga mapainubsanon an kabataan

[Retrato ha pahina 10]

Waray ginpapasulabi an kabataan, ngan masayon hira magpasaylo ngan mahingalimot