Ayaw Gud Pag-undang ha Pagpauswag han Imo Apresasyon

“Hin kamakaruruyag ha akon an imo mga pamalandong, O Dios! Hin pagkadaku han kabug-osan nira!”—SALMO 139:17.

1, 2. Kay ano nga sadang apresyaron naton an Pulong han Dios, ngan paonan-o iginpahayag han salmista an iya apresasyon?

 MAKATIRIGAMNAN an butang nga hin-agian. Samtang gin-aayad an templo ni Jehova ha Jerusalem, hin-agian han hitaas nga saserdote nga hi Hilkia an “basahon han balaud ni Jehova nga ihinatag ni Moises,” nga sigurado nga amo an orihinal nga kopya nga nakompleto mga 800 ka tuig na antes hito! Mahahanduraw mo ba an inabat han mahadlukon-ha-Dios nga hi Hadi Josia han gindara ha iya an libro? Oo, pinabilhan gud niya ito ngan iginpabasa dayon ito kan Sapan nga sekretaryo.—2 Kronikas 34:14-18.

² Yana, an Pulong han Dios, ha kabug-osan o ha bahin, mababasa na han binilyon nga tawo. Kondi naibanan ba hito an pagkabirilhon, an pagkaimportante han Kasuratan? Syempre waray! An totoo, nagsusulod ito han mga panhunahuna mismo han Makagarahum-ha-ngatanan, nga iginrekord para ha aton kapulsanan. (2 Timoteo 3:16) Ha pagpahayag han iya mga pagbati mahitungod ha Pulong han Dios, an salmista nga hi David nagsurat: “Hin kamakaruruyag ha akon an imo mga pamalandong, O Dios! Hin pagkadaku han kabug-osan nira!”—Salmo 139:17.

3. Ano an nagpapakita nga hi David usa ka tawo nga may-ada hilarom nga espirituwalidad?

³ Waray gud mawara an apresasyon ni David kan Jehova, ha iya Pulong, ngan ha iya kahikayan para ha totoo nga pagsingba. An damu nga mag-opay nga salmos nga ginkomposo ni David nagpahayag han iya inabat. Pananglitan, ha Salmo 27:4, hiya nagsurat: “Usa la nga butang [an] ginpangaro ko kan Jehova, ini [an] pangingitaon ko: nga hi ako makaukoy ha balay ni Jehova ha ngatanan nga mga adlaw han akon kinabuhi, basi ako makatan-aw han katahom ni Jehova, ngan pagpakiana [“magkita nga may apresasyon,” NW] dida hiton iya templo.” Ha orihinal nga Hebreo, an mga pulong nga “magkita nga may apresasyon” nangangahulogan nga mag-iha nga namamalandong, mag-usisa, magkita nga may kalipay, pagkaruyag, pagdayaw. Matin-aw, hi David usa ka tawo nga may-ada hilarom nga espirituwalidad ngan nag-apresyar gud han espirituwal nga mga tagana ni Jehova ngan nalipay gud ha tagsa nga espirituwal nga kamatuoran nga iginpahayag han Dios. An iya susbaranan han apresasyon takos subaron.—Salmo 19:7-11.

Apresyara an Pribilehiyo nga Hibaroan an Kamatuoran han Biblia

4. Ano an hinungdan nga hi Jesus “nalipay ha espiritu santo”?

⁴ An pagkaada hilarom nga pagsabot ha Pulong han Dios diri nadepende ha pagin intelihente o ha kalibotanon nga edukasyon, nga may tendensya ha pag-aghat hin pagpahitaas. Lugod, nadepende ito ha diri-takos nga pagkabuotan ni Jehova, nga iginhahatag niya ha mapainubsanon, tangkod-an-kasingkasing nga mga tawo nga mahunahunaon han ira espirituwal nga panginahanglan. (Mateo 5:3; 1 Juan 5:20) Han pinamalandong ni Jesus nga an mga ngaran han iba nga diri-hingpit nga mga tawo ipinanurat ha langit, “hiya nalipay ha espiritu santo, ngan siniring: Ako nagpapasalamat ha imo, O, Amay! Ginoo han langit ngan han tuna, nga imo gintago ini nga mga bagay tikang han mga kamag-araman ngan masinabuton, ngan ipinakita hira ha mga kabataan.”—Lukas 10:17-21.

5. Kay ano nga diri sadang igbalewaray han mga disipulo ni Jesus an mga kamatuoran han Ginhadian nga iginpahayag ha ira?

⁵ Katapos igpahayag iton kinasingkasing nga pag-ampo, hi Jesus liningi ha iya mga disipulo ngan nagsiring: “Bulahan an mga mata, nga nakakakita han iyo pinanhikit-an. Kay ako nasiring ha iyo, nga damu an mga manaragna ngan mga  kahadian an nagkakaruyag pagkita han iyo pinanhikit-an, ngan hira waray magpakakita; ngan pagpakabati han iyo pinanhibatian, ngan hira waray pagpakabati.” Oo, gindasig ni Jesus an iya matinumanon nga mga sumurunod nga diri igbalewaray an presyoso nga mga kamatuoran han Ginhadian nga iginpapahayag ha ira. Ini nga mga kamatuoran waray igpahayag ha nahiuna nga mga henerasyon han mga surugoon han Dios, ngan waray gud ito igpahayag ha “mga kamag-araman ngan masinabuton” ha panahon ni Jesus!—Lukas 10:23, 24.

6, 7. (a) Ano an aton mga hinungdan ha pagin maapresyaron ha kamatuoran tikang ha Dios? (b) Ano nga kaibahan an nakikita yana butnga han totoo nga relihiyon ngan han palso?

⁶ Ha aton panahon, mas damu pa gud an aton hinungdan nga magin maapresyaron ha kamatuoran tikang ha Dios, kay hi Jehova, pinaagi han “matinumanon ngan maaramon nga uripon,” naghahatag ha iya katawohan hin mas hilarom pa nga pagsabot ha iya Pulong. (Mateo 24:45, NW; Daniel 12:10) May kalabotan ha panahon han kataposan, hi propeta Daniel nagsurat: “Damu an madalagan ngadto nganhi, ngan an hibaro magdudugang [“magigin hura,” NW].” (Daniel 12:4) Diri ka ba nauyon nga yana an kahibaro mahitungod ha Dios ‘nagin hura’ na ngan an mga surugoon ni Jehova napapakaon hin maopay ha espirituwal?

⁷ Daku gud nga kaibahan an nakikita naton butnga han espirituwal nga kahuraan han katawohan han Dios ngan han relihiyoso nga kasamok ha Babilonya nga Daku! Sugad nga resulta, damu nga nasusubo o nangingil-ad ha palso nga relihiyon an naayop na ha totoo nga pagsingba. Hira an mga sugad-karnero nga ‘nadiri nga makaangbit ha mga sala han Babilonya nga Daku’ o “makakarawat han iya mga peste.” Gindadasig ni Jehova ngan han iya mga surugoon an ngatanan han sugad nga mga tawo nga sumulod ha totoo nga Kristiano nga kongregasyon.—Pahayag 18:2-4; 22:17.

An mga Maapresyaron Nadaop ha Dios

8, 9. Paonan-o natutuman yana an Hagay 2:7?

⁸ Mahitungod han iya espirituwal nga balay han pagsingba, hi Jehova nagtagna: “Akon babay-ugon an ngatanan nga nasud, ngan an birilhon nga mga butang han ngatanan nga nasud mahinganganhi; ngan akon pupun-on ini nga balay hin himaya.” (Hagay 2:7) Inin urusahon nga tagna natuman ha panahon ni Hagay han gintukod utro han nahibalik nga nanhibilin han katawohan han Dios an templo ha Jerusalem. Yana, an tagna ni Hagay dugang nga natutuman may kalabotan ha daku nga espirituwal nga templo ni Jehova.

⁹ Minilyon an nagkasulod na ha simboliko nga templo basi magsingba ha Dios “ha espiritu ngan ha kamatuoran,” ngan kada tuig ginatos ka yukot nga “birilhon nga mga butang han ngatanan nga nasud” an padayon nga nagkakasulod. (Juan 4:23, 24) Pananglitan, an bug-os-kalibotan nga report han 2006 nga tuig han pag-alagad nagpapakita nga 248,327 an nabawtismohan sugad nga simbolo han ira dedikasyon kan Jehova. Nagrirepresentar ito hin aberids nga 680 nga bag-ohan kada adlaw! An ira gugma ha kamatuoran ngan an ira hingyap nga mag-alagad kan Jehova sugad nga mga parasamwak han Ginhadian nagpapamatuod nga hira tinuod nga ginpahirani han Dios.—Juan 6:44, 65.

10, 11. Isaysay an usa nga eksperyensya nga nagpapakita kon paonan-o inaapresyar han mga tawo an kamatuoran han Biblia.

¹⁰ Damu hini nga mga tangkod-an-kasingkasing an nadani ha kamatuoran tungod kay nakita nira an “ginkakalainan han matadong ngan han  maraot, han ginkakalainan niya nga nag-aalagad ha Dios ngan niya nga diri nag-aalagad ha iya.” (Malakias 3:18) Tagda an eksperyensya nira Wayne ngan Virginia, nga mag-asawa nga membro hadto han Protestante nga relihiyon kondi may-ada damu nga pakiana nga diri nababaton. Nangangalas hira ha girra ngan nawuwurok ngan naguguol kon nakikita nira an mga klero nga nagbibendisyon ha mga sundalo ngan mga armas. Samtang nagtitikalagas an mag-asawa, inaabat nira nga ginbabalewaray hira han iba ha ira relihiyon, bisan kon hi Virginia nagtutdo ha Sunday school ha sulod hin damu ka tuig. “Waray binisita ha amon o nagpahayag hin pagtagad ha amon espirituwal nga kahimtang,” siring nira. “Interesado la an amon relihiyon ha amon kwarta. Nasubo gud kami.” Mas nasubo pa gud hira han an ira relihiyon nagin matinuguton ha homoseksuwalidad.

¹¹ Samtang hito nga panahon, an apo nira Wayne ngan Virginia ngan sunod an ira anak nga babaye nagin mga Saksi ni Jehova. Bisan kon ha siyahan nasubo hini hira Wayne ngan Virginia, ha urhi nagbag-o an ira hunahuna ngan ginkarawat nira an pag-aram ha Biblia. “Ha tulo la ka bulan,” siring ni Wayne, “mas damu an amon hinbaroan mahitungod ha Biblia kay ha amon hinbaroan ha naglabay nga 70 ka tuig! Waray gud namon hibaroi nga Jehova ngay-an an ngaran han Dios, ngan waray gud kami hinbaroan mahitungod han Ginhadian ngan han Paraiso nga tuna.” Waray pag-iha, inin sinsero nga mag-asawa nagtikang tumambong ha Kristiano nga mga katirok ngan makigbahin ha ministeryo. “Karuyag namon isumat ha ngatanan an mahitungod han kamatuoran,” siring ni Virginia. Nabawtismohan hira nga duha han 2005 nga pariho sobra 80 anyos na an edad. “Hin-agian namon an totoo nga mga Kristiano,” siring nira.

Apresyara an Pagin Nasangkapan Para ha “Ngatanan nga Maopay nga Buhat”

12. Ano an igintatagana pirme ni Jehova para ha iya mga surugoon, ngan ano an kinahanglan buhaton naton basi magpahimulos?

¹² Binubuligan pirme ni Jehova an iya mga surugoon ha pagbuhat han iya kaburut-on. Pananglitan, hi Noe nakakarawat hin matin-aw, espisipiko nga mga instruksyon kon paonan-o hihimoon an arka—usa ka proyekto nga kinahanglan buhaton hin eksakto ha siyahan nga higayon! Ngan eksakto gud ito. Kay ano? Tungod kay ‘ginbuhat ni Noe sugad ha ngatanan nga kanan Dios ginsugo ha iya, iya ginbuhat.’ (Genesis 6:14-22) Yana liwat, bug-os nga sinasangkapan ni Jehova an iya mga surugoon ha pagbuhat han iya kaburut-on. Syempre, an aton nangunguna nga buruhaton amo an pagsangyaw han maopay nga sumat han naestablisar na nga Ginhadian han Dios ngan pagbulig ha mga takos nga magin mga disipulo ni Jesu-Kristo. Ngan sugad kan Noe, an aton kalamposan nadepende ha aton pagkamasinugtanon. Kinahanglan masinugtanon nga sundon naton an giya nga iginhahatag ni Jehova pinaagi han iya Pulong ngan iya organisasyon.—Mateo 24:14; 28:19, 20.

13. Pinaagi han ano ginbabansay kita ni Jehova?

¹³ Basi matuman ito nga buruhaton, kinahanglan hibaroan naton an ‘paggamit hin maopay’ han aton nangunguna nga garamiton—an Pulong han Dios—nga “may kapulsanan man ha pagtututdoan, ha pagbadlong, ha pagsaway, ha panutdoan nga ha katadongan: basi nga an tawo han Dios mahingpit, ngan maandam tungod ha ngatanan nga maopay nga buhat.” (2 Timoteo 2:15; 3:16, 17) Sugad ha siyahan nga siglo, hi Jehova naghahatag ha aton hin birilhon nga pagbansay pinaagi han Kristiano nga kongregasyon. Yana, ha 99,770 nga kongregasyon ha bug-os nga kalibotan, an Teokratiko nga Eskwelahan ha Ministeryo ngan an Katirok ha Pag-alagad gindudumara kada semana basi buligan kita ha ministeryo. Ipinapakita mo ba an imo apresasyon para hinin importante nga mga katirok pinaagi han regular nga pagtambong ngan pag-aplikar han imo hinbabaroan?—Hebreo 10:24, 25.

14. Paonan-o ipinapakita han mga surugoon ni Jehova an ira apresasyon ha pribilehiyo ha pag-alagad ha Dios? (Iupod an mga komento mahitungod ha tsart ha pahina 27-30.)

¹⁴ Ha pangalimbasog ha ministeryo, minilyon nga katawohan han Dios ha bug-os nga kalibotan an nagpapakita han ira apresasyon ha pagbansay nga nakakarawat nira. Pananglitan, durante han 2006 nga tuig han pag-alagad, 6,741,444 nga magwarali han Ginhadian an naggasto hin total nga 1,333,966,199 ka oras ha ngatanan nga bahin han buruhaton, nga nag-upod han pagdumara hin 6,286,618 nga pag-aram ha Biblia. Pipira la ini han makapadasig nga mga detalye nga nakalista ha bug-os-kalibotan nga report. Gin-aaghat ka  namon nga usisahon ini nga report ngan madasig hito, sugad la nga an aton kabugtoan ha siyahan nga siglo sigurado nga nadasig gud han mga report mahitungod han pag-uswag han pagsangyaw nga buruhaton ha ira panahon.—Buhat 1:15; 2:5-11, 41, 47; 4:4; 6:7.

15. Kay ano nga waray sadang masubo mahitungod han iya bug-os-kalag nga pag-alagad kan Jehova?

¹⁵ An daku nga singgit han pagdayaw nga iginpapaabot ngadto ha Dios kada tuig nagpapakita han hilarom nga apresasyon han mga surugoon ni Jehova ha pribilehiyo nga makilala hi Jehova ngan magpamatuod mahitungod ha iya. (Isaias 43:10) Oo, an halad han pagdayaw nga iginhahatag han iba han aton lagas, masakit, o magluya nga kabugtoan mahimo igpariho ha gutiay nga sinselyo han balo nga babaye. Kondi diri naton hingalimtan nga inaapresyar gud ni Jehova ngan han iya Anak an ngatanan nga bug-os-kalag nga nag-aalagad ha Dios, samtang ginbubuhat nira an ngatanan nga mahihimo nira.—Lukas 21:1-4; Galasia 6:4.

16. Ano nga mga garamiton ha pagtutdo an igintagana han Dios ha bag-o nga mga tuig?

¹⁶ Gawas pa han pagbansay ha aton para ha ministeryo, ginsasangkapan kita ni Jehova, pinaagi han iya organisasyon, hin mag-opay hinduro nga mga garamiton ha pagtutdo. Ha naglabay nga mga tuig, nag-upod ini han mga libro nga An Kamatuoran nga Nagtutungway Ngadto ha Kinabuhi nga Waray Kataposan, Mahimo Ka Mabuhi ha Waray Kataposan ha Paraiso ha Tuna, Kahibaro nga Nagtutugway Ngadto ha Kinabuhi nga Waray Kataposan, ngan yana, Ano Gud ba an Igintututdo han Biblia? Adton tinuod nga naapresyar hini nga mga tagana nagamit hini hin maopay ha ministeryo.

Gamita hin Maopay an Igintututdo han Biblia nga Libro

17, 18. (a) Ano nga mga bahin han Igintututdo han Biblia nga libro an karuyag mo pabug-atan ha imo ministeryo? (b) Ano an naobserbahan han usa nga paramangno han sirkito mahitungod han Igintututdo han Biblia nga libro?

¹⁷ Pinaagi han 19 nga kapitulo, detalyado nga apendise, ngan matin-aw, simple nga yinaknan, an libro nga Ano Gud ba an Igintututdo han Biblia? usa nga bendisyon ha ministeryo. Pananglitan, an kapitulo 12 naghihisgot han topiko nga “Pagkinabuhi ha Paagi nga Nakakalipay ha Dios.” Iginsasaysay hini nga kapitulo ha estudyante kon paonan-o hiya mahimo magin sangkay han Dios, usa nga butang nga diri gud gintatagad o ginhuhunahuna han damu nga tawo sugad nga posible.  (Jakobo 2:23) Ano an mga komento mahitungod hini nga bulig ha pag-aram ha Biblia?

¹⁸ Usa nga paramangno han sirkito ha Australia an nagreport nga an Igintututdo han Biblia nga libro “nakakaaghat dayon ha mga tagbalay nga makiistorya.” Nagsiring pa hiya nga masayon hinduro ito gamiton salit “nakahatag ito ha damu nga magwarali han Ginhadian hin bag-o nga kompyansa ngan kalipay ha ministeryo. Diri urusahon nga tinatawag han iba ini nga libro sugad nga Presyoso nga Bulawan!”

19-21. Isaysay an pipira nga eksperyensya nga nagpapabug-at han bili han Igintututdo han Biblia nga libro.

¹⁹ “Sigurado nga sinugo ka han Dios,” siring han usa nga babaye ha Guyana ha payunir nga binisita ha iya. An karelasyon han babaye bag-o la nga binaya ha iya ngan ha ira duha nga gudtiay pa nga anak. Inabrihan han payunir an Igintututdo han Biblia nga libro ha kapitulo 1 ngan ginbasa ha iya an parapo 11, ilarom han sub-ulohan nga “Ano an Inaabat han Dios ha Kawaray-Hustisya nga Gin-aantos Naton?” “An mga punto nakabantad gud ha iya,” siring han payunir. “Ha pagkamatuod, nagpakadto hiya ha luyo han iya tindahan ngan nagtangis hinduro.” Ginkarawat hini nga babaye an tanyag nga regular nga pag-aram ha Biblia ngan padayon nga nag-uuswag na.

²⁰ Hi José, nga naukoy ha Espanya, namatayan han iya asawa ha aksidente ha awto. Nagdroga hiya basi maliaw, ngan nagkonsulta liwat hiya ha mga sikologo. Kondi, waray mabaton han mga sikologo an pakiana nga nakaguol gud kan José: “Kay ano nga gintugotan han Dios nga mamatay an akon asawa?” Usa ka adlaw nakilala ni José hi Francesc, nga nagtatrabaho liwat ha pariho nga kompanya. Nagsuhestyon hi Francesc nga ira paghisgotan an kapitulo 11 han Igintututdo han Biblia nga libro, nga may ulohan nga “Kay Ano nga Tinutugotan han Dios an Pag-antos?” An esplikasyon han Kasuratan ngan an ilustrasyon mahitungod han usa nga magturutdo ngan usa nga estudyante nakaaghat gud kan José. Nagtikang hiya mag-aram hin madasigon, tinambong ha sirkito nga asembleya, ngan natambong na yana ha mga katirok ha lokal nga Kingdom Hall.

²¹ Hi Roman, nga 40 anyos an edad nga negosyante ha Polandia, natahod ha Pulong han Dios tikang pa hadto. Kondi tungod kay okupado hinduro ha iya trabaho, gutiay la an iya pag-uswag ha iya pag-aram ha Biblia. Bisan pa hito, tinambong hiya ha distrito nga kombensyon ngan kinarawat hin kopya han Igintututdo han Biblia nga libro. Katapos hito, daku gud an iya pag-uswag. “Pinaagi hini nga libro,” siring niya, “an ngatanan nga basihan nga mga katutdoan han Biblia nagin matin-aw ha akon.” Yana regular na nga nag-aaram ha Biblia hi Roman ngan nag-uuswag hin maopay.

Padayon nga Pauswaga an Imo Apresasyon

22, 23. Paonan-o kita makakagpadayon ha pagpakita han aton apresasyon ha paglaom nga iginhahatag ha aton?

²² Sugad han iginsaysay ha makapaaghat gud nga “Kaluwasan Hirani Na!” Distrito nga mga Kombensyon, an totoo nga mga Kristiano naghihingyap hinduro han “waray kataposan nga pagtubos” nga iginsaad han Dios ngan nagin posible pinaagi han iginbubo nga dugo ni Jesu-Kristo. Waray na mas maopay nga paagi ha pagpakita han aton kinasingkasing nga apresasyon para hinin presyoso nga paglaom kay ha padayon nga pagin limpyo ‘tikang ha mga patay nga buhat basi mag-alagad ha buhi nga Dios.’—Hebreo 9:12, 14.

²³ Oo, usa gud nga milagro nga an sobra unom ka milyon nga parasamwak han Ginhadian matinumanon nga nagpapadayon ha pag-alagad ha Dios bisan kon duro an pag-ipit nga unahon an kalugaringon nga kaopayan. Pinamamatud-an liwat hito nga inaapresyar gud han mga surugoon ni Jehova an kadungganan ha pag-alagad ha Dios, tungod kay maaram nga an ira “kabudlay tungod ha Ginoo diri [kay] waray kapulsanan.” Hinaot diri gud umundang an aton pagpauswag hito nga apresasyon!—1 Korinto 15:58; Salmo 110:3.

Paonan-o Mo Babatunon?

• Ano an igintututdo ha aton han salmista mahitungod han apresasyon ha Dios ngan ha iya espirituwal nga mga tagana?

• Paonan-o natutuman yana an Hagay 2:7?

• Paonan-o ginsasangkapan ni Jehova an iya mga surugoon ha pag-alagad ha iya hin epektibo?

• Ano an mahihimo mo ha pagpakita han imo apresasyon ha pagkamaopay ni Jehova?

[Mga Pakiana]

 [Tsart ha pahina 27-30]

REPORT HAN 2006 NGA TUIG HAN PAG-ALAGAD HAN MGA SAKSI NI JEHOVA HA BUG-OS NGA KALIBOTAN

 (Kitaan an bound volume)

[Mga Retrato ha pahina 25]

Bug-os nga ginsasangkapan kita ni Jehova ha pagbuhat han iya kaburut-on