Hi Jehova Usa nga Maapresyaron nga Dios
Hi Jehova Usa nga Maapresyaron nga Dios
“An Dios diri nga diri-matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran.”—HEBREO 6:10.
1. Paonan-o ipinakita ni Jehova an iya apresasyon ha Moabita nga hi Rut?
INAAPRESYAR gud ni Jehova an mga pangalimbasog hadton sinsero nga nagbubuhat han iya kaburut-on, ngan hura nga ginbibendisyonan niya hira. (Hebreo 11:6) An matinumanon nga hi Boas pamilyar hinin maopay hinduro nga bahin han personalidad han Dios, kay hiya nagsiring ha Moabita nga hi Rut, nga mahigugmaon nga nag-ataman ha iya balo nga ugangan: “Hi Jehova magbalos han imo binuhat, ngan an hingpit nga balos ihatag unta ha imo ni Jehova.” (Rut 2:12) Ginbendisyonan ba han Dios hi Rut? Oo! Ha pagkamatuod, an iya istorya iginrekord ha Biblia! Dugang pa, napangasawa hiya ni Boas ngan nagin kaapoy-apoyan ni Hadi David ngan ni Jesu-Kristo. (Rut 4:13, 17; Mateo 1:5, 6, 16) Ito nga ehemplo usa la han damu dida ha Biblia nga nagpapakita han apresasyon ni Jehova ha iya mga surugoon.
2, 3. (a) Kay ano nga makatirigamnan an mga kapahayagan ni Jehova hin apresasyon? (b) Kay ano nga nakakagpahayag hi Jehova hin totoo nga apresasyon? Iilustrar.
2 Tatagdon gud ni Jehova nga diri-matadong ito ha iya bahin kon diri hiya magpakita hin apresasyon. An Hebreo 6:10 nasiring: “An Dios diri nga diri-matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran, nga nagmangno kamo ha mga baraan, ngan nagmamangno pa kamo niyan.” Makatirigamnan gud ini nga mga pulong tungod kay an Dios nagpapakita hin apresasyon ha maunungon nga katawohan bisan kon hira magpakasasala ngan waray makadangat ha iya himaya.—Roma 3:23.
3 Tungod han aton pagkadiri-hingpit, bangin umabat kita nga an aton mga buhat han diosnon nga debosyon diri importante ngan diri takos ha bendisyon han Dios. Kondi, bug-os nga nasasabtan ni Jehova an aton mga motibo ngan kahimtang, ngan pinabibilhan gud niya an aton bug-os-kalag nga pag-alagad. (Mateo 22:37) Ha pag-ilustrar: Usa nga iroy an nakakita hin regalo—usa nga baratuhon la nga kwintas—ha iya lamesa. Mahimo niya tagdon an regalo sugad nga waray bili ngan igbalewaray la ito. Kondi, an kalakip nga kard nagsusumat nga an regalo tikang ha iya gutiay nga anak nga babaye, nga naggasto han ngatanan nga iya tinirok nga kwarta basi makapalit hito. Yana iba na an pagkita han iroy ha regalo. Bangin may mga luha nga hahangkopan niya an iya anak ngan ipapahayag an kinasingkasing nga apresasyon.
4, 5. Paonan-o ginsubad ni Jesus hi Jehova ha pagpakita hin apresasyon?
4 Tungod kay bug-os nga maaram hi Jehova han aton mga motibo ngan mga limitasyon, inaapresyar niya kon iginhahatag naton ha iya an aton gimaopayi, gutiay man ito o damu. May kalabotan hini, hingpit nga ginsubad ni Jesus an iya Amay. Hinumdumi an asoy han Biblia mahitungod han gutiay nga sinselyo han balo nga babaye. “Han nagtitinan-awon, [hi Jesus] kinita hin mga manggaranon, nga naglalabog han ira mga halad ha surudlan han salapi; ngan hiya kinita hin usa nga kablas nga babaye nga balo, nga naglalabog didto hin duha nga lepta. Ngan hiya siniring: Matuod, nasiring ako ha iyo: ini nga kablas nga babaye nga balo, naglabog hin darodamu ha ngatanan. Kay ngatanan ini naglabog han labaw han ira kahuraan ha mga halad ha Dios; kondi ini nga kablas nga babaye nga balo ha iya kakablasan linabog han ngatanan nga iya pinakabuhian.”—Lukas 21:1-4.
5 Oo, tungod kay hinbabaroan an mga kahimtang han babaye—nga hiya balo ngan pobre—hinsabtan ni Jesus an totoo nga bili han iya regalo, ngan pinabilhan gud niya ito. Ito liwat an masisiring mahitungod kan Jehova. (Juan 14:9) Diri ba makapadasig hibaroan nga anoman an imo mga kahimtang, makakarawat mo an pag-uyon han aton maapresyaron nga Dios ngan han iya Anak?
Ginbalosan ni Jehova an Mahadlukon-ha-Dios nga Etiopiahanon
6, 7. Kay ano ngan paonan-o ipinakita ni Jehova an iya apresasyon kan Ebed-melek?
6 Pauroutro nga ipinapakita ha Kasuratan nga binabalosan ni Jehova adton nagbubuhat han iya kaburut-on. Tagda an iya ginbuhat ha mahadlukon-ha-Dios nga Etiopiahanon nga hi Ebed-melek, nga kadungandungan ni Jeremias ngan surugoon ha balay han diri-matinumanon nga hi Hadi Sedekia han Juda. Hinbaroan ni Ebed-melek nga an mga prinsipe han Juda sayop nga nag-akusar kan propeta Jeremias hin pag-aghat hin pagrebelde ha gobyerno ngan iginlabog hiya ha atabay, basi mamatay didto ha gutom. (Jeremias 38:1-7) Tungod kay maaram nga kinangangalasan gud hi Jeremias tungod han mensahe nga iya iginsangyaw, iginbutang ha peligro ni Ebed-melek an iya mismo kinabuhi ngan nanginyupo ha hadi. An Etiopiahanon maisugon nga nagsiring: “Ginoo ko nga hadi, ini nga mga tawo nagbuhat hin maraot ha ngatanan nga ira ginbuhat kan Jeremias an manaragna, nga ira ginhulog ngadto ha bito; ngan hiya mamamatay dida ha lugar hain hiya, tungod han gutom.” Ha sugo han hadi, nagdara hi Ebed-melek hin 30 ka tawo ngan gintalwas an propeta han Dios.—Jeremias 38:8-13.
7 Nakita ni Jehova nga hi Ebed-melek nagbuhat uyon ha pagtoo, nga nakabulig ha iya nga malamposan an anoman nga kahadlok nga bangin inabat niya. Salit, ipinakita ni Jehova an iya apresasyon ngan nagsiring kan Ebed-melek pinaagi kan Jeremias: “Kitaa, akon dadad-on an akon mga pulong ngada hini nga bungto para ha karat-an, ngan diri para ha kaopayan . . . Kondi akon ka luluwason hadto nga adlaw, . . . ngan diri ka ihahatag ngadto ha kamot han mga tawo nga imo nahahadlokan. Kay ha pagkamatuod akon ka luluwason, ngan . . . an imo kinabuhi magigin dinakpan para ha imo; tungod kay nagbutang ka han imo pagsarig dida ha akon.” (Jeremias 39:16-18) Oo, ginluwas ni Jehova hi Ebed-melek, sugad man hi Jeremias, tikang ha magraot nga mga prinsipe han Juda ngan ha urhi tikang ha mga Babilonyahanon, nga nagbungkag han Jerusalem. “Ginbabantayan [ni Jehova] an iya mga baraan; iya hira ginbabawi tikang ha kamot han mga magtimaraot,” nasiring an Salmo 97:10.
‘An Imo Amay nga Nakita ha Tago Magbabalos ha Imo’
8, 9. Sugad han ipinakita ni Jesus, ano nga klase hin mga pag-ampo an inaapresyar ni Jehova?
8 An usa pa nga ebidensya nga inaapresyar ngan pinabibilhan ni Jehova an aton mga kapahayagan han diosnon nga debosyon makikita ha ginsisiring han Biblia mahitungod han pag-ampo. ‘An pag-ampo han matadong amo an kalipay han Dios,’ siring han maaramon nga tawo. (Proberbios 15:8) Ha panahon ni Jesus damu nga lider han relihiyon an nag-aampo ha kadaygan, diri tungod han totoo nga pagkabaraan, kondi tungod han hingyap nga dayawon han mga tawo. “Hira nakarawat na han ira balos,” siring ni Jesus. “Kondi ikaw kon ikaw mag-ampo,” iya gintutdoan an iya mga sumurunod, “sulod ha imo sarosakob nga sulod: ngan han nasadhan na an imo ganghaan, pag-ampo ha imo Amay nga aadto ha [tago]; ngan an imo Amay, nga nakita ha [tago] babalosan ka.”—Mateo 6:5, 6.
9 Syempre, diri ginkukondenar ni Jesus an pag-ampo ha kadaygan, kay hiya mismo nag-ampo ha kadaygan ha pipira nga okasyon. (Lukas 9:16) Inaapresyar gud ni Jehova kon nag-aampo kita ha iya nga may sinsero nga kasingkasing, diri naghihingyap nga dayawon han iba. An aton pribado nga mga pag-ampo, ha pagkamatuod, maopay nga pangirilal-an han kahilarom han aton gugma ha Dios ngan han aton pagsarig ha iya. Salit, diri urusahon nga hi Jesus agsob nga ha pribado nga mga lugar nag-aampo. Makausa, nag-ampo hiya ‘ha pagkaaga, han waray pa sisidlak an adlaw.’ Ha lain nga panahon, ‘hiya sinaka hin antaw nga bukid ha pag-ampo nga nag-uusahan.’ Ngan antes pilion an iya 12 nga apostol, ginamit ni Jesus an bug-os nga gab-i ha pag-ampo nga nag-uusahan.—Markos 1:35; Mateo 14:23; Lukas 6:12, 13.
10. Kon an aton mga pag-ampo nagpapakita hin sinseridad ngan hilarom nga pagbati, makakasiguro kita ha ano?
10 Handurawa kon mationan-o kaatentibo nga namati hi Jehova ha kinasingkasing nga mga kapahayagan han iya Anak! Oo, may mga panahon nga nag-ampo hi Jesus ‘upod an magbaskog nga mga pagsinggit ngan mga luha, ngan pinamatian hiya tungod ha iya matinahuron nga kahadlok.’ (Hebreo 5:7; Lukas 22:41-44) Kon ipinapakita han aton mga pag-ampo an sugad nga sinseridad ngan hilarom nga pagbati, makakasiguro kita nga an aton langitnon nga Amay atentibo ngan maapresyaron nga namamati. Oo, “hi Jehova hirani ha ira ngatanan . . . nga nagsasangpit ha iya ha kamatuoran.”—Salmo 145:18.
11. Ano an inaabat ni Jehova ha aton ginbubuhat ha pribado?
11 Kon inaapresyar ni Jehova kon kita nag-aampo ha iya ha tago, sigurado nga inaapresyar liwat niya kon nasugot kita ha iya ha tago! Oo, maaram hi Jehova han aton ginbubuhat ha pribado. (1 Pedro 3:12) Ha pagkamatuod, an aton pagin matinumanon ngan masinugtanon kon kita nag-uusahan, maopay nga pangirilal-an nga may-ada kita “hingpit nga kasingkasing” ngadto kan Jehova, kasingkasing nga putli an motibo ngan marig-on para ha husto. (1 Kronikas 28:9) An sugad nga paggawi nagpapalipay gud han kasingkasing ni Jehova!—Proberbios 27:11; 1 Juan 3:22.
12, 13. Paonan-o naton mababantayan an aton hunahuna ngan kasingkasing ngan magin pariho ha matinumanon nga disipulo nga hi Natanael?
12 Tungod hito, an matinumanon nga mga Kristiano nag-iikmat nga diri magbuhat hin tago nga mga sala nga nakakahugaw ha hunahuna ngan kasingkasing, sugad han pagkinita hin pornograpiya ngan kamadarahog. Bisan kon an iba nga sala maitatago ha mga tawo, maaram kita nga “an ngatanan nga mga butang mga hubo ngan pinamuksan ha atubangan ha iya mga mata, nga tungod ha iya kita may buruhaton [“baratunon,” NW].” (Hebreo 4:13; Lukas 8:17) Pinaagi han pangalimbasog nga likyan an mga butang nga nakakapasubo kan Jehova, may-ada kita limpyo nga konsensya ngan nalilipay ha paghibaro nga inuuyonan kita han Dios. Oo, sigurado nga inaapresyar gud ni Jehova an tawo nga “naglalakat hin hingpit, ngan nagbubuhat ha katadongan, ngan nagyayakan hin kamatuoran ha iya kasingkasing.”—Salmo 15:1, 2.
13 Kondi, paonan-o naton mababantayan an aton hunahuna ngan kasingkasing ha kalibotan diin kalyap an karaotan? (Proberbios 4:23; Efeso 2:2) Dugang pa ha bug-os nga pagpahimulos han ngatanan nga espirituwal nga tagana, kinahanglan mangalimbasog gud kita nga isalikway an maraot ngan buhaton an maopay, nagios dayon basi an sayop nga mga hingyap diri magbunga, siring pa, ngan manganak hin sala. (Jakobo 1:14, 15) Hunahunaa la an imo daku nga kalipay kon isiring ni Jesus mahitungod ha imo an iya ginsiring mahitungod kan Natanael: “Kitaa, an usa nga [tawo] nga waray limbong.” (Juan 1:47) Hi Natanael, nga tinatawag liwat nga Bartolome, ha urhi nakapribilehiyo nga magin usa han 12 nga apostol ni Jesus.—Markos 3:16-19.
“Malolooyon Ngan Matinumanon nga Hitaas nga Saserdote”
14. Paonan-o naiiba an reaksyon ni Jesus ha ginbuhat ni Maria kon itanding ha ginsiring han iba?
14 Tungod kay hi Jesus “an dagway han Dios nga diri sadang makita,” nga amo hi Jehova, hingpit nga ginsusubad niya pirme an iya Amay ha pagpakita hin apresasyon ha mga nag-aalagad ha Dios nga may limpyo nga kasingkasing. (Kolosas 1:15) Pananglitan, lima ka adlaw antes itubyan ni Jesus an iya kinabuhi, hiya ngan an iba han iya mga disipulo mga bisita ha balay ni Simon nga taga-Betania. Durante hito nga gab-i, hi Maria nga bugto nira Lasaro ngan Marta “nagkuha hin usa ka libra nga balsamo nga uray nga nardo nga mahal kaopay” (nagkakantidad hin mga usa ka tuig nga sweldo), ngan iginbubo ito ha ulo ngan mga tiil ni Jesus. (Juan 12:3) “Ano nga hinungdan an pagkaragi hini?” siring han iba. Kondi, iba an pagkita ni Jesus ha ginbuhat ni Maria. Iya gintagad ito sugad nga buhat han duro nga pagkamahinatagon ngan importante gud may kalabotan ha iya tiarabot nga kamatayon ngan paglubong. Salit, imbes nga sawayon hi Maria, ginpasidunggan hiya ni Jesus. “Bisan diin igwali ini nga maopay nga sumat ha bug-os nga kalibotan,” siring niya, “hihimangrawon man an binuhat hini nga babaye nga hinumdoman ha iya.”—Mateo 26:6-13.
15, 16. Paonan-o kita nagpapahimulos han kan Jesus pagkinabuhi ngan pag-alagad ha Dios sugad nga tawo?
15 Daku gud an aton pribilehiyo nga hi Jesus an aton Lider, nga maapresyaron hinduro nga persona! Ha pagkamatuod, an kinabuhi ni Jesus sugad nga tawo nag-andam ha iya para ha buruhaton nga igin-andam ni Jehova para ha iya—an pag-alagad sugad nga Hitaas nga Saserdote ngan Hadi, siyahan ha kongregasyon han mga dinihogan ngan sunod ha kalibotan.—Kolosas 1:13; Hebreo 7:26; Pahayag 11:15.
16 Antes kumanhi ha tuna hi Jesus, may-ada na hiya hilarom nga pagtagad ngan espesyal nga gugma ha katawohan. (Proberbios 8:31) Pinaagi han pagkinabuhi sugad nga tawo, hinsabtan niya hin mas bug-os an mga pagsari nga aton naieksperyensyahan ha aton pag-alagad ha Dios. “Kinahanglan gud ha iya [Jesus] nga ha ngatanan nga mga bagay mahimo hiya nga sugad ha iya mga kabugtoan,” nagsurat hi apostol Pablo, “nga mahimo unta hiya nga malolooyon ngan matinumanon nga hitaas nga saserdote . . . Kay tungod nga hiya man nag-antos hin pagsulaya, hiya takos tumabang ha ira nga mga ginsusulay.” Hi Jesus makakapakita “hin pagbati ha aton mga kakurian” kay hiya “man ginsulay ha ngatanan nga paagi sugad ha aton, kondi waray sala.”—Hebreo 2:17, 18; 4:15, 16.
17, 18. (a) Ano an iginpapahayag han mga surat ha pito nga kongregasyon ha Asia Minor mahitungod han kahilarom han apresasyon ni Jesus? (b) Para ha ano igin-andam adton dinihogan nga mga Kristiano?
17 An mas hilarom nga pagsabot ni Jesus ha mga kakurian han iya mga sumurunod nagin matin-aw katapos hiya banhawon. Tagda an iya mga surat ha pito nga kongregasyon ha Asia Minor, nga iginsurat ni apostol Juan. Ha kongregasyon ha Smirna, hi Jesus nagsiring: “Maaram ako ha imo kagol-anan, ngan kakablasan.” Dinhi, hi Jesus sugad hin nasiring, ‘Bug-os nga nasasabtan ko an iyo mga problema; maaram gud ako han iyo gin-aantos.’ Katapos, tungod kay hiya mismo nag-antos tubtob gud ha kamatayon, may pagpaid ngan marig-on nga pasarig nga nagsiring pa hiya: “Magmatinumanon ka tubtob ha kamatayon ngan tatagan ko ikaw han pudong-pudong han kinabuhi.”—Pahayag 2:8-10.
18 An mga surat ha pito nga kongregasyon puno hin mga kapahayagan nga nagpapakita han bug-os nga pagkamaaram ni Jesus ha mga kakurian han iya mga disipulo ngan han iya totoo nga apresasyon ha ira matinumanon nga pagkinabuhi. (Pahayag 2:1–3:22) Hinumdumi nga adton ginsuratan ni Jesus dinihogan nga mga Kristiano nga may-ada paglaom nga makaupod niya ha pagmando ha langit. Pariho han ira Ginoo, igin-aandam hira para ha ira hitaas nga bahin ha pagbulig ha mapinairon hinduro nga paghatag han mga kapulsanan han halad lukat ni Kristo ha masakiton nga katawohan.—Pahayag 5:9, 10; 22:1-5.
19, 20. Paonan-o ipinapakita hadton nagkukompwesto han “daku nga panon” an ira apresasyon kan Jehova ngan ha iya Anak?
19 Syempre, an gugma ni Jesus ha iya dinihogan nga mga sumurunod ipinapakita liwat ha iya maunungon nga ‘iba nga mga karnero,’ nga minilyon ha ira an nagkukompwesto yana han magigin “daku nga panon, . . . tikang ha ngatanan nga nasud,” nga maluluwas ha “daku nga kagol-anan.” (Juan 10:16; Pahayag 7:9, 14, NW) Ini hira nadaop kan Jesus tungod han ira apresasyon ha iya halad lukat ngan tungod han ira paglaom ha kinabuhi nga waray kataposan. Paonan-o nira ipinapakita an ira apresasyon? Ira ipinapakita ito pinaagi han pag-alagad ha Dios “ha adlaw ngan gab-i.”—Pahayag 7:15-17.
20 An bug-os-kalibotan nga report han 2006 nga tuig han pag-alagad, ha pahina 27 tubtob 30, naghahatag hin matin-aw nga ebidensya nga inin magtinumanon nga mga ministro tinuod nga nag-aalagad kan Jehova “adlaw ngan gab-i.” Ha pagkamatuod, durante hito la nga tuig, upod han gutiay nga grupo han nahibibilin pa nga dinihogan nga mga Kristiano naggasto hira hin total nga 1,333,966,199 ka oras ha ministeryo ha publiko—katugbang hin 152,283 ka tuig!
Padayon nga Ipakita an Apresasyon!
21, 22. (a) May kalabotan ha pagpakita hin apresasyon, kay ano nga an mga Kristiano kinahanglan magin mabinantayon gud yana? (b) Ano an paghihisgotan ha masunod nga artikulo?
21 Ha pakig-upod ha diri-hingpit nga mga tawo, ipinapakita ni Jehova ngan han iya Anak an duro kahilarom nga apresasyon nga makapabantad gud. Kondi makasurubo, an kadam-an han katawohan naghuhunahuna hin gutiay la ha Dios, nakasentro lugod hira ha ira kalugaringon nga mga interes. Ha paghulagway han katawohan nga nagkikinabuhi ha “kataposan nga mga adlaw,” hi Pablo nagsurat: “An mga tawo magigin duro kamakikalugaringon, hakog ha kwarta . . . Hira magigin diri gud mapasalamaton.” (2 Timoteo 3:1-5, Phillips) Kabaliktaran gud hira ha totoo nga mga Kristiano, nga pinaagi han kinasingkasing nga pag-ampo, kinaburut-on nga pagkamasinugtanon, ngan bug-os-kalag nga pag-alagad nagpapakita han ira apresasyon ha ngatanan nga ginbubuhat han Dios para ha ira!—Salmo 62:8; Markos 12:30; 1 Juan 5:3.
22 Ha masunod nga artikulo, aton rirepasuhon an pipira han damu nga espirituwal nga mga tagana nga mahigugmaon nga iginhahatag ni Jehova ha aton. Samtang pinamamalandong naton inin ‘mag-opay nga mga hatag,’ hinaot maghilarom pa gud an aton apresasyon.—Jakobo 1:17.
Paonan-o Mo Babatunon?
• Paonan-o ipinapakita ni Jehova nga maapresyaron hiya nga Dios?
• Kon aada ha pribado, paonan-o naton mapapalipay an kasingkasing ni Jehova?
• Ha ano nga mga paagi ipinakita ni Jesus an apresasyon?
• Paonan-o an pagkinabuhi sugad nga tawo nakabulig kan Jesus nga magin mapinairon ngan maapresyaron nga magmarando?
[Mga Pakiana]
[Retrato ha pahina 17]
Sugad la nga an kag-anak naapresyar gud ha simple nga kapahayagan han iya anak, inaapresyar gud ni Jehova kon iginhahatag naton ha iya an aton gimaopayi