Istorya han Kinabuhi

Kon Kay Ano nga Nalilipay Ako ha Paghimo hin mga Disipulo

Iginsumat ni Pamela Moseley

Naggigirra ha Inglatera han 1941 han igin-upod ako ni Nanay ha usa nga kombensyon han mga Saksi ni Jehova ha Leicester. Nakapahimulos kami han espesyal nga pahayag ni Joseph Rutherford mahitungod han kabataan. Han ginbawtismohan kami ni Nanay dida hito nga kombensyon, naobserbahan ko nga nalipay hinduro adton binulig ha amon nga mag-uswag ha espirituwal. Hito nga panahon diri ko pa nasasabtan an daku nga kalipay ha paghimo hin mga disipulo ni Jesu-Kristo.

AN AMON pag-uswag ha pagin mga disipulo nagtikang han 1940. Nahinunumdoman ko pa iton makangingirhat nga adlaw han Septyembre 1939 han nagtikang an Girra ha Kalibotan II. Nakita ko an nanunuro nga mga luha ha bayhon ni Nanay samtang padayon hiya nga nagpipinakiana, “Kay ano nga waray kamurayawan ha kalibotan?” An akon mga kag-anak nagserbi ha militar durante han Girra ha Kalibotan I ngan ira naeksperyensyahan an mga kangirhat hito. Iginpakiana ni Nanay an iya pakiana ha Anglikano nga ministro ha Bristol. Binaton la hiya: “May-ada na mga girra hadto pa ngan pirme magkakamay-ada.”

Kondi, waray pag-iha, ginbisita kami hin edaran na nga babaye. Usa hiya han mga Saksi ni Jehova. Nagpakiana na liwat hi Nanay: “Kay ano nga waray kamurayawan ha kalibotan?” Iginsaysay han Saksi nga an mga girra bahin han tigaman nga nagkikinabuhi na kita ha kataposan hinin maraot nga sistema. (Mateo 24:3-14) Waray pag-iha gindudumarahan na kami hin pag-aram ha Biblia han iya anak nga babaye. Kaupod hira han maglipayon nga nagkita han amon bawtismo. Kay ano nga an paghimo hin mga disipulo nakakalipay gud ha mga tawo? Ha urhi, nasabtan ko ito. Susumatan ko kamo han pipira nga akon hinbaroan ha sobra 65 ka tuig nga akon paghimo hin mga disipulo.

 Pagkaada hin Kalipay han Pagtutdo

Nagtikang ako pagsangyaw ha Bristol mahitungod han Ginhadian han 11 anyos ako. Gintagan ako han usa nga bugto nga lalaki hin ponograpo ngan testimony card ngan nagsiring: “Bisitaha an ngatanan nga balay hito nga bahin han kalsada.” Salit kinadto ako nga nag-uusahan. Syempre, ginkulba ako hinduro. Ginpapatokar ko an nakarekord nga pahayag nga basado ha Biblia katapos ipinapakita ko ha tagbalay an testimony card, nga nag-aaghat ha mga tawo nga kumarawat hin literatura ha Biblia.

Tikang han dekada han 1950, mas ginpabug-atan nga basahon an Biblia durante han amon pagbalay-balay. Ha siyahan, tungod han akon pagin awdanon nakurian ako pakiistorya ngan pagsaysay hin mga teksto ha Biblia ha mga diri ko kilala. Kondi ha kamaihaan, nagkaada ako kompyansa. Hito nga panahon naruyagan ko na gud an buruhaton ha ministeryo. Ginhunahuna han iba nga tawo nga parabaligya la kami hin libro, kondi kon ginbabasahan namon hira ngan ginsasaysayan han mga teksto ha Biblia, nasasantop nira nga magturutdo kami han Pulong han Dios. Naruyagan ko gud ini salit naghingyap ako nga mas makigbahin ha ministeryo. Salit han Septyembre 1955, sinulod ako ha bug-os-panahon nga pagministeryo sugad nga payunir.

Ginbabalosan an Pagkamapinadayunon

Usa han siyahan nga mga leksyon nga akon hinbaroan amo nga ginbabalosan an pagkamapinadayunon. Ha usa nga okasyon, nagbilin ako hin Barantayan ha usa nga babaye, hi Violet Morice. Han pagbalik ko ha iya, gin-abrihan niya an purtahan, nangursamano, ngan namati hin maopay samtang iginsasaysay ko an Kasuratan. Ha kada ko pagbisita, baga hin interesado gud hiya. Kondi, han nagtanyag ako hin regular nga pag-aram ha Biblia, hiya nagsiring: “Ayaw la anay. Kon magdagku na an akon mga anak, mag-aaram na ako.” Nasubo gud ako! An Biblia naghihisgot mahitungod han ‘panahon ha pamiling ngan panahon [ha pagkarawat] han nawara.’ (Eklesiastes 3:6) Nagdesisyon ako nga diri mawad-an hin paglaom.

Paglabay hin usa ka bulan, ginbisita ko utro hi Violet ngan ginhisgotan an dugang pa nga teksto ha iya. Waray pag-iha, nag-aaram na kami han Biblia kada semana ha purtahan han iya balay. Ha kamaihaan hiya nagsiring: “Mas maopay siguro kon sumulod ka, diri ba?” Hi Violet nagin maopay gud nga igkasi-tumuroo ngan sangkay! Oo, nabawtismohan hiya sugad nga usa han mga Saksi ni Jehova.

Usa ka adlaw nahipausa hi Violet nga iginbaligya han iya bana an ira balay nga waray ipahibaro ha iya ngan ginbayaan hiya. Maopay na la nga ha bulig han usa nga Saksi, nagkaada hiya balay hito mismo nga kulop. Tungod han iya pagpasalamat kan Jehova, nagdesisyon hiya nga gamiton an iya bug-os nga kinabuhi sugad nga payunir. Han nakita ko nga an espiritu ni Jehova naghatag ha iya hin kadasig para ha totoo nga pagsingba, nasabtan ko kon kay ano nga an paghimo hin mga disipulo naghahatag hin daku nga kalipay. Oo, ini na an akon magigin buruhaton ha bug-os nga kinabuhi!

Han 1957, igintoka kami ni Mary Robinson sugad nga payunir ha industriyal nga dapit han Rutherglen ha Glasgow, Scotland. Nagsangyaw kami ha ngatanan nga kahimtang han panahon, kondi takos ito han pangalimbasog. Usa ka adlaw nasangyawan ko hi Jessie. Naruyagan ko an pagdumara hin pag-aram ha Biblia iya. Komunista an iya bana, hi Wally, ngan ha tinikangan nalikay hiya ha akon. Han nag-aram hiya han Biblia ngan nakasabot nga an Ginhadian han Dios la an makakahatag hin mag-opay nga kahimtang ha mga tawo, nalipay hiya. Inabot an panahon, hira nga duha nagin parahimo hin mga disipulo.

Mahimo Makalimbong an Siyahan nga Reaksyon

Ha urhi igintoka kami ha Paisley, Scotland. Usa ka adlaw samtang nagsasangyaw ako didto, usa nga babaye an  nagdumiri ha pakiistorya, ngan makusog nga ginsadhan an purtahan. Kondi waray pag-iha, nagpinamiling hiya ha akon basi mangaro hin pasensya. Han binalik ako han sunod nga semana, hiya siniring: “Ha akon pag-abat sugad hin ginsadhan ko han purtahan an Dios. Salit ginawas ako basi pamilngon ka.” Hiya hi Pearl. Iya ako ginsumatan nga nawad-an na gud hiya gana ha mga sangkay ngan paryente salit nag-ampo hiya ha Dios ha pangaro hin totoo nga sangkay. “Ngan binisita ka ha amon,” hiya nagsiring. “Yana nahunahuna ko nga posible ikaw ito nga totoo nga sangkay.”

An pagin sangkay ni Pearl diri masayon. Naukoy hiya ha igbaw han makuri sagkahon nga bungtod. Han gin-agi ko hiya basi ig-upod ha katirok ha siyahan nga higayon, haros mahitalindas ako tungod han hangin ngan uran. Iginlabog ko an akon payong han nagisi ito. Paglabay la hin unom ka bulan katapos nga makusog nga ginsadhan ako han purtahan ni Pearl, ginsimbolohan niya an iya dedikasyon ha Dios pinaagi han bawtismo ha tubig.

Waray pag-iha katapos hito, nagdesisyon an iya bana nga mag-aram han Biblia, ngan ha halipot nga panahon, inupod hiya ha akon ha pagbalay-balay. Pariho han kasagaran nga nahitatabo, nag-inuran hito nga panahon. “Ayaw kabaraka,” hiya nagsiring. “Nailob ako ha pagtinindog nga gin-iinuranan hin damu ka oras ha pagkinita hin football, salit sigurado nga makakailob ako ha pag-inurani para kan Jehova.” Naruruyagan ko gud an determinasyon han mga taga-Scotland.

Daku gud an akon kalipay nga makabalik paglabay hin damu ka tuig ngan makita nga kadam-an han akon gindumarahan hin pag-aram marig-on pa gihapon ha pagtoo! Ito an kalipay ha paghimo hin mga disipulo. (1 Tesalonika 2:17-20) Han 1966, paglabay hin sobra walo ka tuig nga pagpayunir ha Scotland, gintawag ako ha Watchtower Bible School of Gilead basi bansayon ha pagmisyonera.

Ngadto ha Langyaw nga Teritoryo

Igintoka ako ha Bolivia, ha tropikal nga bungto han Santa Cruz, nga may-ada kongregasyon nga 50 an magwarali. Ito nga bungto nagpapahinumdom ha akon han Wild West nga pasalida han Hollywood. Ha akon pagpamalandong han naglabay, para ha akon ordinaryo la ako nga misyonera. Waray pa gud ako atakeha hin mga buaya, palibuti hin magsamok nga tawo, mawara ha disyerto, o malunod ha kadagatan. Kondi, para ha akon, nagigin mas makalilipay an paghimo hin mga disipulo.

Hi Antonia usa han siyahan nga mga babaye nga akon nadumarahan hin pag-aram ha Biblia ha Santa Cruz. Nakurian ako ha pagdumara hin pag-aram ha Espanyol nga yinaknan. Makausa an anak nga lalaki ni Antonia nagsiring: “Nay, gintutuyo ba niya nga magsayop ha pagyakan basi makatawa kita?” Inabot an panahon nagin disipulo hi Antonia, pati hi Yolanda, an iya anak. Hi Yolanda may-ada sangkay, usa nga estudyante ha abogasiya nga ira gin-agnayan hin Dito, nga nagtikang liwat pag-aram han Biblia ngan pagtambong ha aton mga katirok. May hinbaroan pa ako ha iya mahitungod ha pagtutdo han kamatuoran ha Biblia: Usahay an mga tawo nagkikinahanglan hin mahigugmaon nga pag-aghat.

Han inundang hi Dito ha iya pag-aram, akon ginsidngan hiya: “Dito, diri ka gin-oobligar ni Jehova nga suportahan an iya Ginhadian. Kinahanglan ka pumili.” Han binaton hiya nga karuyag niya mag-alagad ha Dios, siniring ako: “May-ada ka mga retrato dinhi hin lider han oposisyon. An bisita ba nga makakita hito maghuhunahuna nga ginpili mo nga suportahan an Ginhadian han Dios?” Ito an mahigugmaon nga pag-aghat nga iya ginkinahanglan.

Paglabay hin duha ka semana, nagtikang an rebolusyon ngan an purupsilay butnga han mga estudyante ha unibersidad ngan han mga polis. “Kagawas kita dinhi!” Sininggit hi Dito ha iya sangkay. “Diri! Ini na an importante nga adlaw nga aton ginpinamulat,” siring han iya kaupod, katapos kinuha hin riple ngan dinalagan ngadto ha atop han unibersidad. Usa hiya han walo nga kasangkayan ni Dito nga namatay hito nga adlaw. Nahahanduraw mo ba an akon daku nga kalipay han makita hi Dito, nga bangin namatay na kon waray hiya magdesisyon nga magin totoo nga Kristiano?

Pakakita han Espiritu ni Jehova nga Nagios

Usa ka adlaw ginlabyan ko la an usa nga balay kay ha akon kahuna ginbisita na namon ito, kondi gintawag ako han babaye nga naukoy hito.  Hiya hi Ignacia. Maaram hiya mahitungod han mga Saksi ni Jehova, kondi napugngan an iya pag-uswag ha espirituwal tungod han duro nga pagkontra han iya bana nga hi Adalberto—usa nga maskulado nga polis. Nawurok hiya mahitungod han damu nga basihan nga katutdoan ha Biblia, salit gindumarahan ko hiya hin pag-aram ha Biblia. Bisan kon determinado hi Adalberto nga maundang ini nga pag-aram, nakaistorya ko hiya hin maiha mahitungod hin iba nga butang. Ito an tinikangan han amon pagkamagsangkay.

Handurawa la an akon kalipay nga hi Ignacia nagin makisangkayon nga membro han kongregasyon, mahunahunaon han espirituwal ngan pisikal nga kaopayan han damu nga nanginginahanglan hin pagliaw. Inabot an panahon, an iya bana ngan tulo han ira mga anak nagin mga Saksi. Ha pagkamatuod, han nasabtan ni Adalberto an katuyoan han maopay nga sumat, binalik hiya ha presinto ngan madasigon nga igin-istorya ito salit nagkaada hiya 200 nga suskripsyon han The Watchtower ngan Awake! tikang ha mga polis.

Ginpapatubo Ito ni Jehova

Katapos mag-alagad ha Santa Cruz hin unom ka tuig, igintoka ako ha kapital nga syudad han Bolivia, ha La Paz, diin gin-gamit ko an sunod nga 25 ka tuig. Temprano han dekada han 1970, an residensya han sanga nga opisina han mga Saksi ni Jehova ha La Paz may-ada la 12 nga membro. Samtang nag-uuswag an pagsangyaw nga buruhaton nga nagkikinahanglan hin mas haluag nga pasilidad, gintukod an bag-o nga sanga ha madagmit nga nag-uuswag nga syudad han Santa Cruz. Iginbalhin didto an sanga nga opisina han 1998, ngan gintawag ako nga magin membro hito. Yana may-ada na ito sobra 50 nga membro.

An uusa la nga kongregasyon ha Santa Cruz han 1966 nagin sobra 50 na. An 640 nga Saksi ha bug-os nga Bolivia hadto nagin haros 18,000 na yana!

Malipayon ako nga mabungahon an akon toka ha Bolivia. Kondi, pirme ako nadadasig han pagkamatinumanon han mga igkasi-Kristiano ha bisan diin. Nalilipay kita ngatanan ha pagkita han bendisyon ni Jehova ha buruhaton nga pagsangyaw han Ginhadian. Makalilipay gud an pakigbahin ha buruhaton nga paghimo hin mga disipulo.—Mateo 28:19, 20.

[Retrato ha pahina 13]

Pagpayunir ha Scotland

[Mga Retrato ha pahina 15]

Pag-alagad ha sanga nga opisina ha Bolivia; (gutiay nga retrato) ha gradwasyon han ika-42 nga klase han Gilead