Masayon Basahon, Kondi Husto ba Ito?

HAN Septyembre 2005, madasigon nga ginsuportahan han Church of England an pagpagowa han The 100-Minute Bible. An bag-o nga bersyon, nga dinisenyo basi basahon ha 100 minutos, nagsusumaryo han Hebreo nga Kasuratan ha 17 ka bahin nga tag-usa ka pahina ngan han Griego nga Kasuratan ha 33, salit waray ilakip an ngatanan nga “makauuyam” nga bahin, sumala ha ginsiring han usa nga paragrepaso. Oo, masayon ito basahon, kondi husto ba ito?

Gawas pa han pagkuhaa han ngaran han Dios nga Jehova, damu pa nga sayop an makikita han seryoso nga mga estudyante han Biblia. (Salmo 83:18) Pananglitan, an bahin 1 nasiring nga an Dios “naghimo han mga langit ngan han tuna ha peryodo nga unom ka adlaw.” Kondi, an Genesis 1:1 nasiring la, “Ha tinikangan an Dios naghimo han mga langit ngan han tuna.” Katapos hito, an orihinal nga asoy naghuhulagway han dugang nga mga buhat han paglarang may kalabotan ha tuna, nga inabot hin unom ka “mga adlaw,” o peryodo han panahon. Katapos, ginsumaryo han Genesis 2:4 an bug-os nga peryodo han paglarang, tinatawag ito nga an “adlaw nga ginhimo ni Jehova nga Dios an tuna ngan an langit.”

Sumala ha The 100-Minute Bible, an matinumanon nga hi Job gin-atake han “usa han mga surugoon [han Dios], hi Satanas, . . . nga an responsabilidad niya amo an pagin paraakusar ha katawohan.” Nakikita mo ba an diri pagkauruyon hini? An pulong nga “Satanas” nangangahulogan hin “Parakontra.” Imbes nga surugoon han Dios, ha pagkamatuod, hi Satanas amo an daku nga kaaway han Dios ngan an naghimo han iya kalugaringon nga paraakusar ha katawohan.—Pahayag 12:7-10.

Kumusta man an Kristiano Griego nga Kasuratan nga bahin han The 100-Minute Bible? Ha parabola mahitungod han mga karnero ngan mga kanding, an bag-o nga bersyon nasiring nga inuuyonan ni Jesus adton binulig ha “bisan hin-o, mationan-o man hira kaminos,” samtang an totoo, hi Jesus nagsiring nga iya ginbibendisyonan adton nagbubuhat hin maopay ha iya mga sumurunod—an iya “mga kabugtoan.” (Mateo 25:40) An sumaryo han Pahayag nagsusumat ha mga magbarasa hito nga “an Roma, an daku nga Babilonya, bug-os nga bubungkagon.” Kondi, an mga estudyante han Biblia maaram nga waray bahin ha orihinal nga mga sinurat nga nasuporta ha sugad nga konklusyon mahitungod han pangirilal-an han ‘Babilonya nga Daku.’—Pahayag 17:15–18:24.

Para hadton nangangalimbasog nga makilala an aton Maglalarang ngan masabtan an iya katuyoan, waray gud maisasaliwan ha bug-os nga Biblia. Oo, an pagbasa han Biblia magkikinahanglan hin labaw pa kay ha 100 minutos la, kondi an pagbuhat hito naghahatag hin birilhon gud nga mga balos. (Juan 17:3) Hinaot buhaton mo ini ngan karawaton an mga balos.—2 Timoteo 3:16, 17.