Mga Pakiana Tikang ha mga Magbarasa

Ano an “pakipag-away . . . han Dios, nga Makagagahum” ha Armagedon, ngan ano an magigin resulta hito?—Pahayag 16:14, 16.

Ha simple nga pagkayakan, an girra han Armagedon amo an tiarabot nga girra ha bug-os nga kalibotan diin an mga kaaway ni Jehova bubungkagon han iya pinili nga Hadi, hi Jesu-Kristo. Iginsasaysay han Biblia nga ini nga mga kaaway, an “mga hadi ha bug-os nga kalibotan,” ginpapagios han ‘mga espiritu han mga yawa,’ ngan gintitirok ngadto “ha pakipag-away [ha] daku nga adlaw han Dios, nga Makagagahum . . . [ha] lugar nga ginngangaranan ha Hebreohanon nga Armagedon.”—Pahayag 16:14, 16.

An lugar diin nagtitirok an mga magkaaway diri literal. An ngaran nga Armagedon, nangangahulogan hin Bukid han Megido. (Pahayag 16:16) Waray gud bukid nga may-ada hito nga ngaran. Dugang pa, “an mga kahadian ha tuna, ngan an ira mga kasundalohan” diri mahimo nga literal nga magtirok ha uusa nga lugar. (Pahayag 19:19) Lugod, an “lugar” nagtutudlok ha sitwasyon diin gintutugwayan ngada hito an mga magmarando ha politika han kalibotan ngan an mga nasuporta ha ira—usa nga sitwasyon nga kontra kan Jehova ngan ha ‘kasundalohan ha langit’ ilarom han pagmando han “Hadi han mga hadi, ngan Ginoo han mga ginoo,” hi Jesu-Kristo.—Pahayag 19:14, 16.

Makatirigamnan nga an termino nga “Armagedon” may kalabotan ha Megido, an kadaan nga syudad han Israel. An Megido estratihiko nga nahimumutang ha este han Bukid Carmel, ngan inaagian ito han mga negosyante ngan kasundalohan hito nga panahon. Dida liwat hito ginbuhat an damu nga araway nga sigurado nga may usa nga grupo nga nadaog. Pananglitan, didto “ha hirani han katubigan ha Megido” ginpirde ni Hukom Barak han Israel an magkusog nga kasundalohan han Kanaan nga ginpangunahan ni Heneral Sisera. (Hukom 4:12-24; 5:19, 20) Dida liwat hito nga lugar ginpirde ni Hukom Gideon an mga Midianitanhon. (Hukom 7:1-22) Pinaagi ha pagkaw-ing han Megido ha tiarabot nga girra, ginpapasarig kita han Biblia nga bug-os nga pipirdihon han Dios, pinaagi han iya Anak, an ngatanan nga nakontra.

Ano an magigin resulta? An girra han Armagedon maglilimpyo han tuna han ngatanan nga panlimbong ngan karaotan. Titikangan hito an pinakamahimayaon nga panahon ha bug-os nga kasaysayan han tawo. (Pahayag 21:1-4) Ilarom han mahigugmaon nga pagdumara han Ginhadian han Dios, an tuna hihimoon nga paraiso diin an mga magtadong mag-uukoy ha waray kataposan.—Salmo 37:29.