Pagkamaminatud-on—Lalaoman La Ba Naton ha Iba?

“NANGANGALAS ako ha mga buwa, ngan nangangalas ako kon ginbubuwaan ako!” siring han 16-anyos nga daragita. Kadam-an ha aton an sugad hito an inaabat. Karuyag naton hunahunaon nga tinuod an impormasyon nga iginsusumat ha aton—yinakan man o sinurat. Kondi tinuod ba an aton ginyayakan kon nagpapasa kita hin impormasyon ha iba?

Ha usa nga surbey ha Alemanya, an kadam-an han ginpakianhan inabat nga “puydi la an pagbuwa may kalabotan ha gudtiay nga isyu basi mapanalipdan han usa an iya kalugaringon o an iba tikang ha kadaot, oo, kinahanglan pa ngani ito basi magin maopay an relasyon han mga tawo ha kada tagsa.” Ngan usa nga peryodista an nagsurat: “An pagsumat han tinuod ha ngatanan nga panahon maopay kondi makauuyam.”

Posible ba nga karuyag naton nga an iba nga tawo magyakan hin tinuod kondi kita mismo naghuhunahuna nga may-ada kita usahay husto nga hinungdan ha diri pagsumat hin tinuod? Importante ba kon nagsusumat kita hin tinuod o diri? Ano an mga resulta han pagbuwa?

An Kadaot nga Nahihimo han Pagbuwa

Tagda an kadaot nga nahihimo han pagbuwa. An kabuwaan nagriresulta hin kawara han pagsarig butnga han mga mag-asawa ngan mga membro han pamilya. An waray basihan nga tsismis mahimo makadaot ha reputasyon han usa. An panlimbong han mga empleyado nagriresulta ha pagdaku han gastos han kompanya ngan nagigin mas mahal an mga produkto. An diri pagdeklara han tinuod nga baraydan ha buhis nagkukuha ha mga gobyerno han ginkikinahanglan nga pundo para ha mga serbisyo publiko. An sayop nga impormasyon han mga parasaliksik nakakadaot han ira maopay nga mga propesyon ngan nakakahugaw han reputasyon han tinahod nga mga institusyon. An maglimbong nga mga estratihiya ha tigda nga pagriko nakakaubos han maiha na hinduro nga natirok han mga kapitalista nga masayon mabiktima o mas maraot pa gud hito an nahitatabo. Diri urusahon nga ginsisidngan kita han Biblia nga kaupod ha mga kinangangalasan ni Jehova nga Dios amo an “dila nga buwaon” ngan ‘an saksi nga buwaon nga nagsasaysay hin mga buwa’!—Proberbios 6:16-19.

An kalyap nga pagbinuwa nakakadaot ha mga indibiduwal ngan ha sosiedad ha kabug-osan. Haros ngatanan mauyon hito. Kondi, kay ano nga an mga tawo tinuyo nga nagbubuwa? Ngan buwa ba an ngatanan nga diri tinuod? Tatagdon naton an mga baton hini ngan han iba nga pakiana ha sunod nga artikulo.

[Retrato ha pahina 3]

An kabuwaan nagriresulta hin kawara han pagsarig butnga han mga mag-asawa