Usa nga Susbaranan ha Pagkatangkod

HI Nelma, nga nagtatrabaho sugad nga byutisyan ha Cruzeiro do Sul, Brazil, bag-o la nga nasarihan an iya Kristiano nga integridad. Han nagbaha ha ira lugar, nakakarawat hiya hin donasyon nga mga bado tikang ha usa han iya mga kliyente. Samtang gin-uusisa an mga bado, hin-agian niya an kwarta nga nagkakantidad hin $1,000 (U.S.) ha mga bulsa han pipira nga saruwal.

An kwarta nga hin-agian ni Nelma nagkakantidad hin mga pito ka bulan nga sweldo niya, ngan ginkikinahanglan gud niya ito. Naguba an iya balay ha baha, ngan nawara an kadak-an nga panag-iya han iya amay ngan kabugtoan. Pinaagi han kwarta, matatapos an pag-ayad ha iya balay ngan may-ada pa mahisasalin nga makakabulig ha iya mga paryente. Kondi, an nabansay-ha-Biblia nga konsensya ni Nelma waray magtugot ha iya nga iyahon an kwarta.—Hebreo 13:18.

Temprano kinabuwasan, nagtrabaho hi Nelma antes han kasagaran nga oras han trabaho ngan tinawagan niya an negosyante nga nagdonar han mga bado. Nagpasalamat hiya para ha mga bado kondi nagsiring nga diri niya mahimo iyahon an hin-agian niya ha mga bulsa. Nalipay gud an babaye nga iginbalik ha iya an kwarta, tungod kay iginlain na niya ito para ha sweldo han iya mga empleyado. “Talagsa mo na la makita an pagkatangkod,” siring han babaye.

Oo, bangin tagdon han iba nga an pagin tangkod waray espesyal nga kapulsanan. Kondi, an pagkatangkod usa nga kalidad nga pinabibilhan gud hadton nangangalimbasog nga lipayon an totoo nga Dios, hi Jehova. (Efeso 4:25, 28) “Diri ako hingangaturog ha gab-i kon iba an akon ginbuhat,” siring ni Nelma.