Usa nga Waray Kataposan nga Regalo Tikang ha Maglalarang

DIRI ka ba nahipapausa nga an mga butang nga gintotoohan han mga syentista nga importante ha kinabuhi ha bisan ano nga planeta gin-uunabi o direkta nga ginhihisgotan ha siyahan nga kapitulo ha Biblia? Ano ini?

Basi magpadayon an kinabuhi, kinahanglan may-ada damu hinduro nga tubig, sugad han gin-unabi ha Genesis 1:2. Kinahanglan husto an temperatura basi an tubig ha planeta magpabilin nga likido. Nagkikinahanglan ini nga an planeta husto an distansya ha adlaw. An asoy han Genesis pauroutro nga naghisgot han adlaw ngan han epekto hito ha tuna.

Basi maukyan han mga tawo, an usa nga planeta nagkikinahanglan hin atmospera nga may-ada eksakto nga pagkasaralakot hin mga gas. Inin importante nga bahin gin-uunabi ha Genesis 1:6-8. An pagtubo han mga tanom, nga ginhulagway ha Genesis 1:11, 12, usa nga nangunguna nga surok han hura nga suplay han oksihina. An usa nga planeta diin mahimo mabuhi an damu kalain nga hayop nagkikinahanglan hin tuna nga mamara ngan mabungahon, sugad han iginsaysay ha Genesis 1:9-12. Ha kataposan, basi magkaada kontrolado nga klima, an usa nga planeta kinahanglan nakiling ha husto nga anggulo ngan magpabilin dida hito—ha kahimtang han tuna, nahihimo ito tungod han pwersa han grabidad han aton bulan. An pag-eksister han bulan ngan an pipira han kapulsanan hito ginpapabug-atan ha Genesis 1:14, 16.

Paonan-o naihulagway ni Moises an mga ginhisgotan na bisan kon waray bulig han moderno nga syensya? Abanse gud la ba hi Moises kay han iya mga kadungan-dungan? Diri, giniyahan hiya han Maglalarang han langit ngan han tuna. Urusahon ito tungod han pagkahusto ha syensya han asoy han Genesis.

Pinamamatud-an han Biblia nga may-ada katuyoan ha paglarang han urusahon nga mga butang nga aton nakikita ha uniberso nga nakapalibot ha aton. “An mga langit amo an mga langit ni Jehova,” siring han Salmo 115:16, “kondi an tuna iya ihinatag ha mga anak han mga tawo.” Usa pa nga salmo an nasiring: “Nagbubutang [hiya] han mga karig-onan han tuna, basi nga ito diri na makiwa ha waray kataposan.” (Salmo 104:5) Kon an aton uniberso ngan an aton maopay hinduro nga planeta gindisenyo ngan ginhimo hin Maglalarang, makatadunganon gud nga tumoo nga mamimintinar niya ini. Nangangahulogan ini nga makakalaom ka ha katumanan han urusahon nga saad: “An mga magtadong makakapanunod han tuna, ngan maukoy hira dida hin waray kataposan.” (Salmo 37:29) Syempre, an Dios “nagbuhat [han tuna] nga diri bayaan,” kondi “naghitsura hini ha pagkaurukyan” ha waray kataposan han may pag-apresyar nga mga tawo nga maaram han iya mga ginbubuhat.—Isaias 45:18.

Sumala ha Kasuratan, linusad hi Jesus ha tuna basi tutdoan kita mahitungod han Dios ngan han Iya katuyoan ha paghatag hin waray kataposan nga kinabuhi ha mga masinugtanon. (Juan 3:16) Nakakasiguro kita nga an Dios hirani na ‘maghibang ha mga naghihibang han tuna,’ samtang maluluwas an mga nahigugma ha kamurayawan tikang ha ngatanan nga nasud nga nakarawat han iya tagana ha pagluwas. (Pahayag 7:9, 14; 11:18) Magigin maopay gud hinduro an kinabuhi samtang an mga tawo padayon nga nagdidiskobre ngan nagkakaada kalipay ha mga urusahon nga butang ha mga linarang han Dios ha kadayonan!—Eklesiastes 3:11; Roma 8:21.

[Ginkuhaan han Retrato ha pahina 8]

NASA photo