Ano an Pangirilal-an han Totoo nga Pagsingba

AN KADAM-AN han relihiyon nasiring nga an ira igintututdo tikang ha Dios. Tungod hito, kinahanglan naton tagdon an iginsurat han apostol ni Jesus nga hi Juan: “Mga hinigugma, diri kamo tumoo ha ngatanan nga espiritu, kondi proybahan niyo an mga espiritu, kon mga Diosnon ba hira; kay damu nga mga manaragna an nagkagowa nganhi ha kalibotan.” (1 Juan 4:1) Paonan-o naton mahibabaroan kon an usa nga butang tikang ha Dios?

An ngatanan nga tikang ha Dios nagpapakita han iya personalidad, labi na an iya nangunguna nga kalidad, an gugma. Pananglitan, an aton sentido ha paghamot nga nakakabulig ha aton nga malipay ha hamot han mga herba, bukad, o bag-o nga luto nga tinapay nagpapakita han gugma han Dios. An aton abilidad ha pagkita han katunod han adlaw, alibangbang, o hiyom hin bata nagpapadagaw han gugma han Dios ha aton. Nagpapakita liwat han iya gugma an aton abilidad ha pagpamati hin makaruruyag nga musika, han huni han tamsi, o tingog hin hinigugma. Bisan kon diri kita hingpit, an aton pagin tawo nagpapahayag liwat han gugma han Dios. Ito an hinungdan kon kay ano nga agsob maeksperyensyahan naton an pagkatotoo han mga pulong ni Jesus: “Burobulahan pa an paghatag kay ngan ha pagkarawat.” (Buhat 20:35) Nalilipay kita ha pagpahayag hin gugma tungod kay ginhimo kita “ha ladawan han Dios.” (Genesis 1:27) Bisan kon damu pa an kalidad ni Jehova, an gugma amo an pinakabantogan nga bahin han iya personalidad.

An mga sinurat nga tikang ha Dios sadang magpakita han iya gugma. Damu an kadaan nga sinurat han mga relihiyon ha kalibotan. Mationan-o kamalampuson an sugad nga mga sinurat ha pagpakita han gugma han Dios?

Ha pagkamatuod, an kadam-an han mga sinurat han mga relihiyon gutiay la an iginsasaysay mahitungod ha paagi han paghigugma ha aton han Dios o han paghigugma naton ha iya. Tungod hito, minilyon an waray makakarawat hin baton han hira nagpakiana, “Kay ano nga nakita kita hin ebidensya han gugma han Dios ha mga linarang samtang nagpapadayon an pag-antos ngan karaotan?” Ha luyo nga bahin, an Biblia la an kadaan nga baraan nga sinurat nga nagsasaysay han gugma han Dios. Nagtututdo liwat ito ha aton kon paonan-o naton ipapakita an gugma.

An Libro Mahitungod han Gugma

An Pulong han Dios, an Biblia, nagsusumat nga hi Jehova ‘an Dios han gugma.’ (2 Korinto 13:11) Iginhuhulagway han Biblia kon paonan-o an gugma nagpagios kan Jehova nga ihatag ha siyahan nga mga tawo an kinabuhi nga waray sakit ngan kamatayon. Kondi an pagrebelde ha awtoridad han Dios nagresulta hin pag-antos ha mga tawo. (Deuteronomio 32:4, 5; Roma 5:12) Ginios hi Jehova ha pagpahiuli han nawara. An Pulong han Dios nasiring: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.” (Juan  3:16) Mas iginpapatin-aw pa han Baraan nga Kasuratan an gugma han Dios kon iginhuhulagway hito kon paonan-o Hiya nagtagana hin hingpit nga gobyerno ilarom ha pagmando ni Jesus ha pagpahiuli han kamurayawan ha masinugtanon nga katawohan.—Daniel 7:13, 14; 2 Pedro 3:13.

Ginsusumaryo han Biblia an obligasyon han tawo ha pagsiring: “Higugmaon mo an Ginoo nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna. Ini amo an daku ngan siyahan nga sugo. Ngan an ikaduha, sugad hini: Higugmaon mo an imo igkasitawo sugad ha imo ngahaw. An bug-os nga Kasugoanan ngan an mga manaragna natikang hini nga duha nga sugo.” (Mateo 22:37-40) Pinamamatud-an han Biblia nga giniyahan ito han Dios. Tungod kay matin-aw nga ipinapakita hito an iya personalidad, makakasiguro kita nga tikang ito ha ‘Dios han gugma.’—2 Timoteo 3:16.

Bisan pinaagi la hini nga suruklan, mahibabaroan naton kon ano nga kadaan nga mga sinurat an tikang gud ha Dios. Ha gugma liwat nakikilala an totoo nga mga magsiringba, tungod kay ira ginsusubad an Dios ha pagpakita hin gugma.

Kon Paonan-o Makikilala an mga Tawo nga Nahigugma ha Dios

Makikilala dayon an totoo nga nahigugma ha Dios, labi na yana nga nagkikinabuhi kita ha tinatawag han Biblia nga “kataposan nga mga adlaw.” An mga tawo nagigin mas ‘mahigugmaon ha ira kalugaringon, ha salapi, ha kalipayan kay ha Dios.’—2 Timoteo 3:1-4.

Paonan-o mo makikilala an mga nahigugma ha Dios? An Biblia nasiring: “Amo ini an gugma han Dios, nga pagtumanon ta an iya mga sugo.” (1 Juan 5:3) An gugma ha Dios nagpapagios ha mga tawo nga tahuron an mga prinsipyo ha Biblia may kalabotan ha moral. Pananglitan, an Pulong han Dios may-ada mga balaud ha pakighilawas ngan pag-asawa. Igintutugot an pakighilawas ha mag-asawa la, ngan kinahanglan magin permanente an pag-asawa. (Mateo 19:9; Hebreo 13:4) Han an usa nga babaye ha Espanya nga nag-eskwela hin teolohiya tinambong ha katirok han mga Saksi ni Jehova nga naiikag ha pag-aram han mga balaud ha Biblia may kalabotan ha moral, hiya nagsiring: “Linakat ako nga naparig-on, diri la pinaagi han naghahatag hin kahibaro nga Kasuratanhon nga mga pahayag kondi pinaagi liwat han ira pagkaurosa, han ira hitaas nga moralidad, ngan han ira maopay nga pamatasan.”

Dugang pa ha ira gugma ha Dios, an totoo nga mga Kristiano masayon makilala tungod han ira gugma ha mga igkasi-tawo. An ira pinakaimportante nga buruhaton amo an pakiistorya ha iba mahitungod han amo la nga paglaom han katawohan, an Ginhadian han Dios. (Mateo 24:14) Waray iba nga makakahatag hin mas nagpapadayon nga kaopayan ha ira mga igkasi-tawo kay ha pagbulig ha ira nga mahibaro mahitungod ha Dios. (Juan 17:3) Ipinapakita liwat han totoo nga mga Kristiano an ira gugma ha iba nga paagi. Nahatag hira hin angayan nga bulig ha mga nag-aantos. Pananglitan, han nadaot hin linog an Italya, usa nga peryodiko didto an nagreport nga an mga Saksi ni Jehova “ginios ha praktikal nga paagi ngan ginbuligan adton nag-aantos anoman an ira relihiyon.”

Gawas ha paghigugma ha Dios ngan ha mga igkasi-tawo, an totoo nga mga Kristiano naghihigugmaay. Hi Jesus nagsiring: “Ako mahatag ha iyo hin usa nga bag-o nga sugo, nga kamo maghigugmaanay an usa kag usa; nga sugad gud han akon paghigugma ha iyo, kamo man maghigugmaanay an usa kag usa. Tungod hini an ngatanan makilala, nga kamo akon mga tinon-an, kon kamo maghigugmaanay an usa kag usa.”—Juan 13:34, 35.

Nakikita gud ba an kaibahan han paghigugmaay han totoo nga mga Kristiano? Oo, para ha kabulig nga hi Ema nga nagtatrabaho ha La Paz, Bolivia. Tungod han pagkaiba-iba han mga tribo didto, agsob nga diri nagkakaurosa an mga riko ngan an mga pobre. Hiya nagsiring: “Ha akon siyahan nga pagtambong ha katirok han mga Saksi ni Jehova, nakakita ako hin riko nga lalaki nga nalingkod ngan nakikiistorya ha pobre nga babaye nga taga-India. Waray pa gud ako makakita hin sugad. Hito mismo nga takna, nasantop ko nga ini gud an katawohan han Dios.” Sugad liwat hito an punto ni Miriam nga usa nga daragita nga taga-Brazil, han hiya nagsiring: “Diri ako maaram kon ano an akon hihimoon basi malipay, bisan kon upod ko an akon pamilya. Ha mga Saksi ni Jehova ko la nakita an gugma nga may buhat.”  Ha Estados Unidos, an direktor han sumat para ha usa nga estasyon ha telebisyon nagsurat: “Kon mas damu an magkikinabuhi uyon ha iyo relihiyon, ini nga nasud diri magigin sugad hini an kahimtang. Usa ako nga reporter nga maaram nga an iyo organisasyon naestablisar ha gugma ngan marig-on nga pagtoo ha Maglalarang.”

Pamilnga an Totoo nga Pagsingba

An gugma usa nga pangirilal-an han totoo nga pagsingba. Iginpariho ni Jesus an pakaagi han totoo nga pagsingba ha pagpamiling han husto nga dalan ngan pagdesisyon nga maglakat dida hito. Ito la an dalan nga nagtutugway ngadto ha kinabuhi nga waray kataposan. Hi Jesus nagsiring: “Sulod kamo ha haligotay nga ganghaan; kay haluag an ganghaan, ngan halapad an dalan nga tipakadto ha karat-an, ngan damu an mga nagpakasulod hito. Kay haligotay an ganghaan, ngan haligot an dalan nga tipakadto ha kinabuhi, ngan talagsa la an nakakaagi hito.” (Mateo 7:13, 14) Uusa la ka grupo an totoo nga mga Kristiano nga naglalakat kaupod han Dios ha dalan han totoo nga pagsingba. Salit, importante gud kon ano nga relihiyon an imo pipilion. Kon mabilngan mo ito ngan magdesisyon ka ha paglakat dida hito, mabibilngan mo an gimaopayi nga paagi han kinabuhi, tungod kay ito an dalan han gugma.—Efeso 4:1-4.

Handurawa an duro nga kalipay samtang naglalakat ka ha dalan han totoo nga pagsingba! Pariho ito ha paglakat upod han Dios. Tututdoan ka han Dios mahitungod han kinaadman ngan gugma basi magpahimulos ka han maopay nga relasyon ha iba. Mahibabaro ka liwat mahitungod han katuyoan han kinabuhi, ngan masasabtan mo an Iya mga saad ngan makakalaom ka hin maopay nga kabubuwason. Diri ka gud magbabasol ha pagpamiling han totoo nga pagsingba.

[Retrato ha pahina 5]

Ha ngatanan nga kadaan nga sinurat may kalabotan ha relihiyon, an Biblia la an nagsusumat mahitungod ha gugma han Dios

[Mga Retrato ha pahina 7]

Masayon makilala an totoo nga mga Kristiano tungod kay nagpapakita hira hin gugma