Importante ba Kon Ano nga Relihiyon an Imo Pipilion?

KADAM-AN ha aton an naruruyag nga damu an aton mapipilian kon namamalit kita. Kon magkalain-lain an prutas ngan utanon ha merkado, makakapili kita han aton naruruyagan gud ngan han maopay para ha aton pamilya. Kon an usa nga tindahan may-ada barato nga mga bado nga damu an estilo ngan kolor, makakapili kita han maangay gud ha aton. An iba nga mga desisyon naton ha kinabuhi nadepende la ha aton kalugaringon nga karuyag. Kondi, an iba nakakaapekto ha aton kaopayan, pananglitan, ha aton pagpili hin masustansya nga pagkaon o mag-opay nga kasangkayan. Salit, kumusta man an aton pagpili hin relihiyon? An aton ba paagi ha pagsingba kapahayagan la han aton kalugaringon nga karuyag? O nakakaapekto gud ba ito han aton kaopayan?

Damu hinduro an relihiyon nga aton pagpipilian. Yana, damu nga nasud an naggagarantiya hin kagawasan ha relihiyon, ngan mas naabat na an mga tawo nga may kagawasan hira ha pagbaya han relihiyon han ira mga kag-anak. Pinaagi han usa nga surbey ha Estados Unidos, hinbaroan nga 80 porsyento han mga Amerikano nga ginpakianhan an “natoo nga sobra usa nga relihiyon an mahimo magin dalan tipakadto ha kaluwasan.” Sumala hito nga surbey, “ha kada lima nga ginpakianhan usa an nagsiring nga han daku na hiya binalhin hiya hin iba nga relihiyon.” Ipinapakita han usa nga surbey ha Brazil nga haros 25 porsyento han ngatanan nga taga didto an nagbag-o hin relihiyon.

Ha naglabay, an mga tawo marig-on nga nagdidebate han mga doktrina nga nagpapaiba ha usa nga relihiyon kay ha iba. Yana, an opinyon han kadam-an amo ini, ‘Diri importante kon ano nga relihiyon an imo pinipili.’ Kondi tinuod ba ito? Makakaapekto ba ha imo an imo napili nga relihiyon?

Sugad la nga an mag-opay nga mamaralit namamakiana mahitungod han gintikangan han mga produkto, ha pariho nga paagi maaramon nga magpakiana ka, ‘Paonan-o nagtikang ini ngatanan nga magkalain-lain nga relihiyon, ngan kay ano?’ An Biblia nagtatagana han mga baton.

 Paonan-o Nagtikang an Ngatanan nga Magkalain-lain nga Relihiyon?

Ha kadaan nga Israel, gintikangan ni Hadi Jeroboam an bag-o nga relihiyon haros usa ka yukot ka tuig antes kumanhi hi Jesus ha tuna. Hi Jeroboam an siyahan nga hadi han independente nga norte nga ginhadian han Israel. Nakurian hiya nga pag-urusahon an mga tawo basi matuman an iya katuyoan. “Dida hito an hadi nakisagdon, ngan naghimo hin duha nga nati nga baka nga bulawan; ngan hiya nagsiring ha ira: Igo na para ha iyo an pagkinadto ha Jerusalem: kitaa an imo mga dios, O Israel.” (1 Hadi 12:28) Matin-aw nga karuyag han hadi nga gamiton an relihiyon basi diri na magin maunungon an mga tawo ha Jerusalem, diin hira nagsisingba hadto. An relihiyon nga gintikangan ni Jeroboam nagpabilin ha sulod hin mga siglo ngan ha urhi nagresulta hin minilyon nga nagkamatay o nabihag han ginhukman na han Dios iton apostata nga nasud han Israel. An relihiyon ni Jeroboam usa nga taktika basi maglampos ha politika. Ha pariho nga paagi, an pipira nga relihiyon yana nagtikang ha pariho nga pangalimbasog ha pagparig-on han gahum ha politika.

Iginpahayag ni apostol Pablo an usa pa nga motibo han mga tawo ha pagtikang hin bag-o nga relihiyon han hiya nagsiring: “Kay ako maaram nga, ha katapos han akon pagbulag, masulod ha iyo an mga lobo nga magbangis, nga diri mahatag hin kalooy han kapanon. Ngan tikang ha iyo la ngahaw matindog in mga tawo, nga magyayakan hin mga bagay nga mga baliko, pagdanas han mga tinon-an ha urhi nira.” (Buhat 20:29, 30) Agsob magpatikang an mapahitas-on nga mga lider hin relihiyoso nga mga organisasyon basi makadani hin mga tawo. An mga relihiyon nga palso nga nag-aangkon ha pagin Kristiano nagkabahin-bahin ha damu hinduro nga magkakontra nga grupo.

Hin-o an Karuyag Lipayon han mga Relihiyon?

Sugad nga baton ha hingyap han publiko, mahimo maaghat an iba nga magtikang hin bag-o nga relihiyon. Pananglitan, an Economist nga magasin nagreport mahitungod ha tinatawag nga dagku nga relihiyon ha Estados Unidos. An artikulo nasiring nga nagtitikadamu an membro hini nga mga relihiyon tungod kay “iginbasar [ito] ha prinsipyo nga pariho ha ngatanan nga malampuson nga mga negosyo: pag-una han kustomer.” An iba may-ada “magrisyo nga katirok nga may mga video, drama ngan moderno nga musika.” Ngan an pipira nga lider hini nga mga relihiyon nasiring nga tinututdoan nira an ira mga membro nga magin “riko, mahimsog ngan waray problema.” Bisan kon ginpapakaraot ini nga mga relihiyon ha pagin aada ha negosyo ha kaliawan o “ha pagbulig basi maglampos ha kalibotan,” siring hito nga magasin, “iginhahatag la hito an karuyag han mga membro hito.” An report nagtatapos: “An pagtampo han negosyo ngan relihiyon malampuson gud.”

Bisan kon an iba nga relihiyon diri dayag nga nagios pariho hin negosyo, an mga relihiyon nga “nagbubuhat han karuyag han publiko” nagpapahinumdom ha aton mahitungod han pahamangno ni Pablo. Hiya nagsurat: “Maabot an panahon nga diri hira mag-aantos han putli nga pagturon-an; kondi, tungod ha ira magkatol nga mga talinga, magtitirok hira hin ira mga lugaringon nga magturutdo nga magsusunod ha ira mga kalugaringon nga kaipa; ngan ira ipahirayo an ira mga talinga tikang ha kamatuoran, ngan mabalik ha mga surumatanon.”—2 Timoteo 4:3, 4.

Tungod kay damu nga relihiyon an nagtikang ha hingyap para hin gahum ha politika, kabantogan, ngan pagkarawat han publiko imbes han hingyap ha pagpalipay ha Dios, diri urusahon nga an relihiyon nahidadabi ha karaotan sugad han pag-abuso ha bata, panlimbong, girra, o terorismo. Agsob hinduro nga nakakalimbong an relihiyon. Paonan-o mo malilikayan an kalimbongi?

[Blurb ha pahina 4]

Damu nga relihiyon an nagtikang ha paghingyap hin gahum ha politika, kabantogan, ngan pagkarawat han publiko imbes han hingyap nga lipayon an Dios