Magmalipayon ha Pagkinabuhi nga May Kahadlok kan Jehova
Magmalipayon ha Pagkinabuhi nga May Kahadlok kan Jehova
“Kahadluki niyo hi Jehova, kamo nga mga baraan niya; kay waray nakakakulang hadton mga may kahadlok ha iya.”—SALMO 34:9.
1, 2. (a) Ano an magkalain-lain nga panhunahuna han Kakristianohan ha kahadlok ha Dios? (b) Ano nga mga pakiana an aton paghihisgotan yana?
AN MGA ministro han Kakristianohan agsob nga nagtututdo mahitungod han kahadlok ha Dios nga iginbasar ha diri-Kasuratanhon nga katutdoan nga ginsisirotan kuno han Dios an magpakasasala ha waray kataposan ha naglalaga nga impyerno. An sugad nga doktrina nasumpaki ha igintututdo han Biblia nga hi Jehova usa nga Dios han gugma ngan hustisya. (Genesis 3:19; Deuteronomio 32:4; Roma 6:23; 1 Juan 4:8) Kabaliktaran an igintututdo han iba nga mga ministro han Kakristianohan. Diri gud nira gin-uunabi an kahadlok ha Dios. Lugod, igintututdo nira nga matinuguton an Dios ngan kinakarawat niya haros an bisan hin-o nga tawo anoman an klase han iya pagkinabuhi. Diri liwat ito an igintututdo han Biblia.—Galasia 5:19-21.
2 Ha pagkamatuod, an Biblia nagdadasig ha aton nga mahadlok ha Dios. (Pahayag 14:7) Ito nga katutdoan nagbabangon hin mga pakiana. Kay ano nga karuyag han mahigugmaon nga Dios nga mahadlok kita ha iya? Ano nga klase hin kahadlok an ginkikinahanglan han Dios? Ano an kapulsanan ha aton han kahadlok ha Dios? Aton paghihisgotan ini nga mga pakiana samtang iginpapadayon naton an paghisgot han ika-34 nga Salmo.
Kon Kay Ano nga Sadang Kahadlokan an Dios
3. (a) Ano an imo panhunahuna ha sugo nga mahadlok ha Dios? (b) Kay ano nga malipayon an mga nahahadlok kan Jehova?
3 Tungod kay hi Jehova an Maglalarang ngan Soberano nga Magmarando han uniberso, takos hiya kahadlokan. (1 Pedro 2:17) Kondi, diri ini an klase hin kahadlok nga inaabat ha usa nga mabangis nga dios. Ito an matinalahuron nga kahadlok tungod han kahibaro kon hin-o hi Jehova. Ito liwat an kahadlok nga mapasubo hiya. An kahadlok ha Dios dungganon ngan nagpapalipay, diri nakakapanluya o makalilisang. Sugad nga “malipayon nga Dios,” karuyag ni Jehova nga an iya tawhanon nga mga linarang magmalipayon ha ira pagkinabuhi. (1 Timoteo 1:11, NW) Kondi, basi mabuhat ito, kinahanglan magkinabuhi kita uyon ha mga kinahanglanon han Dios. Para ha damu, nangangahulogan ito hin pagbag-o han paagi han pagkinabuhi. An ngatanan nga naghihimo han kinahanglanon nga pagbag-o nakakaeksperyensya han pagkatotoo han mga pulong han salmista nga hi David: “O tilawi niyo ngan kitaa nga hi Jehova maopay: bulahan an tawo nga naayop ha iya. O kahadluki niyo hi Jehova, kamo nga mga baraan niya; kay waray nakakakulang hadton mga may kahadlok ha iya.” (Salmo 34:8, 9) Tungod kay may-ada hira maopay nga relasyon kan Jehova, an ngatanan nga nahahadlok ha Iya diri nakukulangan han mga butang nga may-ada nagpapadayon nga bili.
4. Ano nga pasarig an iginhatag ni David ngan ni Jesus?
4 Tigamni nga ginpasidunggan ni David an iya mga tawohan pinaagi han pagtawag ha ira nga “mga baraan,” sugad han iginpapasabot hito nga termino ha iya panahon. Bahin hira han baraan nga nasud han Dios. Ira liwat iginbutang ha peligro an ira kinabuhi ha pagsunod kan David. Bisan kon napalagiw hira tikang kan Hadi Saul, nasarig hi David nga hi Jehova magpapadayon ha paghatag han ira importante nga mga panginahanglan. Hi David nagsurat: “An mga gudtiay nga mga leon nagkukulang, ngan nag-aantos hira hin kagutom; kondi hira nga nagbibiling kan Jehova diri magkukulang hin bisan ano nga maopay nga butang.” (Salmo 34:10) Hi Jesus naghatag hin pariho nga pasarig ha iya mga sumurunod.—Mateo 6:33.
5. (a) Damu han mga sumurunod ni Jesus an tikang ha ano nga klase hin mga tawo? (b) Ano nga sagdon an iginhatag ni Jesus may kalabotan ha kahadlok?
5 Damu hadton namati kan Jesus an tikang ha pobre, ubos nga grupo han mga Judio. Salit, hi Jesus “nalooy ha ira; kay nanluluya ngan nagpapatlaag, sugad hin mga karnero nga waray magbarantay.” (Mateo 9:36) An sugad ba nga mga ubos magkakaada kaisog ha pagsunod kan Jesus? Basi mabuhat ito, kinahanglan patuboon nira an kahadlok kan Jehova, diri ha mga tawo. Hi Jesus nagsiring: “Diri kamo magkahadlok han mga nanmamatay han lawas, ngan ha katapos, waray na nira sadang mabuhat. Kondi akon kamo pakikitaon, kon hin-o an iyo kinahanglan kahadlokan: Kahadluki niyo an tawo nga ha katapos niya pagpatay may gahum paglabog ngadto ha impyerno. Oo, ako nasiring ha iyo: Kahadluki hiya. Di ba an lima nga mga tamsihay iginbaligya hin upat nga daku? Ngan bisan an usa ha ira waray hikalimti ha atubangan han Dios. Kondi bisan an mga buhok ha iyo mga ulo naihap na ngatanan. Ayaw kahadlok: kamo maromahal han damu nga mga tamsihay.”—Lukas 12:4-7.
6. (a) Ano nga mga pulong ni Jesus an nagpaparig-on ha mga Kristiano? (b) Kay ano nga hi Jesus an gimaopayi nga susbaranan ha pagpakita hin kahadlok ha Dios?
6 Kon an mga nahahadlok kan Jehova gin-iipit han ira mga kaaway nga umundang ha pag-alagad ha Dios, mahimo nira hinumdoman an sagdon ni Jesus: “An ngatanan nga magtutug-an ha akon ha atubangan han mga tawo, an Anak han tawo magtutug-an man ha iya ha atubangan han mga anghel han Dios. Kondi an maglilirong ha akon ha atubangan han tawo, iglilirong ko man hiya ha atubangan han mga anghel han Dios.” (Lukas 12:8, 9) Ito nga mga pulong nagpaparig-on ha mga Kristiano, labi na ha katunaan diin igindidiri an totoo nga pagsingba. An sugad nga mga tawo padayon nga maikmat nga nagdadayaw kan Jehova ha Kristiano nga mga katirok ngan ha ira ministeryo ha publiko. (Buhat 5:29) Hi Jesus nagpapakita han gimaopayi nga susbaranan han “matinahuron nga pagkahadlok” ha Dios. (Hebreo 5:7) An matagnaon nga Pulong nagtagna mahitungod ha iya: “An espiritu ni Jehova mahugdon dida ha iya, an espiritu . . . han kahadlok kan Jehova. Ngan an iya kalipay maaada ha kahadlok kan Jehova.” (Isaias 11:2, 3) Salit, kwalipikado gud hi Jesus ha pagtutdo ha aton han mga kapulsanan han kahadlok ha Dios.
7. (a) Ha ano nga paagi nasunod an mga Kristiano ha imbitasyon nga pariho han iginhatag ni David? (b) Paonan-o masusubad han mga kag-anak an susbaranan ni David?
7 An ngatanan nga nasunod ha susbaranan ni Jesus ngan nasugot han iya mga katutdoan, ha pagkamatuod, nasugot ha imbitasyon nga pariho han kan David: “Kadi, kamo nga mga kabataan, pamati kamo ha akon: pagtututdoan ko kamo han kahadlok kan Jehova.” (Salmo 34:11) Angayan la nga tawagon ni David an iya mga tawohan sugad nga “kabataan” o iya mga anak tungod kay ira gintatahod hiya sugad nga ira lider. Iginhatag ni David mismo an espirituwal nga bulig ha iya mga sumurunod basi magkaurosa hira ngan magkaada han pag-uyon han Dios. Pagkamaopay nga susbaranan para ha Kristiano nga mga kag-anak! Hi Jehova naghahatag ha ira hin awtoridad ha ira mga anak nga padayon nga “[aghaton] hira ha pagturon-an ngan paglaygay han Ginoo.” (Efeso 6:4) Kon adlaw-adlaw nga ginhihisgotan han mga kag-anak an espirituwal nga mga butang ha ira mga anak ngan nagdudumara ha ira hin regular nga pag-aram ha Biblia, binubuligan nira an ira mga anak nga magmalipayon ha pagkinabuhi nga may kahadlok kan Jehova.—Deuteronomio 6:6, 7.
Kon Paonan-o Iaaplikar an Kahadlok ha Dios ha Aton Pagkinabuhi
8, 9. (a) Kay ano nga makaruruyag gud an pagkinabuhi nga may kahadlok ha Dios? (b) Ha ano nga paagi babantayan naton an aton dila?
8 Sugad han gin-unabi na, an kahadlok kan Jehova diri nagwawara han aton kalipay. Hi David nagpakiana: “Hin-o ba an tawo nga nagtitinguha hin kinabuhi, ngan nahigugma hin maiha nga mga adlaw, basi hiya makakita hin kaopayan?” (Salmo 34:12) Matin-aw, an kahadlok kan Jehova an yawi ha hilawig ngan malipayon nga pagkinabuhi ngan ha pakakita hin kaopayan. Kondi, masayon an pagsiring, “Nahahadlok ako ha Dios.” Diri sugad kasayon an pagpamatuod hito pinaagi han aton paggawi. Salit, iginsaysay ni David kon paonan-o naton maipapakita an kahadlok ha Dios.
9 “Bantayi an imo dila tikang ha maraot, ngan an imo mga im-im tikang ha pagyakan hin limbong.” (Salmo 34:13) Hi apostol Pedro giniyahan ha pagkotar hini nga bahin han Salmo 34 katapos niya sagdonan an mga Kristiano nga magpakita hin minagburugto nga gugma ha ira pagtrato ha usa kag usa. (1 Pedro 3:8-12) An pagbantay ha aton dila tikang ha maraot nangangahulogan nga lilikyan naton an pagpasarang hin nakakadaot nga tsismis. Lugod, mangangalimbasog kita pirme nga magin makapadasig kon nakikiistorya kita ha iba. Mangangalimbasog liwat kita nga magin maisugon ngan isumat an kamatuoran.—Efeso 4:25, 29, 31; Jakobo 5:16.
10. (a) Isaysay kon ano an kahulogan han pagbaya ha maraot. (b) Ano an nahiuupod ha pagbuhat han maopay?
10 “Bayai an karat-an, ngan pagbuhat hin maopay; pagbiling hin kamurayaw, ngan sundon mo ito.” (Salmo 34:14) Linilikyan naton an mga butang nga ginkukondenar han Dios, sugad han seksuwal nga imoralidad, pornograpiya, pangawat, espiritismo, kamadarahog, paghubog, ngan iginsasalikway liwat naton an kaliawan nga nagpapabug-at han sugad nga magngil-ad nga mga butang. (Efeso 5:10-12) Lugod, ginagamit naton an aton panahon ha pagbuhat han maopay. An gimaopayi nga mahihimo naton amo an regular nga pakigbahin ha pagsangyaw han Ginhadian ngan paghimo hin disipulo, basi mabuligan an iba nga maluwas. (Mateo 24:14; 28:19, 20) An pagbuhat han maopay nag-uupod liwat han pangandam ngan pagtambong ha Kristiano nga mga katirok, pag-amot ha bug-os-kalibotan nga buruhaton, pag-ataman ha aton Kingdom Hall, ngan pagtagad ha mga panginahanglan han pobre nga mga Kristiano.
11. (a) Paonan-o igin-aplikar ni David an iya tinotoohan mahitungod han kamurayawan? (b) Ano an imo mahihimo basi ‘sundon an kamurayaw’ ha kongregasyon?
11 Hi David nagpakita hin susbaranan ha pangalimbasog ha pakigmurayaw. Makaduha nga nagkaada hiya higayon nga patayon hi Saul. Hiton duha nga okasyon, waray hiya magin madarahog ngan ha urhi matinalahuron nga nakiistorya ha hadi, naglalaom nga maibalik an kamurayawan. (1 Samuel 24:8-11; 26:17-20) Ano an mahihimo yana kon namimeligro an kamurayawan han kongregasyon tungod han usa nga problema? Sadang naton ‘bilngon an kamurayaw, ngan sundon ito.’ Salit, kon inaabat naton nga diri maopay an aton relasyon ha usa nga igkasi-tumuroo, aton susundon an sagdon ni Jesus: “Pakighiuli siyahan ha imo bugto.” Katapos, magpapadayon kita ha iba nga mga bahin han totoo nga pagsingba.—Mateo 5:23, 24; Efeso 4:26.
An Kahadlok ha Dios Nagriresulta hin Damu nga Balos
12, 13. (a) Ano nga mga kapulsanan an nakakarawat yana han mga nahahadlok ha Dios? (b) Ano nga urusahon nga balos an hirani na mapahimulosan han matinumanon nga mga magsiringba?
12 “An mga mata ni Jehova ngadto ha mga magtadong, ngan binubuka niya iton iya talinga ngadto ha ira singgit.” (Salmo 34:15) An rekord han pagtrato ni Jehova kan David nagpapamatuod nga totoo ito nga mga pulong. Yana, daku an aton kalipay ngan pag-abat hin kamurayawan tungod kay maaram kita nga hi Jehova nagbabantay ha aton. Nasarig kita nga ihahatag niya pirme an aton mga panginahanglan, bisan ha makuri hinduro nga panahon. Maaram kita nga diri na maiha an ngatanan nga totoo nga magsiringba maatubang ha igintagna nga pag-atake ni Gog han Magog ngan ha “makalilisang nga adlaw ni Jehova.” (Joel 2:11, 31; Esekiel 38:14-18, 21-23) Anoman nga sitwasyon an aton atubangon, an mga pulong ni David matutuman liwat ha aton: “An mga magtadong nagsinggit, ngan hi Jehova dinungog, ngan binawi hira gawas ha ngatanan nira nga mga kakurian.”—Salmo 34:17.
13 Makalilipay gud makita hiton nga panahon nga ginhihimaya ni Jehova an iya harangdon nga ngaran! An aton mga kasingkasing mapupuno hin mas daku nga kahipausa ngan pagtahod kay ha kakan-o pa man, ngan an ngatanan nga mga parakontra makakaeksperyensya hin makaarawod nga kabungkagan. “An nawong ni Jehova patok ha ira nga nagbubuhat hin maraot, ha pag-utod han ira hinumdoman ha tuna.” (Salmo 34:16) Daku gud nga balos an pakaeksperyensya hiton urusahon nga kaluwasan ngadto ha matadong, bag-o nga kalibotan han Dios!
Mga Saad nga Nabulig ha Aton nga Makailob
14. Ano an mabulig ha aton nga makailob bisan pa han mga kalamidad?
14 Kondi yana, ginkikinahanglan an pagpailob basi makagpadayon ha pagsugot kan Jehova ha maraot ngan mapungtanon nga kalibotan. An kahadlok ha Dios nabulig gud ha aton ha pagpatubo han pagkamasinugtanon. Tungod han peligroso nga mga panahon naton yana, an iba nga mga surugoon ni Jehova nakakaeksperyensya hin duro nga mga kakurian nga nagpapasakit han ira kasingkasing ngan nakakapanluya han ira espiritu, siring pa. Kondi, makakasiguro gud hira nga kon sumarig hira kan Jehova, bubuligan niya hira nga makailob. An mga pulong ni David naghahatag hin totoo nga pagliaw: “Hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon an espiritu.” (Salmo 34:18) Makapadasig an sunod nga ginsiring ni David: “Damu an mga kagol-anan han matadong nga tawo; kondi binabawi hiya ni Jehova, tikang hiton ngatanan.” (Salmo 34:19) Mationan-o man kadamu nga kalamidad an umabot ha aton, hi Jehova gamhanan hinduro ngan makakaluwas ha aton.
15, 16. (a) Ano nga kalamidad an hinbaroan ni David waray pag-iha katapos niya makomposo an Salmo 34? (b) Ano an mabulig ha aton nga makailob ha mga kakurian?
15 Waray pag-iha katapos makomposo an Salmo 34, hinbaroan ni David an kalamidad nga nahitabo ha mga umurukoy ha Nob, han ginpamatay hira ni Saul ngan an kadam-an han mga saserdote. Sigurado nga nasubo gud hiya tungod kay nahinumdoman niya nga an iya pagbisita ha Nob an hinungdan han kasina ni Saul! (1 Samuel 22:13, 18-21) Sigurado nga nanginyupo hi David para han bulig ni Jehova, ngan naliaw hiya han paglaom ha tidaraon nga pagkabanhaw han “mga magtadong.”—Buhat 24:15.
16 Yana, an paglaom ha pagkabanhaw nagpaparig-on liwat ha aton. Maaram kita nga bisan ano nga pagbuhaton han aton mga kaaway diri makakadaot ha aton ha kadayonan. (Mateo 10:28) Iginpahayag ni David an pariho nga pagsarig ha pagsiring: “Binabantayan niya an ngatanan nga mga tul-an hadto: waray bisan usa nga narurumok.” (Salmo 34:20) Ito nga bersikulo literal nga natuman kan Jesus. Bisan kon mabangis an paagi han pagpatay kan Jesus, waray usa han iya mga tul-an an ‘nabari.’ (Juan 19:36) Ha usa pa nga aplikasyon, an Salmo 34:20 nagpapasarig ha aton nga bisan ano nga mga kakurian an atubangon han dinihogan nga mga Kristiano ngan han ira mga kaupod nga ‘iba nga mga karnero,’ diri gud hira madadaot ha kadayonan. An ira mga tul-an diri gud mababari, siring pa.—Juan 10:16.
17. Ano nga kalamidad an maieksperyensyahan han diri-mabinasulon nga mga nangangalas ha katawohan ni Jehova?
17 Para ha magraot, naiiba an sitwasyon. Diri na maiha aanihon nira an ira iginpugas. “An karat-an mamamatay han mga magraot; ngan adton nangangalas han matinadungon pagsisirotan.” (Salmo 34:21) An ngatanan nga nagpapadayon ha pagkontra ha katawohan han Dios makakaeksperyensya han girarauti nga klase hin kalamidad. Ha pagpahayag ni Jesu-Kristo, hira “mag-aantos hin sirot, nga amo an pagkabungkag nga waray kataposan.”—2 Tesalonika 1:9.
18. Ha ano nga paagi ginlukat na an “daku nga panon,” ngan ano an ira maieksperyensyahan ha tidaraon?
18 An salmo ni David natatapos pinaagi hinin nagpapasarig nga mga pulong: “Hi Jehova nagtutubos han kalag han iya mga surugoon; ngan waray bisan hin-o nga naayop ha iya nga paghuhukman hin sirot.” (Salmo 34:22) Ha ikatarapos han 40-ka-tuig nga pagmando ni Hadi David, hiya nagsiring: “[An Dios] naglukat han akon kalag tikang ha ngatanan nga kalisdanan.” (1 Hadi 1:29) Pariho kan David, diri na maiha an mga nahahadlok kan Jehova magkakalipay tungod kay ginlukat hira tikang ha sala ngan ginluwas tikang ha ngatanan nga ira mga kakurian. Kadam-an han dinihogan nga mga Kristiano an nakakarawat na han ira langitnon nga balos. An “daku nga panon” tikang ha ngatanan nga nasud naupod na yana ha mga nahibibilin pa han kabugtoan ni Jesus ha pag-alagad ha Dios ngan sugad nga resulta gintatagad hira ni Jehova nga limpyo. Tungod ini kay natoo hira ha naglulukat nga gahum han iginbubo nga dugo ni Jesus. Durante han tiarabot nga Usa ka Yukot ka Tuig nga Pagmando ni Kristo, an bug-os nga mga kapulsanan han halad lukat ihahatag ha ira, salit magigin hingpit na hira.—Pahayag 7:9, 14, 17, NW; 21:3-5.
19. An mga membro han “daku nga panon” determinado nga buhaton an ano?
19 Kay ano nga ini ngatanan nga bendisyon ihahatag ha “daku nga panon” han mga magsiringba han Dios? Tungod kay determinado hira nga magpadayon nga nahahadlok kan Jehova, ngan nag-aalagad ha iya nga may pagdayaw ngan matinalahuron nga pagsugot. Oo, an kahadlok kan Jehova nabulig ha aton nga magmalipayon ha pagkinabuhi yana ngan ‘madakop an kinabuhi nga totoo’—an kinabuhi nga waray kataposan ha bag-o nga kalibotan han Dios.—1 Timoteo 6:12, 18, 19; Pahayag 15:3, 4.
Nahinunumdoman Mo Ba?
• Kay ano nga sadang mahadlok kita ha Dios, ngan nangangahulogan hin ano an kahadlok ha iya?
• Ano an sadang magin epekto han kahadlok ha Dios ha aton paggawi?
• Ano an mga balos han pagin mahadlukon-ha-Dios?
• Ano nga mga saad an nabulig ha aton nga makailob?
[Mga Pakiana]
[Retrato ha pahina 26]
An mga nahahadlok kan Jehova nag-iikmat kon igindidiri an ira buruhaton
[Retrato ha pahina 28]
An gimaopayi nga mahihimo naton para ha aton mga igkasi-tawo amo an pagsumat ha ira han maopay nga sumat han Ginhadian