Malipayon ha Paghulat kan Jehova

NAKAKAON ka na ba hin hilaw nga prutas? Waray ruhaduha nga waray ka matagbaw ngan malipay han rasa hito. An prutas nagkikinahanglan hin panahon basi mahinog, ngan an paghulat han kahinog hito takos gud. May-ada iba nga mga kahimtang diin takos an paghulat. “Maopay nga an tawo maglalaom ngan ha mahilumon maghuhulat han kaluwasan ni Jehova,” siring han Biblia. (Pagtangis 3:26; Tito 2:13) Ha ano nga mga paagi sadang maghulat an mga Kristiano kan Jehova? Paonan-o kita magpapahimulos ha paghulat ha iya?

Paghulat ha Dios—Ano an Nahiuupod?

Sugad nga mga Kristiano, ‘naghuhulat ngan nagtitinguha gud kita han pag-abot han adlaw han Dios.’ Naglalaom kita hin katalwasan kon ipahinabo na niya an “pagbungkag ha mga tawo nga diri magtinahuron ha Dios.” (2 Pedro 3:7, 12) Hi Jehova mismo naiikag nga tapuson an ngatanan nga maraot, kondi naghuhulat hiya basi talwason an mga Kristiano ha paagi nga magbabaraan han iya ngaran. An Biblia nasiring: “An Dios [bisan kon] buot ha pagpahayag ha iya kasina, ngan ha pagpakilala ha iya gahum, nag-antos ha daku nga pagkamailob ha mga surudlan ha kasina nga andam ha pagbungkag: ngan basi nga magpakilala han kamanggaran han iya himaya ha mga surudlan han kalooy.” (Roma 9:22, 23) Sugad la han ginbuhat ni Jehova ha panahon ni Noe, maaram hiya han husto nga panahon ha pagtalwas han iya katawohan yana. (1 Pedro 3:20) Tungod hito, an paghulat ha Dios nag-uupod ha paghulat han panahon han iya paggios.

Samtang ginpapamulat naton an adlaw ni Jehova, usahay bangin masubo kita ha pagkita nga nagtitikaraot gud an moral nga suruklan han kalibotan. Ha sugad nga mga kahimtang, maopay nga tagdon naton an mga pulong ni propeta Mika, nga nagsurat: “An tawo nga diosnon nahanaw tikang ha tuna, ngan waray bisan hin-o nga matadong dida ha mga tawo.” Katapos hiya nagdugang: “Mahitungod ha akon, ako matan-aw ngadto kan Jehova: ako maghuhulat para han Dios han akon kaluwasan.” (Mika 7:2, 7) Ano an ‘naghuhulat’ nga disposisyon an angay naton kultibaron? Tungod kay an paghulat agsob nga makasurubo, paonan-o kita magmamalipayon samtang naghuhulat ha Dios?

Malipayon Samtang Naghuhulat

Mahibabaroan naton an husto nga disposisyon kan Jehova. Waray hiya umundang ha pagin an “malipayon nga Dios.” (1 Timoteo 1:11, NW) Malipayon hiya samtang naghuhulat tungod kay padayon nga nagbubuhat hiya basi matuman an iya katuyoan nga maabot han katawohan nga nahigugma ha iya an kahingpitan nga iya karuyag ihatag ha mga tawo han ginlarang niya hira. (Roma 5:12; 6:23) Nakikita niya an mag-opay nga resulta han iya buhat—minilyon an nadadani ha totoo nga pagsingba. Hi Jesus nagsiring: “An akon Amay nagbubuhat ngada yana; ngan ako nagbubuhat.” (Juan 5:17) Importante ha pagin malipayon an pagbuhat para ha iba. (Buhat 20:35) Ha pariho nga paagi, an totoo nga mga Kristiano diri naghuhulat nga waray binubuhat. Lugod, padayon nga nagbubuhat hira basi buligan an iba nga mahibaro han katuyoan han Dios para ha katawohan.

An mga matinumanon kontento pirme ha pagdayaw ha Dios samtang naghuhulat han panahon nga hiya gumios. Tagda an ehemplo ni salmista David. Gintimaraot hiya han iya hadi, ginsalikway han iya duok nga kaupod, ngan gintraydoran han iya anak. Ha tagsa hini nga kahimtang, mahimo ba magmalipayon hiya samtang  naghuhulat nga umabot an katalwasan ha igo nga panahon ni Jehova? An Salmo 71, nga matin-aw nga ginsurat ni David, nasiring: “Maglalaom la ako hin dayoday, ngan pagdadayawon ko ikaw hin mamaurog. An akon baba magsusumat han imo kamatadong, ngan han imo kaluwasan ha bug-os nga adlaw.” (Salmo 71:14, 15) Imbes nga masubo hiya ha paghinulat, nagpahayag hiya hin kalipay tungod kay sagipo hiya ha pagdayaw kan Jehova ngan ha pagparig-on ha iba ha totoo nga pagsingba.—Salmo 71:23.

An paghulat kan Jehova diri nakakaaringit pariho ha paghulat hin nadidilatar nga bus. Paropariho ito ha malipayon nga paghinulat han mga kag-anak samtang nagtutubo an ira anak ha pagkaadulto nga ira maipapasigarbo. An mga katuigan puno hin buruhaton—pagbansay, pagtutdo, ngan pagdisiplina—ini ngatanan basi magkaada maopay nga resulta. Ha pariho nga paagi, kita nga naruruyag paghulat kan Jehova nalilipay ha pagbulig ha iba nga magin duok ha Iya. Karuyag liwat naton makarawat an pag-uyon han Dios ngan, ha kataposan, maluwas.

Diri Nawawad-an hin Paglaom

An paghulat kan Jehova nangangahulogan hin padayon nga paghigugma ngan pag-alagad ha iya nga diri nawawad-an hin paglaom. Mahimo ini magin ayat. Damu han surugoon han Dios yana an naukoy ha mga komunidad diin gintatamay han mga tawo an bisan hin-o nga nagkikinabuhi nga nagtotoo ha mga saad han Dios. Kondi, tagda an susbaranan han magtinumanon nga Israelita nga nagpabilin nga naglalaom durante han 70 ka tuig nga pagin bihag ha Babilonya. Ano an nakabulig ha ira nga mabuhat ito? Waray ruhaduha nga nakaparig-on ha ira an pagbinasa han mga salmo. An usa nga makaparig-on nga salmo nga posible nahisurat na hito nga panahon nasiring: “Ha iya pulong naglalaom ako. An akon kalag naghuhulat han Ginoo labi pa hadton mga nagbabantay han kaagahon; oo, kapin pa hadton mga naghuhulat han kaagahon. O Israel, paglaom kan Jehova.”—Salmo 130:5-7.

An mga Judio nga nagtipig han ira paglaom nga buhi pinaagi ha pagbasa ngan pagyakan hito ginbendisyonan han nabihag an Babilonya ha kaurhian. Nagbiyahe dayon an yinukot nga matinumanon nga Judio ngadto ha Jerusalem. May kalabotan hito nga panahon, ini an nahisurat: “Han pagbalikan ni Jehova hadton mga nag-uli ngadto ha Sion, . . . an aton baba napuno han katatawa.” (Salmo 126:1, 2) Waray mawad-i hin paglaom adto nga mga Judio, kondi padayon nga ginparig-on nira an ira pagtoo. Ngan waray hira umundang ha pagkanta hin pagdayaw kan Jehova.

Ha pariho nga paagi, an totoo nga mga Kristiano nga naghuhulat ha Dios durante ha “kataposan” han sistema nangangalimbasog pirme nga matipigan nga buhi an ira pagtoo. Nag-aaram hira han Pulong han Dios, nagdidinasigay, ngan padayon nga nagdadayaw kan Jehova pinaagi ha pagsangyaw han maopay nga sumat han iya Ginhadian.—Mateo 24:3, 14.

Naghuhulat Basi Magpahimulos ha Disiplina

Hi propeta Jeremias nagsurat: “Maopay nga an tawo maglalaom ngan ha mahilumon maghuhulat han [pagluwas] ni Jehova.” (Pagtangis 3:26) Karuyag sidngon ni Jeremias nga maopay para ha katawohan ni Jehova nga  diri magreklamo ha paagi han Iya pagdisiplina ha ira han gintugotan niya nga mabungkag an Jerusalem. Lugod, sadang hira magpahimulos tikang hito nga eksperyensya pinaagi ha pagpamalandong han ira pagtalapas ngan han ira panginahanglan ha pagbag-o hin disposisyon.—Pagtangis 3:40, 42.

An paagi han pagdisiplina ni Jehova ha aton mahimo ipariho ha paghinog han prutas. May kalabotan ha disiplina han Dios, an Biblia nasiring: “Maghahatag ito hin bunga nga makigdaiton ngadto ha mga nanhiara hito, nga amo an bunga han katadongan.” (Hebreo 12:11) Sugad la nga an prutas nagkikinahanglan hin panahon basi mahinog, nagkikinahanglan liwat kita hin panahon basi bag-ohon an aton mga disposisyon ha pagsunod ha pagbansay nga igintatagana han Dios. Pananglitan, kon mawara an aton pipira nga pribilehiyo ha kongregasyon tungod han aton sayop nga paggawi, an aton pagkadisidido ha paghulat ha Dios magpupugong ha aton nga manluya ngan umundang. Ha sugad nga mga kahimtang, an giniyahan nga mga pulong ni David nakakapadasig: “Iton [kanan Dios] kasina uusa la kadali; an iya grasya aada ha bug-os nga kinabuhi han tawo: an pagtangis mahagos ha usa ka gab-i, kondi an kalipayan naabot ha aga.” (Salmo 30:5) Kon aton kultibaron an naghuhulat nga disposisyon ngan iaplikar an sagdon nga aton nakakarawat ha Pulong han Dios ngan ha iya organisasyon, maabot an panahon han aton “kalipayan.”

Nagkikinahanglan hin Panahon an Pagin Hamtong

Kon batan-on ka ngan bag-o la nga nabawtismohan, bangin maikag ka ha pagkaada mga responsabilidad ha kongregasyon. Kondi ginkikinahanglan an panahon basi makultibar an pagin hamtong ha espirituwal nga kinahanglanon basi magin responsable an usa. Salit, pahimulusi an imo pagkabatan-on basi mag-uswag ha espirituwal. Pananglitan, an pagkabatan-on maopay nga panahon ha pagbasa han bug-os nga Biblia, ha pagpatubo han Kristiano nga mga kalidad, ngan ha pag-aram han kaabtik ha paghimo hin mga disipulo. (Eklesiastes 12:1) Kon mapainubsanon nga ipinapakita mo an naghuhulat nga disposisyon, maabot an panahon nga tatagan ka ni Jehova hin dugang nga responsabilidad.

Nagkikinahanglan liwat hin pagpailob an paghimo hin disipulo nga buruhaton. Sugad la nga kinahanglan padayon nga bisibisan han parauma an liso tubtob nga patuboon ito han Dios, pariho liwat hito an buruhaton ha paghimo hin mga disipulo. (1 Korinto 3:7; Jakobo 5:7) An pagkultibar hin pagtoo ngan apresasyon kan Jehova ha kasingkasing han iba nga mga tawo nagkikinahanglan hin mga bulan o tuig pa ngani hin mapailubon nga pagdumara hin pag-aram ha Biblia. An paghulat kan Jehova nagkikinahanglan hin pagkamapinadayunon, bisan kon ha siyahan, diri nagios an mga estudyante ha ira nahibabaroan. Kon nagpapakita hira hin bisan gutiay la nga apresasyon, bangin tigaman ito nga nagios hira uyon ha espiritu ni Jehova. Pinaagi ha pagpailob, posible nga malilipay ka ha pagkita nga ginpapauswag ni Jehova an imo estudyante ha pagin disipulo ni Kristo.—Mateo 28:20.

Pagpahayag hin Gugma Pinaagi ha Paghulat

An usa nga ehemplo kon paonan-o mahimo magin kapahayagan hin gugma ngan pagsarig an paghulat amo an kahimtang han usa nga lagas nga babaye nga naukoy ha disyerto nga dapit han Andes, ha Amerika del Sur. Hiya ngan an usa nga bugto nga babaye la an mga Saksi ni Jehova ha ira baryo. Nahahanduraw mo ba an ira daku nga kaikag ha pagbisita hin mga igkasi Kristiano? Ha usa ka higayon, usa nga nagbibiyahe nga paramangno an nawara durante han iya siyahan nga pagbisita ha ira. Kinahanglan niya balikon an iya inagian ngan nalangan hin pipira ka oras. Kaagahon na han nakita niya an baryo ha hirayo. Tungod kay waray koryente didto, nahipausa hiya ha pakakita hin hayag hin suga. Nalipay gud hiya han inabot hiya ha baryo ngan nakita nga an suga tikang ha de-lana nga lampara nga gin-aalsa han lagas! Sigurado an lagas nga maabot an paramangno, salit naghulat hiya.

Nalilipay kita ha paghulat kan Jehova nga may-ada pariho nga pagpailob. Sigurado kita nga tutumanon niya an iya mga saad. Ngan pariho ha nagbibiyahe nga paramangno, nalilipay kita ha mga tawo nga mahigugmaon nga naghuhulat ha aton. Salit, diri urusahon nga nalilipay an Dios ha mga naghuhulat ha iya. An Biblia nasiring: “Hi Jehova nagmamalipay . . . ha ira nga naglalaom ha iya mahigugmaon nga kalooy.”—Salmo 147:11.

[Retrato ha pahina 18]

An katawohan nga sagipo ha pagdayaw kan Jehova nalilipay ha paghulat ha Iya