Pagdayawon Naton Ngatanan an Ngaran ni Jehova

“O padakuon niyo hi Jehova upod ha akon, ngan pagdayegon naton ngatanan an iya ngaran.”—SALMO 34:3.

1. Ano nga maopay nga susbaranan an ipinakita ni Jesus durante han iya ministeryo ha tuna?

 HA GAB-I han Nisan 14, 33 K.P., nagkanta hi Jesus ngan an iya mga apostol hin mga pagdayaw kan Jehova ha igbaw nga kwarto han usa nga balay ha Jerusalem. (Mateo 26:30) Ito an ultimo nga panahon nga bubuhaton ito ni Jesus upod an iya mga apostol. Kondi, angayan nga tapuson niya an iya pakigkatirok ha ira hito nga paagi. Tikang ha tinikangan han ministeryo ni Jesus ha tuna tubtob ha kataposan, gindayaw niya an iya Amay ngan madasigon nga iginpakilala an Iya ngaran. (Mateo 4:10; 6:9; 22:37, 38; Juan 12:28; 17:6) Hito nga paagi, iya gin-utro an makalilipay nga imbitasyon han salmista: “O padakuon niyo hi Jehova upod ha akon, ngan pagdayegon naton ngatanan an iya ngaran.” (Salmo 34:3) Pagkamaopay nga susbaranan nga angay sundon naton!

2, 3. (a) Kay ano nga masisiring naton nga an Salmo 34 may-ada matagnaon nga kahulogan? (b) Ano an aton paghihisgotan hini nga artikulo ngan ha masunod?

² Mga pipira ka oras katapos magkanta hin mga pagdayaw upod ni Jesus, hinkit-an ni apostol Juan an naiiba gud nga hitabo. Iya hinkit-an nga an iya Agaron ngan an duha nga kriminal ginpatay ha pasakitan nga kahoy. Ginbari han Romano nga mga sundalo an mga bitiis han duha nga kriminal basi mamatay dayon. Kondi, siring ni Juan nga waray hira magbari han mga bitiis ni Jesus. Patay na hi Jesus han dinaop ha iya an mga sundalo. Ha Ebanghelyo ni Juan, ipinakita niya nga katumanan ito han usa pa nga bahin han Salmo 34: “Waray usa nga tul-an niya nga mababari.”—Juan 19:32-36; Salmo 34:20, Septuagint.

³ An Salmo 34 may-ada damu pa nga punto nga makapainteres ha mga Kristiano. Salit, hini nga artikulo ngan ha masunod, aton rirepasuhon an mga kahimtang ni David han iya iginsurat an salmo ngan katapos, aton paghihisgotan an makapadasig nga mga sulod han salmo mismo.

An Pagpalagiw ni David Tikang kan Saul

4. (a) Kay ano nga gindihogan hi David sugad nga tidaraon nga hadi han Israel? (b) Kay ano nga ‘ginhigugma’ hinduro ni Saul hi David?

⁴ Han batan-on hi David, hi Saul an hadi ha Israel. Kondi, hi Saul nagin matinalapason ngan nawara an pag-uyon ni Jehova ha iya. Tungod hito, hi propeta Samuel nagsiring ha iya: “Linaknit ni Jehova an ginhadian ha Israel tikang ha imo hini nga adlaw, ngan ihinatag niya ini ha imo hirani, nga maoroopay kay ha imo.” (1 Samuel 15:28) Katapos, ginsugo ni Jehova hi Samuel nga dihogan hi David, an gimanghuri nga anak ni Jesse, nga magin sunod nga hadi han Israel. Hito nga panahon, hi Hadi Saul nga nawad-an han espiritu han Dios, agsob magin masurub-on hinduro. Hi David, nga maopay gud nga musikero, ginpakadto ha Gibea basi magserbi ha hadi, ngan an musika ni David nakaliaw kan Saul, nga tungod hito hiya “nahigugma ha iya hin daku.”—1 Samuel 16:11, 13, 21, 23.

5. Kay ano nga nabag-o an disposisyon ni Saul kan David, ngan napiritan hi David nga buhaton an ano?

⁵ Samtang nalabay an panahon, nagin matin-aw nga hi Jehova kaupod ni David. Binuligan hiya ni Jehova nga magdaog ha Pilisteohanon nga higante nga hi Goliat ngan sinuportahan hiya han ginpasidunggan hiya ha Israel tungod han iya kaabtik ha pakig-away. Kondi, nangabugho hi Saul tungod ha bendisyon ni Jehova kan David, ngan nangalas hiya ha iya. Samtang nagtutokar hi David han iya arpa ha atubangan ni Saul, duha ka beses nga iya ginbangkaw hi David. Hito nga duha nga hitabo, nalikyan ni David an bangkaw. Han nangalimbasog hi Saul ha pag-iparatay ha iya ha ikatulo ka beses, nasantop ni David nga kinahanglan  pumalagiw na hiya. Ha kataposan, tungod han padayon nga pangalimbasog ni Saul ha pagdakop ngan pagpatay kan David, nagdesisyon hiya nga umayop ha gawas han teritoryo han Israel.—1 Samuel 18:11; 19:9, 10.

6. Kay ano nga nagsugo hi Saul nga pamatayon an mga umurukoy ha Nob?

⁶ Han tipakadto na hi David ha giutan han Israel, inagi hiya ha syudad han Nob, nga hinmumutangan han tabernakulo ni Jehova. Matin-aw, ha pagpalagiw ni David, inupdan hiya han batan-on nga kalalakin-an, ngan nagbiling hiya hin pagkaon para ha ira ngatanan. Hinbaroan ni Saul nga an hitaas nga saserdote naghatag kan David ngan ha iya mga tawohan hin pagkaon ngan espada nga ginkuha ni David tikang ha patay nga hi Goliat. Nasina hinduro hi Saul ngan nagsugo nga pamatayon an ngatanan nga umurukoy han syudad, upod na an 85 nga saserdote.—1 Samuel 21:1, 2; 22:12, 13, 18, 19; Mateo 12:3, 4.

Natalwas na Liwat ha Kamatayon

7. Kay ano nga an Gat diri talwas nga lugar nga matatagoan ni David?

⁷ Tikang ha Nob, pinalagiw hi David hin mga 40 kilometro tipaweste ngadto ha teritoryo han Pilistia ngan inayop kan Hadi Akis ha Gat, an natawohan nga bungto ni Goliat. Bangin naghunahuna hi David nga diri gud hiya bibilngon ni Saul ha Gat. Kondi, nakilala dayon hiya han mga surugoon han hadi han Gat. Han hinbatian ni David nga nakilala hiya, hiya “nahadlok hinduro kan Akis an hadi ha Gat.”—1 Samuel 21:10-12.

8. (a) Ano an iginsusumat ha aton han Salmo 56 mahitungod han eksperyensya ni David ha Gat? (b) Paonan-o nakatalwas hi David ha kamatayon?

⁸ Salit gindakop han mga Pilisteohanon hi David. Bangin hini nga panahon ginkomposo ni David an kinasingkasing nga salmo diin nakimalooy hiya kan Jehova: “Ibutang nimo an akon mga luha ngadto ha imo botilya.” (Salmo 56:8 ngan superskripsyon) Iginpahayag niya an iya pagsarig nga diri hingangalimtan ni Jehova an iya kasubo kondi mahigugmaon nga magmamangno ngan magpapanalipod ha iya. Naghimo liwat hi David hin estratihiya ha paglansi ha Pilisteohanon nga hadi. Ginios hiya sugad hin lurong. Han nakita ini ni Hadi Akis, iya ginsaway an iya mga surugoon tungod ha pagdara hin “buang” nga tawo ha iya atubangan. Matin-aw nga ginbendisyonan ni  Jehova an estratihiya ni David. Ginpabaya hi David ha syudad, salit nakatalwas na liwat hiya ha kamatayon.—1 Samuel 21:13-15.

9, 10. Kay ano nga iginsurat ni David an Salmo 34, ngan hin-o an bangin nahunahuna niya han ginkomposo niya an salmo?

⁹ An Biblia diri nagsasaysay kon an mga nasuporta kan David pinalagiw ngadto ha Gat upod niya o nagbantay ha iya ha kahirani nga mga baryo ha Israel. Anoman an kahimtang, sigurado nga malipayon nga pagkirita utro ito han iginsumat ha ira ni David kon paonan-o ginluwas na liwat hiya ni Jehova. Ito nga hitabo amo an nagin basihan han Salmo 34, sugad han ipinapakita han superskripsyon. Ha siyahan nga pito nga bersikulo hini nga salmo, gindadayaw ni David an Dios tungod ha pagluwas ha iya ngan gin-aaghat an mga nasuporta ha iya nga umupod ha iya ha pagdayaw kan Jehova sugad nga Harangdon nga Manluluwas han Iya katawohan.—Salmo 34:3, 4, 7.

¹⁰ Hi David ngan an iya mga tawohan nag-ukoy nga talwas ha lungib han Adulam ha kabukiran han Israel, mga 15 kilometro ha este han Gat. An mga Israelita nga diri na tagbaw ha mga kahimtang ilarom han pagmando ni Hadi Saul nagkaabot didto ngan inupod ha ira. (1 Samuel 22:1, 2) Han ginkomposo ni David an mga pulong han Salmo 34:8-22, bangin hira an nahunahuna niya. An mga pahinumdom hito nga mga bersikulo importante liwat para ha aton yana, ngan sigurado nga mapulsanon ha aton an detalyado nga paghisgot hinin makaruruyag nga salmo.

An Imo ba Pinakaimportante nga Hingyap Pariho han kan David?

11, 12. Ano an aton mga hinungdan nga pagdayawon pirme hi Jehova?

¹¹ “Pagbibendisyonan ko hi Jehova ha ngatanan nga takna: an iya pagdayaw mamaada ha akon baba ha dayoday.” (Salmo 34:1) Tungod ha pagkinabuhi sugad nga isinalikway, sigurado nga damu an nabarak-an ni David may kalabotan ha materyal nga panginahanglan, kondi sugad han ipinapakita hini nga mga pulong, waray niya tuguti an iya adlaw-adlaw nga kabaraka nga magwara han iya determinasyon ha pagdayaw kan Jehova. Pagkamaopay nga susbaranan para ha aton kon nakakaeksperyensya kita hin mga kakurian! Ha eskwelahan man kita, ha trabaho, kaupod han mga igkasi-Kristiano, o ha ministeryo ha publiko, an pagdayaw kan Jehova amo an sadang magin pinakaimportante nga hingyap naton. Hunahunaa la an aton damu nga hinungdan nga buhaton ito! Pananglitan, waray kataposan an makaruruyag nga mga butang nga aton hibabaroan ha urusahon nga mga linarang ni Jehova. Ngan tagda an iya nahihimo pinaagi han tunan-on nga bahin han iya organisasyon! Ginagamit ni Jehova an matinumanon nga mga tawo ha daku nga paagi ha moderno nga mga panahon bisan kon hira diri-hingpit. Ano an masisiring mahitungod hini ngatanan kon itanding ha mga binuhat han mga tawo nga gin-iidolo han kalibotan? Diri ka ba nauyon kan David, nga nagsurat liwat: “Ha ngatanan nga mga dios waray sugad ha imo, O Ginoo; bisan ngani waray mga buhat sugad han imo, mga buhat?”—Salmo 86:8.

¹² Pariho kan David, napapagios kita nga magdayaw pirme kan Jehova tungod han iya diri-matupngan nga mga binuhat. Dugang pa, nalilipay kita nga mahibaro nga kinarawat na han permanente nga Manurunod ni David, hi Jesu-Kristo, an Ginhadian han Dios. (Pahayag 11:15) Nangangahulogan ini nga hirani na an kataposan hini nga sistema han mga butang. Namimeligro an waray kataposan nga tidaraon han sobra unom ka bilyon nga tawo. Mas apurado gud yana kay ha kakan-o pa man nga masumatan an iba mahitungod han Ginhadian han Dios ngan kon ano an pagbubuhaton hito para ha katawohan ha diri na maiha ngan buligan hira nga umupod ha aton ha pagdayaw kan Jehova. Sigurado nga sadang magin prayoridad naton ha kinabuhi an paggamit han tagsa nga higayon ha pagdasig ha iba nga karawaton inin “maopay nga sumat” samtang may panahon pa.—Mateo 24:14.

13. (a) Hin-o an iginhambog ni David, ngan ano nga klase hin mga tawo an ginios uyon hito? (b) Ano an nakakadani han mga maaghop ha Kristiano nga kongregasyon yana?

¹³ “An akon kalag magmamalipay gud kan Jehova: an mga maaghop makakabati dida hiton, ngan magkakalilipay hira.” (Salmo 34:2) Waray ighambog ni David dinhi an anoman nga iya nahimo. Pananglitan, waray niya ighambog an paagi han iya paglansi ha hadi han Gat. Maaram hiya nga  ginpanalipdan hiya ni Jehova han nakadto hiya ha Gat ngan nakatalwas hiya tungod han bulig ni Jehova. (Proberbios 21:1) Salit, iginhambog ni David, diri an iya kalugaringon, kondi hi Jehova. Tungod hini, an mga maaghop naaghat nga magpahirani kan Jehova. Hi Jesus nagdayaw liwat han ngaran ni Jehova, ngan tungod hini an mga mapainubsanon ngan masayon tutdoan nga mga tawo nagpahirani ha Iya. Yana, an mga maaghop ha ngatanan nga nasud nadadani ha internasyonal nga kongregasyon han dinihogan nga mga Kristiano, nga hi Jesus amo an Ulo. (Kolosas 1:18) An mga kasingkasing han sugad nga mga maaghop napapagios kon nababatian nira nga ginhihimaya an ngaran han Dios hinin mapainubsanon nga mga surugoon ngan kon nababatian nira an mensahe han Biblia, nga nasasabtan nira pinaagi han bulig han baraan nga espiritu han Dios.—Juan 6:44; Buhat 16:14.

An Kristiano nga mga Katirok Nagpaparig-on han Aton Pagtoo

14. (a) Kontento ba hi David ha pagdayaw kan Jehova ha pribado la? (b) Ano nga susbaranan an ipinakita ni Jesus may kalabotan ha mga katirok ha pagsingba?

¹⁴ “O padakuon niyo hi Jehova upod ha akon, ngan pagdayegon naton ngatanan an iya ngaran.” (Salmo 34:3) Diri kontento hi David ha pagdayaw kan Jehova ha pribado la. Mahigugmaon nga gin-aghat niya an iya mga kaupod nga umupod ha iya ha pagdayaw han ngaran han Dios. Ha sugad man nga paagi, hi Jesu-Kristo, an mas Harangdon nga David, nalipay ha pagdayaw kan Jehova ha publiko—ha lokal nga sinagoga, ha mga pyesta ha templo han Dios ha Jerusalem, ngan upod han iya mga sumurunod. (Lukas 2:49; 4:16-19; 10:21; Juan 18:20) Makalilipay gud nga pribilehiyo an pagsunod ha susbaranan ni Jesus ha pagdayaw kan Jehova ha tagsa nga higayon kaupod han mga igkasi-tumuroo, labi na yana samtang aton “gintatan-aw nga an adlaw nagtitikahirani na”!—Hebreo 10:24, 25.

15. (a) Ano an epekto han eksperyensya ni David ha iya mga tawohan? (b) Ano an mga kapulsanan para ha aton han pagtambong ha aton mga katirok?

¹⁵ “Pinamiling nakon hi Jehova, ngan hiya binaton ha akon, ngan binawi ako tikang dida ha ngatanan nakon nga mga kahadlok.” (Salmo 34:4) Importante kan David ini nga eksperyensya. Salit, nagpadayon hiya ha pagsiring: “Ini nga kablasanon nga tawo nagsinggit, ngan hi Jehova nakabati ha iya, ngan ginluwas hiya han ngatanan niya nga mga kasakitan.” (Salmo 34:6) Kon nakikig-upod ha mga igkasi-tumuroo, damu an aton higayon nga mag-istorya hin makaparig-on nga mga eksperyensya kon paonan-o binuligan kita ni Jehova nga makailob ha makuri nga mga kahimtang. Nagpaparig-on ini han pagtoo han aton mga igkasi-tumuroo, sugad la nga ginparig-on han mga  pulong ni David an pagtoo han mga nasuporta ha iya. Ha kahimtang ni David, an iya mga kaupod “naniplat . . . ngadto [kan Jehova], ngan hira nalamragan; ngan an ira mga bayhon diri gud magkakaalohan.” (Salmo 34:5) Bisan kon napalagiw hira tikang kan Hadi Saul, waray hira maawod. Nasarig hira nga an Dios nabulig kan David, ngan malamrag, o malipayon, an ira mga bayhon. Ha pariho nga paagi, an bag-ohan nga mga interesado sugad man adton maiha na nga totoo nga mga Kristiano nasarig ha bulig ni Jehova. Tungod kay naeksperyensyahan nira an iya bulig, an ira malamrag o malipayon nga mga bayhon nagpapakita han ira determinasyon nga magpabilin nga matinumanon.

Magin Mapasalamaton ha Bulig han mga Anghel

16. Paonan-o ginagamit ni Jehova an iya mga anghel ha pagbulig ha aton?

¹⁶ “An anghel ni Jehova nakada hin paglibot hadton mga nagkakahadlok ha iya, ngan iya ginbabawi hira.” (Salmo 34:7) Waray hunahunaa ni David nga hiya la an mahimo luwason ni Jehova. Totoo, hi David an dinihogan nga hadi ni Jehova, an tidaraon nga hadi han Israel; kondi maaram hiya nga ginagamit ni Jehova an iya mga anghel ha pagbantay ha ngatanan nga iya matinumanon nga mga magsiringba, prominente man hira o ordinaryo. Ha aton moderno nga panahon, an totoo nga mga magsiringba nakakaeksperyensya liwat han panalipod ni Jehova. Ha Nazi nga Alemanya—sugad man ha Angola, Malawi, Mozambique, ngan ha damu pa nga katunaan—an mga awtoridad nangampanya ha pangalimbasog nga poohon an mga Saksi ni Jehova. Napakyas an ira mga pangalimbasog. Lugod, an katawohan ni Jehova hiton nga katunaan nagpapadayon ha pag-uswag samtang gindadayaw nira ngatanan an ngaran han Dios. Kay ano? Tungod kay ginagamit ni Jehova an iya baraan nga mga anghel ha pagpanalipod ngan paggiya ha iya katawohan.—Hebreo 1:14.

17. Ha ano nga mga paagi binubuligan kita han mga anghel han Dios?

¹⁷ Dugang pa, an mga anghel ni Jehova may-ada gahum ha pagsiguro nga bisan hin-o nga nakakapakdol ha iba paiiwason tikang ha katawohan ni Jehova. (Mateo 13:41; 18:6, 10) Ngan bisan kon bangin hito nga panahon diri kita maaram hito, ginkukuha han mga anghel an mga nakakaulang ha aton pag-alagad ha Dios, ngan nagpapanalipod hira ha aton tikang ha mga butang nga mahimo makadaot han aton relasyon kan Jehova. Labaw ha ngatanan, naggigiya hira ha aton ha buruhaton nga pagsangyaw han “waray kataposan nga maopay nga sumat” ha ngatanan nga katawohan, upod na an aadto ha mga lugar diin ginbubuhat an pagsangyaw nga buruhaton ha peligroso nga mga kahimtang. (Pahayag 14:6) An proyba han bulig han mga anghel agsob nga iginsasaysay ha mga literatura han Biblia nga iginpublikar han mga Saksi ni Jehova. a Damu hinduro an sugad nga mga eksperyensya salit diri masisiring nga nahituman la ito.

18. (a) Ano an ginkikinahanglan ha aton basi magpahimulos kita han bulig han mga anghel? (b) Ano an paghihisgotan ha masunod nga artikulo?

¹⁸ Basi padayon nga magpahimulos han giya ngan panalipod han mga anghel, kinahanglan magpadayon kita ha pagdayaw han ngaran ni Jehova bisan pa han pagkontra. Hinumdumi, an anghel han Dios nagkakampo ha palibot la “hadton mga nagkakahadlok [kan Jehova].” Ano an iginpapasabot hito? Ano an kahadlok ha Dios, ngan paonan-o naton mapapatubo ito? Kay ano nga karuyag han aton mahigugmaon nga Dios nga mahadlok kita ha iya? Ini nga mga pakiana paghihisgotan ha masunod nga artikulo.

[Footnote]

Ano an Imo Baton?

• Ano nga mga kakurian an gin-ilob ni David sugad nga batan-on?

• Pariho kan David, ano an aton pinakaimportante nga hingyap?

• Ano an aton pagtagad ha aton Kristiano nga mga katirok?

• Paonan-o ginagamit ni Jehova an iya mga anghel ha pagbulig ha aton?

[Mga Pakiana]

[Mapa ha pahina 21]

(Para ha aktuwal nga format, kitaa an publikasyon)

Rama

Gat

Siklag

Gibea

Nob

Jerusalem

Betlehem

Adulam

Keila

Hebron

Sip

Hores

Karmel

Maon

En-gedi

Dagat nga Asin

[Ginkuhaan han Retrato]

Mapa: Iginbasar ha mga mapa nga gintatag-iya han Pictorial Archive (Near Eastern History) Est. and Survey of Israel

[Retrato ha pahina 21]

Bisan han puga hi David, iya gindayaw an ngaran ni Jehova

[Retrato ha pahina 23]

Napaparig-on an aton pagtoo samtang namamati kita ha makaparig-on nga mga eksperyensya nga iginsasaysay ha aton Kristiano nga mga katirok