An Pag-abot ni Kristo—Kon Ano an Magigin Resulta Hito

“MAKANGINGIRHAT NGA KRIMEN HA SÃO PAULO.” Sugad hito iginhulagway han Veja nga magasin an upat ka adlaw han Mayo 2006, han “ginpaluya” han organisado nga krimen an pinakahaluag ngan pinakariko nga syudad ha Brazil. Mga 150 nga opisyal nga nagpapatuman han balaud, mga kriminal, ngan mga sibilyan an namatay durante han “sobra 100 ka oras nga krimen.”

Nangunguna nga mga sumat an kamadarahog ha haros ngatanan nga bahin han tuna. Baga hin diri ito napupugngan han tawhanon nga mga lider. Yana, an aton kalibotan baga hin nagtitikapeligroso pag-ukyan. Bangin manluya ka tungod kay bisan diin ka sumiplat, damu hinduro an karaotan. Kondi, hirani na an panahon ha pagbag-o.

Gintutdoan ni Jesus an iya mga sumurunod nga ig-ampo an pag-abot han Ginhadian han Dios ngan an katumanan han Iya kaburut-on, “ha langit, amo man ha tuna.” (Mateo 6:9, 10) Ini nga Ginhadian usa nga gobyerno nga hi Kristo Jesus an Hadi nga pinili han Dios. Susulbaron hito an ngatanan nga problema han katawohan. Kondi, basi matuman an mga pagbag-o ha tuna pinaagi han Ginhadian han Dios, an pagmando han tawo kinahanglan saliwnan han pagmando ni Kristo. Ini gud an ipapahinabo han pag-abot ni Kristo.

Magigin Mamurayawon Ba Ito nga Pagbag-o?

Mamurayawon ba nga magpapasakop an mga nasud ha pagmando ni Kristo? Mababaton ini han usa nga bisyon nga iginpakita kan apostol Juan. Hiya nagsiring: “Hinkit-an ko an mananap [an politikal nga sistema han kalibotan], ngan an mga kahadian ha tuna, ngan an ira mga kasundalohan, nga natirok ha pakig-away kontra hadton nangangabayo [Jesus], ngan kontra ha iya kasundalohan.” (Pahayag 19:19) Ano an mahitatabo ha mga hadi ha tuna durante hini nga girra? An Hadi nga gindihogan ni Jehova ‘magguguba ha ira pinaagi hin puthaw nga sungkod; iya pagtitipiktipikon hira sugad hin daba,’ siring han Biblia. (Salmo 2:9) Bug-os nga bubungkagon an sistema han politika. An Ginhadian han Dios “magpipinit-pinit ngan mag-aanaw hini ngatanan nga ginhadian [han tawo], ngan ini matindog ha kadayonan.”—Daniel 2:44.

Kumusta man an mga tawo nga nakontra ha Ginhadian han Dios? ‘Ha pagpahayag han Ginoo nga hi Jesus tikang ha langit upod an iya gamhanan nga mga anghel ha naglalaga nga kalayo,’ iginhuhulagway hi Jesus sugad nga usa nga ‘naghatag  hin bulos ha mga waray kumilala ha Dios ngan ha waray pagtuman han maopay nga sumat.’ (2 Tesalonika 1:7, 8) “Kondi,” siring han Proberbios 2:22, “an magraot paghihinginlan tikang ha tuna. Ngan an mga malingoon pagrarabuton tikang dida.”

May kalabotan ha pag-abot ni Kristo, an Biblia nasiring: “Kitaa, makanhi hiya upod ha mga dampog; ngan an ngatanan nga mga mata makita ha iya.” (Pahayag 1:7) Diri hiya literal nga makikita han mga tawo. Tikang han pagsaka ni Jesus ha langit, hiya nagin espiritu nga persona nga “nag-uukoy ha kalamrag nga diri gud sadang hiranian; nga waray bisan hin-o nga tawo nga nakakita, bisan sadang makakita.”—1 Timoteo 6:16.

Diri kinahanglan nga magkaada pisikal nga lawas hi Jesus basi ‘makita’ han mga naukoy ha tuna sugad la nga hi Jehova diri kinahanglan nga literal nga magpakita han iya ginpahinabo an Napulo nga Peste ha mga taga-Ehipto ha panahon ni Moises. An mga tawo hito nga panahon sigurado nga hi Jehova an nagpapahinabo han mga peste, ngan napiritan hira ha pagkilala han iya awtoridad. (Eksodo 12:31) Ha pariho nga paagi, han gumios hi Kristo sugad nga an Parapamatay nga sinugo han Dios, an mga magraot mapipiritan ha ‘pagkita,’ o pagkarawat, nga ginagamit han Dios hi Jesus ha paghukom ha ira. Mahibabaro hira hini tungod kay ginpahibaro na nga daan an katawohan. Oo, “an ngatanan nga mga mata makita [kan Jesus], ngan hira nga nagbuno ha iya; ngan an ngatanan nga mga panon ha tuna masasakit tungod ha iya.”—Pahayag 1:7.

Kinahanglan mabungkag an magraot ngan mawara an maraot nga pagmando antes an totoo nga kamurayawan ngan kauswagan maipahiuli ha tuna. Tutumanon ito ni Kristo. Katapos, hiya an bug-os nga magdudumara han ngatanan nga buruhaton ha tuna, ngan magkakaada daku hinduro nga mga pagbag-o.

An Pagpahiuli nga Mag-opay an mga Resulta

Naghisgot hi apostol Pedro mahitungod han ‘pagpahiuli han ngatanan nga bagay nga kanan Dios iginyakan ha baba han iya baraan nga mga manaragna tikang ha tinikangan.’ (Buhat 3:21) Ini nga pagpahiuli nag-uupod han pagbag-o nga mahitatabo dinhi ha tuna durante han pagmando ni Kristo. Usa han mga propeta nga gin-istoryahan han Dios mahitungod han ‘pagpahiuli han ngatanan nga bagay’ ha tuna amo hi propeta Isaias, han ikawalo ka siglo A.K.P. Iya igintagna nga an kamurayawan ha tuna ipapahiuli ni Jesu-Kristo, an ‘Prinsipe han Pagdait.’ May kalabotan ha pagmando ni Kristo, an tagna ni Isaias nasiring: “Mawawaray kataposan an pagtubo han iya kagamhanan ngan han pagdait.” (Isaias 9:6, 7) Tututdoan ni Jesus an katawohan ha tuna nga magkinabuhi ha mamurayawon nga paagi. An mga maukoy ha tuna ‘maglilipay tungod han kahuraan han kamurayaw.’—Salmo 37:11.

Ilarom han pagmando ni Kristo, ano an mahitatabo ha kapobrehan ngan kagutom? Hi Isaias nagsiring: “Dida hini nga bukid hihimoon ni Jehova han mga kasundalohan ngada ha ngatanan nga mga katawohan an usa nga pyesta han magtambok nga mga butang, an pyesta han mga alaksiw ha mga lagod, han magtambok nga mga butang nga puno hin utok, han mga alaksiw nga pinatin-aw hin maopay ha bawbaw han lagod.” (Isaias 25:6) An salmista nagkanta: “Magkakaada kahuraan hin lugas ha tuna ha bawbaw han mga bukid.” (Salmo 72:16) Dugang pa, may kalabotan ha mga umurukoy ha tuna, aton mababasa: “Hira magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini. Diri hira magtutukod, ngan an iba an maukoy; diri hira magtatanom, ngan an iba an makaon: kay masusugad han mga adlaw han usa nga kahoy an mga adlaw han akon katawohan, ngan an akon mga pinili ha maihaan magpapahimulos han buhat han ira mga kamot.”—Isaias 65:21, 22.

Igintagna liwat ni Isaias nga mawawara na an sakit ngan kamatayon. Pinaagi kan Isaias, an Dios nagsiring: “Dida hito an mga mata han buta pangangabrihon, ngan an mga talinga han mga bungol pangunguhaan han sarop. Dida hito an tawo nga piol malukso sugad hin bugsok, ngan an dila han ngula magkakanta.” (Isaias 35:5, 6) Hito nga panahon waray na ‘umurukoy nga masiring: Ako masakit.’ (Isaias 33:24) ‘Lalamuyon han Dios ha kadayonan an kamatayon; ngan  papahiron han Ginoo nga hi Jehova an mga luha tikang ha ngatanan nga nawong.’—Isaias 25:8.

Kumusta man an ngatanan nga patay nga “aadto ha mga lubnganan”? (Juan 5:28, 29) Hi Isaias nagtagna: “An imo mga patay mabubuhi . . . mabangon.” (Isaias 26:19) Oo, mababanhaw an mga patay!

‘An Imo Lingkuranan nga Hadianon Waray Kataposan’

An pag-abot ni Kristo magriresulta ha bug-os nga pagpahiuli han planeta nga Tuna. An tuna magigin mahimayaon nga paraiso, ngan an katawohan magkakaurosa ha pagsingba ha totoo nga Dios. Makakasiguro ba kita nga maglalampos hi Jesu-Kristo ha pagwara han karaotan ha tuna ngan ha pagpahinabo han maopay nga mga kahimtang?

Tagda an gintikangan han gahum ngan awtoridad nga iginhatag kan Jesus. May kalabotan ha Anak, an Biblia nasiring: “An imo lingkuranan nga hadianon, O Dios, waray kataposan; ngan an setro han katadongan amo an setro han imo ginhadian. Ginhigugma mo an katadongan, ngan gindumtan mo an karaotan.” (Hebreo 1:8, 9) An trono ni Jesus, karuyag sidngon, an iya kagamhanan o awtoridad, tikang kan Jehova. An Dios an gintikangan ngan an humaratag hini. Waray makuri nga problema nga diri masusulbad ni Jesus.

Han kabanhaw ni Jesus, iya ginsidngan an iya mga disipulo: “Ngatanan nga kagamhanan iginhatag ha akon ha langit ngan ha tuna.” (Mateo 28:18) “An mga anghel, ngan mga kagamhanan ngan mga pagburut-an ginpasakop niya,” siring han 1 Pedro 3:22. Waray kagamhanan o awtoridad an maglalampos ha pagkontra kan Jesus. Waray makakapugong ha iya ha pagpahinabo hin permanente nga kaopayan para ha katawohan.

Paonan-o Makakaapekto ha mga Tawo an Pag-abot ni Kristo?

Ha surat ni apostol Pablo ha mga taga-Tesalonika, hiya nagsiring: “Ha atubangan han aton Dios ngan Amay nahinunumdom kami gihapon han iyo buhat ha pagtoo ngan kabudlay han paghigugma ngan pag-ilob han paglaom, ha aton Ginoo Jesu-Kristo.” (1 Tesalonika 1:3) Hi Pablo nasiring nga an mabungahon nga pangalimbasog ngan pag-antos resulta han paglaom kan Jesu-Kristo. Ito nga paglaom nag-uupod han pagtoo ha pag-abot ni Kristo ngan ha pahihinaboon hito nga pagpahiuli. An sugad nga paglaom makakabulig ha totoo nga mga Kristiano nga magpadayon, o makaantos, bisan ha magkuri hinduro nga kahimtang.

Pananglitan, han Agosto 2003, hinbaroan ni Carlos nga taga-São Paulo, Brazil, nga may-ada hiya kanser. Tikang hito nga panahon, walo ka beses na hiya naoperahan nga nagresulta hin maul-ol ngan nakakapaluya nga mga epekto. Kondi, nakakadasig pa gihapon hiya ha iba. Pananglitan, samtang nagsasangyaw hiya ha kalsada ha atubangan hin ospital, iginkita hiya hin usa nga Saksi ni Jehova, nga an bana nagpapa-chemotherapy. Tungod kay naeksperyensyahan na niya an nakakadaot nga mga epekto han kanser, nakadasig ngan nakaliaw gud hiya ha mag-asawa. Katapos han ira pag-istorya, an mag-asawa nagsiring nga nakadasig gud ito ha ira. Hito nga paagi, naeksperyensyahan ni Carlos an pagkatotoo han kan Pablo ginsiring: “Naglilipay [an Dios] ha aton ha ngatanan nga aton mga kagol-anan, basi nga sadang man kita makapaglipay ha ngatanan nga aada ha bisan ano nga kagol-anan, pinaagi han paglipay nga iginlipay ha aton han Dios.”—2 Korinto 1:4.

Ano an nakakabulig kan Carlos nga magkaada hin kusog basi makapadayon ha pagdasig ha iba bisan pa han iya sakit? An paglaom ha pag-abot ni Kristo ngan an ngatanan nga mahihimo hito nagpapagios kan Carlos nga padayon nga ‘buhaton an maopay.’—Galasia 6:9.

Tagda liwat an kahimtang ni Samuel, nga an manghod nga lalaki ginpatay mga 50 metros la an distansya ha ira balay. Napulo nga bala an nakaigo ha lawas han iya manghod. Ha sulod hin walo ka oras nakada la ha ligid han kalsada an patay samtang gin-iimbistigar han mga polis an krimen. Diri mahingalimtan ni Samuel an nahitabo hito nga adlaw. Kondi, nabuligan hiya han paglaom nga wawad-on ni Kristo ha tuna an ngatanan nga karaotan ngan an matadong nga pagmando nga masunod hito maghahatag hin mga bendisyon ha katawohan. Agsob mahanduraw ni Samuel  nga iya ginhahangkopan an iya nabanhaw nga manghod ha Paraiso nga tuna.—Buhat 24:15.

Ano an Kinahanglan Mo Buhaton?

Maliliaw ka gud ha paglaom han pag-abot ni Kristo ngan han ipapatuman hito. Sigurado nga susulbaron ni Jesu-Kristo an ngatanan nga gintikangan han mga problema han tawo ngan han karaotan nga naabot ha aton.

Ano an kinahanglan mo buhaton basi mapahimulosan an hura nga bendisyon ha katawohan pinaagi han pagmando ni Kristo? Pag-admi hin maopay an Pulong han Dios, an Biblia. Ha usa nga pag-ampo ni Jesus ha iya amay, hiya nagsiring: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.” (Juan 17:3) Himoa nga tumong an pag-usisa han igintututdo han Biblia. An mga Saksi ni Jehova ha iyo lugar malilipay ha pagbulig ha imo may kalabotan hini. Ginhahangyo ka gud namon nga makig-istorya ha ira o magsurat ha mga nagpublikar hini nga magasin.

[Mga Retrato ha pahina 7]

An pag-abot ni Kristo magriresulta ha bug-os nga pagpahiuli han tuna

[Ginkuhaan han Retrato]

Luyo han gutiay nga retrato: Rhino and Lion Park, Gauteng, South Africa