An Pag-abot ni Kristo—Sadang ba Naton Kahadlokan Ito?

ANO an imo nahahanduraw mahitungod han pag-abot ni Jesu-Kristo? Ginhuhunahuna mo ba ito sugad nga panahon han paghukom, kabungkagan, ngan sirot ha katawohan? O ginlalaoman mo ba nga pagwawad-on hito an ngatanan nga problema naton? Angay ba kahadlokan an pag-abot ni Kristo? O sadang ba naton pamulaton ito?

May kalabotan ha pag-abot ni Kristo, an Biblia nasiring: “Kitaa, makanhi hiya upod ha mga dampog; ngan an ngatanan nga mga mata makita ha iya, . . . ngan an ngatanan nga mga panon ha tuna masasakit tungod ha iya.” (Pahayag 1:7) Ini nga pag-abot nagtutudlok ha presensya ni Kristo ha tidaraon basi balosan an magtadong ngan sirotan an magraot.

Imbes nga kahadlokan ito, ginpamulat ni apostol Juan an pag-abot ni Kristo. Katapos makarawat an pahayag mahitungod hini nga pag-abot ngan han iginpapasabot hito ha tuna, hi Juan sinsero nga nag-ampo: “Kadi, Ginoo Jesus.” (Pahayag 22:20) Kondi kay ano nga “an ngatanan nga mga panon ha tuna masasakit tungod ha iya”? Ha ano nga paagi hiya makikita han “ngatanan nga mga mata”? Ano an tutumanon han pag-abot ni Kristo? Paonan-o kita magpapahimulos yana ha pagtoo hito? Babatunon ini nga mga pakiana han masunod nga artikulo.