“Ginpirit Niya Kami nga Kumadto”

AN MGA tawo ha mga nasud ha Sinirangan kilala gud ha pagin maabiabihon. Pananglitan, ha India, gabay na la nga magutom an usa nga pamilya basi la may maipakaon hira ha diri-linalaoman nga bisita. Ha Iran, pirme ginpupuno han iroy hin pagkaon an refrigerator basi maabiabi niya an diri-linalaoman nga mga bisita.

An sugad nga mahinatagon nga disposisyon nakita ha damu nga mga tawo nga gin-unabi ha Biblia. An usa nga maopay hinduro nga susbaranan hito amo hi Lydia, nga bangin usa nga Judio nga kombirte nga naukoy ha Filipos, an sentro nga syudad han distrito han Masedonia. Ha usa nga adlaw nga iparahuway, hin-agian ni apostol Pablo ngan han iya mga kaupod ha pagbiyahe hi Lydia ngan an iba pa nga kababayin-an nga nagkakatirok ha ligid han usa nga salog ha gawas han Filipos. Ginpagios ni Jehova an iya kasingkasing samtang nagyayakan hi Pablo hito nga okasyon. Sugad nga resulta, nabawtismohan hiya upod an iya mga kapamilya. Katapos, nakimalooy hiya ha mga biyahero: “Kon iyo ako ginhuhukman nga may pagtoo ha Ginoo, sulod kamo ngan umukoy ha akon balay.” An kaupod ni Pablo nga hi Lukas nagsiring: “Ginpirit niya kami nga kumadto.”—Buhat 16:11-15; NW.

Pariho kan Lydia, gin-aabiabi han mga Kristiano yana an ira mga igkasi-tumuroo, sugad han nagbibiyahe nga mga paramangno ngan han ira mga asawa. An mga tagbalay ‘nagpipirit ha ira nga kumadto’ ha ira balay. Sugad nga resulta, adton nag-aabiabi ginbabalosan hin makapadasig nga iristorya ngan makaparig-on ha espirituwal nga pakig-upod. Bisan kon an kadam-an han mga Saksi ni Jehova diri mga riko, ‘maloloy-on hira ha mga dumuruong,’ o maabiabihon. (Roma 12:13; Hebreo 13:2) An ira mahinatagon nga disposisyon nagpapalipay ha ira. Husto gud hi Jesus han hiya nagsiring: ‘Burobulahan pa an paghatag kay ha pagkarawat.’—Buhat 20:35.