Kitaa! Pagkaurusahon han Kahayag!

KON imo na naeksperyensyahan an paglakat ha masirom nga dalan, maaram ka nga makuri gud ito. Hito nga kahimtang, daku gud an naibubulig han kapawa! Bangin nahingada ka na liwat ha sitwasyon nga maipapariho ha kasisidman. Posible nga nahitabo ini han waray ka makita nga solusyon ha problema. Katapos hinay-hinay nga nakakita ka hin kahayag—may-ada ngay-an solusyon. Makalilipay gud an pakatalwas ha sugad nga makuri nga kahimtang ngan pakabiling hin solusyon.

Ha siyahan nga siglo, an kadam-an han mga tawo masirom an espirituwalidad. Ha mga binaya han ira naglabay nga mga gintotoohan ngan kinarawat han Kristianidad, hi apostol Pedro nagsurat: “[An Dios] nagtawag ha iyo tikang ha kangitngitan ngadto ha iya katingalahan nga kahayag.” (1 Pedro 2:9) Para ha ira, sugad ini hin paggawas tikang ha duro nga kasisidman ngadto ha kahayag. Maipapariho liwat ito ha pagin nag-uusahan nga waray paglaom ngan katapos pagin kaapi han pamilya nga may-ada sigurado nga tidaraon.—Efeso 2:1, 12.

“Imo Binayaan an Imo Siyahan nga Gugma”

Nabilngan han mga Kristiano ha naglabay an “kamatuoran”—an totoo nga Kristiano nga relihiyon. (Juan 18:37) Nakita nira an urusahon nga kahayag han kamatuoran ngan nagbag-o tikang ha espirituwal nga kasisidman ngadto ha kahayag. Kondi, ha paglabay han panahon, nagtikawara an siyahan nga interes ngan kadasig han pipira nga Kristiano. Pananglitan, han ikatarapos an siyahan nga siglo, nagkaada seryoso nga problema ha kongregasyon han Efeso. An binanhaw nga hi Jesu-Kristo maaram han problema, hiya siniring: “May-ada ko kontra ha imo, nga imo binayaan an imo siyahan nga gugma. Busa hinumdumi kon diin ka kahulog, ngan pagbasol ngan buhata an siyahan nga mga buruhaton.” (Pahayag 2:4, 5) Kinahanglan han mga Kristiano ha Efeso nga ibalik utro an ira gugma ha Dios ngan ha kamatuoran.

Kumusta man kita? Kita liwat nakaeksperyensya han kalipay ha pagkita han kahayag, ngan ha paghibaro han urusahon nga kamatuoran han Pulong han Dios. Aton ginhigugma an kamatuoran. Kondi an mga kakurian nga komon ha katawohan mahimo makaiban han aton gugma ha kamatuoran. Bangin dugang pa hini an mga problema hinin “kataposan nga mga adlaw.” Nagkikinabuhi kita ha kalibotan nga aada ha “magpakalilisang nga mga panahon”—kalibotan nga an mga tawo ‘mahigugmaon ha kalugaringon, mahigugmaon ha salapi, hambog, palabilabihon, maglibakon, maglaris ha ginikanan, diri magbaluson, diri baraan.’ (2 Timoteo 3:1, 2) An ira impluwensya mahimo makapaluya han aton kadasig ngan tungod hito, mawawara an aton gugma kan Jehova.

Kon nawara an aton siyahan nga gugma, kinahanglan naton ‘hinumdoman kon diin kita nahulog ngan magbasol.’ Kinahanglan kultibaron naton utro an espirituwalidad sugad han bag-o pa la kita ha kamatuoran. Dugang pa, kinahanglan magbantay kita nga diri magluya an aton apresasyon ha kamatuoran. Importante gud nga kita ngatanan magkaada pirme hin positibo ngan malipayon nga disposisyon, ngan tipigan nga buhi an aton gugma ha Dios ngan ha iya kamatuoran!

‘An Kamatuoran Magluluwas ha Aton’

An kahayag han kamatuoran ha Biblia urusahon tungod kay binabaton hito an importante nga mga pakiana nga nakakagupong ha katawohan  ha sulod hin mga milenyo na. An pipira hini nga pakiana amo ini: Kay ano nga aanhi kita? Ano an katuyoan han kinabuhi? Kay ano nga naeksister an karaotan? May-ada ba kinabuhi katapos han kamatayon? Gintagan kita ni Jehova hin urusahon nga mga kamatuoran mahitungod han mga doktrina ha Biblia. Diri ba kita sadang magin mapasalamaton hito? Hinaot diri gud naton balewarayon an aton hinbaroan!

Hi Jesus nagsiring ha iya mga disipulo: “Kamo mahibabaro han kamatuoran, ngan an kamatuoran magluluwas ha iyo.” (Juan 8:32) Tungod han halad lukat ni Jesus nagin posible an kagawasan ha sala ngan kamatayon. Kondi inin presyoso nga kamatuoran nakabulig liwat ha aton nga makagawas tikang ha pagkaignorante ngan kawaray kasigurohan han kalibotan nga sugad hin napuputos han kasisidman. An pagpamalandong ngan pag-apresyar han aton hinbabaroan makakabulig ha aton nga maparig-on an aton gugma kan Jehova ngan ha iya Pulong.

Ha mga Kristiano ha Tesalonika, hi apostol Pablo nagsurat: “Han iyo pagkarawat ha amon han baraan nga pulong han sumat, nga amo an pulong han Dios, iyo kinarawat ito, diri sugad nga pulong han mga tawo, kondi, ha pagkamatuod, nga pulong han Dios, nga nagbubuhat man dida ha iyo nga mga nagtoo.” (1 Tesalonika 2:13) An mga taga-Tesalonika nakabati ngan ‘kinarawat han pulong han Dios nga may kalipay.’ Waray na hira “ha kasisidman.” Lugod, hira nagin “mga anak han adlaw,” o han kahayag. (1 Tesalonika 1:4-7; 5:4, 5) Ito nga mga Kristiano nahibaro nga hi Jehova an Maglalarang ngan hiya makagarahum-ha-ngatanan, maaramon, mahigugmaon, ngan malolooyon. Pariho han iba nga mga sumurunod ni Kristo, nahibaro liwat hira nga hi Jehova naghimo hin paagi nga magin posible nga mawara an ira mga sala pinaagi han halad lukat han iya Anak, hi Jesu-Kristo.—Buhat 3:19-21.

Bisan kon an mga taga-Tesalonika waray bug-os nga kahibaro mahitungod han kamatuoran, maaram hira kon diin pamimilngon an kahibaro. An giniyahan nga Kasuratan makakahimo han tawo han Dios nga “mahingpit, ngan maandam tungod ha ngatanan nga maopay nga buhat.” (2 Timoteo 3:16, 17) An mga Kristiano ha Tesalonika mahimo magpadayon ha pag-aram, ngan pauroutro nga makaeksperyensya nga an kahayag tikang ha Dios urusahon gud. May-ada hira rason nga malipay ha ngatanan nga panahon. (1 Tesalonika 5:16) Ngan sugad man kita.

Suga ha Aton Agian

Han iginsaysay han salmista an usa nga hinungdan han pagkaurusahon han kahayag, hiya nagkanta: “An imo pulong lawag ha akon mga tiil, ngan suga ha akon agian.” (Salmo 119:105) An giya han Dios nga aton nakakarawat tikang ha iya Pulong mahimo makabulig ha aton basi makadesisyon hin maopay ngan magpahimulos hin may katuyoan nga kinabuhi. Diri naton kinahanglan magin pariho hin igin-aanod nga barko. An paghibaro ngan pag-aplikar han kamatuoran nagpapanalipod ha aton nga diri ‘mahianod ngan mahipalid han tagsa nga hangin han pagturon-an.’—Efeso 4:14.

“Ayaw niyo ibutang an iyo pagsarig ha mga prinsipe, bisan ngani dida ha anak han tawo, ha kan kanay waray pagbulig,” siring han Biblia. Ito liwat nasiring: “Malipayon adton may-ada magbarantay nga amo an Dios ni Jakob, nga an iya paglaom aada kan Jehova nga iya Dios.” (Salmo 146:3, 5) Dugang pa, an pagsarig kan Jehova nabulig ha aton nga malamposan an kahadlok ngan kabaraka. Hi apostol Pablo nagsurat: “Diri kamo magkabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” (Filipos 4:6, 7) Nagpapahimulos gud kita ha pagin giniyahan han kahayag han Pulong han Dios.

 Nasanag Sugad nga mga Kalamrag ha Kalibotan

An usa pa nga hinungdan kon kay ano nga urusahon an kahayag tikang ha Pulong han Dios, tungod kay ginpapahinabo hito nga magin posible para ha mga tawo nga makarawat an pinakaimportante nga toka. Ginsugo ni Jesus an iya mga sumurunod: “Lakat kamo, ngan manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo. Pagtutdui hira han pagbantay han ngatanan nga mga bagay, nga akon iginsugo ha iyo; ngan kitaa, ako upod ha iyo ha ngatanan nga mga adlaw tubtob ha kataposan han kalibotan.” Iya gintikangan an sugo pinaagi ha pagsiring: “Ngatanan nga kagamhanan iginhatag ha akon ha langit ngan ha tuna.”—Mateo 28:18-20.

Tagda kon hin-o an nabulig ha totoo nga mga Kristiano ha buruhaton nga pagsangyaw han maopay nga sumat ngan pagtutdo ha mga tawo han ngatanan nga nasud mahitungod han kamatuoran ha Biblia. Ginsaaran ni Jesus an iya mga sumurunod nga iya uupdan hira. Oo, iya gud gin-uupdan ngan ginbubuligan hira ha ira ministeryo samtang ‘ira iginlalawag an ira suga’ hito nga paagi ngan ha iba pa nga “mag-opay nga buhat.” (Mateo 5:14-16) Nabulig liwat hini nga pag-ebanghelyo an mga anghel. (Pahayag 14:6) Ngan kumusta man hi Jehova nga Dios? Hi apostol Pablo nagsurat: “Hi ako an nagtanom, hi Apolo an nagbisibis: kondi an Dios an nagpatubo.” Daku gud nga pribilehiyo an pagin “mga kabulig han Dios ha pagbuhat”!—1 Korinto 3:6, 9.

Hunahunaa liwat kon paonan-o ginbibendisyonan an aton mga pangalimbasog para hini nga buruhaton nga hatag han Dios. Waray maitatanding ha pribilehiyo nga iginhatag han Dios ha aton ha pagin sugad hin “mga kalamrag han kalibotan.” Pinaagi ha pagpakita han kahayag tikang ha Pulong han Dios ha aton pagyakan ngan buhat, nakakabulig gud kita ha tangkod nga mga tawo. (Filipos 2:15) Ngan mahimo kita magmalipayon samtang madasigon nga nagsasangyaw ngan nagtututdo kita, ‘kay an Dios diri nga diri matadong, nga hikalimtan an iyo buhat ngan an gugma nga iyo iginpakita ha iya ngaran.’—Hebreo 6:10.

‘Palit hin Tambal nga Ighihirog ha Imo mga Mata’

Ha usa nga mensahe ha kongregasyon ha Laodisea han siyahan nga siglo, hi Jesus nagsiring: “Pumalit ka tikang ha akon hin . . . tambal nga ighihirog ha imo mga mata, basi nga makakita ka. Ginsasaway ngan ginsisirotan ko an ngatanan nga akon ginhihigugma.” (Pahayag 3:18, 19) An masasarigan nga tambal para ha espirituwal nga kabuta amo an ‘hirog ha mata’—an katutdoan ngan disiplina ni Jesus. Kon karuyag naton tipigan an disposisyon nga mahimsog ha espirituwal, kinahanglan karawaton naton an iya sagdon ngan sundon ito pati an giya tikang ha Biblia. Kinahanglan magkaada liwat kita panhunahuna nga pariho han kan Kristo ngan sundon an iya susbaranan. (Filipos 2:5; 1 Pedro 2:21) Diri libre an hirog ha mata. Hi Jesus nagsiring: ‘Palita ito ha akon.’ An bayad hito nag-uupod han aton panahon ngan kusog.

Kon tikang kita ha masirom nga lugar ngan nasulod ha mapawa nga kwarto, bangin magkinahanglan anay hin panahon antes makakita hin maopay an aton mga mata. Ha pariho nga paagi, nagkikinahanglan hin panahon an pag-aram han Pulong han Dios ngan pakasabot han kahayag han kamatuoran. Nagkikinahanglan hin panahon ha pagpamalandong han aton hinbabaroan ngan paghunahuna han pagkapresyoso han kamatuoran. Kondi, bawi ka gud ha imo pangalimbasog. Kay ano? Tungod kay urusahon gud an kahayag!

[Retrato ha pahina 14]

“Pumalit ka tikang ha akon hin . . . tambal nga ighihirog ha imo mga mata, basi nga makakita ka”