Kon Paonan-o Nagkaada Kamurayawan hi Hana

USA nga matinumanon nga babaye an makusog an tingog nga nag-aampo ha pagdayaw kan Jehova. Inabat niya nga ginbangon hiya han Dios ha tapotapo, ngan an iya kasubo ginsaliwnan hin duro nga kalipay.

Hiya hi Hana. Ano an hinungdan han daku nga pagbag-o han iya inaabat? Kay ano nga malipayon na gud hiya yana? Ano an mahibabaroan naton tikang ha iya eksperyensya? Basi mabaton ini nga mga pakiana, aton paghisgotan an mahitungod ha iya.

Pamilya nga Tensyonado an Kahimtang

Usa hi Hana han duha nga asawa ni Elkana, an Lebita nga naukoy ha teritoryo han Epraim. (1 Samuel 1:1, 2a; 1 Kronikas 6:33, 34) Bisan kon an poligamya diri bahin han orihinal nga katuyoan han Dios ha katawohan, ha Mosaiko nga Balaud gintugotan ito ngan may-ada mga balaud may kalabotan hito. Nagsisingba kan Jehova an pamilya ni Elkana, kondi an pagkaada damu nga asawa agsob nga nagigin hinungdan han samok, sugad han nahitabo ha iya pamilya.

Baw-as hi Hana, kondi hi Penina, an usa pa nga asawa ni Elkana, may-ada mga anak. Hiya an karibal ni Hana.—1 Samuel 1:2b.

An pagin baw-as gintatagad nga kaarawdan han kababayin-an nga Israelita ngan tigaman pa ngani hin pagin waray bili ha paniplatan han Dios. Pero diri ini nagpapasabot nga an pagin baw-as ni Hana ebidensya han diri pag-uyon ha iya han Dios. Kondi, imbes nga liawon hi Hana, ginamit ni Penina an iya kapasidad ha pagpanganak basi magin miserable an iya karibal.

Pagkadto ha Santuaryo ni Jehova

Bisan pa hini nga kahimtang, an pamilya ni Elkana nagbibiyahe kada tuig basi maghalad ha santuaryo ni Jehova ha Shilo. a Inin mga 60 kilometros nga balikan nga biyahe posible nga ginbabaktas la. Sigurado nga nakurian gud hi Hana hini nga mga okasyon tungod kay damu nga bahin han halad an iginhahatag kan Penina ngan ha iya mga anak, samtang usa la nga bahin an iginhahatag ha iya. Ginsasalingabot ni Penina ini nga mga kahimtang ha pag-aringit kan Hana, ngan nasisina hiya tungod kay baga hin “ginsadhan an iya tagoangkan” ni Jehova. Ini nga kasakit nahitatabo kada tuig nga tungod hito hi Hana nagtitinangis ngan diri nakaon. Ini nga mga pagbiyahe makalilipay unta ha iya, kondi nagin panahon lugod ito hin duro nga kasubo. Bisan pa hito, nagbibiyahe la gihapon hi Hana ngadto ha santuaryo ni Jehova.—1 Samuel 1:3-7.

Nasasantop mo ba an susbaranan nga iginpakita ni Hana para ha aton? Kon nasusubo ka, ano an imo ginbubuhat? Nagpapahirayo ka ba ngan diri na nakikig-upod ha mga igkasi-tumuroo? Waray ito buhata ni Hana. Nagin batasan niya nga makig-upod ha mga magsiringba ni Jehova. Bisan pa han makuri nga mga kahimtang, sadang liwat naton buhaton ito.—Salmo 26:12; 122:1; Proberbios 18:1; Hebreo 10:24, 25.

Nangalimbasog hi Elkana ha pagliaw kan Hana ngan pag-aghat ha iya nga isumat an iya kinasingkasing nga mga  pagbati. “Hana, kay ano nga nagtuok ka? Ngan kay ano nga diri ka nakaon? Ngan kay ano nga mabidoon an imo kasingkasing?” nagpakiana hiya. “Diri ba ako maoroopay para ha imo kay hin napulo nga anak nga kalalakin-an?” (1 Samuel 1:8) Posible nga diri maaram hi Elkana han maraot nga ginbubuhat ni Penina, ngan bangin hilom nga gin-antos na la ito ni Hana imbes nga magreklamo. Anoman an kahimtang, an mahunahunaon ha espirituwal nga hi Hana namiling hin kamurayawan pinaagi ha pagdaop kan Jehova ha pag-ampo.

Nagsaad hi Hana

An mga halad ha pakigdait ginkakaon ha santuaryo ni Jehova. Katapos ni Hana bumaya ha karaonan, nag-ampo hiya ha Dios. (1 Samuel 1:9, 10) “O Jehova han mga kasundalohan, kon ha pagkamatuod lingion mo an kasakitan hinin imo surugoon nga babaye, ngan hinumdoman mo ako, ngan diri mo hingalimtan an imo surugoon nga babaye, kondi nga hatagan mo an imo surugoon nga babaye hin bata nga lalaki, dida hito ihahatag ko hiya kan Jehova ha ngatanan nga adlaw han iya kinabuhi, ngan waray labaha nga madapat ha iya ulo.”—1 Samuel 1:11.

Espisipiko an pag-ampo ni Hana. Naghangyo hiya hin anak nga lalaki ngan nagsaad nga ihahatag hiya sugad nga Nasareo ha bug-os nga kinabuhi. (Numeros 6:1-5) Ito nga saad kinahanglan uyonan han iya bana, ngan an paggios ni Elkana ha urhi nagpapakita nga nauyon hiya ha saad han iya hinigugma nga asawa.—Numeros 30:6-8.

Tungod ha paagi han pag-ampo ni Hana naghunahuna an Hitaas nga Saserdote nga hi Eli nga hubog hiya. Nakiwa an im-im ni Hana, kondi waray nababatian hi Eli, tungod kay nagyayakan hiya ha iya la hunahuna. Sinsero gud ito nga pag-ampo. (1 Samuel 1:12-14) Handurawa an inabat niya han ginsaway hiya ni Eli ngan ginsidngan hiya nga hubog hiya! Kondi, matinalahuron nga ginbaton niya an hitaas nga saserdote. Han nasantop ni Eli nga nag-aampo hi Hana ‘tikang ha kadamu han iya sumbong ngan han iya kauriton,’ hi Eli nagsiring: “An Dios han Israel matugot han imo hangyo.” (1 Samuel 1:15-17) Tungod hito, linakat hi Hana ngan kumaon, ngan “an iya pangahimo [nagin] diri na mabidoon.”—1 Samuel 1:18.

Ano an mahibabaroan naton tikang hini ngatanan? Kon nag-aampo kita kan Jehova mahitungod han aton mga kabaraka, mahimo naton ipasabot ha iya an aton inaabat ngan kinasingkasing nga manginyupo. Kon waray na kita mahihimo ha pagsulbad han problema, sadang naton ito itapod ha iya. Ito an gimaopayi pagbuhaton.—Proberbios 3:5, 6.

Katapos mag-ampo hin sinsero, an magsiringba ni Jehova posible gud nga makaeksperyensya hin kamurayawan pariho kan Hana. May kalabotan ha pag-ampo, hi apostol Pablo nagsurat: “Diri kamo magkabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” (Filipos 4:6, 7) Kon iginhahatag naton an aton pinas-an kan Jehova, kinahanglan itapod naton ito ha iya. Katapos, pariho kan Hana, diri na kita sadang mabaraka.—Salmo 55:22.

Anak nga Iginhatag kan Jehova

Namati an Dios kan Hana; nagburod hiya ngan nag-anak hin lalaki. (1 Samuel 1:19, 20) Usa ini han pipira nga kahimtang nga iginrekord ha Biblia nga ginpahinabo han Dios an katawo han usa nga iya magigin surugoon. An anak nira Elkana ngan Hana nga hi Samuel magigin propeta ni Jehova, usa nga magkakaada importante nga bahin ha pag-establisar han ginhadian han Israel.

Waray ruhaduha nga gintutdoan ni Hana hi Samuel tikang ha pagkabata mahitungod kan Jehova. Kondi hinngalimtan ba niya an iya iginsaad? Waray gud! “Diri ako makadto ngada nga an bata malutas; ngan dida hito akon hiya dadad-on nga hiya pumakita ha atubangan ni Jehova, ngan didto mag-ukoy ha kadayonan,” nagsiring hiya. Han nalutas hi Samuel, posible han tres anyos hiya o sobra pa, gindara hiya ni Hana basi mag-ukoy ha santuaryo ni Jehova, sugad la han iya iginsaad.—1 Samuel 1:21-24; 2 Kronikas 31:16.

Katapos ni Hana ngan han iya bana maghalad kan Jehova, gindara nira hi Samuel kan Eli. Posible gud nga ginkakaptan ni Hana an kamot han iya  anak han nagsiring hiya kan Eli: “O ginoo ko; sugad nga an imo kalag buhi, ginoo ko, ako an babaye nga tinmindog ha imo harani dinhi, ha pag-ampo kan Jehova. Para hini nga bata nag-ampo ako; ngan hi Jehova naghatag ha akon han akon hangyo nga akon pinangaro ha iya: busa akon man ihinatag hiya kan Jehova; ha ngatanan nga adlaw han iya kinabuhi hiya ihahatag kan Jehova.” Hini nga paagi nagtikang an kan Samuel bug-os kinabuhi nga espesyal nga pag-alagad ha Dios.—1 Samuel 1:25-28; 2:11.

Paglabay han panahon, sigurado nga waray hingalimti ni Hana hi Samuel. An Kasuratan nasiring: “An iya iroy naghimo ha iya hin gutiay nga bado nga halaba, ngan dad-on ini ngada ha iya ha kada tuig, kon nakada hiya upod han iya bana paghalad han tinuig nga halad.” (1 Samuel 2:19) Sigurado nga nag-aampo pirme hi Hana para kan Samuel. Ha iya pagbisita kada tuig, waray ruhaduha nga gindadasig niya hi Samuel nga magpadayon nga matinumanon ha iya pag-alagad ha Dios.

Ha usa han sugad nga okasyon, ginbendisyonan ni Eli an mga kag-anak ni Samuel ngan nagsiring kan Elkana: ‘Hinaot hi Jehova maghatag ha imo hin tulin hini nga babaye tungod han hangyo nga pinangaro kan Jehova.’ Uyon hito nga mga pulong, hira Hana ngan Elkana ginbendisyonan pa hin tulo nga anak nga kalalakin-an ngan duha nga kababayin-an.—1 Samuel 2:20, 21.

Maopay gud nga susbaranan an iginpapakita nira Elkana ngan Hana ha Kristiano nga mga kag-anak! Damu nga iroy ngan amay an andam nga ihatag kan Jehova an ira mga anak, siring pa, pinaagi ha pagdasig ha ira nga pangalimbasogan an bug-os-panahon nga pag-alagad nga hirayo ha balay. Angay kumendasyonan an sugad nga mahigugmaon nga mga kag-anak tungod han ira mga pagsakripisyo. Ngan bibendisyonan hira ni Jehova.

An Pag-ampo ni Hana Tungod ha Kalipay

Nagin malipayon gud an baw-as hadto nga hi Hana! An mga pag-ampo han kababayin-an talagsa la irekord ha Kasuratan. Kondi ha kahimtang ni Hana, ginhisgotan naton an duha hito. An siyahan mahitungod han iya mga pagbati han ginpaaringit ngan ginpasakitan hiya, ngan an ikaduha pag-ampo ha pagpasalamat tungod ha kalipay. ‘An akon kasingkasing nalilipay tungod kan Jehova,’ nagtikang hi Hana. Nalilipay hiya nga “an baw-as nag-anak,” ngan gindadayaw niya hi Jehova sugad nga an ‘Paraalsa, an Parabangon han mga kablas tikang ha tapotapo.’ Oo, “iya sinapwat an mga runos tikang ha kalamirihan.”—1 Samuel 2:1-10.

Ipinapakita han giniyahan nga asoy mahitungod kan Hana nga mahimo kita masubo tungod han mga kaluyahan o pagpasakit han iba. Kondi, kinahanglan nga diri naton tugotan nga mawara an aton kalipay ha pag-alagad kan Jehova tungod hito nga mga pagsari. Hiya an supremo nga Parapamati han pag-ampo, nga nabaton ha mga pagsinggit han iya matinumanon nga katawohan, ngan nagluluwas ha ira tikang ha kasakitan ngan naghahatag ha ira hin hura nga kamurayawan ngan iba pa nga bendisyon.—Salmo 22:23-26; 34:6-8; 65:2.

[Footnote]

[Retrato ha pahina 17]

Iginhatag ni Hana hi Samuel kan Jehova