Mga Anghel—Kon Ano an Ira Ginbubuhat Para ha Katawohan

“Katapos hini nga mga bagay hinkit-an ko an lain nga anghel nga nalusad tikang ha langit, nga may-ada daku nga kagamhanan . . . Ngan sininggit hiya ha daku nga tingog, nga nasiring: Nahulog na, nahulog na an Daku nga Babilonya.”—PAHAYAG 18:1, 2.

1, 2. Ano an nagpapakita nga ginagamit ni Jehova an mga anghel ha pagtuman han iya kaburut-on?

 SAMTANG an lagas na nga hi apostol Juan distyero ha isla han Patmos, tinagan hiya hin matagnaon nga mga bisyon. Pinaagi “ha espiritu,” nahingadto hiya ha “adlaw han Ginoo” ngan nakakita hin makatirigamnan nga mga hitabo. Ito nga adlaw nagtikang ha kahitrono ni Jesu-Kristo han 1914 ngan magpapadayon tubtob gud ha kataposan han iya Usa ka Yukot ka Tuig nga Pagmando.—Pahayag 1:10.

² Diri direkta nga iginhatag ni Jehova nga Dios kan Juan ini nga pahayag. May-ada hiya iba nga ginamit ha paghatag hito. An Pahayag 1:1 nasiring: “An pahayag ni Jesu-Kristo, nga iginhatag han Dios ha iya ha pagpakita han iya mga uripon, bisan an mga bagay nga kinahanglan mahinabo hin diri na maiha: ngan iginsugo ngan iginpakilala ito niya, pinaagi ha iya anghel ngadto ha iya surugoon nga hi Juan.” Pinaagi kan Jesus, ginamit ni Jehova an usa nga anghel basi ipahibaro kan Juan an urusahon nga mga butang mahitungod han “adlaw han Ginoo.” Ha usa nga higayon, iya liwat “hinkit-an . . . an lain nga anghel nga naglulusad tikang ha langit, nga may-ada daku nga kagamhanan.” Ano an toka hini nga anghel? “Sininggit hiya ha daku nga tingog, nga nasiring, Nahulog na, nahulog na an Daku nga Babilonya”! (Pahayag 18:1, 2) Inin gamhanan nga anghel nakapribilehiyo ha pagpasamwak mahitungod han kapukan han Babilonya nga Daku, an imperyo han palso nga relihiyon ha kalibotan. Salit, waray ruhaduha nga ginagamit ni Jehova an mga anghel ha importante nga paagi ha pagtuman han iya kaburut-on. Antes usisahon hin detalyado an bahin han mga anghel ha katuyoan han Dios ngan kon ano an ira ginbubuhat para ha aton, aton paghisgotan anay kon paonan-o hira iniksister.

Paonan-o Iniksister an mga Anghel?

3. Ano an sayop nga ideya han damu nga tawo mahitungod han mga anghel?

³ Minilyon nga tawo yana an natoo nga naeksister an mga anghel. Kondi damu an may-ada sayop nga mga ideya mahitungod ha ira ngan han ira tinikangan. Pananglitan, an iba nga relihiyoso nga mga tawo natoo nga kon namamatay an usa nga hinigugma, tinatawag hiya han Dios basi makaupod Niya ha langit ngan nagigin anghel. Ito ba an igintututdo han Pulong han Dios mahitungod han paglarang ha mga anghel, han ira pag-eksister, ngan katuyoan?

4. Ano an iginsusumat ha aton han Kasuratan mahitungod han tinikangan han mga anghel?

⁴ An anghel nga gilalabawi ha gahum ngan awtoridad ginngangaranan nga hi Miguel nga arkanghel o punoan han mga anghel. (Judas 9) Hiya amo hi Jesu-Kristo. (1 Tesalonika 4:16) Maiha na hinduro nga panahon an naglabay, sugad nga Maglalarang, an siyahan nga ginlarang ni Jehova amo inin iya Anak nga anghel. (Pahayag 3:14) Katapos, pinaagi hinin suhag nga Anak, ginlarang ni Jehova an ngatanan nga iba pa nga mga anghel. (Kolosas 1:15-17) Gintawag ni Jehova ini nga mga anghel sugad nga iya mga anak han hiya nagpakiana ha patriarka nga hi Job: “Nakain ka han pagpahamutang ko han mga patukoranan han tuna? Pag-asoy kon may-ada ka sarabotan. . . . Hin-o an nagbutang han pamag-ang hini, han pagkanta ha tingob han mga bitoon ha kaagahon, ngan an ngatanan nga anak nga kalalakin-an han Dios naggugliat ha kalipay?” (Job 38:4, 6, 7) Matin-aw, an mga anghel mga linarang han Dios,  ngan maiha na nga naeksister hira antes han mga tawo.

5. Paonan-o inorganisa an mga anghel?

⁵ “An Dios diri Dios ha kasamokan, kondi ha paghidait,” siring han 1 Korinto 14:33. Tungod hito, inorganisa ni Jehova an iya espiritu nga mga anak ha tulo nga klase: (1) mga serapin, nga nag-aalagad sugad nga mga kabulig ha trono han Dios, nagpapahayag han iya pagkabaraan, ngan nabulig ha iya katawohan nga magpabilin nga limpyo ha espirituwal; (2) mga kerubin, nga nasuporta ha pagkasoberano ni Jehova; ngan (3) iba pa nga mga anghel nga nagtutuman han iya kaburut-on. (Salmo 103:20; Isaias 6:1-3; Esekiel 10:3-5; Daniel 7:10) Ano an pipira nga ginbubuhat hini nga mga anghel para ha mga tawo?—Pahayag 5:11.

Ano nga Bahin an Ginbubuhat han mga Anghel?

6. Paonan-o ginamit ni Jehova an mga kerubin ha hardin han Eden?

⁶ An siyahan nga direkta nga pag-unabi mahitungod han espiritu nga mga linarang mababasa ha Genesis 3:24, nga nasiring: “Gintabog [ni Jehova] ngadto ha gawas an tawo: ngan hiya nagbutang ha may sinirangan han tanaman han Eden hin mga kerubin, ngan laga han usa nga espada nga nagbirikbirik ha tagsa nga agian basi mabantayan han dalan han kahoy han kinabuhi.” Ginbantayan hini nga mga kerubin an orihinal nga urukyan nga hardin basi diri na makasulod utro hira Adan ngan Eva. Nahitabo ito ha tinikangan han kasaysayan han tawo. Ano nga bahin an ginbubuhat han mga anghel tikang hadto?

7. Ha orihinal nga mga yinaknan, ano an kahulogan han mga pulong para ha “anghel,” ngan ano an ipinapakita hini mahitungod han usa han mga bahin nga ginbubuhat han mga anghel?

⁷ Ha orihinal nga mga yinaknan haros 400 ka beses nga gin-uunabi ha Biblia an mga anghel. An Hebreo ngan Griego nga mga pulong para ha “anghel” mahimo ighubad nga “mensahero.” Salit an mga anghel amo an paagi han komunikasyon butnga han Dios ngan han mga tawo. Sugad han gin-unabi na ha siyahan nga duha nga parapo hini nga artikulo, ginamit ni Jehova an usa nga anghel ha pagdara han iya mensahe kan apostol Juan.

8, 9. (a) Ano an epekto han pagbisita han anghel kan Manoa ngan ha iya asawa? (b) Ano an mahibabaroan han mga kag-anak ha pakiistorya ni Manoa ha anghel han Dios?

⁸ Ginagamit liwat an mga anghel ha pagbulig ngan pagdasig ha mga surugoon han Dios ha tuna. Pananglitan, ha panahon han mga Hukom ha Israel, hi Manoa ngan an iya baw-as nga asawa naghingyap gud hin anak. Sinugo ni Jehova an iya anghel basi sumatan an asawa ni Manoa nga magkakaada hiya hin anak nga lalaki. An asoy nagsusumat ha aton: “Kitaa, ikaw mananamkon, ngan mag-aanak hin lalaki; ngan waray labaha nga madapat ha iya ulo; kay an bata mana-Nasareo ngadto ha Dios tikang ha tagoangkan: ngan hiya matikang ha pagluwas han Israel tikang ha kamot han mga Pilisteohanon.”—Hukom 13:1-5.

⁹ An asawa ni Manoa ha kataposan nag-anak hin usa nga lalaki, hi Samson, nga nagin bantogan ha kasaysayan han Biblia. (Hukom 13:24) Antes matawo an bata, naghangyo hi Manoa nga bumalik an anghel basi tutdoan hira kon ano an ira sadang buhaton ha pagmangno ha bata. Hi Manoa nagpakiana: “Maaano an kahimtang han bata ngan ano an amon bubuhaton ha iya?” Iginsumat utro han anghel ni Jehova an mga instruksyon nga iginhatag niya ha asawa ni Manoa. (Hukom 13:6-14) Sigurado nga nadasig gud hi  Manoa! Yana, an mga anghel diri nabisita ha mga indibiduwal ha sugad hito nga paagi, kondi pariho kan Manoa, mahimo pamilngon han mga kag-anak an instruksyon ni Jehova kon ginbabansay nira an ira mga anak.—Efeso 6:4.

10, 11. (a) Ano an reaksyon ni Eliseo ngan han iya surugoon ha nasulong nga kasundalohan han Sirya? (b) Ano an kapulsanan ha aton han pagpamalandong hini nga hitabo?

¹⁰ May-ada makatirigamnan nga ehemplo han bulig han mga anghel ha panahon ni propeta Eliseo. Naukoy hiya ha Dotan, usa nga syudad ha Israel. Usa ka adlaw han an surugoon ni Eliseo binuhat temprano ha aga ngan nagkita ha gawas, iya hinkit-an nga an syudad ginpapalibotan hin kakabayohan ngan hin mga karomata ha pakig-away. An hadi han Sirya nagsugo hin damu nga kasundalohan basi dakpon hi Eliseo. Ano an reaksyon han surugoon ni Eliseo? Nahadlok gud hiya, bangin nataranta, salit nagsinggit hiya: “Abaadaw, agaron ko! Oonanhon ta pagbuhat?” Para ha iya, baga hin waray na gud paglaom. Kondi hi Eliseo binaton: “Ayaw kahadlok; kay hira nga dapig ha aton darodamu kay ha ira nga dapig ha ira.” Ano an iya iginpasabot?—2 Hadi 6:11-16.

¹¹ Maaram hi Eliseo nga damu hinduro nga mga anghel an nakada ha pagbulig ha iya. Kondi, waray hinkit-an an iya surugoon. Salit “hi Eliseo nag-ampo, ngan nagsiring: Jehova, nanginginyupo ako ha imo, pukrata an iya mga mata, nga hiya makakita. Ngan pinukrat ni Jehova an mga mata han batan-on nga lalaki; ngan hiya nakakita: ngan, kitaa, an bukid puno han kakabayohan ngan han mga karomata ha pakig-away nga kalayo nga naglilibot kan Eliseo.” (2 Hadi 6:17) Salit nakita han surugoon an damu hinduro nga anghel. Pinaagi han pagsabot ha espirituwal nga mga butang, simboliko nga makikita liwat naton nga an mga anghel, nga ginigiyahan ngatanan ni Jehova ngan ni Kristo, nabulig ngan nagpapanalipod ha katawohan ni Jehova.

Bulig han mga Anghel ha Panahon ni Kristo

12. Ano nga bulig an nakarawat ni Maria tikang ha anghel nga hi Gabriel?

¹² Tagda an bulig nga nakarawat han birhen nga Judio nga hi Maria han hinbatian niya an sumat: “Mananamkon ka ngan magbata ka hin usa nga anak, nga imo pagngangaranan kan Jesus.” Antes gud isumat inin urusahon nga mensahe, an anghel nga hi Gabriel, nga sinugo han Dios, nagsiring ha iya: “Ayaw kahadlok Maria; kay nakaagi ka hin grasya ha Dios.” (Lukas 1:26, 27, 30, 31) Sigurado nga nadasig ngan naparig-on gud hi Maria hini nga mga pulong nga nagpasarig ha iya nga inuuyonan hiya han Dios!

13. Paonan-o ginbuligan han mga anghel hi Jesus?

¹³ Nahitabo an usa pa nga higayon nga binulig an mga anghel katapos atohan ni Jesus an tulo nga pagsulay ni Satanas ha Iya ha kamingawan. An asoy nagsusumat ha aton nga ha ikatarapos han mga pagsulay, “binayaan hiya han Yawa, ngan, kitaa, an mga anghel nangabot, ngan nagmangno ha iya.” (Mateo 4:1-11) Sugad liwat hito  an nahitabo ha gab-i antes mamatay hi Jesus. Tungod han duro nga kasakit, linuhod hi Jesus ngan nag-ampo, nga nasiring: “Amay, kon imo karuyag, balhinon ini nga irinman tumikang ha akon; kondi diri pagbuhaton an akon kaburut-on, kondi an imo. Ngan nagpakita ha iya an usa nga anghel tikang ha langit, ha pagparig-on ha iya.” (Lukas 22:42, 43) Kondi yana, ano nga klase hin bulig han mga anghel an nakakarawat naton?

Bulig han mga Anghel Yana

14. Ano nga pagtimaraot an gin-iilob han mga Saksi ni Jehova ha moderno nga panahon, ngan ano an resulta?

¹⁴ Kon aton ginhuhunahuna an kasaysayan han pagsangyaw nga buruhaton han mga Saksi ni Jehova ha moderno nga panahon, diri ba nakikita naton an ebidensya han bulig han mga anghel? Pananglitan, an katawohan ni Jehova nakailob han pagtimaraot han mga Nazi ha Alemanya ngan ha Weste nga Europa antes ngan durante han Girra ha Kalibotan II (1939-45). Durante han pagmando han Katoliko nga mga Fasista ha Italya, Espanya, ngan Portugal, kinahanglan ilubon nira an pagtimaraot hin mas maiha pa gud. Ngan ha damu nga katuigan, ira gin-ilob an pagtimaraot ha Unyon Sobyet hadto ngan ha mga nasud nga ginmamandoan hito. Usa pa nga ehemplo amo an pagtimaraot nga gin-ilob han mga Saksi ha pipira nga nasud ha Aprika. a Ha mas bag-o la nga mga panahon, an mga surugoon ni Jehova nag-aantos hin mabangis nga pagtimaraot ha nasud han Georgia. Ginbubuhat ni Satanas an ngatanan nga iya mahihimo ha pagpaundang han buruhaton han mga Saksi ni Jehova. Kondi, sugad nga organisasyon, nakakatalwas hira ha sugad nga pagkontra ngan nag-uuswag. An usa nga hinungdan hini amo an panalipod han mga anghel.—Salmo 34:7; Daniel 3:28; 6:22.

15, 16. Ano nga bulig han mga anghel an nakakarawat han mga Saksi ni Jehova ha ira bug-os-kalibotan nga ministeryo?

¹⁵ Kinasingkasing nga ginbubuhat han mga Saksi ni Jehova an sugo ha ira nga isangyaw an maopay nga sumat han Ginhadian han Dios ha bug-os nga tuna ngan manhimo hin mga disipulo pinaagi han pagtutdo han kamatuoran han Biblia  ha mga interesado ha bisan diin. (Mateo 28:19, 20) Kondi, maaram gud hira nga diri nira matutuman ini nga sugo kon waray bulig han mga anghel. Salit, an ginsisiring ha Pahayag 14:6, 7 pirme nga nagdadasig ha ira. Aton mababasa: “Hinkit-an ko [apostol Juan] in lain nga anghel nga naglulupadlupad ha ginkakatungaan han langit, nga may-ada waray kataposan nga maopay nga sumat nga igwawali ngadto hadton mga nag-uukoy ha tuna, ngan ha ngatanan nga nasud ngan panon, ngan yinaknan ngan katawohan; ngan nasiring hiya ha daku nga tingog: Kahadluki niyo an Dios, ngan tagi hiya niyo hin himaya; kay an oras han iya paghukom iini na: ngan pagsingbaha niyo adton naghimo han langit ngan han tuna, ngan dagat ngan mga burabod han mga tubig.”

¹⁶ Ipinapakita hin matin-aw hini nga mga pulong nga an daku nga pag-ebanghelyo nga buruhaton han mga Saksi ni Jehova ha bug-os nga kalibotan binubuligan ngan ginigiyahan han mga anghel. Ginagamit ni Jehova an iya mga anghel ha paggiya han sinsero nga mga tawo ngadto ha iya mga Saksi, ngan ginigiyahan liwat han mga anghel an mga Saksi ngadto ha takos nga mga tawo. Ini an hinungdan kon kay ano nga damu gud ka beses—agsob gud salit diri masisiring nga nahituman la—nga usa han mga Saksi ni Jehova an iginkikita hin usa nga tawo ha panahon mismo nga nakakaeksperyensya hiya hin mga kakurian ngan nagkikinahanglan hin espirituwal nga bulig.

Usa nga Makatirigamnan nga Bahin han mga Anghel ha Diri na Maiha

17. Ano an nahitabo ha mga Asiryahanon han gin-atake hira han usa la nga anghel?

¹⁷ Dugang pa ha pagin mga mensahero ngan nagpaparig-on nga bulig ha mga magsiringba ni Jehova, an mga anghel may-ada usa pa nga buruhaton. Ha naglabay nga mga panahon, ira iginpadapat an mga paghukom han Dios. Pananglitan, han ikawalo ka siglo A.K.P., gintarhog an Jerusalem han damu hinduro nga kasundalohan han Asirya. Ano an reaksyon ni Jehova? Hiya nagsiring: “Akon pananalipdan ini nga bungto ha pagluwas hini, tungod ha akon ngahaw, ngan tungod kan David nga akon surugoon.” An asoy han Biblia nagsusumat ha aton han nahitabo: “Nahinabo hadto nga gab-i, nga an anghel ni Jehova ginawas, ngan hinampak didto ha tirokan han mga Asiryahanon in usa ka gatos kawaloan kag lima ka yukot; ngan han pamangon han mga tawo ha sayo ha aga, kitaa, ini ngatanan mga patay nga lawas.” (2 Hadi 19:34, 35) Waray gud mahihimo an mga kasundalohan han tawo kon itanding ha kusog han usa la nga anghel!

18, 19. Ano an magigin makatirigamnan nga bahin han mga anghel ha diri na maiha, ngan ano an magigin epekto hito ha katawohan?

¹⁸ Gagamiton han Dios an mga anghel sugad nga mga parapamatay ha diri na maiha. Diri na gud maiha tikang yana, makanhi hi Jesus “upod an mga anghel han iya gahum ha malaga nga kalayo.” An ira misyon amo an ‘pagbulos ha mga waray kumilala ha Dios, ngan ha waray pagtuman han maopay nga sumat han aton Ginoo Jesus.’ (2 Tesalonika 1:7, 8) Daku gud an magigin epekto hini ha katawohan! Bubungkagon adton nagdudumiri ha maopay nga sumat han Ginhadian han Dios nga iginpapasamwak yana ha bug-os nga tuna. An mga tawo la nga namimiling kan Jehova, ha pagkamatadong, ngan pagkamaaghop an ‘pananagoon ha adlaw han kan Jehova kasina’ ngan diri madadaot.—Sepania 2:3.

¹⁹ Mapasalamaton gud kita nga ginagamit ni Jehova an iya gamhanan nga mga anghel ha pagbulig ngan pagparig-on ha iya mga magsiringba dinhi ha tuna. An aton pagsabot mahitungod ha bahin han mga anghel ha katuyoan han Dios labi nga nakakaliaw, tungod kay an iba nga mga anghel nagrebelde kan Jehova ngan dinapig kan Satanas. An masunod nga artikulo maghihisgot han mga paagi nga mahimo buhaton han totoo nga mga Kristiano basi mapanalipdan hira tikang ha gamhanan nga impluwensya ni Satanas nga Yawa ngan han iya mga demonyo.

[Footnote]

Ano an Imo Hinbaroan?

• Paonan-o iniksister an mga anghel?

• Paonan-o ginamit an mga anghel ha kadaan nga mga panahon?

• Ano an iginsusumat han Pahayag 14:6, 7 mahitungod han buruhaton han mga anghel yana?

• Ano an magigin makatirigamnan nga bahin han mga anghel ha diri na maiha?

[Mga Pakiana]

[Retrato ha pahina 22]

Hi Manoa ngan an iya asawa gindasig han usa nga anghel

[Retrato ha pahina 23]

“Hira nga dapig ha aton darodamu kay ha ira nga dapig ha ira”