Mga Demonyo—Paonan-o Naton Maaatohan Hira?

“An mga anghel nga waray pagmangno ha ira mga kaginoohanan, kondi nga binayaan nira an ira kalugaringon nga inukyanan, ginbantayan niya hira hin mga talikara nga waray kataposan sakob ha kasisidman tubtob ha paghukom ha daku nga adlaw.”—JUDAS 6.

1, 2. Ano nga mga pakiana an nabangon mahitungod kan Satanas ngan ha mga demonyo?

 “MAGBUOTAN, ngan mag-agma kamo,” nagpapahamangno hi apostol Pedro. “An iyo kaaway nga amo an Yawa, sugad hin maaringasa nga leon, naglilinakat-lakat, pagpinamiling hin iya lalamyon.” (1 Pedro 5:8) Mahitungod han mga demonyo, hi apostol Pablo nasiring: “Diri ko karuyag nga makipag-arangbit kamo ha mga yawa. Diri kamo sadang makainom ha tagayan han Dios, ngan ha tagayan han mga yawa; diri kamo sadang makiangbit ha lamesa han Dios, ngan ha lamesa han mga yawa.”—1 Korinto 10:20, 21.

² Kondi, hin-o hi Satanas nga Yawa ngan an mga demonyo? Paonan-o ngan kakan-o hira iniksister? Ginlarang ba hira han Dios? Mationan-o kagamhanan an ira impluwensya ha mga tawo? Paonan-o naton mapapanalipdan an aton kalugaringon kontra ha ira?

Paonan-o Iniksister hi Satanas Ngan an mga Demonyo?

3. Paonan-o an usa nga anghel han Dios nagin Satanas nga Yawa?

³ Ha tinikangan han kasaysayan han tawo ha hardin han Eden, usa nga anghel han Dios an nagin rebelyoso. Kay ano? Tungod kay waray hiya matagbaw ha iya bahin ha langitnon nga organisasyon ni Jehova. Han ginlarang hira Adan ngan Eva, nakita niya an higayon nga ipasimang an ira pagsugot ngan pagsingba tikang ha matuod nga Dios ngadto ha iya. Pinaagi han pagrebelde ha Dios ngan pagsulay ha siyahan nga mag-asawa nga magbuhat hin sala, ginhimo hini nga anghel an iya kalugaringon nga Satanas nga Yawa. Inabot an panahon nga an iba nga mga anghel inupod ha iya pagrebelde. Paonan-o?—Genesis 3:1-6; Roma 5:12; Pahayag 12:9.

4. Ano an ginbuhat han iba nga rebelyoso nga mga anghel antes han Baha ha panahon ni Noe?

⁴ An giniyahan nga Kasuratan nagsusumat ha aton nga pipira ka panahon antes han daku nga Baha ha panahon ni Noe, may-ada mga anghel nga nagpakita hin diri-angayan nga pagkaruyag ha kababayin-an ha tuna. An Biblia nasiring nga tungod han sayop nga katuyoan, “ha pagtan-aw han [langitnon nga] mga anak nga lalaki han Dios nga an mga anak nga babaye han tawo mga maghusay, ira ginkuha hira nga mga asawa ha ngatanan nga ira ginpili.” Ini nga mga pag-asawa diri-natural, ngan nanganak hira hin mga higante nga gintawag nga mga Nepilim. (Genesis 6: 2-4) An espiritu nga mga linarang nga nagtalapas ha Dios hito nga paagi inupod ha pagrebelde ni Satanas kontra kan Jehova.

5. Ano an nahitabo ha mga rebelde han ginpahinabo ni Jehova an kabungkagan pinaagi han daku nga Baha?

⁵ Han ginpahinabo ni Jehova an Baha ha katawohan, nagkamatay an mga Nepilim ngan an ira tawhanon nga mga iroy. An rebelde nga mga anghel napiritan nga hukason an ira tawhanon nga mga lawas ngan bumalik ngadto ha lugar han mga espiritu. Kondi, diri na hira puydi bumalik ha ira “kalugaringon nga inukyanan” upod han Dios. Lugod, iginbutang hira ha “sakob ha [espirituwal nga] kasisidman,” nga tinatawag liwat nga magsirom nga mga bito, o Tartaro.—Judas 6; 2 Pedro 2:4.

6. Ha ano nga paagi ginlilimbongan han mga demonyo an mga tawo?

⁶ Tikang nga nawara han magraot nga mga anghel “an ira kalugaringon nga inukyanan,” hira na an mga demonyo nga kaupod ni Satanas ngan nasuporta ha iya maraot nga mga buhat. Tikang hadto nga panahon padayon, an mga demonyo waray na gahum ha pagsul-ot hin tawhanon nga mga lawas. Kondi, mahimo nira aghaton an kalalakin-an ngan kababayin-an nga magbuhat hin magkalain-lain nga klase hin kalaw-ayan. Aktibo nga ginlilimbongan liwat han mga demonyo an mga tawo pinaagi han espiritismo, nga nag-uupod han mga buhat sugad han panlumay ngan pamarang, ngan han mga espiritista. (Deuteronomio 18:10-13; 2 Kronikas 33:6) Uusa la an dadangatan han magraot nga mga anghel ngan han Yawa—dayon nga kabungkagan. (Mateo 25:41; Pahayag 20:10) Kondi yana, kinahanglan magin marig-on kita ngan atohan hira. Maaramon para ha aton nga tagdon kon mationan-o kagamhanan hi Satanas ngan kon paonan-o kita magigin malampuson ha pag-ato ha iya ngan ha iya mga demonyo.

Mationan-o Kagamhanan hi Satanas?

7. May-ada ano nga gahum hi Satanas ha kalibotan?

⁷ Ha bug-os nga kasaysayan, ginpapakaraot ni Satanas hi Jehova. (Proberbios 27:11) Ngan iniimpluwensyahan niya an damu nga tawo. “An bug-os nga kalibotan kanan kayawan-on,” siring han 1 Juan 5:19. Ito an hinungdan nga ginsulay han Yawa hi Jesus pinaagi han pagtanyagi ha iya han kagamhanan ngan han himaya han “ngatanan nga mga ginhadian han kalibotan.” (Lukas 4:5-7) Mahitungod kan Satanas, hi apostol Pablo nasiring: “Bisan pa kon an aton maopay nga sumat natabonan, ito natabonan la ngada ha mga nagkawawara: nga an mga hunahuna hini nga diri magtinoohon ginbuta han dios hini nga kalibotan, basi nga diri hira sidlakan han kalamrag han maopay nga sumat han himaya ni Kristo, nga amo an dagway han Dios.” (2 Korinto 4:3, 4) Hi Satanas “buwaon, ngan amay hiya han buwa,” kondi hiya “nagpapakaaroanghel han kahayag.” (Juan 8:44; 2 Korinto 11:14) May-ada hiya han gahum ngan mga paagi ha pagbuta han mga hunahuna han mga magmarando han kalibotan ngan han ira mga sakop. Pinaagi han sayop nga propaganda ngan mga susmatanon ngan mga buwa ha relihiyon, iya ginlilimbongan an mga tawo.

8. Ano an ipinapakita han Biblia mahitungod han impluwensya ni Satanas?

⁸ An gahum ngan impluwensya ni Satanas nakita ha panahon ni propeta Daniel, mga lima ka siglo antes han aton Komon nga Panahon. Han ginsugo ni Jehova an usa nga anghel ha pagdara hin mensahe basi dasigon hi Daniel, an anghel gin-ulang han “[espiritu nga] prinsipe han ginhadian ha Persia.” An matinumanon nga anghel ginpugngan ha sulod hin 21 ka adlaw tubtob nga “hi Mikael, usa han labaw nga mga prinsipe,” inabot ha pagbulig ha iya. Ito nga asoy nag-uunabi liwat mahitungod han “[demonyo nga] prinsipe ha Gresya.” (Daniel 10:12, 13, 20) Ngan ha Pahayag 13:1 2, iginhuhulagway hi Satanas sugad nga ‘an dragon’ nga naghahatag han ‘iya kagamhanan, ngan han iya lingkuranan nga hadianon, ngan hin daku nga gahum’ ha politikal nga ihalas nga mananap.

9. Kontra kan kanay nakikig-away an mga Kristiano?

⁹ Diri urusahon nga hi apostol Pablo nagsurat: “An aton pakig-away diri kontra ha unod ngan ha dugo, kondi kontra ha mga punoan, kontra ha mga pagburut-an, kontra ha mga magburuot hini nga masirom nga kalibotan, kontra ha mga espirituhanon nga kasundalohan han kamaraotan ha mga langitnon nga lugar.” (Efeso 6:12) Bisan yana, an diri-nakikita nga demoniko nga kasundalohan nga kontrolado ni Satanas nga Yawa nag-iimpluwensya ha tawhanon nga mga magmarando ngan ha katawohan ha kabug-osan, gin-aaghat hira nga poohon an partikular nga grupo han mga tawo, magbuhat hin  terorismo, ngan manmatay. Aton usisahon yana kon paonan-o naton maaatohan hin malampuson inin gamhanan nga magraot nga espiritu.

Paonan-o Naton Mapapanalipdan an Aton Kalugaringon?

10, 11. Paonan-o naton maaatohan hi Satanas ngan an iya magraot nga mga anghel?

¹⁰ Diri naton maaatohan hi Satanas ngan an iya magraot nga mga anghel ha aton kalugaringon nga kusog, ha pisikal man o ha mental. Hi Pablo nagsasagdon ha aton: “Magmarig-on kamo ha Ginoo, ngan ha kusog han iya gahum.” Kinahanglan mangamuyo kita ha Dios nga panalipdan kita. Hi Pablo nasiring liwat: “Magsul-ot kamo han bug-os nga hinganiban han Dios, basi nga mahimo kamo pag-atubang kontra ha mga limbong han Yawa . . . Kuhaa niyo an bug-os nga hinganiban han Dios, basi nga sadang kamo makaato ha maraot nga adlaw, ngan kahimo na niyo han ngatanan, nga makatindog kamo hin marig-on.”—Efeso 6:10, 11, 13.

¹¹ Makaduha nga ginsagda ni Pablo an iya mga igkasi-Kristiano nga isul-ot “an bug-os nga hinganiban han Dios.” An pulong nga “bug-os” nagpapasabot nga kon waray kita pagtagad ha aton pamaagi, diri kita makakaato ha pag-atake han mga demonyo. Salit, ano an importante nga mga bahin han espirituwal nga hinganiban nga ginkikinahanglan gud han mga Kristiano yana basi makaato ha mga demonyo?

“Manindog Kamo” hin Marig-on—Paonan-o?

12. Paonan-o maibabakos han mga Kristiano an kamatuoran?

¹² Hi Pablo nagsasaysay: “Sanglit pag-andam gud kamo: gamita niyo an kamatuoran sugad hin bakos ha iyo hawak; isul-ot an pagkamatadong sugad hin salipod han iyo dughan.” (Efeso 6:14, Maopay nga Sumat nga Biblia) An duha nga bahin han hinganiban nga gin-uunabi dinhi amo an bakos o takgong, ngan an salipod ha dughan. Kinahanglan hugot pirme an takgong han usa nga sundalo basi mapanalipdan an iya pig-i (mga baliatang, singit o lala, ngan ubos nga bahin han tiyan) ngan makailob han bug-at han iya espada. Ha sugad man nga paagi, an kamatuoran han Biblia kinahanglan hugot nga ibakos naton, siring pa, basi magkinabuhi kita uyon hito. May-ada ba kita eskedyol han pagbasa han Biblia adlaw-adlaw? Kaupod ba an bug-os nga pamilya? May-ada ba kita rutina ha paghisgot han inadlaw nga teksto sugad nga pamilya? Dugang pa, kinakarawat ba naton an mga pagsaysay ha mga publikasyon nga igintatagana han “matinumanon ngan maaramon nga uripon”? (Mateo 24:45, NW) Kon amo, nangangalimbasog kita ha pag-aplikar han sagdon ni Pablo. May-ada liwat kita mga video nga makakaghatag hin Kasuratanhon nga giya. An pagkapot hin marig-on ha kamatuoran makakabulig ha aton ha paghimo hin maaramon nga mga desisyon ngan makakapugong ha aton ha pagbuhat hin sayop.

13. Paonan-o naton mapapanalipdan an aton simboliko nga kasingkasing?

¹³ An literal nga salipod ha dughan nagpapanalipod ha dughan, kasingkasing, ngan iba pa nga importante nga mga organo han usa nga sundalo. Mapapanalipdan han Kristiano an iya simboliko nga kasingkasing—an iya tago nga pagkatawo—pinaagi han pagpatubo han gugma ha pagkamatadong han Dios ngan pagsunod ha matadong nga mga suruklan ni Jehova. Kon sul-ot naton an simboliko nga salipod ha dughan, diri naton paluluyahon an pwersa han Pulong han Dios. Samtang nahibabaro kita ha ‘pagdumot ha maraot, ngan paghigugma ha maopay,’ ginpupugngan naton an aton mga tiil “ha mga magraot nga dalan.”—Amos 5:15; Salmo 119:101.

14. Ano an kahulogan han mga pulong nga ‘nasul-otan an aton mga tiil han pag-andam ha maopay nga sumat han pakigdait’?

¹⁴ An mga tiil han Romano  nga mga sundalo kasagaran na nga nakasul-ot hin marig-on nga mga sandalyas para ha maiha nga mga pagmartsa ha ginatos ka kilometro nga kakalsadahan ha imperyo han Roma. Ano an kahulogan para ha mga Kristiano han mga pulong nga ‘nasul-otan an iyo mga tiil han pag-andam ha maopay nga sumat han pakigdait’? (Efeso 6:15) Nangangahulogan ito nga andam kita ha pagbuhat. Andam kita ha pagsangyaw han maopay nga sumat han Ginhadian han Dios ha tagsa nga angayan nga okasyon. (Roma 10:13-15) An aton pagin aktibo ha Kristiano nga ministeryo nagpapanalipod ha aton kontra han “mga limbong” ni Satanas.—Efeso 6:11.

15. (a) Ano an nagpapakita nga importante gud an daku nga taming han pagtoo? (b) Ano nga “magpintas nga mga pana” an mahimo makadaot ha aton pagtoo?

¹⁵ Hi Pablo nagpadayon ha pagsiring: “Dayoday [nga] dad-a niyo an pagtoo sugad hin iyo [“daku nga,” NW] taming; pinaagi han taming makakapugong kamo han ngatanan nga magpintas nga mga pana nga ipapana ha iyo han Yawa.” (Efeso 6:16, Maopay nga Sumat nga Biblia) An sagdon nga dad-on an daku nga taming han pagtoo gintikangan pinaagi han mga pulong nga “dayoday,” o ha ngatanan nga panahon, nagpapasabot nga importante gud ini nga bahin han hinganiban. Kinahanglan waray kulang ha aton pagtoo. Pariho hin daku nga nagpapanalipod nga taming, an aton pagtoo nagpapanalipod ha aton tikang ha “magpintas nga mga pana” ni Satanas. Ha ano ini nagrirepresentar yana? Amo ito an maul-ol hinduro nga mga insulto, mga buwa, ngan diri bug-os nga mga kamatuoran nga ginpapasarang han mga kaaway ngan mga apostata nga nangangalimbasog ha pagpaluya han aton pagtoo. Ini nga “mga pana” amo liwat an mga pagsulay nga magin materyalistiko, nga tungod hito mahimo kita magin okupado ha pamalit hin damu nga butang ngan maaghat pa ngani nga  subaron an mga tawo nga magarbo an pagkinabuhi. Bangin naggasto hira para ha mas daku ngan mas maopay nga mga balay ngan mga awto o naparayaw han ira marahalon nga mga alahas ngan han pinakabag-o nga mga uso han bado. Anoman an ginbubuhat han iba, kinahanglan magkaada kita han pagtoo nga marig-on gud basi masagang inin “magpintas nga mga pana.” Paonan-o kita magkakaada hin marig-on nga pagtoo ngan matipigan ito?—1 Pedro 3:3-5; 1 Juan 2:15-17.

16. Ano an makakabulig ha aton ha pagkaada hin marig-on nga pagtoo?

¹⁶ Mahimo kita magin duok ha Dios pinaagi han regular nga personal nga pag-aram ha Biblia ngan sinsero nga mga pag-ampo. Mahimo kita manginyupo kan Jehova nga parig-unon an aton pagtoo ngan katapos, ipakita pinaagi han kinahanglanon nga mga buhat nga nagios kita uyon ha aton igin-aampo. Pananglitan, nag-aandam ba kita hin maopay para ha sinemana nga Pag-aram ha Barantayan basi makagkomento? Magigin marig-on an aton pagtoo kon pag-aadman naton an Biblia ngan an basado-ha-Biblia nga mga publikasyon.—Hebreo 10:38, 39; 11:6.

17. Ha ano nga paagi mahimo naton karawaton “an pandong han kaluwasan”?

¹⁷ Gintapos ni Pablo an iya paghulagway mahitungod han espirituwal nga hinganiban pinaagi han sagdon: “Kuhaa niyo an pandong han kaluwasan, ngan an kampilan han espiritu, nga amo an pulong han Dios.” (Efeso 6:17) An pandong o helmet nagpapanalipod ha ulo ngan utok han sundalo, an sentro han paghimo hin desisyon. Ha sugad man nga paagi, an aton Kristiano nga paglaom nagpapanalipod han aton abilidad ha paghunahuna. (1 Tesalonika 5:8) Imbes nga pun-on an aton mga hunahuna hin kalibotanon nga mga tumong ngan materyalistiko nga mga hingyap, sadang isentro naton an aton panhunahuna ha aton hatag-han-Dios nga paglaom, sugad han ginbuhat ni Jesus.—Hebreo 12:2.

18. Kay ano nga diri naton sadang pasibay-an an aton regular nga pagbasa han Biblia?

¹⁸ An aton ultimo nga panalipod kontra han impluwensya ni Satanas ngan han iya mga demonyo amo an pulong o mensahe han Dios, nga iginrekord ha Biblia. Ini an usa pa nga hinungdan kon kay ano nga diri naton sadang pasibay-an an aton regular nga pagbasa han Biblia. An husto ngan hilarom nga kahibaro ha Pulong han Dios nagpapanalipod ha aton tikang ha mga buwa ni Satanas ngan ha mga propaganda han mga demonyo sugad man ha mga pulong ngan mga publikasyon han napupungot nga mga apostata.

“Mag-ampo Kamo ha Ngatanan nga Panahon”

19, 20. (a) Ano an mahitatabo kan Satanas ngan ha iya mga demonyo? (b) Ano an makakaparig-on ha aton ha espirituwal?

¹⁹ Hirani na bungkagon hi Satanas, an iya mga demonyo, ngan an maraot nga kalibotan. Maaram hi Satanas nga “halipot na la nga oras iton iya pag-ukoy.” Nasisina gud hiya ngan nakikig-away ha mga “nagbabantay han mga sugo han Dios, ngan nagtitipig han pagpamatuod ni Jesus.” (Pahayag 12:12, 17) Kinahanglan atohan naton hi Satanas ngan an iya mga demonyo.

²⁰ Mapasalamaton gud kita ha sagdon nga isul-ot an bug-os nga hinganiban tikang ha Dios! Gintapos ni Pablo an iya paghisgot mahitungod han espirituwal nga hinganiban pinaagi hini nga sagdon: “Ha bug-os nga pag-ampo ngan pakimalooy, mag-ampo kamo ha ngatanan nga panahon ha espiritu, ngan magbantay gud kamo ha bug-os nga pagpadayon ngan pakimalooy tungod ha ngatanan nga mga baraan.” (Efeso 6:18) An pag-ampo makakaparig-on ha aton ha espirituwal ngan makakabulig ha aton nga magpabilin nga alerto. Kinasingkasing nga sundon naton an mga pulong ni Pablo ngan magpadayon ha pag-ampo, kay mabulig ini ha aton nga maatohan hi Satanas ngan an iya mga demonyo.

Ano an Imo Hinbaroan?

• Paonan-o iniksister hi Satanas ngan an iya mga demonyo?

• Mationan-o kagamhanan an Yawa?

• Paonan-o naton mapapanalipdan an aton kalugaringon kontra kan Satanas ngan ha iya mga demonyo?

• Paonan-o naton maisusul-ot an bug-os nga hinganiban tikang ha Dios?

[Mga Pakiana]

[Mga Retrato ha pahina 26]

‘An mga anak nga lalaki han Dios nagtan-aw ha mga anak nga babaye han tawo’

[Retrato ha pahina 28]

Maisasaysay mo ba an unom nga bahin han aton espirituwal nga hinganiban?

[Mga Retrato ha pahina 29]

Paonan-o an pakigbahin hini nga mga buruhaton nagpapanalipod ha aton kontra kan Satanas ngan ha iya mga demonyo?