Mga Pakiana Tikang ha mga Magbarasa

Pira nga limpyo nga hayop an iginsulod ni Noe ha arka—pito han kada limpyo nga hayop o pito kapadis han kada klase?

Han natapos ni Noe an arka, hi Jehova nagsiring ha iya: “Sumulod ka ha arka, ngan an ngatanan nga imo panimalay; kay hinkit-an ko ikaw nga matadong ha atubangan ko dida hini nga katulinan. An ha imo magkuha ka ha ngatanan nga malinis nga mananap hin pito ngan pito, lalaki ngan babaye; ngan han mga mananap nga diri maglinis, duha, an lalaki ngan an babaye.” (Genesis 7:1, 2) Iginhubad han iba nga bersyon, sugad han An Maopay nga Sumat nga Biblia, Ang Biblia—Bagong Salin sa Pilipino, ngan an The New Jerusalem Bible an orihinal nga Hebreo nga “pito ka padis.”

Ha orihinal nga Hebreo, an mga pulong nga “pito ngan pito” literal nga mababasa nga “pito pito.” (Genesis 7:2) Kondi, an pag-utro hin numero ha Hebreo nga yinaknan diri nangangahulogan nga kinahanglan sumahon an duha nga numero. Pananglitan, an 2 Samuel 21:20 naghuhulagway hin “usa nga tawo nga daku in lawas, nga may-ada ha kada kamot uunom nga tudlo, ngan ha tagsa ka tiil uunom nga tudlo.” Ha Hebreo, gin-utro an numero nga “uunom.” Kondi, diri ini nangangahulogan nga an higante may-ada unom ka padis hin tudlo (o, 12) ha kada kamot ngan ha kada tiil. Sumala ha gramatika han Hebreo nga yinaknan, an pag-utro may kalabotan la ha kadamu han mga tudlo ha usa nga kamot ngan ha usa nga tiil.

Salit an “pito pito” ha Genesis 7:2 diri nangangahulogan hin pito ka padis, o 14, sugad la nga an pag-utroha han “duha” diri nangangahulogan hin duha ka padis, o upat, ha Genesis 7:9, 15. An pag-utroha han usa nga numero ha tagsa nga bersikulo nagpapasabot la hin kadamu—diri an suma han mga numero. Bisan kon “pito” nga limpyo nga hayop an gindara ha arka,” “duha” la han diri limpyo an iginsulod didto.

Kondi, ano an iginpapasabot han pagsunod dayon han mga pulong nga “lalaki ngan babaye” ha pulong nga “pito” ha Genesis 7:2? Tungod hito nahunahuna han iba nga ginsugo hi Noe nga magdara hin pito ka padis han kada limpyo nga hayop basi magdamu ito. Kondi, an limpyo nga hayop diri la ginpreserba basi magdamu. An Genesis 8:20 nagsusumat ha aton nga han pakagawas ha arka, “hi Noe nagtukod hin halaran ha kan Jehova, ngan kinuha han tagsa ka malinis nga mananap, ngan han tagsa ka malinis nga tamsi, ngan naghalad ha bawbaw han halaran hin mga halad nga sinunog.” An ikapito nga hayop tikang ha tagsa nga limpyo nga klase an iginhalad ni Noe, ngan an nabibilin nga tulo ka padis para ha pagpadamu han klase hito ha tuna.