Istorya han Kinabuhi

An Paghimo hin mga Disipulo Nakaimpluwensya han Akon Pagkinabuhi

Iginsumat ni Lynette Peters

Domingo adto nga aga. May inabot nga mga sundalo han E.U. basi ig-ibakwit kami. Usa nga maopay pumusil an nakadto ha igbaw han istraktura. Nakahapa an mga sundalo ha kabanwaan ngan nakaandam na an ira pusil. Samtang nadalagan kami nga mga misyonero ngadto ha helikopter nga naghuhulat ha amon, nangalimbasog kami nga magpabilin nga kalmado. Waray pag-iha, linarga na an helikopter. Paglabay hin dyes minutos, talwas na kami nga nakasakay ha barko han militar nga nakaangkla hirani ha baybayon.

KINABUWASAN nga aga, hinbaroan namon nga ginbombahan han mga rebelde an hotel diin kami nagtago han naglabay nga gab-i. An maiha na nga girra sibil ha Sierra Leone nga inabot na hin mga tuig, ha kaurhian nagin girra na gud. Haros hito mismo nga takna, ginpwersa an ngatanan nga langyawanon, upod na kami, nga bumaya ha nasud. Basi isaysay kon kay ano nga nahingada ako hito nga sitwasyon, ig-iistorya ko ha iyo tikang ha tinikangan.

Nagtubo ako ha British Guiana nga gintatawag nga Guyana tikang han 1966. Han batan-on pa ako han dekada 1950, waray ako ginkakabarak-an ngan marisyo an akon kinabuhi didto. Kadam-an han mga kag-anak nagpapabili gud han edukasyon, ngan an kabataan ginlalaoman nga mag-aram hin maopay. Nahinunumdoman ko pa han makausa ginpakianhan han usa nga klerk hin bangko hi Tatay, “Kay ano nga nagbabayad ka hin daku para ha edukasyon han imo mga anak?” Hi Tatay binaton, “An pinakamaopay la nga edukasyon an makakagarantiya han ira kalamposan.” Para ha iya hito nga panahon, an gimaopayi nga edukasyon makukuha la ha kilala nga mga eskwelahan. Kondi, diri mag-iiha, magbabag-o an iya panhunahuna.

 Han 11 anyos ako, nagtikang pag-aram han Biblia hi Nanay upod han mga Saksi ni Jehova. Nakatambong na hiya ha usa nga Kingdom Hall upod hin amyaw. An ira hinbatian hito nga gab-i nakakombinse ha ira nga hin-agian na nira an kamatuoran. Katapos hito, an ginhisgotan didto iginsumat ni Nanay ha usa pa nga amyaw namon. Waray pag-iha, nag-aaram na hira nga tulo upod han mga misyonero nga hira Daphne Harry (nagin Baird) ngan Rose Cuffie. Waray pa mag-usa ka tuig, nabawtismohan hira. Paglabay hin lima ka tuig, binaya hi Tatay ha Seventh-Day Adventist Church ngan nabawtismohan sugad nga usa han mga Saksi ni Jehova.

Sugad nga kabataan, ako ngan an akon duha nga manghod nga babaye—an tulo nga gimagurangi ha napulo nga anak—pirme nakadto ha urukyan han mga misyonero diin naukoy hira Daphne ngan Rose. Hito nga mga higayon, namamati kami ha ira mga eksperyensya ha kanataran. Ini nga mga misyonera nagpakita hin kalipay ha waray-kakapoy nga pag-ataman han espirituwal nga kaopayan han iba. Tungod han ira susbaranan naisilsil ha akon an hingyap nga magmisyonera.

Kondi, ano an nakabulig ha akon nga magpabilin nga nakasentro ha bug-os-panahon nga pag-alagad bisan pa kon napapalibotan ako hin mga paryente ngan kaeskwela nga interesado la ha pagkaada malampuson nga propesyon? Damu hinduro an nakakadani nga oportunidad—mahimo ako mag-aram hin abogasiya, musika, medisina, ngan iba pa. An susbaranan han akon mga kag-anak naghatag ha akon han ginkinahanglan ko nga giya. Igin-aplikar nira an kamatuoran, maduruto nga gin-adman an Biblia, ngan ginbuligan an iba nga mahibaro mahitungod kan Jehova. a Dugang pa, pirme hira nag-iimbitar hin bug-os-panahon nga mga ministro ha amon balay. An kalipay ngan katagbaw nga iginpakita hini nga kabugtoan nagparig-on han akon hingyap ha paghimo hin disipulo.

Kinse anyos ako han magpabawtismo ako. Ngan han naggradwar ako ha hayskul, nagpayunir dayon ako. Hi Philomena, nga kabulig han nars ha ospital, an siyahan nga akon nabuligan tubtob nga magdedikar hiya ngan magpabawtismo. An kalipay ha pagkita ha iya nga nagkakaada gugma kan Jehova, mas nagparig-on han akon hingyap nga magpadayon ha bug-os-panahon nga pag-alagad. Waray pag-iha katapos hito, gintanyagan ako hin mas maopay nga posisyon ha opisina han gobyerno diin nagtatrabaho ako sugad nga sekretarya. Waray ko karawata ito, kondi ginpili ko lugod nga ipadayon an pagpayunir.

Nalungon pa gihapon ako ha balay, ngan padayon nga binibisita kami hin mga misyonero. Nalipay gud ako pagpinamati han ira mga eksperyensya! Ini ngatanan nagparig-on han akon hingyap nga magmisyonera, bisan kon baga hin imposible ito. Hito nga panahon nagpapadara hin mga misyonero ha Guyana ngan tubtob pa gihapon yana. Usa ka adlaw han 1969, diri ako naglalaom nga makakarawat hin imbitasyon ha pag-eskwela ha Watchtower Bible School of Gilead ha Brooklyn, New York, kondi nalipay ako hito.

 Usa nga Toka nga Waray Ko Laomi

May-ada 54 nga estudyante tikang ha 21 nga nasud ha ika-48 nga klase han Gilead. Disisyete ha amon an solo nga kababayin-an. Bisan kon 37 ka tuig na an naglabay, matin-aw pa gihapon iton lima ka bulan ha akon hunahuna. Damu hinduro an angay hibaroan—diri la an mga kamatuoran ha Biblia kondi pati na an praktikal nga mga suhestyon ngan sagdon para ha amon sugad nga magigin mga misyonero. Pananglitan, nahibaro ako ha pagsunod hin mga instruksyon, ha pagin balanse may kalabotan ha mga uso ha pamado, ngan ha pagpadayon bisan pa ha kakurian.

Pirme pinapabug-atan han akon mga kag-anak an regular nga pagtambong ha katirok. An bisan hin-o nga nagpapasangil nga masakit kon may katirok, diri liwat tutugotan nga gumawas ha balay. Kondi, waray anay ako makatambong ha ngatanan nga katirok han nag-eskwela ako ha Gilead. Usa ka Biernes nga gab-i, nangalimbasog ako pag-esplikar kanda Don ngan Dolores Adams nga diri ako makakatambong. Hira an bethelite nga mag-asawa nga may awto nga akon sinasakyan kon may katirok. Damu gud hinduro an homework ngan mga report! Paonan-o ako makakatambong ha Teokratiko nga Eskwelahan ha Ministeryo ngan ha Katirok ha Pag-alagad? Katapos hin madaliay nga pangatadongan ni Bugto Adams, hiya nagsiring: “An imo konsensya na la an pabuota.” Ginsunod ko an iya sagdon ngan tinambong ako ha katirok hito nga gab-i o ha ngatanan nga katirok katapos hito. Ha paglabay han katuigan, labot la kon maraot hinduro an kahimtang, diri ko tinutugotan an bisan ano nga makaulang han akon pagtambong ha mga katirok.

Ha kabutngaan han amon pag-eskwela, nag-uruistorya na kami mahitungod han amon magigin toka. Pirme ko nahuhunahuna nga itutoka ako ha Guyana, diin ginkikinahanglan gud an bulig. Handurawa an akon kahipausa han mahibaroan ko nga diri ako mabalik didto. Lugod, igintoka ako ha Sierra Leone, ha Weste nga Aprika. Mapasalamaton gud ako kan Jehova nga natuman an akon hingyap nga magin misyonera ha hirayo nga lugar!

Damu Hinduro an Angay Hibaroan

“Maopay hinduro” an pinakaangayan nga mga pulong nga makakapahayag han akon siyahan nga impresyon ha Sierra Leone, upod na an damu nga kabungtoran, kabukiran, kabaybayonan ngan kadagatan hito. Kondi, an totoo nga pagkamaopay hini nga nasud aada ha mga umurukoy hito, nga tungod han gugma ngan pagkabuotan han mga tawo didto nagigin komportable bisan an langyawanon. Daku an naibulig hini nga malamposan han bag-o nga mga misyonero an kamingaw. Nalilipay an mga taga-Sierra Leone ha pag-istorya mahitungod han ira kustomre ngan kultura, ngan labi na ha pagbulig ha mga bag-ohan nga mahibaro han Krio, an nangunguna nga yinaknan han nasud.

An mga nagyayakan hin Krio may-ada mag-opay nga darawhanon. Pananglitan, Nagtatrabaho an gudti nga mga ulot o amo, nakaon an dagku, nangangahulogan nga an nagtatanom diri pirme amo an nag-aani. Angayan gud ito nga paghulagway han kawaray hustisya nga kalyap hinduro ha kalibotan!—Isaias 65:22.

Makalilipay an buruhaton nga pagsangyaw ngan paghimo hin disipulo. Talagsa gud la kami makabiling hin diri interesado ha Biblia. Damu ka tuig na nga ginbubuligan han mga misyonero ngan mag-iha na nga Saksi ni Jehova an mga tawo—batan-on ngan lagas—tikang ha ngatanan nga kahimtang ha kinabuhi ngan gintikangan nga tribo nga kumarawat han kamatuoran.

 Hi Erla St. Hill, an siyahan nga misyonera nga akon kaupod, diri nakakapoy ha pagbuhat. An iya kamaduruto ha pag-ataman han iya buruhaton ha amon inuukyan haros kapariho han iya kadasig ha pagministeryo. Ginbuligan niya ako nga masabtan an importansya han damu nga butang, sugad han pagin pamilyar ha mga amyaw, pagbisita ha masakit nga mga Saksi ngan mga interesado, ngan pagsuporta ngan pagliaw ha mga namatayan. Iginpasilsil liwat niya ha akon an importansya han diri gud pagbaya ha teritoryo katapos han pagsangyaw nga diri nahapit, bisan hin madaliay la, ha pangumusta ha kabugtoan nga naukoy hito nga lugar. Pinaagi ha pagbuhat hini, nagkaada dayon ako mga nanay, kabugtoan, ngan kasangkayan, ngan nagin panimalay ko an akon teritoryo.—Markos 10:29, 30.

Nakultibar ko liwat an marig-on nga bugkos han pagkamagsangkay ha mga misyonero nga nakaupod ko. Upod ha ira an akon kakwarto nga hi Adna Byrd, nga nag-alagad ha Sierra Leone butnga han 1978 ngan 1981, ngan hi Cheryl Ferguson, nga nagin kakwarto ko ha naglabay nga 24 ka tuig.

Mga Kakurian Tungod han Girra Sibil

Han 1997, mga usa ka bulan katapos idedikar an bag-o nga sanga nga opisina ha Sierra Leone, napiritan kami nga pumalagiw ha nasud tungod han girra, sugad han gin-unabi na. Unom ka tuig antes hito, nabantad kami han pagtoo han mga Saksi ha Liberia nga pinalagiw ngadto ha Sierra Leone basi malikyan an girra didto. An iba nagkaabot nga waray bisan ano. Bisan pa han kakurian, adlaw-adlaw nga nakigbahin hira ha ministeryo. Makapabantad gud nga makita an ira gugma kan Jehova ngan ha mga tawo.

Yana nga kami mismo mga dinangop ha Guinea, ginsubad namon an ginbuhat han kabugtoan nga taga-Liberia ngan padayon nga sinarig kami kan Jehova ngan gin-una an mga buruhaton han Ginhadian. Paglabay hin usa ka tuig, nakabalik kami ha Sierra Leone, kondi ha sulod hin pito ka bulan, nagtikang na liwat an araway ngan kinahanglan pumalagiw na liwat kami ngadto ha Guinea.

Waray pag-iha, ginsumatan kami nga an usa han nag-aaraway nga grupo nagkakampo ha amon inuukyan ha Kissy ngan an ngatanan nga gamit namon ginpangawat o gin-guba. Imbes nga masubo, mapasalamaton kami nga buhi kami. Gutiay la nga panag-iya an nahibilin ha amon, kondi naatubang namon ito nga kakurian.

Katapos han amon ikaduha nga pag-ibakwit, ako ngan an akon kakwarto nga hi Cheryl  nagpabilin ha Guinea. Nangangahulogan ini hin pag-aram han Franses nga yinaknan. An iba han akon igkasi-misyonero madagmit nga nakayakan hin Franses, ngan diri nababaraka bisan kon hira nagsasayop. Kondi naaaringit ako kon nagsasayop ako ha pagyakan hin Franses, salit ginagamit ko la ito kon kinahanglanon gud. Nakakapanluya gud hinduro ito. Kinahanglan adlaw-adlaw ko nga pahinumdumon an akon kalugaringon kon kay ano nga aadto ako ha Guinea—basi buligan an iba nga mahibaro mahitungod kan Jehova.

Hinay-hinay nga nag-uswag ako pinaagi ha pag-aram, pagpamati ha mag-opay mag-Franses, ngan pagpabulig ha kabataan ha kongregasyon nga diri nag-aalang ha pagyakan han ira karuyag. Katapos, ha diri linalaoman, may inabot nga napapanahon nga bulig tikang ha organisasyon ni Jehova. Tikang han Septyembre 2001, an Aton Ministeryo han Ginhadian may-ada mga suhestyon ha pagtanyag han mga magasin dugang pa ha mga ideya ha pagtanyag hin mga libro ngan brosyur ha mga tawo nga magkalain-lain an relihiyon. Yana kon nagsasangyaw ako, mas may kompyansa na ako, bisan kon diri ko naipapahayag an akon mga ideya ha Franses hin sugad kaopay kon ipapahayag ko ito ha akon kalugaringon nga yinaknan.

An pagtubo ha daku nga pamilya nakabulig gud ha akon nga diri makurian ha paglungon kaupod han damu nga tawo, nga may-ada panahon nga inabot hin 17. Durante han akon 37 ka tuig nga pagmisyonera, nakaupod ko na an sobra 100 nga misyonero. Daku gud nga pribilehiyo nga damu hinduro an makilala, nga an ngatanan magkalain-lain an personalidad kondi uusa la an tumong! Ngan daku gud nga kalipay an magin igkasi-magburuhat han Dios ngan makita an mga nakarawat han kamatuoran ha Biblia!—1 Korinto 3:9.

Tikang han magmisyonera na ako, damu nga importante nga okasyon ha akon mga kapamilya an waray ko na matambongi, sugad han mga kasal han kadam-an han akon kamanghoran ngan diri ko agsob makita an akon mga umangkon sugad han akon karuyag. Sakripisyo ito para ha akon ngan ha akon pamilya, nga diri-hakugnon nga nagdadasig ha akon nga magpadayon ha pagmisyonera.

Kondi, an ngatanan nga ginhandom ko ha balay kaupod han akon pamilya, naieksperyensyahan ko ha panapanahon ha akon pag-alagad sugad nga misyonera. Bisan kon ginpili ko magpabilin nga waray asawa, damu an akon espirituwal nga mga anak, diri la adton akon gindumarahan hin pag-aram ha Biblia kondi pati an iba nga nagin duok ha akon. Dugang pa, nakita ko an ira mga anak nga nagtubo, nag-asawa, ngan nagpadaku han ira mga anak ha dalan han kamatuoran. An iba ha ira, pariho ha akon, nagin paagi na liwat han ira pagkinabuhi an paghimo hin disipulo nga buruhaton.

[Footnote]

[Mga Mapa ha pahina 15]

(Para ha aktuwal nga format, kitaa an publikasyon)

Igintoka ako ha Sierra Leone, ha Weste nga Aprika

GUINEA

SIERRA LEONE

[Retrato ha pahina 13]

An akon duha nga bugto nga kaupod ko pirme didto ha urukyan han mga misyonero han dekada han 1950

[Retrato ha pahina 14]

Upod han akon mga kaklase ha ika-48 nga klase han Gilead

[Retrato ha pahina 16]

Han igdedikar an mga pasilidad han sanga nga opisina ha Sierra Leone