An Pagpamiling han Husto nga mga Baton

Paonan-o ko mapapanalipdan an akon kahimsog?

Ano an akon mahihimo basi magin mas malipayon an akon pamilya?

Paonan-o ko mapapauswag an posibilidad nga diri ako mapaiwas ha trabaho?

IGINPAKIANA mo na ba an usa hito nga mga pakiana? Nakabiling ka ba hin praktikal nga mga baton nga epektibo gud? Kada tuig, mga 2,000 nga magkalain-lain nga libro an iginpupublikar nga naghahatag hin sagdon mahitungod hini ngan ha iba pa nga importante nga topiko. Ha Britanya la, kada tuig nagasto an mga magbarasa hin mga 80 milyon pounds (mga $150 milyon, E.U.) ha mga libro nga nagsasagdon kon paonan-o aatubangon an mga problema ha kinabuhi. Ha Estados Unidos, kada tuig mga $600 milyon an kantidad han naibabaligya nga libro nga naghihisgot mahitungod ha pagbulig ha kalugaringon. Sigurado nga diri la ikaw an namimiling hin mag-opay nga sagdon kon paonan-o magkikinabuhi ha kada adlaw.

May kalabotan ha sagdon nga nabilngan dinhi hinin damu hinduro nga publikasyon, usa nga awtor an nagsiring: “Damu nga bag-o nga libro an nag-uutro la han nahisurat na.” Oo, damu han sagdon hini nga mga libro an nag-uutro la han kinaadman nga nakarekord ha usa han gidadaani nga libro ha kalibotan. Ini nga libro sigurado nga amo an pinakadamu an naipanaltag na. Naihubad na ito ha bug-os o ha bahin ha mga 2,400 nga yinaknan. Ha kabug-osan, sobra 4.6 bilyon an naimprinta na ha bug-os nga kalibotan. Ito nga libro amo an Biblia.

An Biblia matin-aw nga nasiring: “An ngatanan nga mga Baraan nga Surat nga ginpakaaghat han Dios may kapulsanan man ha pagtututdoan, ha pagbadlong, ha pagsaway, ha panutdoan nga ha katadongan.” (2 Timoteo 3:16) Oo, waray isurat an Biblia basi magin libro ha pagbulig ha kalugaringon. An siyahan nga katuyoan hito amo an pagpahayag han kaburut-on han Dios para ha katawohan. Bisan pa hito, damu an impormasyon ha Biblia kon paonan-o aatubangon an mga problema nga komon ha aton ngatanan, ngan nagsasaad ito nga adton nasunod ha giya hito magpapahimulos mismo hito. (Isaias 48:17, 18) Kon iaaplikar an praktikal nga sagdon hito pirme maglalampos, anoman an rasa, kultura, o edukasyon han usa. Kay ano nga diri basahon an sunod nga artikulo ngan personal nga usisaha kon praktikal ba an ginsisiring han Biblia mahitungod ha kahimsog, pamilya, ngan trabaho?