Magin Maunungon kan Kristo Ngan ha Iya Matinumanon nga Uripon
Magin Maunungon kan Kristo Ngan ha Iya Matinumanon nga Uripon
‘Palalabihon hiya han iya agaron ha ngatanan nga aada ha iya.’—MATEO 24:45-47.
1, 2. (a) Sumala ha Kasuratan, hin-o an aton Lider? (b) Ano an nagpapakita nga aktibo nga nangunguna hi Kristo ha Kristiano nga kongregasyon?
“DIRI niyo tugotan an mga tawo nga tawagon kamo nga ‘mga lider’—usa la an iyo lider, hi Kristo!” (Mateo 23:10, The New Testament in Modern English) Hini nga mga pulong, iginpatin-aw ni Jesus ha iya mga sumurunod nga waray tawo dinhi ha tuna an magigin ira lider. Langitnon an ira Lider—hi Jesu-Kristo mismo. An Dios an nagpili kan Jesus hito nga katungdanan. Hi Jehova ‘nagbanhaw ha iya tikang ha mga minatay, ngan iginhatag niya hiya nga ulo han ngatanan nga mga bagay ha singbahan, nga amo an iya lawas.’—Efeso 1:20-23.
2 Tungod kay hi Kristo an “ulo han ngatanan nga mga bagay” may kalabotan ha Kristiano nga kongregasyon, may-ada hiya awtoridad ha ngatanan nga nahitatabo ha sulod han kongregasyon. Nakikita niya an ngatanan nga nahitatabo ha kongregasyon. Inoobserbahan niya hin maopay an espirituwal nga kahimtang han tagsa nga grupo han mga Kristiano, o kongregasyon. Matin-aw nga iginsasaysay ini ha pahayag nga iginhatag kan apostol Juan ha kataposan han siyahan nga siglo K.P. Ha pito nga kongregasyon, lima ka beses nga nagsiring hi Jesus nga maaram hiya han ira mga buhat, han ira mag-opay nga mga kalidad ngan han ira mga kaluyahan, ngan iya ginsagdonan ngan gindasig hira. (Pahayag 2:2, 9, 13, 19; 3:1, 8, 15) Makakatoo gud kita nga maaram liwat hi Kristo han espirituwal nga kahimtang han iba nga mga kongregasyon ha Asia Minor, Palestina, Sirya, Babilonya, Gresya, Italya, ngan ha iba pa nga mga lugar. (Buhat 1:8) Kumusta man yana?
Usa nga Matinumanon nga Uripon
3. Kay ano nga angayan nga igpariho hi Kristo ha ulo ngan an iya kongregasyon ha lawas?
3 Katapos banhawon hi Jesus ngan antes gud han iya pagsaka ngadto ha iya Amay ha langit, ginsumatan niya an iya mga disipulo: “Ngatanan nga kagamhanan iginhatag ha akon ha langit ngan ha tuna.” Nagsiring liwat hiya: “Kitaa, ako upod ha iyo ha ngatanan nga mga adlaw tubtob ha kataposan han kalibotan.” (Mateo 28:18-20) Padayon nga makakaupod nira hiya sugad nga ira Ulo nga aktibo nga nangunguna ha ira. Ha mga surat ha mga Kristiano ha Efeso ngan ha Kolosas, iginpariho ni apostol Pablo an Kristiano nga kongregasyon ha “lawas,” nga an Ulo amo hi Kristo. (Efeso 1:22, 23; Kolosas 1:18) An libro nga The Cambridge Bible for Schools and Colleges nasiring nga ini nga metapora “nagpapasabot diri la han importante nga pakighiusa ha Ulo, kondi nga ginigiyahan liwat han Ulo an mga membro. Hira an Iya mga instrumento.” Ano nga grupo an ginagamit ni Kristo sugad nga iya instrumento tikang nga tinagan hiya hin gahum ha Ginhadian han 1914?—Daniel 7:13, 14.
4. Sugad han igintagna ni Malakias, ano an hin-agian ni Jehova ngan ni Kristo Jesus han inabot hira ha pag-usisa ha espirituwal nga templo?
4 Hi Malakias nagtagna nga hi Jehova, “an Ginoo,” nga inupdan han iya “sinugo han kauyonan,” an iya bag-o la nga nahitrono nga Anak nga hi Kristo Jesus, maabot ha paghukom ngan ha pag-usisa ha Iya “templo,” o espirituwal nga balay han pagsingba. ‘An panahon ha pagtikang han paghukom ha balay han Dios’ matin-aw nga inabot han 1918. a (Malakias 3:1; 1 Pedro 4:17) Husto nga gin-usisa adton nag-aangkon nga nagrirepresentar ha Dios ngan ha iya totoo nga pagsingba ha tuna. Iginsalikway an mga relihiyon han Kakristianohan, nga damu ka siglo na nga nagtututdo hin mga doktrina nga nagpapasipara ha Dios ngan duro nga nahiupod ha pamatay durante han Girra ha Kalibotan I. Usa nga matinumanon nga nanhibilin han dinihogan-han-espiritu nga mga Kristiano an ginsarihan, ginputli sugad hin ha kalayo, ngan inuyonan, salit nagin katawohan nga “[naghahalad] ngadto kan Jehova hin mga halad ha pagkamatadong.”—Malakias 3:3.
5. Uyon ha tagna ni Jesus mahitungod han iya “pagkanhi,” hin-o an napamatud-an nga amo an matinumanon nga “uripon”?
5 Uyon ha tagna ni Malakias, an tigaman nga may-ada damu kalain nga bahin nga iginhatag ni Jesus ha iya mga disipulo basi makilala nira an panahon han iya “pagkanhi, ngan [han] kataposan han kalibotan” nag-upod han pagkilala ha grupo nga “uripon.” Hi Jesus nagsiring: “Hin-o hadto nga uripon nga masugot ngan buotan [“matinumanon ngan maaramon nga uripon,” NW], nga pinalabi han iya agaron ha iya balay, basi nga maghatag ha ira hin pagkaon ha igo [“husto,” NW] nga panahon? Baraan adton uripon, nga kon umabot an iya agaron, hiaagian hiya nga magbubuhat hin sugad. Matuod ako nasiring ha iyo, nga iya palalabihon hiya ha ngatanan nga aada ha iya [“ngatanan nga iya panag-iya,” NW].” (Mateo 24:3, 45-47) Han ‘inabot’ hi Kristo basi usisahon an “uripon” han 1918, hin-agian niya an dinihogan-han-espiritu nga nanhibilin han matinumanon nga mga disipulo nga tikang han 1879 nagamit na hini nga magasin ngan han iba pa nga basado ha Biblia nga mga publikasyon ha pagtagana hin espirituwal nga pagkaon ha husto nga panahon. Kinarawat niya hira ngatanan sugad nga iya instrumento, o “uripon,” ngan han 1919 igintapod ha ira an pagmangno ha ngatanan nga iya panag-iya ha tuna.
Pagmangno ha mga Panag-iya ni Kristo ha Tuna
6, 7. (a) Ano an iba nga termino nga ginamit ni Jesus ha pag-unabi han iya matinumanon nga “uripon”? (b) Ano an iginpapasabot han paggamit ni Jesus han pulong nga “tinaporan”?
6 Pipira ka bulan antes igintagna ni Jesus an mahitungod han tigaman han iya presensya, upod na an pag-eksister han usa nga “uripon” nga nagrirepresentar ha iya ha tuna, ginamit niya an iba nga termino ha pag-unabi hini nga “uripon” nga nagpapatin-aw han mga responsabilidad han uripon. Hi Jesus nagsiring: “Hin-o ba an matinumanon ngan buotan nga tinaporan, nga pinalabi han agaron ha iya panimalay, basi maghatag han bahin nira nga karan-on han iya panahon? Matuod, ako nasiring ha iyo, nga iya palalabihon hiya ha ngatanan nga aada ha iya.”—Lukas 12:42, 44.
7 Dinhi an uripon tinatawag nga tinaporan, usa nga pulong nga iginhubad tikang ha Griego nga termino nga nagpapasabot han “paramangno han panimalay o estado.” An grupo nga tinaporan diri la magigin usa nga grupo han intelihente nga mga tawo nga nagsasaysay hin makapainteres nga mga punto tikang ha Biblia. Dugang pa ha pagtagana hin masustansya nga espirituwal nga pagkaon ha husto nga panahon, ‘an matinumanon nga tinaporan’ itutoka ha pagmangno ha ngatanan nga surugoon ni Kristo ngan ha pag-ataman han kongregasyon ni Kristo ngan han mga buruhaton hito ha tuna, an ngatanan nga iya panag-iya. Ano ini nga mga panag-iya?
8, 9. Ano nga mga panag-iya an igintoka ha uripon nga mangnoan?
8 Upod han mga responsabilidad han uripon amo an pagmangno ha mga pasilidad nga ginagamit han mga sumurunod ni Kristo ha pagtuman han ira Kristiano nga mga buruhaton, sugad han sentro nga opisina ha kalibotan ngan mga sanga nga opisina han mga Saksi ni Jehova, sugad man han ira mga lugar para ha pagsingba—mga Kingdom Hall ngan Assembly Hall—ha bug-os nga kalibotan. Labaw pa hito, gindudumara liwat han uripon an makaparig-on ha espirituwal nga mga programa han pag-aram ha Biblia ha sinemana nga mga katirok ngan ha mga asembleya ngan mga kombensyon. Hini nga mga katirok, iginhahatag an impormasyon mahitungod han katumanan han mga tagna han Biblia ngan an napapanahon nga giya kon paonan-o iaaplikar an mga prinsipyo han Biblia ha adlaw-adlaw nga pagkinabuhi.
9 Responsabilidad liwat han tinaporan an pagmangno han pinakaimportante nga buruhaton nga pagsangyaw “hinin maopay nga sumat han ginhadian” ngan panhimo hin “mga tinon-an ha ngatanan nga nasud.” Kaupod hini an pagtutdo ha mga tawo ha pagbuhat han ngatanan nga iginsugo han Ulo han kongregasyon, hi Kristo, nga buhaton durante hinin panahon han kataposan. (Mateo 24:14; 28:19, 20; Pahayag 12:17) An pagsangyaw ngan pagtutdo nga buruhaton nagresulta hin “daku nga panon” han maunungon nga mga kaupod han dinihogan nga nanhibilin. Inin “birilhon nga mga butang han ngatanan nga nasud” sigurado nga bahin han presyoso nga mga “panag-iya” ni Kristo nga ginmamangnoan han matinumanon nga uripon.—Pahayag 7:9, NW; Hagay 2:7.
Usa nga Representante nga Nagmamando nga Lawas
10. Ano nga grupo nga igintoka ha paghimo hin mga desisyon an naeksister ha siyahan nga siglo, ngan ano an epekto hito ha mga kongregasyon?
10 An mabug-at nga mga responsabilidad han matinumanon nga uripon matin-aw nga nag-uupod han paghimo hin damu nga desisyon. Ha siyahan nga Kristiano nga kongregasyon, an mga apostol ngan mga tigurang ha Jerusalem amo an nagrepresentar han uripon nga klase ha paghimo hin mga desisyon para ha bug-os nga Kristiano nga kongregasyon. (Buhat 15:1, 2) An mga desisyon hinin siyahan-siglo nga nagmamando nga lawas iginpapahibaro ha mga kongregasyon pinaagi han mga surat ngan nagbibiyahe nga mga representante. Malipayon nga kinarawat han siyahan nga mga Kristiano inin matin-aw nga giya, ngan an ira kinaburut-on nga kooperasyon ha nagmamando nga lawas nagresulta hin kamurayawan ngan pagkaurosa.—Buhat 15:22-31; 16:4, 5; Filipos 2:2.
11. Hin-o an ginagamit ni Kristo yana ha paggiya ha iya kongregasyon, ngan ano an sadang magin pagtagad naton hini nga grupo han dinihogan nga mga Kristiano?
11 Sugad ha tinikangan han Kristiano nga panahon, usa ka gutiay nga grupo han dinihogan-han-espiritu nga mga paramangno an nagkukompwesto han Nagmamando nga Lawas han mga sumurunod ni Kristo ha tuna yana. Pinaagi han iya “too nga kamot,” nga nagsisimbolo han iya ginagamit nga gahum, ginigiyahan ni Kristo, nga Ulo han kongregasyon, inin matinumanon nga kalalakin-an samtang ira ginmamangnoan an buruhaton han Ginhadian. (Pahayag 1:16, 20) Ha istorya ha kinabuhi ni Albert Schroeder, usa nga maiha nga membro han Nagmamando nga Lawas nga bag-o la nga nakatapos han iya tunan-on nga kinabuhi, hiya nagsurat: “An Nagmamando nga Lawas nagkakatirok kada Mierkoles, gintitikangan an katirok pinaagi hin pag-ampo ngan naghahangyo han giya han espiritu ni Jehova. Pinangangalimbasogan gud nira nga tagdon an tagsa nga butang ngan ipahiuyon an tagsa nga desisyon ha Pulong han Dios, an Biblia.” b Makakasarig kita ha sugad matinumanon nga dinihogan nga mga Kristiano. Mahitungod ha ira labi na, sadang sundon naton an sugo ni apostol Pablo: “Magtuman ngan magpasakop kamo ha iyo mga magmarando: kay nagmamangno hira tungod ha iyo mga kalag, sugad nga hira an maghahatag hin kahusayan; basi nga pagbuhaton ini nira ha kalipayan; ngan diri ha kasakitan: kay ini mawawaray kapulsanan ha iyo.”—Hebreo 13:17.
Pagpakita hin Husto nga Pagtahod ha Matinumanon nga Uripon
12, 13. Ano an Kasuratanhon nga mga hinungdan ha pagpakita hin pagtahod ha uripon nga klase?
12 Usa nga importante nga hinungdan ha pagpakita hin husto nga pagtahod ha matinumanon nga uripon nga klase amo nga kon ginbubuhat naton ito, ha pagkamatuod, ipinapakita naton an pagtahod ha Agaron, hi Jesu-Kristo. Hi Pablo nagsurat mahitungod han mga dinihogan: “An gintawag nga linuwas, amo an uripon ni Kristo. Kay pinalit kamo.” (1 Korinto 7:22, 23; Efeso 6:6) Salit, kon maunungon nga nagpapasakop kita ha giya han matinumanon nga uripon ngan han Nagmamando nga Lawas hito, nagpapasakop kita kan Kristo, an Agaron han uripon. An aton pagpakita hin husto nga pagtahod ha instrumento nga ginagamit ni Kristo ha pagmangno ha iya mga panag-iya ha tuna usa ka paagi nga dayag nga kinikilala naton nga “hi Jesu-Kristo amo an Ginoo, ha himaya han Dios nga Amay.”—Filipos 2:11.
13 Usa pa nga Kasuratanhon nga hinungdan ha pagpakita hin pagtahod ha matinumanon nga uripon amo nga an dinihogan nga mga Kristiano ha tuna simboliko nga iginhuhulagway ha Biblia sugad nga “templo” nga inuukyan ni Jehova “ha espiritu.” Tungod hito, hira “baraan.” (1 Korinto 3:16, 17; Efeso 2:19-22) Dida hini nga baraan nga templo nga klase igintapod ni Jesus an iya mga panag-iya ha tuna, nga nangangahulogan nga may-ada mga katungod ngan mga responsabilidad ha sulod han Kristiano nga kongregasyon nga esklusibo nga iginhatag ngada hinin grupo nga uripon. Tungod hini, gintatagad han ngatanan ha kongregasyon nga sagrado nga obligasyon an pagsunod ngan pagsuporta ha giya nga nagtitikang ha matinumanon nga uripon ngan ha Nagmamando nga Lawas hito. Oo, gintatagad han ‘iba nga mga karnero’ nga daku nga pribilehiyo an pagbulig ha uripon nga klase ha pagmangno ha mga panag-iya han Agaron.—Juan 10:16.
Maunungon nga Pagsuporta ha mga Dinihogan
14. Sugad han igintagna ni Isaias, ha ano nga paagi naglalakat an iba nga mga karnero ha urhi han dinihogan nga uripon nga klase ngan nag-aalagad sugad nga “diri-binabayaran nga mga trabahador”?
14 An mapainubsanon nga pagpasakop han iba nga mga karnero ha dinihogan nga mga membro han espirituwal nga Israel igintagna ni Isaias: “An buhat [“diri-binabayaran nga mga trabahador,” NW] han Ehipto, ngan an ibaraligya han Etiopia, ngan han mga Sabeahanon, mga tawo nga higtaas an tindog, makanhi ha imo, ngan hira maiimo; hira maglalanat ha imo; ha mga talikara makanhi hira; ngan hira mahapa ngada ha imo, hira makikimalooy ha imo, ha pagsiring: Ha waray ruhaduha an Dios aada ha imo; ngan waray lain, waray [lain nga] Dios.” (Isaias 45:14) An iba nga mga karnero yana simboliko nga naglalanat o naglalakat ha urhi han dinihogan nga uripon nga klase ngan han Nagmamando nga Lawas hito, nasunod ha ira pagpanguna. Sugad nga “diri-binabayaran nga mga trabahador,” kinaburut-on nga ginagamit han iba nga mga karnero an ira pisikal nga kusog ngan an ira mga katigayonan ha pagsuporta ha bug-os-kalibotan nga pagsangyaw nga igintoka ni Kristo ha iya dinihogan nga mga sumurunod dinhi ha tuna.—Buhat 1:8; Pahayag 12:17.
15. Ano an igintagna han Isaias 61:5, 6 mahitungod han relasyon han iba nga mga karnero ngan han espirituwal nga Israel?
15 An iba nga mga karnero malipayon ngan mapasalamaton ha pag-alagad kan Jehova ilarom han pagmangno han uripon nga klase ngan han Nagmamando nga Lawas hito. Kinikilala nira an mga dinihogan sugad nga mga membro han ‘Israel han Dios.’ (Galasia 6:16) Sugad nga simboliko nga “mga dumuruong” nga nakikig-upod ha espirituwal nga Israel, malipayon nga nag-aalagad hira sugad nga “mga mag-aarado” ngan “mga parapangapon han balagon han ubas” ilarom han giya han mga dinihogan, an “mga saserdote ni Jehova” ngan ‘mga mag-aalagad han Dios.’ (Isaias 61:5, 6) Madasigon nga nakikigbahin hira ha pagsangyaw hinin maopay nga sumat han Ginhadian ngan ha paghimo hin mga disipulo ha ngatanan nga nasud. Bug-os-kasingkasing nga nabulig hira ha uripon nga klase ha pagbantay ngan pagmangno ha bag-o la nga hin-agian nga sugad-karnero nga mga tawo.
16. Ano an nagpapagios ha iba nga mga karnero nga maunungon nga suportahan an matinumanon ngan maaramon nga uripon?
16 Kinikilala han iba nga mga karnero nga daku nga kapulsanan an ira nakakarawat tungod han maduruto nga mga pangalimbasog han matinumanon nga uripon ha paghatag ha ira han napapanahon nga espirituwal nga pagkaon. Mapainubsanon nga kinikilala nira nga kon diri tungod han bulig han matinumanon ngan maaramon nga uripon, gutiay la an ira hibabaroan o waray hira hibabaroan mahitungod han presyoso nga mga kamatuoran han Biblia, sugad han pagkasoberano ni Jehova, han pagbaraan han iya ngaran, han Ginhadian, han bag-o nga mga langit ngan bag-o nga tuna, han kalag, han kahimtang han mga patay, ngan han totoo nga pangirilal-an ni Jehova, han iya Anak, ngan han baraan nga espiritu. Tungod han bug-os nga pagpasalamat ngan pagkamaunungon, an iba nga mga karnero mahigugmaon nga nasuporta ha dinihogan nga “kabugtoan” ni Kristo ha tuna durante hini nga panahon han kataposan.—Mateo 25:40.
17. Ano an nakita han Nagmamando nga Lawas nga kinahanglan buhaton, ngan ano an paghihisgotan ha masunod nga artikulo?
17 Tungod kay nagtitikaguti na an mga dinihogan nga aanhi pa ha tuna, diri hira mahimo magin presente ha ngatanan nga kongregasyon ha pagsiguro nga maataman an mga panag-iya ni Kristo. Salit, an Nagmamando nga Lawas nagpipili hin kalalakin-an tikang ha iba nga mga karnero ha pagmangno ha mga sanga nga opisina, distrito, sirkito, ngan mga kongregasyon han mga Saksi ni Jehova. An aton ba disposisyon ngada hinin pinili nga mga magbarantay may-ada kalabotan ha aton pagkamaunungon kan Kristo ngan ha iya matinumanon nga uripon? Paghihisgotan ini ha masunod nga artikulo.
[Mga footnote]
a Para ha detalyado nga paghisgot hini nga topiko, kitaa An Barantayan, Marso 1, 2004, pahina 13-18, ngan Disyembre 1, 1992, pahina 19.
b Iginpublikar ha Marso 1, 1988 nga gowa han The Watchtower, pahina 10-17.
Sugad nga Repaso
• Hin-o an aton Lider, ngan ano an nagpapakita nga maaram hiya han mga kahimtang ha sulod han mga kongregasyon?
• Han gin-usisa an “templo,” hin-o an hin-agian nga nagbubuhat sugad nga matinumanon nga uripon, ngan ano nga mga panag-iya an igintapod ha ira?
• Ano an Kasuratanhon nga mga hinungdan nga kinahanglan maunungon nga suportahan naton an matinumanon nga uripon?
[Mga Pakiana]
[Mga Retrato ha pahina 23]
Upod han mga “panag-iya” nga ginmamangnoan han “tinaporan” amo an materyal nga mga panag-iya, espirituwal nga mga programa, ngan an pagsangyaw nga buruhaton
[Retrato ha pahina 25]
An mga membro han iba nga mga karnero nasuporta ha matinumanon nga uripon nga klase pinaagi han ira madasigon nga pagsangyaw