Mapainubsanon nga Magpasakop ha Mahigugmaon nga mga Magbarantay
Mapainubsanon nga Magpasakop ha Mahigugmaon nga mga Magbarantay
“Magtuman ngan magpasakop kamo ha iyo mga magmarando.”—HEBREO 13:17.
1, 2. Ano nga mga teksto an nagpapakita nga mahigugmaon nga mga Magbarantay hi Jehova ngan hi Jesus?
HI Jehova nga Dios ngan an iya Anak, hi Jesu-Kristo, mahigugmaon nga mga Magbarantay. Hi Isaias nagtagna: “Kitaa an Ginoo nga hi Jehova makanhi sugad hin usa nga makusganon, ngan an iya butkon maglalarang ha iya. . . . Hiya matubong han iya kapangon nga kakarnerohan sugad hin magbarantay han mga karnero, iya pagtitirukon an mga nati nga karnero dida ha iya butkon, ngan pagdadad-on hira ha iya dughan ngan magmamando ha malumo hadton may-ada han ira kabataan.”—Isaias 40:10, 11.
2 Ito nga tagna mahitungod han pagpahiuli siyahan nga natuman han an usa nga grupo han nanhibilin nga mga Judio binalik ha Juda han 537 A.K.P. (2 Kronikas 36:22, 23) Natuman liwat ito han ginluwas han mas Harangdon nga Ciro, hi Jesu-Kristo, an dinihogan nga nanhibilin tikang ha ‘Babilonya nga Daku’ han 1919. (Pahayag 18:2; Isaias 44:28) Hiya an “butkon” ni Jehova para ha pagmando, nga nagtitirok han kakarnerohan ngan mahigugmaon nga nagbabantay ha ira. Hi Jesus nagsiring: “Ako amo an maopay nga paramangno han mga karnero, ngan ako nakilala ha akon kalugaringon [nga mga karnero], ngan an akon kalugaringon [nga mga karnero] nakilala ha akon.”—Juan 10:14.
3. Ha ano nga paagi ipinapakita ni Jehova an mahigugmaon nga pagtagad ha paagi han pagtrato ha iya mga karnero?
3 An tagna ha Isaias 40:10, 11 nagpapabug-at han mahigugmaon nga pagbantay ni Jehova ha iya katawohan. (Salmo 23:1-6) Durante han ministeryo ni Jesus ha tuna, ipinakita liwat niya an mahigugmaon nga pagtagad ha iya mga disipulo ngan ha katawohan ha kabug-osan. (Mateo 11:28-30; Markos 6:34) Nangalas hi Jehova ngan hi Jesus ha kawaray-kalooy han mga magbarantay, o mga lider, han Israel, nga nagpasibaya gud ngan nag-abuso ha ira mga panon. (Esekiel 34:2-10; Mateo 23:3, 4, 15) Hi Jehova nagsaad: “Akon luluwason an akon kapangon nga kakarnerohan, ngan diri na hira maaamo an pangirinaunon; ngan ako maghuhukom ha katunga-tungaan han kakarnerohan ngan han kakarnerohan. Ngan ako magbubutang mausa nga magbarantay ha ira, ngan iya hira panunubongan, bisan an akon surugoon nga hi David; iya hira panunubongan, ngan hiya an maiira magbarantay.” (Esekiel 34:22, 23) Hini nga panahon han kataposan, hi Jesu-Kristo, an mas Harangdon nga David, amo an ‘uusa nga paramangno’ nga ginpili ni Jehova ha pag-ataman ha ngatanan nga Iya surugoon ha tuna, an dinihogan-han-espiritu nga mga Kristiano ngan an ‘iba nga mga karnero.’—Juan 10:16.
Mga Regalo ni Jehova ha Kongregasyon
4, 5. (a) Ano nga presyoso nga regalo an iginhatag ni Jehova ha iya katawohan ha tuna? (b) Ano nga regalo an iginhatag ni Jesus ha iya kongregasyon?
4 Pinaagi han pagpabangon hin ‘uusa nga paramangno,’—hi Jesu-Kristo—ha Iya mga surugoon ha tuna, hi Jehova naghatag hin presyoso nga regalo ha Kristiano nga kongregasyon. Inin regalo nga langitnon nga Lider igintagna ha Isaias 55:4: “Kitaa, ako naghatag ha iya sugad nga usa nga saksi ha mga katawohan, usa nga magmarando ngan maglalarang ha mga katawohan.” An dinihogan nga mga Kristiano ngan an mga membro han “daku nga panon” gintitirok tikang ha ngatanan nga nasud, tribo, katawohan, ngan yinaknan. (Pahayag 5:9, 10; 7:9, NW) Hira an nagkukompwesto han internasyonal nga kongregasyon, ‘usa nga panon,’ ilarom han pagpanguna han ‘uusa nga paramangno,’ hi Kristo Jesus.
5 Hi Jesus naghatag liwat hin presyoso nga regalo ha iya kongregasyon ha tuna. Naghatag hiya hin matinumanon nga kalalakin-an nga nagsusubad kan Jehova ngan kan Jesus, ngan mahigugmaon nga nagbabantay ha panon. Gin-unabi ni apostol Pablo an mahitungod hinin mahigugmaon nga regalo ha iya surat ha mga Kristiano ha Efeso. Hiya nagsurat: “Kon hiya sumaka ngadto ha kahitas-an, gindara niya an nabihag ha pagkabihag, ngan naghatag hin mga hatag ha mga tawo. . . . Ihinatag niya an iba ha mga pagkaapostol; ngan an iba, ha mga pagkamanaragna; ngan an iba, ha mga pagkaebanghelista; ngan an iba, ha mga pagkapastor ngan pagkamanurutdo; ha paghingpit ha mga baraan, ha buhat ha pagkaministro, ha pagparig-on ha lawas ni Kristo.”—Efeso 4:8, 11, 12.
6. Paonan-o iginhulagway ha Pahayag 1:16, 20 an dinihogan nga mga paramangno nga nag-aalagad sugad nga mga grupo han mga tigurang, ngan ano an masisiring mahitungod han pinili nga mga tigurang nga membro han iba nga mga karnero?
6 Ini nga ‘mga hatag nga mga tawo’ amo an mga paramangno, o mga tigurang, nga ginpili ni Jehova ngan han iya Anak, pinaagi han baraan nga espiritu, basi mahigugmaon nga magbantay ha mga karnero. (Buhat 20:28, 29) Ha tinikangan, ini ngatanan nga paramangno mga dinihogan nga Kristiano nga kalalakin-an. Ha Pahayag 1:16, 20, adton nag-aalagad sugad nga mga grupo han mga tigurang ha kongregasyon han mga dinihogan ginsimbolohan han “mga bitoon” o “mga anghel” ha too nga kamot ni Kristo, karuyag sidngon, kontrolado niya. Kondi, hini nga panahon han kataposan, tungod kay nagtitikagutiay na an dinihogan nga mga paramangno nga aanhi pa ha tuna, an kadam-an han Kristiano nga mga tigurang ha mga kongregasyon yana mga membro han iba nga mga karnero. Tungod kay pinili hira han mga representante han Nagmamando nga Lawas pinaagi han giya han baraan nga espiritu, masisiring liwat nga hira ilarom han too nga kamot (o, ilarom han giya) han Maopay nga Magbarantay, hi Jesu-Kristo. (Isaias 61:5, 6) Tungod kay an mga tigurang ha aton mga kongregasyon nagpapasakop kan Kristo, nga Ulo han kongregasyon, takos hira han aton bug-os nga pagkooperar.—Kolosas 1:18.
Pagsugot Ngan Pagpasakop
7. Ano an iginsagdon ni apostol Pablo may kalabotan ha aton pagtagad ha Kristiano nga mga paramangno?
7 Ginlalaoman han aton langitnon nga mga Magbarantay, hi Jehova nga Dios ngan hi Jesu-Kristo, nga magigin masinugtanon ngan mapinasakupon kita ha pinili nga mga magbarantay nga ira tinagan hin responsabilidad ha kongregasyon. (1 Pedro 5:5) Pinaagi han giya han Dios, hi apostol Pablo nagsurat: “Hinumdumi niyo an iyo mga magmarando, an mga tawo nga nagsumat ha iyo han pulong han Dios; pamurubuuton niyo an kataposan han ira mga panggawi, magsubad kamo ha ira pagtoo. Magtuman ngan magpasakop kamo ha iyo mga magmarando: kay nagmamangno hira tungod ha iyo mga kalag, sugad nga hira an maghahatag hin kahusayan; basi nga pagbuhaton ini nira ha kalipayan; ngan diri ha kasakitan: kay ini mawawaray kapulsanan ha iyo.”—Hebreo 13:7, 17.
8. Ano an igin-aaghat ha aton ni Pablo nga “pamurubuuton,” ngan paonan-o kita sadang “magtuman”?
8 Tigamni nga gin-aaghat kita ni Pablo nga “pamurubuuton,” o hunahunaon hin maopay, an resulta han matinumanon nga paggawi han mga tigurang ngan sundon an sugad nga mga susbaranan han pagtoo. Dugang pa, nagsasagdon hiya ha aton nga magtuman ngan magpasakop ha giya hinin pinili nga kalalakin-an. An eskolar ha Biblia nga hi R. T. France nagsasaysay nga ha orihinal nga Griego, an pulong nga iginhubad dinhi nga “magtuman,” o magin masinugtanon, diri amo an kasagaran nga termino para ha pagkamasinugtanon, kondi literal nga nangangahulogan nga ‘makombinse,’ nagpapasabot hin kinaburut-on nga pagkarawat han ira panguna.” Nasugot kita ha mga tigurang diri la tungod kay an Pulong han Dios nagsusugo ha aton nga buhaton ito kondi liwat tungod kay kombinsido kita nga karuyag nira an gimaopayi para ha mga butang nga may kalabotan ha Ginhadian ngan para ha aton pisikal ngan espirituwal nga kaopayan. Sigurado nga magmamalipayon kita kon kinaburut-on nga kakarawaton naton an ira panguna.
9. Kay ano nga kinahanglan “magpasakop” kita dugang pa ha pagin masinugtanon?
9 Kondi, ano man kon diri kita kombinsido nga an instruksyon han mga tigurang diri amo an gimaopayi nga buhaton ha usa nga sitwasyon? Dinhi ginkikinahanglan an aton pagpasakop. Masayon an pagsugot kon matin-aw an ngatanan ngan nauyon kita hito, kondi ipapakita naton nga totoo nga nagpapasakop kita kon nasunod kita bisan kon diri naton nasasabtan an instruksyon nga iginhatag. Hi Pedro, nga ha urhi nagin apostol, nagpakita hini nga klase han pagpasakop.—Lukas 5:4, 5.
Upat nga Hinungdan han Kinaburut-on nga Pagkooperar
10, 11. Ha ano nga paagi ‘nagsusumat han pulong han Dios’ an mga paramangno ha ira mga igkasi-Kristiano ha siyahan nga siglo ngan yana?
10 Ha Hebreo 13:7, 17, nga ginkotar na, iginhahatag ni apostol Pablo an upat nga hinungdan kon kay ano nga sadang magin masinugtanon ngan mapinasakupon kita ha Kristiano nga mga paramangno. Siyahan, hira ‘nagsusumat han pulong han Dios’ ha aton. Hinumdumi nga an ‘mga hatag nga mga tawo’ iginhahatag ni Jesus ha kongregasyon para ha “paghingpit ha mga baraan.” (Efeso 4:11, 12) Iya ginhingpit, o gintadong, an panhunahuna ngan paggawi han siyahan-siglo nga mga Kristiano pinaagi han matinumanon nga pinili nga mga magbarantay, nga an iba ha ira giniyahan ha pagsurat ha mga kongregasyon. Ginamit niya an sugad pinili-han-espiritu nga mga paramangno ha paggiya ngan pagparig-on ha siyahan nga mga Kristiano.—1 Korinto 16:15-18; 2 Timoteo 2:2; Tito 1:5.
11 Yana, ginigiyahan kita ni Jesus pinaagi han “matinumanon ngan maaramon nga uripon,” nga ginrirepresentaran han Nagmamando nga Lawas hito ngan han pinili nga mga tigurang. (Mateo 24:45, NW) Sugad nga pagtahod ha “punoan han mga magbarantay,” hi Jesu-Kristo, aton ginsusunod an sagdon ni Pablo: “Iyo kilalahon an mga nagbubuhat ha butnga niyo, ngan nagmamando ha iyo ha Ginoo, ngan an mga nagsasagdon ha iyo.”—1 Pedro 5:4; 1 Tesalonika 5:12; 1 Timoteo 5:17.
12. Ha ano nga paagi an mga paramangno ‘nagmamangno han aton mga kalag’?
12 An ikaduha nga hinungdan ha pagkooperar ha Kristiano nga mga paramangno, tungod kay ‘nagmamangno hira han aton mga kalag.’ Kon nakikita nira an anoman ha aton disposisyon o paggawi nga bangin magin hinungdan nga mameligro an aton espirituwalidad, madagmit hira ha paghatag ha aton han ginkikinahanglan nga sagdon ha pagtadong ha aton. (Galasia 6:1) An Griego nga pulong nga iginhubad nga “nagmamangno” literal nga nangangahulogan nga “diri nakaturog.” Sumala ha usa nga eskolar ha Biblia, “nagpapasabot ito hin padayon nga pag-agma han magbarantay.” Dugang pa ha ira pagpadayon ha espirituwal nga pag-agma, bangin diri pa ngani mahingaturog an mga tigurang tungod ha kabaraka para ha aton espirituwal nga kaopayan. Diri ba sadang magkooperar kita hin kinaburut-on ha sugad mahigugmaon nga pinili nga mga magbarantay, nga nagbubuhat han ira gimaopayi ha pagsubad han mahigugmaon nga pagtagad ni Jesu-Kristo, “an daku nga magbarantay han mga karnero”?—Hebreo 13:20.
13. Kan kanay ngan ha ano nga mga paagi may baratunon an mga paramangno ngan an ngatanan nga Kristiano?
13 An ikatulo nga hinungdan han aton kinaburut-on nga pagkooperar ha mga paramangno amo nga hira nagbabantay ha aton “sugad nga hira an maghahatag hin kahusayan.” Nahinunumdoman han mga paramangno nga pinili hira nga mga magbarantay nga nag-aalagad ilarom han langitnon nga mga Magbarantay, hi Jehova nga Dios ngan hi Jesu-Kristo. (Esekiel 34:22-24) Hi Jehova an Tag-iya han mga karnero, nga iya pinalit pinaagi han dugo han iya kalugaringon nga Anak, ngan Iya gintatagad nga may baratunon an pinili nga mga paramangno ha ira pagtrato ha Iya panon, nga sadang ‘hatagan hin kalooy.’ (Buhat 20:28, 29) Tungod hito, may baratunon kita ngatanan kan Jehova ha paagi nga nagios kita ha iya giya. (Roma 14:10-12) An aton pagsugot ha pinili nga mga tigurang nagpapakita liwat han aton pagpasakop kan Kristo, an Ulo han kongregasyon.—Kolosas 2:19.
14. Ano an mahimo magin hinungdan nga an Kristiano nga mga paramangno mag-alagad nga may “kasakitan,” ngan ano an mga resulta?
14 Iginhatag ni Pablo an ikaupat nga hinungdan kon kay ano nga kinahanglan mapainubsanon nga magpasakop kita ha Kristiano nga mga paramangno. Hiya nagsurat: “Basi nga pagbuhaton ini nira ha kalipayan; ngan diri ha kasakitan: kay ini mawawaray kapulsanan ha iyo.” (Hebreo 13:17) Tungod han mabug-at nga mga responsabilidad han Kristiano nga mga tigurang ha pagtutdo, pagbantay, pagpanguna ha pagsangyaw, pagmangno ha ira mga pamilya, ngan pagsulbad han mga problema ha kongregasyon, mabug-at an ira pinas-an. (2 Korinto 11:28, 29) Kon diri kita magkooperar ha ira, dinudugangan la naton an ira pinas-an. Magriresulta ini han ira “kasakitan.” An aton diri pagkooperar nakakapasubo kan Jehova ngan mahimo makadaot ha aton. Lugod, kon ipinapakita naton an husto nga pagtahod ngan kooperasyon, malipayon nga makakagpadayon an mga tigurang ha ira buruhaton, ngan an kongregasyon mas nagkakaurosa ngan mas malipayon ha pakigbahin ha pagsangyaw han Ginhadian.—Roma 15:5, 6.
Pagpakita han Aton Pagpasakop
15. Ha ano nga paagi maipapakita naton an aton pagsugot ngan pagpasakop?
15 May-ada damu nga praktikal nga paagi diin mahimo kita magkooperar ha pinili nga mga paramangno. Basi makapahiuyon ha bag-o nga mga kahimtang ha teritoryo, naghihikay ba an mga tigurang hin mga katirok para ha pag-alagad ha kanataran ha mga adlaw ngan ha mga panahon nga nagkikinahanglan hin mga pagbag-o ha aton rutina? Pangalimbasogan naton nga suportahan an bag-o nga mga kahikayan. Mahimo kita kumarawat hin diri-linalaoman nga mga bendisyon. Nabisita ba an paramangno han pag-alagad ha aton Pag-aram ha Libro han Kongregasyon? Bug-os nga makigbahin kita ha pagsangyaw hiton nga semana. Nakakarawat ba kita hin toka ha Teokratiko nga Eskwelahan ha Ministeryo? Sadang mangalimbasog kita nga magin presente ngan buhaton an aton toka. Iginpahibaro ba han paramangno han Pag-aram ha Libro han Kongregasyon nga turno han aton grupo nga maglimpyo ha Kingdom Hall? Bug-os nga suportahan naton hiya, sumala han itinutugot han aton kahimsog ngan kusog. Hini ngan ha damu iba pa nga paagi, ipinapakita naton an aton pagpasakop ha kalalakin-an nga ginpili ni Jehova ngan han iya Anak ha pagmangno ha panon.
16. Kon an usa nga tigurang diri nasunod ha instruksyon, kay ano nga diri ini husto nga hinungdan ha pagrebelde?
16 Usahay, bangin diri nasusunod han usa nga tigurang an instruksyon han matinumanon nga uripon nga klase ngan han Nagmamando nga Lawas hito. Kon magpadayon hiya ha pagbuhat hini nga paagi, may baratunon hiya kan Jehova, “an magbarantay ngan obispo han [aton] mga kalag.” (1 Pedro 2:25) Kondi bisan kon mapakyas o magsayop an pipira nga mga tigurang, diri ini husto nga hinungdan nga diri kita magpasakop. Diri ginbibendisyonan ni Jehova an pagtalapas ngan pagrebelde.—Numeros 12:1, 2, 9-11.
Ginbibendisyonan ni Jehova an Kinaburut-on nga Pagkooperar
17. Ano an sadang magin pagtagad naton ha aton mga paramangno?
17 Maaram hi Jehova nga Dios nga diri-hingpit an kalalakin-an nga iya ginpipili sugad nga mga paramangno. Kondi, ginagamit niya hira, ngan pinaagi han iya espiritu, iya ginbabantayan an iya katawohan ha tuna. Naaplikar ha mga tigurang—ngan ha aton ngatanan—nga ‘an kapin kaopay nga gahum kanan Dios, ngan diri tikang ha aton ngahaw.’ (2 Korinto 4:7) Salit sadang pasalamatan naton hi Jehova tungod han iya mga nahihimo pinaagi han aton matinumanon nga mga paramangno, ngan kinahanglan kinaburut-on nga magkooperar kita ha ira.
18. Kon nagpapasakop kita ha aton mga paramangno, ha pagkamatuod, ano an aton ginbubuhat?
18 Maduruto nga nangangalimbasog an mga paramangno nga iaplikar an paghulagway ni Jehova mahitungod han mga magbarantay nga iya ginpili ha pagmangno ha iya panon ha kataposan nga mga adlaw, sugad han mababasa ha Jeremias 3:15: “Akon kamo tatagan sumala han akon kasingkasing, hin mga paramangno hin karnero nga magpapakaon ha iyo hin hibaro ngan hin sarabotan.” Sigurado nga maopay gud an ginbubuhat han aton mga tigurang ha pagtutdo ngan pagpanalipod ha mga karnero ni Jehova. Hinaot padayon nga ipakita naton an aton apresasyon ha ira maduruto nga buhat pinaagi han aton kinaburut-on nga pagkooperar, pagsugot, ngan pagpasakop. Kon ginbubuhat naton ito, ipinapakita naton an aton apresasyon ha aton langitnon nga mga Magbarantay, hi Jehova nga Dios ngan hi Jesu-Kristo.
Sugad nga Repaso
• Paonan-o ipinapakita ni Jehova ngan ni Jesu-Kristo nga mahigugmaon hira nga mga Magbarantay?
• Dugang pa ha pagsugot, kay ano nga ginkikinahanglan an pagpasakop?
• Ha ano nga praktikal nga mga paagi maipapakita naton an aton pagpasakop?
[Mga Pakiana]
[Retrato ha pahina 27]
An Kristiano nga mga tigurang nagpapasakop ha pagpanguna ni Kristo
[Mga Retrato ha pahina 29]
Damu an mga paagi nga maipapakita naton an aton pagpasakop ha pinili ni Jehova nga mga magbarantay