Mga Pakiana Tikang ha mga Magbarasa

Ano an iginpapasabot han mga pulong ni Pablo nga an usa nga balo kinahanglan ‘asawa hin usa la nga lalaki’ basi magin kwalipikado han bulig han Kristiano nga kongregasyon?—1 Timoteo 5:9.

Tungod kay hito nga panahon hi apostol Pablo naghihisgot mahitungod hin balo nga babaye, an mga pulong nga ‘asawa hin usa la nga lalaki’ sigurado nga naghihisgot mahitungod han iya kahimtang antes hiya nabalo. Nangangahulogan ba ini nga makausa la hiya nag-asawa? O posible ba nga iba an iginpapasabot ni Pablo? a

An iba nagsiring nga an ginhihisgotan ni Pablo mga balo nga makausa la nag-asawa. Totoo nga ha damu nga kultura ngan sosiedad, an balo nga nagpapabilin nga waray asawa gintatagad nga maopay hinduro an moral. Kondi, ito nga ideya diri uyon ha mga pulong ni Pablo ha iya iba nga surat. Pananglitan, iya iginpatin-aw ha mga Kristiano ha Korinto nga bisan kon para ha iya an balo magigin mas malipayon kon magpabilin hiya nga solo, ‘mahimo hiya mag-asawa han iya karuyag, kondi ha Ginoo la.’ (1 Korinto 7:39, 40; Roma 7:2, 3) Dugang pa, ha iya surat kan Timoteo, hi Pablo nagsiring: ‘Buot ko nga an batan-on nga mga balo mag-asawa.’ (1 Timoteo 5:14) Salit, diri sadang pakarauton an balo kon magdesisyon hiya nga mag-asawa utro.

Kon sugad, ano gud an iginpapasabot ni Pablo han iya ginsiring kan Timoteo? An mga pulong nga ‘asawa hin usa la nga lalaki,’ dinhi la mababasa hini nga bersikulo. Ha orihinal nga yinaknan, literal nga nangangahulogan ito hin “asawa han usa nga lalaki.” Makapainteres nga pariho ini ha gin-gamit ni Pablo hin pipira ka beses ha iya mga surat, nga nangangahulogan hin “asawa han usa la nga babaye,” o “bana han usa la nga babaye” ha orihinal nga yinaknan. (1 Timoteo 3:2, 12; Tito 1:6) Gin-gamit ni Pablo an “asawa han usa la nga babaye” han iya iginlista an mga kwalipikasyon para ha Kristiano nga mga paramangno ngan mga ministeryal. Hito nga konteksto, an siyahan nga iginpapasabot hito nga basi magin kwalipikado para ha responsabilidad ha Kristiano nga kongregasyon, an lalaki, kon inasaw-an, kinahanglan magin matinumanon ngan maunungon ha iya asawa ngan waray ikasaway ha moral. b Tungod hito, an ginsisiring ha 1 Timoteo 5:9 pariho an iginpapasabot: Basi magin kwalipikado an balo han bulig han kongregasyon, kinahanglan nga nagin debotado ngan maunungon hiya nga asawa han buhi pa an iya bana ngan kinahanglan nga maopay an iya moral. An dugang nga kwalipikasyon nga iginlista ni Pablo naghuhulagway han sugad nga klase hin balo.—1 Timoteo 5:10.

[Mga footnote]