Paghatag hin mga Halad nga Nakakalipay ha Dios

“AN KINABUHI nagtikang ha kamatayon—ito an gintoohan han mga Aztec, nga naghalad hin mga tawo ha kadamu nga waray kapariho ha Mesoamerika,” siring han libro nga The Mighty Aztecs. “Samtang nagtitikadaku an imperyo hito, ginagamit an halad nga mga tawo basi maparig-on an pagsarig ha imperyo,” nagdugang ito nga libro. Sumala ha lain nga ensayklopidya, an mga tawo nga iginhalad han mga Aztec naabot hin 20,000 ha usa ka tuig.

Ha bug-os nga kasaysayan, naghahalad an mga tawo ha ira mga dios tungod ha kahadlok ngan pagruhaduha, o tungod ha pag-abat hin pagin salaan ngan kasubo tungod ha pakasala. Ha luyo nga bahin, ipinapakita han Biblia nga an pipira nga halad gintikangan han Dios—han makagarahum ha ngatanan, hi Jehova. Salit, angayan an pagpakiana: “Ano nga klase hin mga halad an nakakapalipay ha Dios? Ngan an mga halad ba sadang magin bahin han pagsingba yana?

Mga Halad ha Totoo nga Pagsingba

Han naestablisar an nasud han Israel, naghatag hi Jehova hin matin-aw nga mga instruksyon may kalabotan ha karuyag niya nga paagi nga singbahon hiya han mga Israelita, ngan nag-uupod ini hin paghalad. (Numeros, kapitulo 28 ngan 29) An iba nga mga halad produkto han tuna; an iba mga hayop sugad han baka, karnero, kanding, sarapati, ngan tukmo. (Lebitiko 1:3, 5, 10, 14; 23:10-18; Numeros 15:1-7; 28:7) May-ada liwat mga halad nga kinahanglan sunugon hin bug-os. (Eksodo 29:38-42) May-ada liwat mga halad nga pag-aarangbitan, diin adton naghalad hito nakikigbahin pinaagi ha pagkaon han iginhalad ha Dios.—Lebitiko 19:5-8.

An ngatanan nga iginhalad ha Dios uyon ha Mosaiko nga Balaud usa nga paagi ha pagsingba ha Dios ngan pagkilala ha iya sugad nga an Soberano han Uniberso. Pinaagi han sugad nga mga halad, iginpahayag han mga Israelita an ira pagpasalamat kan Jehova tungod han iya pagkamaopay ngan pagpanalipod, ngan han pagpasaylo han ira mga sala. Samtang maunungon nga ginsusunod nira an mga ginkikinahanglan ni Jehova ha pagsingba, hura nga ginbendisyonan hira.—Proberbios 3:9-10.

Para kan Jehova, an pinakaimportante amo an disposisyon hadton naghahalad. Pinaagi han iya propeta nga hi Hosea, hiya nagsiring: “Ako  naungara han kamaopay, ngan diri han halad; ngan han pagkilala han Dios labi kay han mga halad nga sinunog.” (Hosea 6:6) Tungod hito, han binaya an mga tawo ha totoo nga pagsingba ngan nagbuhat hin kalaw-ayan ngan nagpaagay hin dugo han inosente nga mga tawo, nagin waray pulos an ira mga halad ha altar ni Jehova. Salit, pinaagi kan Isaias, ginsidngan ni Jehova an nasud han Israel: “Aanhon ko an kadam-an han iyo mga halad? . . . Igo na para ha akon an mga halad nga sinunog nga mga karnero nga lalaki, ngan an tambok han mga binoohan nga kamanampan; ngan diri ako nalilipay ha dugo han mga baka nga umagwas, o han mga nati nga karnero, o han mga kanding nga lalaki.”—Isaias 1:11.

“Waray Ko ha Ira Igsugo”

Kabaliktaran ha mga Israelita, iginhalad han mga taga-Kanaan an ira mga anak ha ira mga dios, upod na ha dios han mga Amonitanhon nga hi Molek, nga tinatawag liwat nga Milkom o Molok. (1 Hadi 11:5, 7, 33; Buhat 7:43) An Halley’s Bible Handbook nasiring: “An mga Kanaanita hadto nagsisingba pinaagi ha pagpatagbaw ha imoralidad, sugad nga bahin han relihiyoso nga seremonya, ha atubangan han ira mga dios; ngan pinaagi ha pagpatay han ira suhag nga mga anak, sugad nga halad hini nga mga dios.”

Nakapalipay ba ito kan Jehova? Waray gud. Han tisulod na an mga Israelita ha Kanaan, iginhatag ni Jehova an sugo ha ira nga nakarekord ha Lebitiko 20:2, 3: “Sidnga an mga anak ni Israel; Bisan hin-o nga lalaki han mga anak ni Israel, o han mga dumuruong nga nahapit ha Israel, nga naghahatag han iya tulin kan Molok; ha waray ruhaduha papatayon hiya: an mga tawo ha tuna maglalabay ha iya hin mga bato. Akon ibubutang man an akon bayhon patok hadto nga tawo, ngan paiiwason ko hiya tikang ha butnga han iya katawohan; kay iya iginhatag an iya tulin kan Molok, ha paghugaw han akon santuaryo, ngan pagpasipara han baraan ko nga ngaran.”

Bisan kon baga hin diri katoohan ini, ginsubad han iba nga Israelita nga binaya ha totoo nga pagsingba inin yawan-on nga buhat ha paghalad han ira mga anak ha palso nga mga dios. May kalabotan hini, an Salmo 106:35-38 nasiring: “Nakigtampo hira ngahaw han mga nasud, ngan nagtoon han ira mga buhat, ngan nag-alagad han ira mga ladawan, nga nahimo nga bitik ha ira. Oo, iginhalad nira an ira mga anak nga lalaki ngan mga anak nga babaye ngadto ha mga yawa, ngan nag-ula hin dugo nga waray sala, bisan an dugo han ira mga anak nga lalaki ngan han mga anak nga babaye, nga ira iginhalad ngadto ha mga ladawan ha Kanaan; ngan an tuna nahugawan han dugo.”

Ha pagpahayag han duro nga kasina ni Jehova ha mga anak han Juda nga nagbubuhat hini, pinaagi ha iya propeta nga hi Jeremias, hiya nagsiring: “Ira ibinutang an ira mga kangil-aran dida ha balay nga tinatawag ha akon ngaran ha paghugaw hini. Ngan hira nagtukod hin higtaas nga mga lugar ha Topet, nga aada ha walog han anak nga lalaki ni Himon, ha pagsunog han ira mga anak nga kalalakin-an ngan han ira mga anak nga kababayin-an dida ha kalayo; nga waray ko ha  ira igsugo, waray man umabot ini ha akon panumdoman.”—Jeremias 7:30, 31.

Tungod ha pakigbahin han Israel ha sugad nga mangil-ad nga mga buhat, inabot an panahon nga iginsalikway hira ni Jehova. Ha kaurhian an kapital nga syudad hito, an Jerusalem, nabungkag ngan an mga tawo hito gindara ha Babilonya sugad nga bihag. (Jeremias 7:32-34) Matin-aw nga an paghalad hin mga tawo diri tikang ha totoo nga Dios ngan diri bahin han putli nga pagsingba. An bisan ano nga paagi han paghalad hin tawo yawan-on, ngan an totoo nga magsiringba han Dios naglilikay ha bisan ano nga may kalabotan hito.

An Halad Lukat ni Kristo Jesus

Kondi, bangin may magpakiana, ‘Kon sugad, kay ano nga an Balaud ni Jehova ha mga Israelita nag-uupod han paghalad hin mga hayop?’ Gintagad ni apostol Pablo ini nga pakiana ngan ini an iya baton: “Busa ano ba an Kasugoanan? Iton igindugang tungod ha mga pagtalapas, tubtob ha pag-abot han katulinan [binhi] nga tungod ha iya an saad ginhimo . . . Ha pagkaagi nga an Kasugoanan nahimo nga aton magturutdo ha pagdara ha aton ngadto kan Kristo.” (Galasia 3:19-24) An mga halad nga hayop ilarom han Mosaiko nga Balaud nagrirepresentar hin mas labaw nga halad nga itatagana ni Jehova nga Dios para ha katawohan—an iya Anak, hi Jesu-Kristo. Gin-unabi ni Jesus inin mahigugmaon nga buhat han hiya nagsiring: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.”—Juan 3:16.

Tungod han gugma ni Jesus ha Dios ngan ha katawohan, iya kinasingkasing nga iginhatag an iya hingpit nga tawhanon nga kinabuhi sugad nga lukat para han mga anak ni Adan. (Roma 5:12, 15) Hi Jesus nagsiring: “An Anak han tawo waray kumanhi basi pag-alagdon kondi ha pagmangno, ngan paghatag han iya kinabuhi nga lukat han kadam-an.” (Mateo 20:28) Waray iba ha tuna an makakalukat ha katawohan tikang ha pagkauripon ha sala ngan kamatayon diin hira iginbaligya han makasala hi Adan. (Salmo 49:7, 8) Salit hi Pablo nagsaysay nga hi Jesus ‘sinulod diri tungod ha dugo han mga kanding nga lalaki ngan kanatihan han baka, kondi pinaagi ha iya kalugaringon nga dugo, ha makausa ngan ha gihapon ngadto ha baraan nga lugar, han pakakarawat hin waray kataposan nga pagtubos’ ha aton. (Hebreo 9:12) Pinaagi ha pagkarawat han halad nga dugo ni Jesus, an Dios ‘nagpara han mga sinurat nga balaud nga kontra ha aton.’ Karuyag sidngon, ginbalewaray ni Jehova an kauyonan nga Balaud, pati an ginkikinahanglan hito nga mga halad. Hito nga paagi, iya iginpasulod an ‘hatag nga kinabuhi nga waray kataposan.’—Kolosas 2:14; Roma 6:23.

Espirituwal nga mga Halad

Tungod kay an mga halad nga hayop diri na bahin han totoo nga pagsingba, ginkikinahanglan pa ba yana an bisan ano nga halad? Oo. Hi Jesu-Kristo nagkinabuhi nga may pagsakripisyo ha kalugaringon ha iya pag-alagad ha Dios ngan ha kataposan iya iginhalad an iya kinabuhi para ha katawohan. Tungod hito, hiya nagsiring: “Kon may tawo nga buot magsunod ha akon, maglirong ha iya la ngahaw, ngan pas-anon an iya krus, ngan sumunod ha akon.” (Mateo 16:24) Nagpapasabot ini nga an bisan hin-o nga naruruyag sumunod kan Jesus kinahanglan maghimo hin espisipiko nga mga pagsakripisyo. Ano ini?

Usa hini, an totoo nga sumurunod ni Kristo diri na nagkikinabuhi para ha iya kalugaringon la, kondi ha pagbuhat han kaburut-on han Dios. Iya gin-uuna an kaburut-on ngan karuyag han  Dios kay han iya kalugaringon. Tigamni kon paonan-o iginsaysay ito ni apostol Pablo: “Mga kabugtoan, nanginginyupo ako ha iyo tungod ha pagkalooy han Dios, nga ighalad niyo an iyo mga lawas sugad han buhi nga halad, maputli, karuruyagon ha Dios, nga amo an iyo espirituhanon nga pag-alagad. Ngan diri kamo angay umuyon hini nga panahon: Kondi magbalhin kamo tungod ha pagbag-o ha iyo mga hunahuna, basi niyo kasayoran kon ano an maopay ngan karuruyagon ngan hingpit nga kaburut-on han Dios.”—Roma 12:1, 2.

Dugang pa, ipinapakita han Biblia nga an aton mga kapahayagan hin pagdayaw mahimo tagdon sugad nga mga halad ngadto kan Jehova. Gin-gamit ni propeta Hosea an mga pulong nga “mga umagwas nga baka han halad han amon mga im-im,” nga nagpapakita nga gintatagad ni Jehova an pagdayaw han aton mga im-im nga usa han gimaopayi nga mga halad. (Hosea 14:2) Ginsagda ni apostol Pablo an Hebreohanon nga mga Kristiano: “Halaran ta gihapon an Dios hin halad han pagdayeg, nga amo, an bunga han mga im-im nga nagsusumat han iya ngaran.” (Hebreo 13:15) Yana, an mga Saksi ni Jehova pirme nga sagipo hinduro ha pagsangyaw han maopay nga sumat ngan paghimo hin mga disipulo ha ngatanan nga nasud. (Mateo 24:14; 28:19, 20) Naghahalad hira hin pagdayaw ha Dios ha adlaw ngan gab-i ha bug-os nga tuna.—Pahayag 7:15.

Kaupod ha pagsangyaw, an pagbuhat hin maopay ha iba usa han mga halad nga nakakalipay ha Dios. “Ayaw niyo hikalimti an pagbuhat hin maopay ngan pagkamahatagon,” nagsagdon hi Pablo, “kay ha sugad nga mga halad an Dios nalilipay.” (Hebreo 13:16) Ha pagkamatuod, basi an mga halad hin pagdayaw makalipay ha Dios, ginkikinahanglan an maopay nga panggawi han mga naghahalad hito. Hi Pablo nagsagdon: “Manggawi unta kamo nga takos ha maopay nga sumat ni Kristo.”—Filipos 1:27; Isaias 52:11.

Sugad han naglabay, an ngatanan nga halad para ha pagsuporta han totoo nga pagsingba magriresulta ha daku nga kalipay ngan ha mga bendisyon tikang kan Jehova. Salit, hinaot buhaton naton an aton bug-os nga mahihimo ha paghalad hin nakakalipay gud ha Dios!

[Retrato ha pahina 18]

“An ira mga anak . . . ira iginhalad ngadto ha mga ladawan ha Kanaan”

[Mga Retrato ha pahina 20]

Pinaagi ha pagsangyaw han maopay nga sumat ngan pagin mabinuligon ha iba pa nga paagi, an totoo nga mga Kristiano naghahalad hin nakakalipay ha Dios