An Hingyap ni Adryana

HI Adryana, nga sais anyos nga bata ha Tulsa, Oklahoma, E.U.A., may-ada ginhihingyap gud. Pariho ito han ginhingyap han salmista nga hi David, nga nagkanta: “Usa la nga butang [an] ginpangaro ko kan Jehova, ini pangingitaon ko: nga hi ako makaukoy ha balay ni Jehova ha ngatanan nga mga adlaw han akon kinabuhi, basi ako makatan-aw han katahom ni Jehova, ngan pagpakiana dida hiton iya templo.”—Salmo 27:4.

Han unom ka bulan pa la an edad ni Adryana, hinbaroan ha mga pag-usisa han mga doktor nga may-ada hiya neuroblastoma, usa nga makamaratay nga tumor nga natubo ha mga bahin han sistema han nerbyos. Tungod hinin makamaratay nga sakit naparalisa an iya duha nga bitiis. Gintambal hiya han mga doktor pinaagi hin damu nga operasyon ngan usa ka tuig nga chemotherapy.

An tatay ni Adryana, nga an relihiyon diri pariho ha relihiyon ni Adryana ngan han iya nanay, naghangyo ha usa nga institusyon nga makabisita unta an iya anak ha usa nga amusement park nga bantogan ha kalibotan. Antes ihatag an hingyap ni Adryana, gin-interbyu anay hiya han institusyon. Nagpasalamat hiya nga tinagan hiya hin atensyon kondi iya ginsumatan hira nga mas karuyag niya nga bumisita ha Bethel, an sentro han bug-os-kalibotan nga buruhaton han mga Saksi ni Jehova ha New York. Katapos hibaroan ni Adryana an hangyo han iya tatay, nag-ampo hiya kan Jehova nga hatagan hiya hin higayon nga makabisita ha Bethel. Bisan kon ha siyahan nabaraka an institusyon nga bangin diri maruyagan han bata an Bethel, iginhatag nira an hingyap ni Adryana han an iya amay waray kumontra ha iya karuyag.

Inupdan hi Adryana han iya iroy, bugto nga babaye, ngan usa nga sangkay, ngan nagbiyahe hira ngadto ha New York basi bumisita ha Bethel ha siyahan nga higayon. “Ginbaton ako ni Jehova,” siring ni Adryana. “Maaram ako nga kakarawaton niya kami ha Bethel. Nakita ko an paghimo han mga libro, magasin, ngan Biblia. Mas maopay gud ito kay ha amusement park.”

Hinkit-an gud ni Adryana an “katahom ni Jehova” ngan inapresyar an paggios han sentro han mga buruhaton han katawohan ni Jehova yana. Malipayon nga gin-iimbitar ka liwat ha pagbisita ha Bethel. Dugang pa ha sentro nga opisina han mga Saksi ni Jehova ha New York, may-ada sanga nga mga opisina ha magkalain-lain nga lugar ha kalibotan.