An Madarahog nga Kalibotan Yana

SITENTA anyos na hi Maria ngan nag-uusahan. Nakit-an hiya nga patay na ha iya balay, tungod kay ginkastigo ngan gintilo hiya hin metal nga kable.

Tulo nga polis an ginkastigo hin nasisina nga grupo tungod kay ira gin-akusahan an mga polis ha pagkidnap hin duha nga kabataan. Ira gintakbohan hin gasolina an duha nga polis ngan ginsunog hira. Kondi, nakapalagiw an ikatulo.

Usa nga waray magpakilala nga tawag ha telepono an nagresulta hin makangingirhat nga kabuhayhag. An patay nga lawas han upat nga turista naukab ha usa nga hardin. Nakatabon an ira mga mata, ngan nakagapos an ira mga kamot. Hinbaroan ha resulta han utopsiya nga iginlubong hira nga buhi.

Inin magpakangingirhat nga panhitabo diri tikang ha madarahog ngan bayolente nga makaharadlok nga mga sine. Tinuod ini nga mga istorya nga ha diri pa la maiha nagin ulohan han mga sumat ha usa nga nasud ha sur han Estados Unidos. Kondi, sigurado nga ito nga nasud diri la amo an nakakaeksperyensya hin sugad nga magpakangingirhat nga panhitabo ha kalibotan yana.

An magdarahog nga buhat ordinaryo na la ha kada adlaw. An mga pagbomba, pag-atake han mga terorista, pamatay, pagsulong, pamusil, ngan panlugos pipira la han sugad nga magraot nga buhat. Pauroutro nga nagpapakita an media hin detalyado nga mga report han magpakangingirhat nga panhitabo, ngan damu an diri na nangingirhat ha pagkita o pagpamati hito.

Bangin ka maghunahuna: ‘Ano na an nahitatabo ha kalibotan yana? Nawara na gud ba an ngatanan nga pagtagad ha pagbati han iba ngan pagtahod ha kinabuhi?’ Kay ano nga nagkikinabuhi kita ha kalibotan nga pariho hini?

Yana tagda hi Harry nga 69-anyos ngan may-ada kanser. An iya asawa may sakit nga multiple sclerosis, kondi an iya mga amyaw ngan kasangkayan kinaburut-on nga nabulig. “Diri ako maaram kon ano an hihimoon namon kon waray an mga tawo nga nabulig ha amon,” siring ni Harry. Ha Canada, diin hiya naukoy, ipinapakita han usa nga surbey nga sobra 50 porsyento han nag-aataman ha mga lagas an nabulig ha tawo nga waray relasyon ha ira. Sigurado nga may kilala ka nga ordinaryo nga mga tawo nga pirme napaid ngan buotan ha iba. Oo, an mga tawo may-ada kapas ha pagin mapinairon ngan pagin buotan imbes ha pagin madarahog.

Kon amo ito, kay ano nga may-ada man magpakangingirhat nga mga hitabo? Ano an nagpapagios ha mga tawo nga magin madarahog? Mahimo ba magbag-o an madarahog nga mga tawo? Matatapos pa ba an kamadarahog? Kon amo, paonan-o ngan san-o?

[Ginkuhaan han Retrato ha pahina 3]

Tren: CORDON PRESS