An Uma nga Mabusag Para ha Pagbari

Ha durho han norte nga bahin han Amerika del Sur nahimumutang an Guajira Peninsula. Aada ito ha norte nga Columbia ngan norte-weste nga Venezuela. An masirak hinduro nga adlaw ngan panalagsa la nga uran an nakakapakuri hinin sugad-disyerto nga lugar, diin naabot hin 43 digri Celsius an temperatura. Bisan pa han klima, sagipo an mga tawo ngan mag-opay hira nga mga parauma. Tungod han permanente nga huyuhoy han hangin tikang ha dagat ngan makusog nga hangin amihan, sugad hin diri naaabat an kapaso, salit an mga bisita nakakapahimulos han makaruruyag nga palibot ngan mag-opay nga kabaybayonan.

GIN-AABIABI kamo ha lugar han mga Wayuu nga Indian. May-ada mga 305,000 nga Wayuu, ngan 135,000 hito an naukoy ha Columbia. Nag-uukoy na dinhi ini nga tribo antes pa sakupon han Espanya an lugar.

Pag-uma ngan pag-ataman hin mga hayop an nangunguna nga panginabuhi han mga Wayuu. Nangingisda liwat hira ngan nakikignegosyo ha kahirani nga mga nasud. Maabtik nga naglalara an kababayin-an hin mapawa an kolor nga mga tela nga naruruyagan gud paliton han mga turista.

Kilala an mga Wayuu tungod han ira pagkasinsero ngan pagkamaabiabihon. Kondi, hira liwat nag-uukoy ha “magpakalilisang nga mga panahon.” (2 Timoteo 3:1) An kapobrehan usa han ira daku nga problema, nga nagriresulta ha iba pa nga problema sugad han pagkadiri-maaram magbasa ngan magsurat, malnutrisyon ha mga minasus-an, kakulang hin medikal nga bulig, ngan ha iba nga lugar, an pagkadelingkwente.

Ha damu nga mga tuig, nagpadara hin mga misyonero an mga singbahan han Kakristianohan didto. Sugad nga resulta, an kadam-an han eskwelahan para ha pagbansay han mga magturutdo ngan boarding school gindudumara han singbahan. Damu nga Wayuu an nagkarawat han tinatawag nga Kristiano nga mga kustomre, sugad han pagsingba ha imahen ngan pagbunyag han minasus-an, kondi waray nira bayai an ira gintotoohan ngan mga rituwal nga nakagamot ha tradisyon ngan patootoo.

Ha kabug-osan, may kahadlok ha Dios an mga Wayuu ngan naruruyag hira han mga kamatuoran ha Biblia nga gintututdo han mga Saksi ni Jehova. Han 1980, may-ada pito la nga Saksi nga Wayuu ha Guajira, ngan an tulo hito naukoy ha Riohacha, an kapital nga lugar. Dugang pa ha nitibo nga mga Saksi, 20 pa nga magwarali an nagsasangyaw han maopay nga sumat han Ginhadian ha Espanyol didto.

Mensahe ha Ira Kalugaringon nga Yinaknan

An kadam-an han Wayuu ha Riohacha nagyayakan hin gutiay nga Espanyol, labot la han ira yinaknan, an Wayuunaiki. Ha tinikangan, gutiay la an nahihimo ha pagsangyaw han mensahe han Ginhadian. Baga hin nalikay an mga nitibo ha mga arijunas, an ira pagtawag ha diri Wayuu. Kon nabisita an mga Saksi ha ira balay, kasagaran han mga Wayuu an nabaton nga gamit an ira yinaknan, diri an Espanyol. Salit, nabalhin na la an mga Saksi ha sunod nga balay.

Kondi, ha kataposan han 1994, nagtoka an sanga nga opisina han mga Saksi ni Jehova hin mga espesyal  payunir, o bug-os-panahon nga magsarangyaw, basi mag-alagad ha Riohacha nga Kongregasyon. Ginhangyo han mga payunir an usa nga Saksi nga Wayuu nga tutdoan hira han Wayuunaiki. Katapos memoryahon an pipira nga simple nga presentasyon, kinadto hira ha teritoryo ngan nakaobserba dayon han daku nga pagbag-o ha reaksyon han mga tawo. Bisan kon diri hira maopay mag-Wayuunaiki, nalipay ngan nahipausa an mga tagbalay ngan andam na mamati, nga usahay nagpapadayon an ira marisyo nga pag-uroistorya gamit an limitado nga Espanyol han tagbalay.

‘Mabusag Para ha Pagbari’

Iginpariho ni apostol Pablo an paghimo hin disipulo han mga Kristiano ha pagkultibar hin uma, an pagtanding nga masayon masabtan han parauma nga mga Wayuu. (1 Korinto 3:5-9) Ha simboliko nga paagi, an uma han mga Wayuu ‘magbusag para ha pagbari.’—Juan 4:35.

Hi Neil, usa nga Wayuu nga Indian nga naukoy ha bungto han Manaure, an may-ada na depekto tikang pa han ipanganak hiya. Iya ginbabasol hadto an Dios tungod hini, ngan nasubo hiya hinduro tubtob ha punto nga nagsari hiya mag-unay. Usa nga Saksi nga nagsalingabot han higayon ha pagbalay-balay samtang nabisita ha iba-iba nga bungto, tungod han iya trabaho, an nakig-istorya kan Neil mahitungod han Ginhadian ni Jehova. Katorse anyos pa la hi Neil. Tungod kay nakita han Saksi an interes ni Neil, iya gintikangan hi Neil hin pag-aram han Biblia. Nalipay hi Neil ha paghibaro mahitungod han mahigugmaon nga personalidad ni Jehova, salit nahunahuna niya nga diri an Dios an hinungdan han iya pag-antos. Nabantad gud hiya han nabasa niya an saad han Dios mahitungod han paraiso ha tuna, diin mawawaray na an sakit!—Isaias 33:24; Mateo 6:9, 10.

Hito nga panahon, may-ada nakaaway nga pamilya an pamilya nira Neil. Basi masiguro nga mapapanalipdan hira, nagbuhat hin espisipiko nga rituwal an iya mga kapamilya. Nahinumdom hi Neil: “Ha tinikangan, nahadlok ako pagsumat ha akon pamilya mahitungod han akon bag-o nga relihiyon, labi na ha mga ulo han pamilya nga gintatahod gud.” Nasina an mga kag-anak ni Neil ha paghibaro nga diri hiya magbubuhat hin diri Kasuratanhon nga pagtoo o kustomre nga may kalabotan ha espiritismo. Katapos, binalhin hi Neil ha Ríohacha ngan nagtikang makig-upod ha kongregasyon didto. Waray pag-iha, nabawtismohan hiya. Han 1993 nagin ministeryal hiya, ngan paglabay hin tulo ka tuig nagin regular payunir hiya. Ngan han 1997 nagin tigurang hiya ha kongregasyon. Han 2000, ginpauswag niya an iya ministeryo ngan nagin espesyal payunir.

Tagda liwat an kahimtang ni Teresa, usa nga nitibo nga Wayuu nga nagtikang mag-aram han Biblia upod han mga Saksi. Gintatamay ngan ginkakastigo hiya ngan an iya tulo nga anak ni Daniel, an iya kalungon. Bisan kon ha urhi inuyon hiya nga mag-aram han Biblia upod kan Teresa, agsob nga nakikig-ininom hiya ha iya kasangkayan, usahay ha sulod hin upat o lima ka adlaw. Tungod hito, nagkukuri an iya pamilya. Regular nga nagpadayon hi Teresa ha pag-aram ngan pagtambong ha Kristiano nga mga katirok. Nakabulig ini kan Daniel nga makita an importansya han pag-aram han Biblia. Usa ka adlaw, usa han ira anak an aksidente nga nahulog ha takuri nga may nakaladkad nga tubig ngan namatay tungod han duro nga kapaso. Labot la han nagpapadayon  nga duro nga kasubo tungod han kamatyi, ginpirit liwat hi Teresa han iya kasangkayan ngan mga amyaw nga magbuhat hin diri-kasuratanhon nga kustomre ha paglubong.

Durante hiton makuri nga takna, kinarawat ini nga magpadis hin makapadasig nga bulig ngan pagliaw tikang ha kahirani nga mga kongregasyon. Katapos han lubong, padayon hira nga ginbibisita basi liawon han kongregasyon ha ira lugar nga Wayuu an yinaknan. Han naobserbahan ni Daniel an gugma nga ipinakita han mga Saksi, napagios hiya nga mag-uswag ha espirituwal. Inundang hiya ha pag-ininom ngan pagminaltrato kan Teresa. Ginkasal hira, ngan nagtikang hiya magtrabaho basi masuportahan an iya pamilya. Nag-uswag hira ha espirituwal ngan nabawtismohan han 2003. Hira nga duha nagdudumara na yana hin mga pag-aram ha Biblia. Tungod kay nasangyawan hin maopay ni Teresa an iya pamilya, naruruyag na hira yana mamati ha mga Saksi kon ginbibisita hira. Usa han umangkon ni Daniel an diri-bawtismado nga magwarali na, ngan duha han iya umangkon an nag-aaram han Biblia ngan natambong na ha mga katirok. An hipag ni Teresa, nga namatyan liwat hin anak tungod hin aksidente, nagpakita hin interes ha pag-aram han Biblia upod han iya pamilya.

Espirituwal nga Pagkaon ha Wayuunaiki nga Yinaknan

Han 1998 napublikar an bokleta nga Pahimulosi an Kinabuhi ha Tuna ha Waray Kataposan! a ha Wayuunaiki nga yinaknan. Nagin birilhon ini para ha pagpauswag han buruhaton ha lugar han mga Wayuu ngan ha pagdumara hin mga pag-aram han Biblia. Naghimo hin mga kahikayan han 2003 ha pagbansay hin kabugtoan nga kalalakin-an ha paghubad han mga publikasyon han mga Saksi ni Jehova ha Wayuunaiki nga yinaknan. Tungod han pagkamaduruto han mga parahubad ha Riohacha, nagagamit na an dugang nga brosyur nga nakabulig ha pag-uswag ha espirituwalidad han mga nagyayakan hin Wayuu.

Tikang han 2001, ginhubad ha Wayuunaiki an pipira nga bahin han programa ha distrito nga kombensyon. Nadasig ha espirituwal an mga estudyante han Biblia han hinbatian nira an programa ha ira yinaknan. Naglalaom hira nga ha diri maiha magkakamay-ada drama ha Wayuunaiki.

Nag-uuswag nga Uma

An Uribia usa nga bungto nga mga 100 kilometro ha norte-este han Riohacha. An Wayuu nga Kongregasyon ha Uribia may-ada 16 nga magwarali ngan damu ha ira an dugang nga nangangalimbasog ha pagsangyaw ha mga Indian nga nag-uukoy ha kahuronan. Mahitungod ha usa han sugad nga pagbiyahe, usa nga tigurang ha kongregasyon an nagsiring: “Binisita kami ha usa nga rantso nga may-ada pipira la nga balay nga hagmubo an atop ngan gudtiay an bintana. Ha prente han kada balay, may-ada payag nga patag an atop nga hinimo tikang ha yotojolo, an matig-a nga bahin han lawas hin kaktus. Napapanalipdan hito an pamilya ngan mga bisita tikang ha masirak hinduro nga adlaw. Nalipay kami nga damu an interesado hinduro, salit nakigsabot kami ha pagbalik ngan pagtikang hin mga pag-aram ha Biblia. Ha amon pagbalik, naobserbahan namon nga damu an diri maaram magbasa ngan magsurat. Ginsumatan nira kami nga may-ada usa nga eskwelahan nga gin-abandona na tungod han kakulang hin pundo. An nagdudumara maloloy-on nga nagtugot ha amon nga gamiton an usa nga dapit ha eskwelahan para ha mga klase ha pagbasa ngan pagsurat ngan pag-aram han Biblia. Unom nga Wayuu an nahibaro ha pagbasa ngan pagsurat ngan nag-uuswag ha ira pag-aram han Biblia. Nabantad kami han ira apresasyon, salit nagplano kami nga magdumara hin mga katirok ha rantso.”

Damu nga diri-nitibo nga Saksi an nahibaro magyakan hin Wayuunaiki, ngan inaapresyar gud an ira bulig. Ha Guajira Peninsula, walo nga kongregasyon ngan duha nga grupo an nagamit hini nga yinaknan yana.

Nakikita gud an bendisyon ni Jehova hini nga mga pangalimbasog. Sigurado nga damu pa an mahihimo ha pagsangyaw han maopay nga sumat ha mga Wayuu. Ginlalaoman an maopay nga mga resulta samtang adton mga mahunahunaon ha ira espirituwal nga panginahanglan nagigin mga sumurunod ni Kristo. Hinaot padayon pa nga magpadara hi Jehova hin dugang nga mga magsarangyaw ha pagkultibar hini nga uma, nga ‘mabusag para ha pagbari.’—Mateo 9:37, 38.

[Footnote]

[Mga Mapa ha pahina 16]

(Para ha aktuwal nga format, kitaa an publikasyon)

VENEZUELA

COLOMBIA

LA GUAJIRA

Manaure

Ríohacha

Uribia

[Ginkuhaan han Retrato ha pahina 16]

Mga balay han mga Wayuu: Victor Englebert