Mga Pakiana Tikang ha mga Magbarasa

Kinahanglan ba likyan han usa nga Kristiano an mga irinmon ngan pagkaon nga may-ada caffeine?

Diri igindidiri han Biblia ha usa nga Kristiano an pag-inom hin kape, semente, tsokolate, maté, ngan soft drink nga may-ada caffeine. Kondi, an mga prinsipyo ha Kasuratan makakabulig ha aton ha paghimo hin husto nga mga desisyon. Paghisgotan anay naton kon kay ano nga may mga tawo nga naglilikay hin mga irinmon ngan pagkaon nga may-ada caffeine.

Usa nga hinungdan amo nga an caffeine mahimo hunahunaon nga nakakagbag-o han panggawi ngan disposisyon, tungod kay nakakaapekto ito han hunahuna. Nakakagiyan liwat ito. Usa nga basihan nga reperensya han mga parmasyotiko an nasiring: “An sobra nga pagkaon ngan pag-inom hin may caffeine ha sulod hin maiha nga panahon mahimo magresulta hin pagkagiyan ngan diri na pag-abat han epekto hito. An maraot nga epekto nga nag-uupod han sakit ha ulo, kaaringit, kulba, kabaraka, ngan kalipong mahimo maeksperyensyahan ha tigda nga pag-undang ha paggamit hito.” An caffeine-withdrawal syndrome iginlakip ha Diagnostic and Statistical Manual of Mental Disorders, upod han iba nga problema nga naieksperyensyahan han usa kon naundang hiya ha paggamit hin droga. Tungod hito, diri urusahon nga inaabat han iba nga Kristiano nga sayop an paggamit hin caffeine tungod kay karuyag nira nga diri magiyan hito ngan maipakita an pagpugong ha kalugaringon.—Galasia 5:23.

An iba natoo nga an caffeine nakakaapekto ha kahimsog han tawo o han iginbuburod. Sadang higugmaon han mga Kristiano an Dios ‘ha ira bug-os nga kalag,’ salit diri hira nagbubuhat hin bisan ano nga magpapahalipot han ira kinabuhi. Ngan tungod kay ginsugo liwat hira nga higugmaon an ira igkasi-tawo, ginlilikyan nira an bisan ano nga bangin makadaot han iginbuburod pa la.—Lukas 10:25-27.

Husto ba an sugad nga kabaraka ha kahimsog? Bisan kon may-ada nasiring nga an caffeine mahimo magin hinungdan han magkalain-lain nga sakit, diri ngatanan nauyon hito. An iba nga parasaliksik nasiring pa ngani nga maopay an kape ha kahimsog. Han 2006, an Time nga magasin nagreport: “An siyahan nga mga pag-aram nasiring [nga an caffeine] mahimo magresulta hin kanser ha pantog, hitaas nga presyon han dugo ngan iba nga sakit. An mas bag-o nga mga pagsaliksik diri la nagpapamatuod nga sayop ito kondi nakadiskobre liwat hin daku nga mga kapulsanan ha paggamit hito. Baga hin nagpapanalipod ito kontra ha kadaot han atay, Parkinson’s disease, diabetes, Alzheimer’s disease, bato ha apdo, depresyon ngan bangin bisan ha pipira nga klase hin kanser.” May kalabotan ha paggamit hito, usa nga magasin an nagsiring: ‘An importante amo an diri pagpasobra ha paggamit hito.’

An kada Kristiano sadang magdesisyon basado ha iya pagsabot han gibabag-ohi nga impormasyon mahitungod ha caffeine ngan ha iba nga prinsipyo ha Biblia nga baga hin nahidadabi. Pananglitan, an Kristiano nga burod bangin magdesisyon nga diri la anay uminom o kumaon hin may-ada caffeine kon nahuhunahuna niya nga makakaapekto ito han iya iginbuburod. Kon naoobserbahan han usa nga Kristiano nga an diri pirme pakainom o pakakaon hin may caffeine nakakapaaringit ha iya o baga hiya hin nagkakasakit, bangin maopay kon likyan la anay niya ito. (2 Pedro 1:5, 6) Sadang tahuron han iba nga Kristiano an sugad nga desisyon, diri iginpipirit an ira opinyon.

Anoman an imo desisyon may kalabotan ha mga irinmon ngan pagkaon nga may-ada caffeine, hinumdumi pirme an kan Pablo sagdon: “Kon mangaon kamo, o manginom, o bisan ano an iyo pagbuhaton, pagbuhaton niyo an ngatanan ha himaya han Dios.”—1 Korinto 10:31.