Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan? Bueno, kitaa kon mababaton mo an masunod nga mga pakiana:

• Ano an mahibabaroan naton tikang ha ilustrasyon ni Jesus mahitungod han namimirit nga tawo? (Lukas 11:5-10)

Ipinapakita hini nga ilustrasyon kon ano an sadang magin disposisyon naton kon nag-aampo kita. Kinahanglan padayon kita nga maghangyo, o padayon nga mangaro, labi na han baraan nga espiritu han Dios. (Lukas 11:11-13)—12/15, pahina 20-2.

• Ano nga leksyon an aton mahibabaroan tikang ha ilustrasyon ni Jesus mahitungod han balo nga babaye ngan han hukom? (Lukas 18:1-8)

Nagpapabug-at ito han panginahanglan ha pag-ampo. Diri pariho ha hukom, hi Jehova matadong ngan naruruyag pagbulig ha aton. Dugang pa, sadang kita magkaada han pagtoo nga pariho han kanan balo nga babaye ha ilustrasyon.—12/15, pahina 26-8.

• Kay ano nga ginsidngan ni apostol Pablo an mga Kristiano ha Korinto nga “magpahaluag”? (2 Korinto 6:11-13, NW)

Baga hin an pipira ha Korinto kulang hin apresasyon ha mga igkasi-tumuroo, tungod kay hira diri mahinatagon. Kinahanglan mangalimbasog kita ha pagpatubo han totoo nga apresasyon ha mga igkasi-tumuroo, nangangalimbasog pa ngani nga magkaada bag-o nga kasangkayan.—1/1, pahina 9-11.

• Ano nga pagselyo an gin-unabi ha Pahayag 7:3?

Kon gindidihogan han Dios an mga Kristiano pinaagi han baraan nga espiritu, ini an siyahan nga pagselyo. Kondi, an Pahayag 7:3 nag-uunabi han ultimo nga pagselyo, kon naparig-on nga an sugad nga mga dinihogan nagpakita na han ira bug-os nga pagkamaunungon.—1/1, pahina 30-1.

• Ano an mahibabaroan han mga kag-anak tikang ha rekord han Biblia mahitungod kan Samuel?

Siyahan ha ngatanan, sadang nira tutdoan an ira mga anak mahitungod han Pulong han Dios, sugad la han sigurado nga ginbuhat han mga kag-anak ni Samuel. Dugang pa, sadang nira dasigon an ira mga anak nga himoon nga karera an pag-alagad kan Jehova.—1/15, pahina 16.

• Paonan-o naton maipapakita nga malipayon kita ha paghulat kan Jehova?

‘Naghuhulat kita han adlaw han Dios,’ nga nagpapamulat han katalwasan kon iya na pagwad-on an ngatanan nga diri-diosnon. (2 Pedro 3:7, 12) Bisan kon naiikag hi Jehova ha pagtapos han ngatanan nga maraot, naghuhulat hiya basi talwason an mga Kristiano ha paagi nga magbabaraan han iya ngaran. Sadang kita sumarig nga hi Jehova maaram han husto nga panahon ha paggios, samtang yana, sadang kita magin aktibo ha pagdayaw ha iya. (Salmo 71:14, 15)—3/1, pahina 17-18.

• Pito ba han kada limpyo nga hayop an iginsulod ni Noe ha arka, o pito ka padis han kada klase?

Ginsugo hi Noe nga magkuha hin “pito” han tagsa nga limpyo nga hayop. (Genesis 7:1, 2) Ha Hebreo, an mga pulong nga “pito ngan pito” literal nga mababasa nga “pito pito.” Ito nga paagi han pagyakan diri nangangahulogan nga pito ka padis, sugad han ipinapakita han iba nga teksto han Biblia. Matin-aw nga hi Noe nagdara hin pito han tagsa nga klase, tulo ka padis ngan hin usa pa nga magagamit niya ha urhi ha paghalad. (Genesis 8:20)—3/15, pahina 31.

• Kay ano nga sadang “pamurubuuton” han mga Kristiano an resulta han pagtoo han mga tigurang, an mga nangunguna?

Gin-aaghat kita ni Pablo nga “pamurubuuton,” o tagdon hin maopay, an resulta han pagkamatinumanon han mga tigurang ngan sundon an sugad nga mga susbaranan han pagtoo. (Hebreo 13:7) Ginbubuhat naton ini tungod kay an Pulong han Dios nagsusugo ha aton nga buhaton ito. Dugang pa, kombinsido kita nga karuyag han mga tigurang an gimaopayi may kalabotan ha Ginhadian ngan ha aton kaopayan.—4/1, pahina 28.