Papagdayawa an mga Kongregasyon kan Jehova

“Igsusumat ko an imo ngaran ngadto ha akon mga kabugtoan, ha butnga han katig-uban [“kongregasyon,” NW] nga magsiringba magkakanta ako ha pagdayeg ha imo.”—HEBREO 2:12.

1, 2. Kay ano nga mapulsanon hinduro an kongregasyon, ngan ano an ǹangunguna nga katuyoan hito?

 HA BUG-OS nga kasaysayan, an mga tawo malipayon nga nakikig-upod ngan may-ada kasigurohan ha sulod han importante nga yunit han pamilya. Kondi, gin-uunabi han Biblia an usa pa nga yunit diin damu nga tawo ha bug-os nga kalibotan yana an nagpapahimulos hin naiiba nga pakig-upod ngan kasigurohan. Ito an Kristiano nga kongregasyon. Bahin ka man han duok, mabinuligon nga pamilya o diri, mahihimo mo ngan sadang mo apresyaron an igintatagana han Dios pinaagi han kongregasyon. Syempre, kon nakikig-upod ka na ha usa nga kongregasyon han mga Saksi ni Jehova, sigurado nga makakag-asoy ka han mahigugmaon nga pakig-upod nga naieksperyensyahan mo ngan han inaabat mo nga kasigurohan.

² An kongregasyon diri la kay grupo han mga tawo nga pariho an mga interes. Diri ito usa nga asosasyon ha komunidad o usa nga club diin nagkakatarampo an mga tawo nga pariho an mga eksperyensya o pariho an mga interes ha isport o hilangkagan. Lugod, an nangunguna nga katuyoan han kongregasyon amo an pagdayaw kan Jehova nga Dios. Maiha na ito nga ginbubuhat, sugad han pinabubug-atan han libro han Mga Salmos. Ha Salmo 35:18, aton mababasa: “Tatagan ko ikaw hin mga pasalamat didto hiton daku nga katig-uban [“kongregasyon,” NW]: Pagdadayawon ko ikaw dida ha damu nga mga tawo.” Ha sugad man nga paagi, an Salmo 107:31, 32 nagdadasig ha aton: “O nga an mga tawo magdayaw kan Jehova tungod han iya mahigugmaon nga kalooy, ngan tungod han iya urusahon nga mga buhat para ha mga anak han mga tawo! Ira liwat igpahitaas hiya dida han katig-uban han katawohan.”

3. Sumala kan Pablo, ano an ginbubuhat han kongregasyon?

³ Iginpatin-aw han Kristiano nga hi apostol Pablo an usa pa nga importante nga bahin han kongregasyon han gin-unabi niya an “balay han Dios, nga amo an singbahan [“kongregasyon,” NW] han buhi nga Dios, an harigi ngan turumbanan han kamatuoran.” (1 Timoteo 3:15) Ano nga kongregasyon an gin-uunabi ni Pablo? Ha ano nga mga paagi ginagamit han Biblia an pulong nga “kongregasyon”? Ngan ano an sadang magin epekto hini ha aton kinabuhi ngan mga ginlalaoman? Basi hibaroan an baton, aton usisahon anay an mga paggamit han pulong nga “kongregasyon” ha Pulong han Dios.

4. Ha ano nga paagi kasagaran nga ginagamit an pulong nga “kongregasyon” ha Hebreo nga Kasuratan?

⁴ An Hebreo nga pulong para ha “kongregasyon” agsob ighubad sugad nga “katig-oban,” “katirok,” “katirokan,” ngan “kadamuan” ha Samar-Leyte nga Biblia. Nagtikang ito ha pulong nga nangangahulogan “pagtawag basi magkatarampo” o “magkatirok.” (Deuteronomio 4:10; 9:10) Ginamit han salmista inin Hebreo nga pulong mahitungod han mga anghel ha langit, ngan mahimo ito gamiton ha paghulagway ha usa nga grupo han magraot nga kalalakin-an. (Salmo 26:5; 89:5-7) Kondi, ha Hebreo nga Kasuratan kasagaran nga inaaplikar ito ha mga Israelita. Ipinakita han Dios nga hi Jakob “mahihimo nga kadamuan nga mga tawo,” ngan nahitabo ito. (Genesis 28:3; 35:11; 48:4) An mga Israelita gintawag, o ginpili, nga magin “katirok han Dios.”— Numeros 20:4; Nehemia 13:1; Josue 8:35; 1 Samuel 17:47; Mika 2:5.

5. Ano nga Griego nga pulong an kasagaran nga iginhuhubad nga “kongregasyon,” ngan ha ano nga paagi maiaaplikar ini nga pulong?

⁵ Ek·kle·siʹa an katugbang nga Griego nga pulong, tikang ha duha nga Griego nga pulong nga  nangangahulogan “gawas” ngan “pagtawag.” Mahimo ito iaplikar ha sekular nga grupo, sugad han mga “nagtitirok” nga gin-aghat ni Demetrio nga kontrahon hi Pablo ha Efeso. (Buhat 19:32, 39, 41) Kondi kasagaran nga ginagamit ito han Biblia para ha Kristiano nga kongregasyon. Ha iba nga hubad sugad han Samar-Leyte nga Biblia, iginhubad ini nga pulong sugad nga “singbahan,” kondi an The Imperial Bible-Dictionary nagsasaysay nga ito “diri gud . . . nagpapasabot han literal nga tinukod diin nagkakatirok an mga Kristiano para ha pagsingba ha publiko.” Kondi, makapainteres nga ha Kristiano Griego nga Kasuratan, makikita naton an pulong nga “kongregasyon” nga inaplikar ha diri maminos upat nga magkalain-lain nga paagi.

An Dinihogan nga Kongregasyon han Dios

6. Ano an ginbuhat nira David ngan Jesus ha kongregasyon?

⁶ Ha pag-aplikar han mga pulong ni David ha Salmo 22:22 kan Jesus, hi apostol Pablo nagsurat: “Igsusumat ko an imo ngaran ngadto ha akon kabugtoan, ha butnga han katig-uban nga magsiringba magkakanta ako ha pagdayeg ha imo. Busa kinahanglan gud [kan Jesus] nga ha ngatanan nga mga bagay mahimo hiya nga sugad ha iya mga kabugtoan, nga mahimo unta hiya nga malolooyon ngan matinumanon nga hitaas nga saserdote ha mga butang nga nahitutungod ha Dios.” (Hebreo 2:12, 17) Gindayaw ni David an Dios ha butnga han kongregasyon han kadaan nga Israel. (Salmo 40:9) Kondi, ano an iginpapasabot ni Pablo han nagsiring hiya nga hi Jesus nagdayaw ha Dios “ha butnga han katig-uban,” o kongregasyon? Ano ito nga kongregasyon?

7. Ha ano nga nangunguna nga paagi ginagamit han Kristiano Griego nga Kasuratan an pulong nga “kongregasyon”?

⁷ Importante an aton mababasa ha Hebreo 2:12, 17. Ipinapakita hito nga ha kabug-osan nga kahulogan, membro hi Kristo han usa nga kongregasyon diin iginsumat niya an ngaran han Dios ha iya kabugtoan. Hin-o ito nga kabugtoan? Adton bahin han “katulinan ni Abraham,” an dinihogan-han-espiritu nga kabugtoan ni Kristo, nga “mga angbit ha langitnon nga pagtawag.” (Hebreo 2:16–3:1; Mateo 25:40) Oo, an nangunguna nga kahulogan han “kongregasyon” ha Kristiano Griego nga Kasuratan amo an grupo han dinihogan-han-espiritu nga mga sumurunod ni Kristo. Inin 144,000 nga mga dinihogan nagkukompwesto han “singbahan [“kongregasyon,” NW] han mga suhag nga nanhisurat na ha langit.”—Hebreo 12:23.

8. Paonan-o ipinakita ni Jesus an kaestablisar han Kristiano nga kongregasyon?

⁸ Ipinakita ni Jesus nga maiestablisar ini nga Kristiano nga “kongregasyon.” Mga usa ka tuig antes hiya mamatay, iya ginsumatan an usa nga apostol: “Ikaw hi Pedro, ngan ha bawbaw hini nga bato akon pagtitindugon an akon singbahan, ngan an mga ganghaan han impyerno diri makakadaog hito.” (Mateo 16:18) Husto nga nasabtan nira Pedro ngan Pablo nga hi Jesus mismo an igintagna nga bato. Hi Pedro nagsurat nga adton gintukod sugad nga “buhi nga mga bato” han espirituwal nga balay ha bawbaw han bato, hi Kristo, amo an “katawohan nga kalugaringon han Dios, basi nga [ira] unta igpahayag an mga kamahalan” han Usa nga nagtawag ha ira.—1 Pedro 2:4-9; Salmo 118:22; Isaias 8:14; 1 Korinto 10:1-4.

9. Kakan-o nagtikang maestablisar an kongregasyon han Dios?

⁹ Kakan-o ini nga “katawohan nga kalugaringon han Dios” nagtikang maestablisar sugad nga Kristiano nga kongregasyon? Han Pentekostes 33 K.P. han iginbubo han Dios an baraan nga espiritu ha mga disipulo nga nagkatirok ha Jerusalem. Ha urhi hito nga adlaw, iginhatag ni Pedro an makapaaghat nga pahayag ha usa ka grupo  han mga Judio ngan mga kombirte. Damu an sugad hin pinanurok an ira kasingkasing tungod ha kamatay ni Jesus; nagbasol hira ngan nabawtismohan. Makikita naton ha makasaysayan nga asoy nga tulo ka yukot an nagbuhat hito, ngan katapos gud hito, nagin bahin hira han bag-o ngan nagtitikadaku nga kongregasyon han Dios. (Buhat 2:1-4, 14, 37-47) Nagtitikadaku ito tungod kay nagtitikadamu nga mga Judio ngan mga kombirte an nakarawat han kamatuoran nga an unudnon nga Israel diri na an kongregasyon han Dios. Lugod, an dinihogan nga mga Kristiano nga nagkukompwesto han espirituwal nga ‘Israel han Dios’ amo na an nagin totoo nga kongregasyon han Dios.—Galasia 6:16; Buhat 20:28.

10. Ano an relasyon ni Jesus ha kongregasyon han Dios?

¹⁰ Agsob nga iginsasaysay han Biblia an kaibahan butnga ni Jesus ngan han mga dinihogan, sugad han ha mga pulong nga “nahitutungod kan Kristo ngan ha singbahan.” Hi Jesus amo an Ulo hini nga kongregasyon han dinihogan-han-espiritu nga mga Kristiano. Hi Pablo nagsurat nga ‘iginhatag han Dios hi Jesus sugad nga ulo han ngatanan nga mga bagay ha singbahan, nga amo an iya lawas.’ (Efeso 1:22, 23; 5:23, 32; Kolosas 1:18, 24) Yana, gutiay na la nga dinihogan nga mga membro hini nga kongregasyon an nahibibilin pa ha tuna. Kondi, makakasiguro kita nga an ira Ulo, hi Jesu-Kristo, nahigugma ha ira. An iya gugma ha ira iginhuhulagway ha Efeso 5:25: “Hi Kristo naghigugma ha singbahan ngan igintubyan niya an iya kalugaringon tungod hito.” Nahigugma hiya ha ira tungod kay aktibo nga naghahalad hira ha Dios hin “halad han pagdayeg, nga amo, an bunga han mga im-im nga nagsusumat han iya ngaran,” sugad la han ginbuhat ni Jesus han nakanhi pa hiya ha tuna.—Hebreo 13:15.

“Kongregasyon”—Iba nga Paggamit Hito

11. Ha ano nga ikaduha nga paagi ginagamit han Kristiano Griego nga Kasuratan an “kongregasyon”?

¹¹ Usahay, ginagamit han Biblia an pulong nga “kongregasyon” ha mas espisipiko o matin-aw nga kahulogan, diri inaaplikar ito ha bug-os nga grupo han 144,000 nga mga dinihogan nga nagkukompwesto han kongregasyon han Dios. Pananglitan, hi Pablo nagsurat ha usa nga grupo han mga Kristiano: “Diri kamo maghatag hin katigayonan hin paghipakdol, bisan ha mga Judio, o bisan ha mga Gresyahanon, o bisan ha singbahan han Dios.” (1 Korinto 10:32) Matin-aw, kon an usa nga Kristiano ha kadaan nga Korinto nagbuhat hin sayop, bangin magin hinungdan ito nga mahipakdol an iba. Kondi, posible ba nga mahipakdol hito an ngatanan nga Gresyahanon, Judio, o dinihogan tikang hito nga panahon tubtob yana? Syempre diri. Salit hini nga bersikulo baga hin an kongregasyon han Dios naaplikar ha mga Kristiano nga nagkikinabuhi ha usa ka panahon. Tungod hito, mahimo unabihon han usa an mahitungod han paggiya, pagtagana, o pagbendisyon han Dios ha kongregasyon, karuyag sidngon, ha ngatanan nga Kristiano ha usa ka panahon, diin man hira naukoy. O mahimo naton unabihon an kalipay ngan kamurayaw nga kalyap ha kongregasyon han Dios yana, ha bug-os nga Kristiano nga pagminagburugto.

12. Ha ano nga ikatulo nga paagi ginagamit ha Biblia an “kongregasyon”?

¹² An ikatulo nga paagi nga ginagamit han Biblia an “kongregasyon” naaplikar ha ngatanan nga Kristiano ha usa nga espisipiko nga lugar. Aton mababasa: “An mga singbahan [“kongregasyon,” NW] namurayaw ha bug-os nga Judea, ngan Galilea, ngan Samaria.” (Buhat 9:31) May-ada sobra usa nga grupo han mga Kristiano dida hiton daku nga lugar, kondi hira ngatanan ha Judea, Galilea, ngan Samaria tinatawag nga “kongregasyon.” Tungod kay damu an nabawtismohan ha Pentekostes 33 K.P. ngan waray pag-iha katapos hito, bangin may-ada pa ngani sobra ha usa nga grupo nga regular nga nagkakatirok ha Jerusalem. (Buhat 2:41, 46, 47; 4:4; 6:1, 7) Hi Herodes Agripa I nagmando ha Judea tubtob ha iya kamatay han 44 K.P, ngan kon uusisahon an 1 Tesalonika 2:14, matin-aw nga han 50 K.P., damu na an kongregasyon ha Judea. Salit, kon nababasa naton nga hi Herodes “nagsugo nga pagsakiton an iba nga mga membro han singbahan,” bangin gintutudlok hini an damu nga grupo nga nagkatirok ha Jerusalem.—Buhat 12:1.

13. Ano an ikaupat ngan kasagaran nga paagi han paggamit han Biblia ha “kongregasyon”?

¹³ An ikaupat nga paagi, nga mas espisipiko pa gud ngan kasagaran nga paggamit han pulong nga “kongregasyon” nagtutudlok ha mga Kristiano nga nagkukompwesto han usa la nga lokal nga kongregasyon, sugad han ha usa nga balay. Gin-unabi  ni Pablo an “mga singbahan didto ha Galasia.” May-ada sobra usa nga kongregasyon dida hiton daku nga probinsya han Roma. Makaduha nga ginamit ni Pablo an termino nga “mga singbahan” ha Galasia, nga nag-uupod hadton ha Antiokia, Derbe, Listra, ngan Ikonio. An kwalipikado nga mga tigurang nga kalalakin-an, o mga paramangno, ginpili dida hinin lokal nga mga kongregasyon. (1 Korinto 16:1; Galasia 1:2; Buhat 14:19-23) Sumala ha Kasuratan, ito ngatanan “mga singbahan han Dios.”—1 Korinto 11:16; 2 Tesalonika 1:4.

14. Ano an masisiring naton mahitungod han paggamit han “kongregasyon” ha pipira nga mga teksto?

¹⁴ Ha pipira nga kahimtang, an mga grupo ha Kristiano nga mga katirok sigurado nga gutiay, nga mahusto ha pribado nga balay. Bisan pa hito, an pulong nga “kongregasyon” igin-aplikar ha pipira han sugad nga mga grupo. An aton hinbabaroan amo adton mga kongregasyon ha mga balay nira Akila ngan Prisca, Nimpa, ngan Filemon. (Roma 16:3-5; Kolosas 4:15; Filemon 2) Sadang makadasig ini ha lokal nga mga kongregasyon yana nga gudtiay ngan bangin regular pa ngani nga nagkakatirok ha pribado nga balay. Kinilala ni Jehova an sugad gudtiay nga mga kongregasyon ha siyahan nga siglo, ngan sigurado nga kinakarawat liwat niya ito yana, ngan iya ginbibendisyonan ito pinaagi han iya espiritu.

An mga Kongregasyon Nagdadayaw kan Jehova

15. Paonan-o ipinakita an paggios han baraan nga espiritu ha pipira nga siyahan nga mga kongregasyon?

¹⁵ Gin-unabi na naton kanina nga sugad nga katumanan han Salmo 22:22, gindayaw ni Jesus an Dios ha butnga han kongregasyon. (Hebreo 2:12) Kinahanglan buhaton liwat ito han iya matinumanon nga mga sumurunod. Ha siyahan nga siglo, han an totoo nga mga Kristiano gindihogan han baraan nga espiritu nga magin mga anak han Dios ngan hito nga paagi magin kabugtoan ni Kristo, an espiritu nagtikang gumios ha pipira ha ira ha espesyal nga paagi. Nakarawat nira an milagroso nga mga regalo han espiritu. An espiritu ipinakita pinaagi han espesyal nga pagyakan hin kinaadman o kahibaro, gahum ha pagtambal o panagna, o han abilidad pa ngani ha pagyakan ha mga yinaknan nga diri nira hinbabaroan.—1 Korinto 12:4-11.

16. Ano an usa nga katuyoan han milagroso nga mga regalo han espiritu?

¹⁶ Mahitungod han pagyakan ha usa nga yinaknan, hi Pablo nagsiring: “Mag-aawit ako ha espiritu, ngan mag-aawit man ako ha hunahuna.” (1 Korinto 14:15) Nasantop niya an pagkaimportante nga masabtan han iba an iya mga pulong basi matutdoan hira. An tumong ni Pablo amo an pagdayaw kan Jehova ha kongregasyon. Iya  ginsagda an iba nga may-ada han mga regalo han espiritu: “Pamilngon niyo, basi kamo magkahuhura ha pagparig-on ha singbahan,” karuyag sidngon, an lokal nga kongregasyon diin ipinapakita nira an regalo. (1 Korinto 14:4, 5, 12, 23) Matin-aw nga interesado hi Pablo ha lokal nga mga kongregasyon, tungod kay maaram hiya nga ha tagsa nga kongregasyon, an mga Kristiano magkakaada mga higayon ha pagdayaw ha Dios.

17. Mahitungod han lokal nga mga kongregasyon yana, makakasiguro kita ha ano?

¹⁷ Padayon nga ginagamit ngan binubuligan ni Jehova an iya kongregasyon. Iya ginbibendisyonan an grupo han dinihogan nga mga Kristiano dinhi ha tuna yana. Nakikita ini ha hura nga suplay han espirituwal nga pagkaon nga nakakarawat han katawohan han Dios. (Lukas 12:42) Iya ginbibendisyonan an bug-os-kalibotan nga pagminagburugto. Ngan iya ginbibendisyonan an lokal nga mga kongregasyon, diin aton gindadayaw an aton Maglalarang pinaagi han aton mga buhat ngan nagpaparig-on han pagtoo nga mga komento. Nakakarawat naton dida hito an edukasyon ngan pagbansay basi dayawon naton an Dios ha iba nga mga panahon nga waray kita ha aton lokal nga mga kongregasyon.

18, 19. Ano an karuyag buhaton han sinsero nga mga Kristiano ha bisan ano nga lokal nga kongregasyon?

¹⁸ Hinumdumi nga ginsagda ni apostol Pablo an mga Kristiano ha lokal nga kongregasyon ha Filipos, Masedonia: “Ini an akon igin-ampo, . . . nga napuno kamo han mga bunga han kamatuoran, nga amo an pinaagi kan Jesu-Kristo, nga ha kahimayaan ngan kadayegan ha Dios.” Mag-uupod ito han ira pagyakan ha iba, ha mga tagagawas, mahitungod han ira pagtoo kan Jesus ngan han ira urusahon nga paglaom. (Filipos 1:9-11; 3:8-11) Tungod hito, ginsagda ni Pablo an iya mga igkasi-Kristiano: “Pinaagi [kan Jesus] halaran ta gihapon an Dios hin halad han pagdayeg, nga amo, an bunga han mga im-im nga nagsusumat han iya ngaran.”—Hebreo 13:15.

¹⁹ Nalilipay ka ba ha pagdayaw ha Dios “ha butnga han katig-uban,” sugad han ginbuhat ni Jesus, ngan ha paggamit han imo mga im-im ha pagdayaw kan Jehova ha atubangan hadton diri pa nakilala ngan nagdadayaw ha iya? (Hebreo 2:12; Roma 15:9-11) An aton baton ha pipira nga paagi mahimo dumepende ha kon ano an aton inaabat ha bahin han aton lokal nga kongregasyon ha katuyoan han Dios. Ha masunod nga artikulo, aton paghisgotan kon paonan-o ginigiyahan ngan ginagamit ni Jehova an aton lokal nga kongregasyon ngan kon ano an sadang magin bahin hito ha aton kinabuhi yana.

Nahinunumdoman Mo Ba?

• Paonan-o iniksister an kongregasyon han Dios, nga ginkukompwesto han dinihogan nga mga Kristiano?

• Ano an tulo nga dugang nga mga paagi nga ginagamit ha Biblia an termino nga “kongregasyon”?

• Mahitungod han kongregasyon, ano an karuyag buhaton nira David, Jesus, ngan han siyahan-siglo nga mga Kristiano, ngan ano an sadang magin epekto hini ha aton?

[Mga Pakiana]

[Retrato ha pahina 21]

Hi Jesus an pundasyon han ano nga kongregasyon?

[Retrato ha pahina 23]

An lokal nga mga grupo han mga Kristiano nagkatirok sugad nga mga kongregasyon han Dios

[Retrato ha pahina 24]

Pariho ha mga Kristiano ha Benin, mahimo naton dayawon hi Jehova ha nagkakatirok nga mga grupo